Sɛb-sõw yielu 34
34
Sɛb-sõw yielu 34 (33) sob
Bãbàal lɔb'ɩ cɛl a Sore bɛr wõ
1Daviir so ʋ. A Daviir tɩ bãw na kɛ́ yarɛ a Abimelɛkɩ niŋé, ʋ diw ʋ bɛr, ʋ tɔl cen.
2Ɩ̃ na puore nɩ a Sore barka kʋralɛ,
a ʋ danʋ na be n a ɩ̃ nʋɔrɩ́ kʋrakʋralɛ.
3A Sore so a ɩ̃ pɔ̀lʋ.
A su-siwri dem bɛ bɛrɛ wone ɛ́ cɩlɛ.
4Nyɩ lãw nɩ mɛ̃ tɩ manɛ a Sore na ɩ kpɛ̃ɛ a,
nyɩ ɩ tɩ lãw taa íre a ʋ yúor.
5Ɩ̃ ƴɛ̀r'ɩ a Sore zie, ʋ sɔw mɛ̃,
ʋ ɩ na a ɩ̃ dɛ̃bɩ̃ɛ za baarɩ.
6A bɛlɩ dem na jɩ́rɛ ʋ a na laar'ɩ yɔwyɔw,
a vĩ kʋ̃ sãá a bɛ niŋe ƴãw ɛ.
7Bãbàal'ɩ ŋan lɔb cɛl a Sore wõ,
ɛ́ faa ʋ bɛr a ʋ kpɩɛrʋ za pʋɔ.
8A Sore malkɩ mɩ́ àr'a gù a bɛlɩ dem
na zɔrɛ a Sore a, ɛ́ mɩ́ faa bɛ.
9Nyɩ ɩ kaa nyɛ̃ a lɛ a Sore na vɩɛl a.
Zu-nʋ̃ɔ̀ sob'ɩ a nɩr ʋl na zɔrɛ kpɩɛr a ʋ naayir a.
10Nyɩ zɔrɛ a Sore, nyɩɩm ʋ nɩ-son i,
bɛlɩ dem na zɔrɛ ʋ a, bɛ bɛ bɔbr bom guur ɛ.
11A nũ-kpɛn dem bãw nɩ a nã́w nɩ a kɔ̃,
ɛcɛ bom za tuo bɛ kpɩɛr a bɛlɩ dem na bɔbr a Sore a ɩ.
12Ɩ̃ bibiir i, nyɩ wa bɛrɛ wone a ɩ̃ ƴɛ̀rʋ!
Ɩ̃ na wul nyɩ na nyɩ zɔrɛ a Sore.
13Nɩ-buor'ʋ nɔnɛ a nyɔ-vʋʋrʋ ɛ́ bɔbr
k'ʋʋ nãá nyɛrɛ nʋ̃ɔ̀ a ʋ beba pʋɔ?
14Ʋ gùre ʋ tʋɔra a ƴɛ̀r-faar ƴãw,
nɩ a ziri ƴãw.
15Ʋ dɛrɛ a faa, ɛ́ maalɛ a vla,
ʋ su zu bɔbr a ƴã-ɓaarʋ.
16A Sore jɩ́rɛ nɩ a nɩ-mɩn,
ʋ mɩ́ ƴãw nɩ tobr a bɛ cɛlsɩ ƴãw.
17A Sore mɩ́ ír'ɩ mimir ƴãw a yel-fa-maalbɛ,
k'ʋʋ ɩ bɛ yiiri a bɛ yele a tẽw zu.
18A nɩ-mɩn mɩ́ kõ na, a Sore wõ a,
ɛ́ mɩ́ faa bɛ bɛr a bɛ kpɩɛrʋ za pʋɔ.
19A Sore pɩɛl'ɩ a su-sãwnɩ dem,
ɛ́ mɩ́ faa a bɛlɩ dem a tɩɛrʋ na sãw a.
20Kpɩɛrʋ yaga páwr'ɩ a nɩ-mɩŋa,
ɛcɛ a Sore mɩ́ faa ʋ nɩ a za pʋɔ.
21Ʋ kaarɛ nɩ a ʋ ƴã-gan ɓɛrmɛ za zie,
a ʋ kɔbr been bɛ kàrɛ ɩ.
22A faalʋ n'a na kʋ a nɩ-faa,
a nɩ-mɩŋa dɔ̃ dem na nyɛ̃ nɩ dɔwrʋ.
23A Sore mɩ́ faa nɩ a ʋ tõ-tõ-biir nyɔ-vʋʋrʋ,
bɛlɩ dem na zɔ kpɛ a ʋ naayir a bɛ nyɛrɛ dɔwrʋ ɛ.
La Bible en Dagara © Alliance Biblique du Burkina Faso, 2013.