Zʋkpaɩ 25
25
1Nyɛ̃ a Salomɔ̃ zʋkpaɩ a mɩnɛ a Zuda tẽw nãà Ezekɩasɩ nɩbɛ na sɛb a.
Zʋkpa-bʋʋrɛ bʋʋrɛ
2A Naaŋmɩn yúor-vɩɛlʋ-danʋ n'ɩ k'aa ʋ ɩb mɩ́ sɔwlɩ, ɛ́ a na-mɩnɛ yúor-vɩɛlʋ-danʋ ɩ kɛ́ bɛ mɩ́ jɛl bãw a yel-sɔwlɩ.
3Tɩ kʋ̃ tʋ̃ɔ́ bãw a salom kɛrʋ nɩ a tẽsɔw zulu ɛ. Lɛ mɩ̀ n'a tɩ mɩ̀ kʋ̃ tʋ̃ɔ́ bãw a na-mɩnɛ socie ɩ.
4Ír a salm-pla dɛwr bɛr, ɛ́ a salm-zɩɛ-bʋ̃-vɩɛlɩ-bãw-maalɛ na maal'ɩ bʋ̃-vla.
5Ír a nɩ-faar bɛr a nãà niŋé, ʋʋ na tɛr'ɩ fãw a ʋ naalʋ-dɩb pʋɔ, ʋ na tuur a mɩnʋ a ƴãw.
6Ta zɛwr fʋ tʋɔra a nãà niŋé ɩ, mɩ̀ ta mɩ́ de a nɩ-bɛrɛ zɩma zie ɩ.
7Bɛlɛ wa yel fʋ: «Do wa a ka!», alɛ sa bɛ nãà wa siwri fʋ nɩ-kpɛ̃ɛ niŋé a#25:7 A kan-nɛ́ɛ 6-7 ƴãw a, nyɛ̃ Luk 14.8-10..
8Ta mɩ́ paw manɩ a lɛ fʋ na nyɛ̃ a a ƴɛ̀rʋ-dɩb zie ɩ. A fʋ dɔ̃ sob wa ƴɛ̀r wul a fʋ sãwna a, bʋ̃ʋ n'ʋ fʋ na lɛb ɩ a pùorí?
9Fʋ̃ʋ nɩ a fʋ tɔ sob wa tɛr guu-taa a, maalɩ a fʋ yel fʋ̃ʋ nɩ a ʋl, ɛcɛ ta ɩ yel-sɔwla nɩ-yũo na yel kʋ̀ b a yi ɛ.
10Alɛ bɛ ɩ lɛ, nɩr na tʋ̃ɔ́ na wõ a, tʋʋr fʋ, ɛ́ fʋ kʋ̃ tʋ̃ɔ́ lɛb diw nyɔw a fʋ ƴɛ̀r-bi-faar á ŋá ɩ.
11Ƴɛ̀rʋ na ƴɛ̀r vla a mɩ́ ɩ na mɛ̃ salm-zɩɛ bom bɛ na ƴãw salm-pla pɩ̃ɛmɛ a.
12Nɩr na cɛlɛ be a zie a, a yã-bãwnɛ yele ŋmɛ̃ na mɛ̃ salm-zɩɛ mɩŋa mɩŋa nũ-tʋʋr bɩɩ kɔkɔrɩ́ bãw a.
13A lɛ a kʋ̃ɔ-ɓaar-gbinini na ŋmɛ̃ a bʋ̃-dieri-deb tʋlʋ daar a, lɛ n'a a nɩ-vla bɛ na tõ a ŋmɛ̃: ʋ mɩ́ ɓãa nɩ a ʋ zu-sob ƴãw.
14Zũzuge nɩ sɛsɛb na bɛ waar'ɩ saa a, lɛ n'a a nɩr na pɔrɛ k'ʋʋ na kʋ̀ n nɩr bom ɛ́ kʋ̃ tɩr a ŋmɛ̃.
15A tʋɔra-nyɔwfʋ yaga na tʋ̃ɔ́ na ɩ fʋ tʋ̃ɔ́ ƴɛ̀r-dɩrɛ. A ƴɛ̀r-bàalʋ bàalʋ na tʋ̃ɔ́ na ír bɩwrɩ na ta bɩwrɩ a bɛr.
16Fʋ̃ʋ wa nyɛ̃ sɩwr a, dɩ man, alɛ bɛ ɩ lɛ, fʋ̃ʋ wa dɩ zuo a, fʋ na ti a na bɛr.
17Ta mɩ́ cere a fʋ bá yir kʋralɛ ɩ, alɛ bɛ ɩ lɛ, ʋ nãà wa bàl'ɩ a fʋ ƴãw ɛ́ hɩ̃ɛn fʋ.
18Dakpuli-ŋmãa, zɛbr-sɔ-kpɛ̃ɛ bɩɩ pĩi-nɔ-ɓɩlɓɩl, lɛ n'a a nɩr na dɩ dãsɩ-ziri a ʋ tɔ ƴãw a ŋmɛ̃.
19Tɩ́ɛrʋ nɩr na ƴãw a nɩ-mɩlɛ ƴãw a kpɩɛrʋ daar a, a ɩ na mɛ̃ nɩr na 'wɔbr'ɩ nyɩ́ɩm na yɔwrɛ bɩɩ nɩr na dine gbɛ́r na ka a.
20Yieli yielu nɩr na tɛr pʋ-sãwna a niŋé a, a ɩ na mɛ̃ a ʋ kpar-kpɛ̃ɛ n'ʋ fʋ yaa ƴawr bibir, bɩɩ bʋ̃-miiru n'a fʋ ɩ ƴãw a ʋ natɩr pʋɔ a.
21Kɔ̃ wa kpɩɛr a fʋ dɔ̃ sob a, fʋ̃ʋ kʋ̀ ʋ bʋ̃-dɩrɩ ʋ dɩ, kʋ̃ɔ-nyúur wa kpɩɛr ʋ a, fʋ̃ʋ kʋ̀ ʋ kʋ̃ɔ ʋ nyũ.
22Fʋ na ɩrɛ à à ŋá a, a ɩ na mɛ̃ vũu-bie#25:22 Vũu-bie: A vũu-bie fʋ na mʋ̃ɔnɛ dɔwlɛ a fʋ dɔ̃ sob zũú a, a pɛr na tʋ̃ɔ́ na ɩ ziir ayi: a ʋ dɔwrʋ na lɛb'a bãw kpɛ kpɛ̃ɛ, bɩɩ vĩ na dɩrɛ ʋ na mɛ̃ vũu a, ʋ lɩɛbɩ a ʋ ɩb. Nyɛ̃ Ʋr 12.20. n'a fʋ mʋ̃ɔnɛ dɔwlɛ a ʋ zũú a. Ɛcɛ a Sore na ya b'a.
23A saa-pɛrɩ́-gʋba-lowr sɛsɛb waar'ɩ nɩ saa, ɛ́ a ziri waar'ɩ a taabɛ suur.
24A yẽw gaa sa fʋ na na lãw kpɩɛr'ɩ pɔw-nɔ-haarʋ sob a.
25Yel-nʋ̃ɔ̀ na yi tẽ-zãána wa a ɩ na mɛ̃ kʋ̃ɔ-ɓaarʋ kɔkɔr-kõw ƴãw a.
26Nɩ-mɩŋa na màwr nɩ-faa niŋé a ŋmɛ̃ na mɛ̃ bul-nʋɔr kʋ̃ɔ, bɩɩ bule kʋ̃ɔ bɛ na dɛw bɛr a.
27A sɩwr dɩ zuo bɛ vɩɛl ɛ, a yo-bɔ zuo mɩ̀ bɛ vɩɛl ɛ.
28Nɩr na bɛ tʋ́ɔr a ʋ suur nyɔwr a ŋmɛ̃ na mɛ̃ tẽ-kpɛ̃ɛ na yuo gã, ɛ́ bɛ tɛr dacĩ-kpɛ̃ɛ ʋ na piw ʋ tɛr a.
La Bible en Dagara © Alliance Biblique du Burkina Faso, 2013.