Zʋkpaɩ 3
3
A Yã-bãwfʋ nɩ a Naaŋmɩn nʋɔr-sàwfʋ
1Ɩ̃ bie e, taa wa yiire a ɩ̃ wulu bɛrɛ ɩ, tɛr a ɩ̃ nɛ-ƴãwnɩ a fʋ socir pʋɔ. 2Fʋ̃ʋ wa maal tɛr a a, fʋ na vʋʋr'a cɛlɩ, ɛ́ fʋ na tɛr'ɩ ƴã-ɓaarʋ. 3A nɔ̃wfʋ nɩ a pùor-bɛ-lɛbrʋ, a be a fʋ zie kʋralɛ, 'lẽ a ƴãw a fʋ kɔkɔrɩ́, sɛb a ƴãw a fʋ socir pʋɔ. 4Lɛ n'a a Naaŋmɩn nɩ a nɩsaalbɛ na nɔnɛ fʋ, ɛ́ fʋ ɩ nɩr. 5Ƴãw a fʋ tɩ́ɛrʋ za a Sore ƴãw, taa wa ɩrɛ ƴãwn a fʋ mɩŋa yã ƴãw ɛ. 6Bãw ʋ a fʋ yele za fʋ na maalɛ a pʋɔ, ʋʋ na wule fʋ nɩ a cenu. 7Ta tɩ́ɛrɛ kɛ́ fʋ ɩ n yã-bãwnɛ ɩ, nɩ̃ɛ zɔrɛ a Sore, ɛ́ gùr pùor cɔw a yel-faa#3:7 Nyɛ̃ Ʋr 12.16.. 8A na sanɩ nɩ a fʋ ƴã-gan ɛ́ kʋ̀ b fãw. 9Ƴãwnɛ a Sore nɩ a fʋ bʋ̃-tɛrɩ, mɩ́ de a fʋ kɔb bʋ̃-dan kʋ̀ ʋ. 10Lɛ n'a a bʋ̃-bie na mɩ́ paalɩ a fʋ boge, ɛ́ a fʋ divɛ̃ ʋr bɛ nyɛrɛ ƴãwfʋ zie ɩ. 11Ɩ̃ bie e, taa zawrɛ a Sore kpãàfʋ ɛ, fʋ̃ʋ wa sãw ʋ yere fʋ a, ta nyɛ̃ a ɩ faa ɩ. 12Bʋ̃ʋ n'ʋ vɛ̃, a Sore mɩ́ yere nɩ a sob nɛ ʋ na nɔnɛ a, mɛ̃ a lɛ sãà na mɩ́ yere a ʋ bi-nɔna a#3:12 Nyɛ̃ Zɔb 5.17, 1 Kor 11.32, Eb 12.5-6..
A Yã-bãwfʋ waar'ɩ nɩ a nʋ̃ɔ̀
13Zu-nʋ̃ɔ̀ sob'ɩ sob nɛ na nyɛ̃ a yã-bãwfʋ ɛ́ páw a yã a! 14Bʋ̃ʋ n'ʋ vɛ̃, a ʋ tɛrʋ sa n a salm-pla tɛrʋ, ɛ́ a ʋ tɔnɛ sa a salm-zɩɛ. 15A yã-bãwfʋ ɩ n bʋ̃-sɩza zuo lɛw-vɩɛlɩ, ɛ́ bʋ̃-bɔbra kãw za kʋ̃ tʋ̃ɔ́ man taa nɩ ʋ ɛ#3:15 Nyɛ̃ 2.4.. 16Ʋ mɩ́ sõw nɩ a nɩsaal ʋ vʋʋrɩ cɛlɩ, ʋ mɩ́ kʋ̀ ʋ nɩ naalʋ nɩ yúor. 17Ʋ mɩ́ tɛr ʋ na lo n sɛ́ɛ na vɩɛl a, ʋ cere ɛ́ bɛ bãw damnʋ ɛ. 18A yã-bãwfʋ ɩ n nyɔ-vʋʋrʋ tɩɛ a bɛlɩ dem na nyɔw ʋ a zie, ɛ́ zu-nʋ̃ɔ̀ dem n'ɩ a bɛlɩ dem na nyɔw ʋ tɛr a#3:18 Nyɛ̃ 11.30, 13.12, 15.4, Yzt 2.9.. 19A Sore yã-bãwfʋ n'ʋ ʋ ír'ɩ a tẽw, a ʋ yã n'a ʋ ɩ n a salom ʋ kpɛmɛ àr. 20A ʋ bãwfʋ zũú n'a a tẽsɔw pile kʋ̃ɔ tɛ wa yi, ɛ́ a zũzuwe mɩ́ bɛr a saa ʋ wa.
A Sore mɩ́ piw nɩ a yã-bãwnɛ tɛr
21Ɩ̃ bie e, a maal-ɩrɛ nɩ a yele-jielu a, a taa wa zãánɛ nɩ fʋ ɛ: tuur a. 22A na sõw fʋ na fʋ tɛr nyɔ-vʋʋr-vla. 23Lɛ n'a fʋ na mɩ́ ɓãa ƴãw cere, ɛ́ a fʋ gbɛ́ɛ bɛ sarɛ ɩ. 24Fʋ̃ʋ wa ganɛ a, pʋl-vʋ̃ɔ kʋ̃ tɛr fʋ ɛ, ɛ́ fʋ̃ʋ wa gã baarɩ a, fʋ na gúr'a wõ nʋ̃ɔ̀. 25A pʋl-vʋ̃ɔ kʋ̃ mɩ́ ùr tɛr fʋ ɛ, ɛ́ nɩ-faar kʋ̃ mɩ́ zɛbr'ɩ fʋ ɛ. 26Bʋ̃ʋ n'ʋ vɛ̃, a Sore na mɩ́ gù b'a, ɛ́ kʋ̃ sàw fʋ lo bɛra pʋɔ ɛ.
A tɔ nɔ̃wfʋ
27Ta zawrɩ nɩr a na fɛrɛ a maalʋ ɛ, fʋ̃ʋ na na tʋ̃ɔ́ maal'ʋ a. 28Fʋ̃ʋ wa tɛr a bom nɛ a dɩ̃a a, fʋ̃ʋ ta yel a fʋ tɔ: «Cen tɔl cen! Bio, ɩ̃ na kʋ̀ b'ɩ bom» ɛ. 29A fʋ bá na bɛr tɩ̀ɛrʋ ɛ́ be a fʋ zie a, ta tɩ́ɛrɛ kɛ́ fʋ ɩ ʋ faa ɛ. 30Ta zɛbr'ɩ nɩr zawlalɛ ʋlɛ bɛ wa ɩ bom a ɩ. 31Ta nyùur'ɩ nɩr na ɩrɛ po-to-fãw-ɩb a ɩ, ta cɔwrɛ a ʋ ɩ-ɩrɩ ɛ. 32Bʋ̃ʋ n'ʋ vɛ̃, a Sore bɛ nɔnɛ a nɩ-faa ɩ, ɛcɛ ʋ ɩ n a nɩ-dẽdẽ mɩnɛ bá. 33A Sore mɩ́ ŋmɛ na ƴãw a nɩ-faar yir, ɛ́ maalɩ a nɩ-dẽdẽ mɩnɛ yir. 34A Sore mɩ́ ɩ n a nɩ-ɩ-laarbɛ la, ɛcɛ, ʋ mɩ́ ɩrɛ nɩ nɔ̃wfʋ ɩb a su-siwri dem zie#3:34 Nyɛ̃ Zakɩ 4.6, 1Pɩ 5.5.. 35A yã-bãwnbɛ bom bɛ na na páw a n'ɩ a ƴãwfʋ, ɛ́ a dãbole dem ɩ a vĩ.
La Bible en Dagara © Alliance Biblique du Burkina Faso, 2013.