Sɛb-sõw yielu 35
35
Sɛb-sõw yielu 35 (34) sob
Nɩ-mɩŋa bɛ na dɔwrɛ a puoru
1Daviir so ʋ.
Sore e, tɛr'ɩ ƴɛ̀rʋ a bɛlɩ dem na tɛr'ɩ mɛ̃ ƴɛ̀rʋ a,
zɛbr'ɩ a bɛlɩ dem na zɛbr'ɩ mɛ̃ a.
2Zaa a zɛbr-kur-pãgalɩ, a bile nɩ a kpɛ̃ɛ,
ɛ́ ìr sõw mɛ̃.
3Zɛw a kafin nɩ a lɛr,
a bɛlɩ dem na diwr mɛ̃ a ƴãw.
Ɛ́ yel mɛ̃: «Mãa n'ʋ na faa fʋ.»
4A bɛlɩ dem na bɔbr a ɩ̃ kũu a, bɛ nyɛ̃ vĩ, bʋnɩ àr lɛ!
A bɛlɩ dem na tɩɛrɛ a faa a ɩ̃ ƴãw a,
bɛ lɛb tɩ̃wnɩ pùor, ɛ́ vĩ nyɔw bɛ!
5A Sore malkɩ wa diwr bɛ a lɛn daar a,
bɛ ɩ mɛ̃ sàwr sɛsɛb na maw cere nɩ a.
6A Sore malkɩ wa ta tu bɛ a lɛn daar a,
a bɛ sɔ́r, ʋ ɩ lige nɩ sãsaalʋ tɛwr!
7Ɩ̃ bɛ ɩ bom ɛ, ɛ́ bɛ cɔbrɩ bɛra a ɩ̃ ƴãw,
bɛ tuw nɩ bɔw k'ɩ̃ɩ wa lo a ʋ pʋɔ.
8Kpɩɛrʋ bɛ na bɛ bãwnɩ a, a páw bɛ,
a bɛl mɩŋa bɛra, ʋ lɛb ŋmɛlɩ nyɔw bɛ,
bɛ lo a bɔw bɛ na tuw a pʋɔ!
9Ɛcɛ mãa a, nʋ̃ɔ̀ na kpɩɛr mɛ̃ nɩ yaga a Sore ƴãw,
ɩ̃ na cɩlɛ nɩ a ʋ faafʋ ɩ̃ na nyɛ̃ a ƴãw.
10Ɩ̃ na yel'a nɩ ɩ̃ pʋɔ za:
«Sore e, a fʋ tɔ bɛ ka ɩ:
fʋ mɩ́ faa nɩ a bãbàal,
nɩbɛ na kpɛmɛ zuo ʋ a nuru pʋɔ.
Fʋ mɩ́ faa nɩ a nã́w sob nɩ a bãbàal
a bɛlɩ dem na farɛ bɛ a nuru pʋɔ.»
11Dãsɩ-ziri dem ìre na:
bɛ sowre mɛ̃ nɩ yele ɩ̃ na bɛ bãw a.
12Bɛ mɩ́ maalɩ mɛ̃ nɩ faa yáa a vla san,
mãa n'ɩ ŋan ɩ ɩ̃ yõ tẽtẽ.
13Bɛ na mɩ́ tɩ ɩ bàalbɛ a, ɩ̃ mɩ́ tɩ wul'ɩ a ɩ̃ pʋ-sãwna,
ɩ̃ mɩ́ tɩ tɛr'ɩ mʋta-tuo dɔwrɛ nɩ ɩ̃ tʋɔra,
ɛ́ a ɩ̃ puoru tɩɛrʋ waar a ɩ̃ zie kʋralɛ.
14Ɩ̃ mɩ́ tɩ ɩrɛ na mɛ̃ bá bɩɩ yɛb ƴãw a.
Ɩ̃ mɩ́ tɩ tɛr'ɩ pʋ-sãwna, ɛ́ ɩ wahala sob,
mɛ̃ a ɩ̃ mã-dɔwra n'ʋ kpi a.
15Bɛ gbone nɩ taa kɛ́ bɛ la m a ɩ̃ loba pʋɔ,
bɛ gbone nɩ taa a ɩ̃ ƴãw.
Nɩ-sãanbɛ, nɩbɛ ɩ̃ na bɛ bãw a
cɩɩrɛ nɩ a ɩ̃ ƴãw bɛ tɛr nãà bɛr ɛ.
16Bɛlɛ wa nyɛ̃ m ɩ̃ lore a, bɛ mɩ́ lɛb'a bãw la,
bɛ nyɩr'ɩ a bɛ nyɩmɛ ƴãw mɛ̃.
17Sore e, ŋmɩŋmɩn n'a fʋ na tʋ̃ɔ́ sàw jɩ́rɛ à á ŋá?
Lɛb faa a ɩ̃ nyɔ-vʋʋrʋ
a gben á ŋá na ùore a zie.
18Ɩ̃ na danɩ fʋ nɩ a fʋ nɩbɛ na ɓã taa a niŋé,
ɩ̃ na ír'ɩ a fʋ yúor
a zu-sɛbla ŋa na bɛ dɩ vuo a niŋé.
19A nɩbɛ ɩ̃ na bɛ sãw ɛ́ bɛ tɛr'ɩ mɛ̃ dɔ̃ a,
bɛ taa wa ɩrɛ mɛ̃ laar ɛ.
A bɛlɩ dem na hɩ̃ɛn mɛ̃ zawlalɛ a,
bɛ bɛr a mimie kpɩmnʋ.
20Ƴã-ɓaarʋ ƴɛ̀r-bir bɛ dãw yi a bɛ nʋɔrɩ́ ɛ,
gɛgɛ-ɩb tɩɛrʋ n'a bɛ mɩ́ tɛr tuur'ɩ
a tẽw nɩbɛ na bɛ damnɛ a.
21Bɛ háa nɩ a nʋɔr gbayala cɔw mɛ̃,
ɛ́ yere: «Heheee! tɩ nyɛ b'a.»
22Ɛcɛ fʋ̃ʋ a, Sore e,
fʋ nyɛ̃ nɩ a lɛ a yele na ɩ a,
ta ɩ gbili ɛ, ta àr zãá nɩ mɛ̃ ɩ.
23Ɩ̃ Naaŋmɩn i, ìr dɩ a ƴɛ̀rʋ kʋ̀ m,
Sore e, ìr de a ƴɛ̀rʋ kpɛ m.
24Sore e, dɩ n mɛ̃ a ƴɛ̀rʋ tu n a fʋ mɩnʋ,
bɛ ta cãà ɩrɛ mɛ̃ laar ɛ, ɩ̃ Naaŋmɩn i!
25Bɛ ta tɩɛrɛ nɩ bɛ pʋɔ yere:
«Ãw! À ŋá n'a tɩ tɩ bɔbr!»
Bɛ ta yere kɛ́: «Tɩ vɔl ʋ na» ɩ.
26Bɛlɩ dem a faa na páw mɛ̃ bɛ cɩlɛ a,
bɛ za, bɛ lãw nyɛ̃ vĩ, su zuru àr'ɩ.
Vĩ nɩ ɩ-lab, a nyɔw a bɛlɩ dem
na dɩrɛ gãdaalʋ a ɩ̃ zu a!
27Ɛcɛ a ɩ nʋ̃ɔ̀, nʋ̃ɔ̀ na bɛ dɩ vuo a,
a bɛlɩ dem na nɔnɛ k'aa ɩ̃ yel-mɩŋa sãá a zie!
Bɛ yere kʋrakʋralɛ: «A Sore ɩ n kpɛ̃ɛ,
ʋl na bɔbr a ʋ tõ-tõ-bie ƴã-ɓaarʋ a.»
28Mãa mɩŋa na manɛ nɩ a fʋ mɩnʋ,
ɛ́ danɛ fʋ bibie za.
La Bible en Dagara © Alliance Biblique du Burkina Faso, 2013.