Zʋkpaɩ 9
9
A bʋɔlʋ a Yã-bãwfʋ na bʋɔlɛ a
1A Yã-bãwfʋ maal'ɩ kpule ayopõi, ʋ mɛ n a ʋ yir. 2Ʋ kʋ n a ʋ dʋn, ʋ cɔbr'ɩ a ʋ divɛ̃, ʋ mɔ̃ mɩ̀ cɔbr'ɩ a ʋ bʋ̃-dɩrɩ baarɩ. 3Ʋ tõ n a ʋ tõ-tõ-bi-pɔwbɛ kɛ́ bɛ cen a tẽ-kpɛ̃ɛ zie ʋl na do zuo a za a zu, tɩ hieri bʋɔlɩ a nɩbɛ à ŋá: 4«Nyɩɩm na bɛ bãw bom a, nyɩ wa ka lowr!» Ʋ ƴãw na bɛ yel à ŋá a bɛlɩ dem na bɛ tɛr a yã a: 5«Nyɩ wa dɩ a ɩ̃ bʋ̃-dɩrɩ, ɛ́ nyũ a divɛ̃ ɩ̃ na cɔbrɩ a! 6Nyɩ bɛr a nyɩ dãbolu ɛ́ nyɩ na vʋʋrɛ na! Nyɩ lo a yã sɔ́r!»
A yã-bãwnɛ nɩ a pɔ̀lʋ sob
7Nɩr na wule pɔ̀lʋ sob a kʋ̃ nyɛ̃ ƴãwfʋ ɛ, ɛ́ nɩr na yere nɩ-faa a na wõ n zʋmɛ. 8Taa yere pɔ̀lʋ sob ɛ, alɛ bɛ ɩ lɛ, ʋ na hɩ̃ɛn fʋ na. Ɛcɛ yere a yã-bãwnɛ, ʋʋ na nɔnɛ fʋ na. 9Wul yã yã-bãwnɛ, ʋʋ na ɩ n yã-bãwnɛ dɔwlɩ. Zanɩ nɩ a nɩ-mɩŋa bom, ɛ́ a ʋ bãwfʋ na dɔwl'a. 10A Sore zɔba n'ɩ a yã-bãwfʋ tib zie. À bãw a sob nɛ na ɩ sõw a n'a tɩrɛ a yã#9:10 Nyɛ̃ 1.7.. 11Bʋ̃ʋ n'ʋ vɛ̃, a mãa Yã-bãwfʋ a, ɩ̃ na ɩ n a fʋ bibie a yãwmɛ dɔwlɩ, ɛ́ ɩ a fʋ yome nʋɔr dɔwlɩ. 12Fʋ̃ʋ wa ɩ yã-bãwnɛ a, fʋ̃ʋ mɩŋa ƴãw n'a fʋ ɩ a yã-bãwnɛ. Ɛ́ fʋ̃ʋ wa ɩ pɔ̀lʋ sob a, fʋ̃ʋ yõ n'ʋ na bãwnɛ a.
A bʋɔlʋ a Dãbolu na bʋɔlɛ a
13A Dãbolu#9:13 A sɛb-maalɛ ƴɛ̀rɛ nɩ a Dãbolu ƴɛ̀rʋ mɛ̃ nɩr'ʋ a, ɛ́ ɩ ʋlɛ nɩ a Yã-bãwfʋ bɛ ŋmɛ̃ taa ɩ. ɩ na mɛ̃ pɔw na ɩrɛ gɔmɛ a, pɔw na bɛ bãw bom za ɛ́ gem a. 14Ʋ zɩ̃ n a ʋ yir dɩ̃dɔr nʋɔr, a tẽ-kpɛ̃ɛ zie ʋl na kɛrɩ gãw a za a zu. 15Ʋ be n a be ɛ́ bʋɔlɛ a sɔr-tɔlbɛ na mɩ́ tãa kpaar cere nɩ a. 16«Nyɩɩm na bɛ bãw bom a, nyɩ wa ka lowr!» Ʋ yere nɩ a bɛlɩ dem na bɛ tɛr yã a zie à ŋá: 17«A kʋ̃ɔ fʋ na zu nyũ a nʋmɛ na, ɛ́ a bʋ̃-dɩrɩ fʋ na sɔwlɩ dɩ a nʋ̃ɔ̀ tɔ!» 18Ɛcɛ, a nɩbɛ bɛ ŋa bɛ bãw kɛ́ bɛ lãw nɩ nɩ kũuni ɛ, bɛ bɛ bãw k'aa Dãbolu nɩ-bʋɔlɩ be n a kpɩmɛ tẽw pʋ̃ɔmɩ za ɩ.
La Bible en Dagara © Alliance Biblique du Burkina Faso, 2013.