Sɛb-sõw yielu 44
44
Sɛb-sõw yielu 44 (43) sob
Ìr sõw tɩ, Naaŋmɩn i!
1Yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Koore bibiir yielu na wule yã a.
2Naaŋmɩn i, tɩ wõ n nɩ tobr,
a tɩ sãà mɩnɛ manɩ kʋ̀ tɩ a tome fʋ na tõ
a bɛ daar a koro koro za a.
3Fʋ ír'ɩ nɩ-bʋʋrɛ a bɛ ten pʋɔ,
ɛ́ ƴãw a tɩ bʋʋrɛ zɩ̃.
Fʋ dɔwr'ɩ nɩbɛ k'aa fʋ nɩbɛ tʋ̃ɔ́ nyɛ̃ zie zɩ̃.
4A bɛ zɛbr-sɔ-kpɛ̃ɛ bɛ n'ʋ bɛ de nɩ a tẽw ɛ,
a bɛ kpãkpamɛ fãw bɛ n'a so bɛ tʋ̃ɔ́ ɩ.
A fʋ gãda-nũu n'ʋ so,
nɩ a fʋ niw-vla a bɛ ƴãw,
fʋ na tɩ nɔnɛ bɛ a zũú.
5Naaŋmɩn i, fʋ̃ʋ na ɩ a ɩ̃ nãà a,
yel, ɛ́ a fʋ nɩ-bʋʋrɛ na zɛb'a tʋ̃ɔ́.
6A fʋ̃ʋ zũú n'a tɩ pɔb a tɩ dɔ̃ dem,
a fʋ yúor zũú n'a tɩ nɛb a tɩ fɛr-fɛrbɛ nɩ gbɛ́ɛ.
7Ɩ̃ bɛ ɩrɛ ƴãwn a ɩ̃ tam ƴãw ɛ,
ɛ́ a ɩ̃ zɛbr-sɔ-kpɛ̃ɛ bɛ n'ʋ na faa mɛ̃ ɩ,
8fʋ̃ʋ n'ʋ faarɛ tɩ a bɛlɩ dem na ɩrɛ
a kpɩɛr tɩ a nuru pʋɔ,
ɛ́ mɩ́ ɩ a bɛlɩ dem na hɩ̃ɛn tɩ a nyɛ̃ vĩ.
9Bibie za, tɩ danɛ fʋ na, Sore e,
tɩ íre nɩ a fʋ yúor bɛ tɛr bɛ́rʋ daar ɛ. Tɛw-àrʋ
10Ɛ́ fʋ cãà zawrɩ tɩ bɛr, ɛ́ ɩ tɩ nyɛ̃ vĩ,
fʋ bɛ cãà bɩɛlɛ a tɩ zɛbr-nɩbɛ ɩ.
11Fʋ mɩ́ ɩ na tɩ lɩɛb zɔ a dɔ̃ sob niŋé,
ɛ́ a tɩ bɛ-nɔnbɛ za a tɩ bome.
12Fʋ mɩ́ bɛr tɩ na kʋ̀ bɛ, mɛ̃ peli-kʋrɩ a.
Fʋ diw tɩ na yaarɩ a nɩ-bʋʋr-yoru sɔgɔ.
13Fʋ kʋɔr'ɩ a fʋ nɩbɛ lo,
fʋ bɛ páw bom za a bɛ kʋɔrʋ pʋɔ ɩ.
14Fʋ bɛr'ɩ a tɩ sɩman dem bɛ tʋʋr tɩ,
ɛ́ a nɩbɛ na kpɩɛr viiri koli tɩ a ɩrɛ tɩ laar.
15Fʋ ɩ na tɩ ɩ nɩ-ɩ-laarɩ a nɩ-bʋʋr-yoru zie,
ɛ́ a nɩ-bʋʋr-yoru mɩ́ viire a zuru ɩrɛ nɩ tɩ laar.
16Kʋralɛ n'a ɩ̃ mɩ́ nyɛ̃ a ɩ̃ yúor na sãw,
ɛ́ a vĩ bɛ sàw ɩ̃ na dʋɔ a zu a,
17a lɛn daar ɩ̃ na mɩ́ wa wõ a dɔ̃ sob,
a nɩr na bɔbr k'ʋʋ yáa a san
ʋ bɔbr tɩ a nɔhaarʋ ɛ́ tʋʋr fʋ a, Sore e.
18Tɩ bɛ tɩ yiiri fʋ bɛr ɛ, ɛ́ à á ŋá za ta tɩ,
tɩ bɛ tɩ sãw a fʋ wõ-taa bɛr ɛ.
19Tɩ bɛ lɛb pùor ɛ,
mɩ̀ bɛ bɛr a sɔ́r fʋ na puo kʋ̀ tɩ a ɩ.
20Ɛcɛ fʋ dĩ tɩ na nɩ a kpɩɛrʋ
a gbõgbo-cili kpɛb zie.
Fʋ ɩ na lige na ɩ lige a pili pàw tɩ.
21Tɩmɛ tɩ yiiri a tɩ Naaŋmɩn yúor bɛr a,
tɩmɛ tɩ zɛw a nuru cɔw ŋmɩn-yũo a,
22fʋ kʋ̃ʋ tɩ bãwnɩ a bɩɩ,
fʋ̃ʋ na bãw a pʋ-tɩɛr-sɔwlɩ a?
23Ɛcɛ a fʋ̃ʋ ƴãw n'a bɛ kʋrɛ tɩ bibie za,
bɛ ɩrɛ tɩ mɛ̃ peli-kʋrɩ a.
24Sore e, ìr!
Bʋ̃ʋ n'ʋ so fʋ gúre?
Ìr lɛ, ɛ́ ta jɛ tɩ bɛr a baarɩ ɛ!
25Bʋ̃ʋ n'ʋ so fʋ bɛ bɔbr a tɩ nyɛ́b,
ɛ́ yiiri a tɩ wʋ̀ʋr nɩ a tɩ kpɩɛrʋ bɛr?
26Bʋ̃ʋ n'ʋ vɛ̃, tɩ lo na ɓiile a tanɛ pʋɔ,
tɩ vɔbl'a gã a tẽw.
27Ìr sõw tɩ wɛ!
Faa tɩ a fʋ nɔ̃wfʋ zũú.
La Bible en Dagara © Alliance Biblique du Burkina Faso, 2013.