Zʋkpaɩ 8
8
A Yã-bãwfʋ lɛb'a bʋɔlɛ
1A Yã-bãwfʋ bɛ n'ʋ bʋɔlɛ ɩ?
A yã bɛ n'ʋ bʋɔlɛ gbololo ɩ#8:1 Nyɛ̃ 1.20 nɩ a manʋ.?
2A zi-kɛrɩ zu fʋ na mɩ́ nyɛ̃ a sɔ́r na be a pile a,
a sɔ-carɩ pʋɔ a, a Yã-bãwfʋ àr'ɩ saaƴẽwn.
3A tẽ-kpɛ̃ɛ dɩ̃dɛɛ ƴãw a,
a nɩbɛ tu-tɔlʋ ziir a, ʋ cɩɩrɛ na yere:
4«Nyɩɩm nɩsaalbɛ ɛ, nyɩmɛ nɛbɛ ɩ̃ bʋɔlɛ,
nyɩ za zie n'a ɩ̃ ƴɛ̀rɛ.
5A nyɩɩm na bɛ bãw bom a, nyɩ zanɩ a maal-ɩb.
A nyɩɩm dãbole, nyɩ zanɩ a yã.
6Nyɩ bɛrɛ wone, ɩ̃ tɛr'ɩ ƴɛ̀r-sɩza
na ƴɛ̀r kʋ̀ nyɩ, ɩ̃ na ƴɛ̀r'ɩ cãamɩ́ a nyɩ zie.
7Bʋ̃ʋ n'ʋ vɛ̃, yel-mɩŋa n'a ɩ̃ yere,
ɩ̃ hɩ̃ɛn nɩ a ƴɛ̀r-faa ƴɛ̀rʋ.
8A ɩ̃ nʋɔr ƴɛ̀rʋ za ɩ n yel-mɩŋa,
been kãw za bɛ ɩ ziri bɩɩ bɛ̀lʋ ɛ.
9A za mɩ́ ɩ n yel-mɩŋa nɩr na tɛr yã a zie,
a bɛ mɩ́ tɛr bʋnʋ nɩr na zanɩ bãw a zie ɩ.
10Nyɩ bɔbr a wulu ɩ̃ na tɩrɛ a, ɛ́ bɛr a salm-pla.
Nyɩ bɔbr a bãwfʋ ɛ́ bɛr a salm-zɩɛ.
11Bʋ̃ʋ n'ʋ vɛ̃, a mãa Yã-bãwfʋ a, ɩ̃ sa n a lɛw-vɩɛlɩ,
na-bom kãw za bɛ ta m ɛ#8:11 Nyɛ̃ 2.4..»
A Yã-bãwfʋ wule nɩ ʋ tʋɔra
12A mãa Yã-bãwfʋ a, a yã ɩ̃ na bãw a bɩɛlɛ mɛ̃ na.
Ɩ̃ mɩ́ ɩrɛ nɩ a bom tɛr'ɩ tɩ́ɛrʋ.
13A Sore zɔba n'ɩ a faa hɩ̃ɛnʋ.
Ɩ̃ bɛ nɔnɛ a pɔ̀lʋ, a nyɔka-ɩb,
a ɩ-faar nɩ a ziri ɛ.
14A ɩ̃ ton n'ɩ k'ɩ̃ɩ wule a nɩsaalbɛ a yã,
ɛ́ wule bɛ bɛ mɩ́ dãw bãwnɩ a yel cɔbrɩ.
Mãa n'ɩ a yã, ɛ́ mãa so a kpɛnʋ.
15Mãa zũú n'a a na-mɩnɛ dɩrɛ a naalʋ,
ɛ́ a ƴɛ̀r-dɩrbɛ mɩ́ ƴãw a nɛ́ɛ a tori.
16Mãa zũú n'a, a nɩ-bɛrɛ dɩrɛ a nɩ-kpɛ̃ɛnʋ,
lãwnɩ a nɩ-yée nɩ a bɛlɩ dem za
na dɩrɛ a ƴɛ̀rʋ a tẽw zu a.
17A mãa a, ɩ̃ nɔnɛ nɩ a bɛlɩ dem na nɔnɛ mɛ̃ a,
ɛ́ a bɛlɩ dem na bɔbr mɛ̃ a na mɩ́ nyɛ̃ m'a.
18Mãa n'ʋ tɩrɛ a naalʋ nɩ a yúor,
a tɛra na mɩ́ kɔwrɩ a, nɩ a yele za na mɩ́ tu a nɩr a.
19A ɩ̃ bʋ̃-kʋ̀rɩ sa n a salm-zɩɛ mɩŋa mɩŋa,
a ɩ̃ maalʋ sa n a salm-pla mɩŋa mɩŋa.
20Mɩnʋ sɔ́r zu n'a ɩ̃ mɩ́ cere,
a lɛ na mɩ́ tu sɔ́r a sɔrle zu.
21A be a, ɩ̃ mɩ́ kʋ̀ n bome a bɛlɩ dem na nɔnɛ mɛ̃ a,
ɩ̃ mɩ́ paal'ɩ a bɛ yie nɩ na-bome.
22Mãa n'ʋ a Sore de niwn ír,
ɛ́ wa bãw ír a ʋ bʋ̃-íri za.
23Ʋ ɩ na ɩ̃ be a koro kãw za
a yele za pɛr-tib daar,
a tẽw na bɛ tɩ be sɛr a.
24A ɩ̃ dɔwfʋ daar a, a kʋ̃ɔ-bɛrɛ bɛ tɩ be sɛr ɛ,
bul-nɛ́ɛ kʋ̃ɔ na mɩ́ bule yire a bɛ tɩ be ɩ.
25Ɩ̃ tɩ dɔw na ɛ́ a tan wa bãw be, ɛ́ a tãli wa bãw be.
26A lɛn daar a, a Sore bɛ tɩ ír a tẽw,
a póru nɩ a tẽsɔw uuru kãw za sɛr ɛ.
27A lɛn daar ʋ na tɩ ɩ a salom ʋ kpɛmɛ àr a,
ɩ̃ tɩ be n be, a lɛn daar ʋ na tɩ tʋ̃ɔ̀
a tẽw tʋra a kʋ̃ɔ-kpɛ̃ɛ zu-sɔw a,
28ʋ na tɩ ƴãw a zũzuge a ɓã taa a saa-zu a,
ʋ na tɩ kʋ̀ a fãw a bul-nɛ́ɛ
na be a tẽsɔw pʋ̃ɔmɩ za a,
29ʋ na tɩ ƴãw tʋr-bɔw a kʋ̃ɔ-kpɛ̃ɛ
a kʋ̃ɔnɩ na bɛ tɛr sɔ́r na gãw a,
ʋ na tɩ sʋ̃ɔ́ a tẽw pɛr a, ɩ̃ tɩ be n be.
30A lɛn daar a, ɩ̃ tɩ be n a Sore lõbowrí
mɛ̃ a tome zu-sob a.
Bibi-vɩɛrɩ za, ɩ̃ mɩ́ tɩ ƴãw ʋ nɩ nʋ̃ɔ̀,
ɛ́ be a ʋ zie dɩ̃ɛnɛ kʋralɛ.
31Ɩ̃ mɩ́ tɩ dɩ̃ɛnɛ nɩ a tẽ-daa ʋ na ír a tẽsɔw zu,
ɛ́ nyɛrɛ a ɩ̃ nʋ̃ɔ̀ a nɩsaalbɛ sɔgɔ.
Zu-nʋ̃ɔ̀ sob'ɩ a nɩr ʋl na bɛrɛ wone a Yã-bãwfʋ a
32«Ƴɛrɛŋa a, ɩ̃ bibiir i, nyɩ bɛrɛ wone mɛ̃.
Zu-nʋ̃ɔ̀ dem'ɩ a bɛlɩ dem na tuur a lɛ ɩ̃ na yere a.
33Nyɩ bɛrɛ wone a ɩ̃ wulu, tʋ̃ɔ́ ɩ yã-bãwnbɛ.
Nyɩ taa zawrɛ a bɛrɛ ɩ.
34Zu-nʋ̃ɔ̀ sob'ɩ a sob nɛ na bɛrɛ wone mɛ̃,
na mɩ́ gã ìr a ɩ̃ dɩ̃dɔr ƴãw bibie za, ɛ́ gùre a ɩ̃ dɩ̃dɔr a.
35Bʋ̃ʋ n'ʋ vɛ̃, sob nɛ na nyɛ̃ m a,
nyɛ̃ nɩ a nyɔ-vʋʋrʋ, ɛ́ a Sore na de nɩ a ʋ yele.
36Ɛcɛ, sob nɛ na sãwnɛ mɛ̃ a,
ʋ ɩrɛ na a kpɩɛr a ʋl mɩŋa.
Bɛlɩ dem za na bɛ nɔnɛ mɛ̃ a nɔnɛ nɩ a kũu.»
La Bible en Dagara © Alliance Biblique du Burkina Faso, 2013.