Sɛb-sõw yielu 74
74
Sɛb-sõw yielu 74 (73) sob
A kon bɛ na kone a Naaŋmɩn yir na sãw a
1Asafʋ yielu na wule yã a.
Naaŋmɩn i, bʋ̃ʋ n'ʋ so fʋ zawrɩ tɩ bɛr a baarɩ?
Bʋ̃ʋ n'ʋ so fʋ cãà nyɛ̃ nɩ tɩ suur,
tɩɩm na ɩ a fʋ zaw píir a?
2Cãà bãwnɩ a fʋ nɩ-bʋʋrɛ fʋ na páw koro za a.
Cãà bãwnɩ a dɔwlʋ á ŋá fʋ na ya de só a,
nɩ a Sɩyɔ̃ tãw fʋ na kpɩɛr a.
3Cen ta a deboru á ŋá na àr a koro za a pɛr:
a dɔ̃ sob sãw nɩ bom za bɛr a zi-sõw pʋɔ.
4A be tɔr za fʋ na mɩ́ tɩ tuori tɩ a,
a fʋ bɛ-nɔnbɛ ŋmɛ n a zɛb-tʋ̃ɔ́fʋ cɛlsɩ,
ɛ́ ƴãw a bɛ dɩrapo#74:4 Dɩrapo: Farsɩ ƴɛ̀r-bir'ʋ: pɛn bɛ na mɩ́ 'lẽ ƴãw dàa ƴãw, ʋ ɩ nɩbɛ bɛ mɩnɛ kãw bɩɩ bom kãw bãwfʋ a n'ʋ. Nyɛ̃ Ety 17.15. a ɩ bãwfʋ.
5Bɛ tɩ ɩ na mɛ̃ nɩbɛ na cɩɛr tɩɩr lɔbr
nɩ lɛ́ɛ a tuw pʋɔ a.
6Bɛ cɛ na ɛ́ ŋmɛ a bʋ̃-pɛnɩ kar
nɩ lɛ́ɛ nɩ 'hama.
7Bɛ nyɩw nɩ a fʋ zi-sõw bɛr,
bɛ da n a fʋ kpɛb zie lɔb ɛ́ dɛw ʋ bɛr.
8Bɛ yel'ɩ bɛ tʋɔra: «Tɩ na tʋ̃ɔ́ bɛ nɩ pẽlẽpẽlẽ.»
Bɛ nyɩw nɩ a Naaŋmɩn puoru ziir za bɛr a tẽw pʋɔ.
9Tɩ bɛ mɩ́ cãà nyɛ̃ a bãwfʋ na wul
kɛ́ fʋ be n ka a ɩ,
ƴɛ̀r-manbɛ bɛ cãà be ɩ,
ɛ́ nɩr za a tɩ pʋɔ bɛ bãw
debor'a a na cɛlɩ tɩ ta a ɩ.
10Naaŋmɩn i, debor'a a bɛ-nɔnɛ
na tʋ b a zʋmɛ tɩ ta?
Debor'a a dɔ̃ sob na ɩrɛ fʋ kʋralɛ laar tɩ ta?
11Bʋ̃ʋ n'ʋ so fʋ bɛ dam damnʋ za,
ɛ́ cʋɔbɩ a nuru zɩ̃ nɩ?
12Naaŋmɩn i, fʋ̃ʋ n'ɩ a ɩ̃ Nãà a dɩta-pɛ-yome za,
fʋ̃ʋ n'ʋ faa tɩ gb'a a ŋmɩn za a tẽw ŋa pʋɔ.
13Fʋ̃ʋ n'ʋ ɓar a man nɩ a fʋ fãw,
ɛ́ ŋmɛr a wa-bɩɩr zuru a kʋ̃ɔ pʋɔ.
14Fʋ̃ʋ n'ʋ ŋmɛr a Levɩatã#74:14 Levɩatã: Koro za dem suolu pʋɔ dʋ̃-bɩɛ kãw n'ʋ. Ʋlɛ tɩ n'ɩ a faalʋ kpɛnʋ za bãwfʋ, ɛ́ bɛ tɩ tɩɛrɛ na k'ʋʋ mɩ́ tʋ̃ɔ́ na vɔl a mʋ̃tɔ̃w. Bɛ mɩ́ tɩ tɩɛrɛ na k'ʋʋ ɩ n dʋ̃-bɩɛ kãw na tɛr zuru ayopõi a, bɩɩ k'ʋʋ ɩ n waab, bɩɩ ɩba. Nyɛ̃ Zɔb 40.25—41.26. zuru,
ƴãw zʋm-bɛrɛ 'wɔb ʋ.
15Fʋ̃ʋ n'ʋ yuo a bul-nɛ́ɛ, ɛ́ ɩ a bàrʋ zɔrɛ kʋ̃ɔ,
fʋ̃ʋ n'ʋ ɩ mamɛ na bɛ sɩrɛ a, a sɩr.
16Fʋ̃ʋ só a mʋ̃tɔ̃w, ɛ́ mɩ̀ só a tɩ̃ɩsɔw,
fʋ̃ʋ na ír a cuw nɩ a mʋ̃tɔ̃w a.
17Fʋ̃ʋ n'ʋ ƴãw a tẽw tʋr-bɔwrɩ za,
fʋ̃ʋ n'ʋ maalɩ a ũon nɩ a sɩ̃ɔ.
18Sore e, cãà bãwnɩ a yel ŋa:
a fʋ dɔ̃ dem tʋʋr fʋ na,
ɛ́ nɩ-bʋʋrɛ na gem a ɩrɛ fʋ laar.
19Ta bɛr a fʋ nɩ-bʋʋr-nɔna kʋ̀ a wɛ-dʋn ɛ,
ta yiiri a fʋ nɩ-bʋʋrɛ nɩ-kɔmɛ bɛr kʋralɛ ɩ.
20Cɛlɛ a fʋ wõ-taa zie!
Bʋ̃ʋ n'ʋ vɛ̃, nɩbɛ paal'ɩ a tẽw ziir al na liw a,
kɛ́ bɛ tʋ̃ɔ́ tone po-to-fãw tome.
21A bɛlɩ dem bɛ na dɔwrɛ a, bɛ ta lɛb'ɩ vĩ ɛ.
A nan dem nɩ a nɩ-kɔmɛ, bɛ nɩ̃ɛ danɛ fʋ.
22Naaŋmɩn i, ìr, kaa a fʋ yele zie.
Bãwnɩ a zʋmɛ a dãbole bɛ ŋa
na mɩ́ tʋʋr fʋ a bibie za a.
23Taa yiire a fʋ dɔ̃ dem cɛlsɩ,
nɩ a nɩbɛ na ŋmãa nɩ fʋ zɛbr a gɔmɛ
na ìre dúor kʋralɛ a ɩ.
La Bible en Dagara © Alliance Biblique du Burkina Faso, 2013.