Zʋkpaɩ 24
24
A yã-bãwnɛ nɩ a nɩ-faa
1Ta nyùur'ɩ a nɩ-faar ɛ, ɛ́ ta bɔbr kɛ́ fʋ tuur bɛ ɩ. 2Bʋ̃ʋ n'ʋ vɛ̃, sãw-bɛrʋ tɩ́ɛrʋ tɛwr'a bɛ mɩ́ tɛr, ɛ́ a faa bɛ na na maal'a ƴɛ̀rʋ tɛwr'a bɛ mɩ́ ƴɛ̀rɛ.
3Yã-bãwfʋ n'a bɛ mɩ́ ŋmãa nɩ a yir, a yã n'a bɛ mɩ́ ɩ n ʋ ʋ kpɛmɛ. 4A bãwfʋ n'a mɩ́ paalɩ a diru nɩ bʋ̃-sɩza na ɩrɛ nʋ̃ɔ̀ a.
5A yã-bãwfʋ n'ɩ a nɩr fãw, ɛ́ a bãwfʋ mɩ́ ɩ ʋ kpɛmɛ gb'a ayi. 6Ta cen a zɛbr zie ɛ́ bɛ dãw de niwn jɛl a yele vla ɩ. Bʋ̃ʋ n'ʋ vɛ̃, a zɛb-tʋ̃ɔ́fʋ mɩ́ yi n yã-wulbɛ yaga zie.
7A yã-bãwfʋ bɛ tɛr a dãbol sob tab ɛ. Alɛ n'a so ʋ bɛ tɛr sɔ́r k'ʋʋ háa nʋɔr a tẽw yele jɛlʋ pʋɔ ɩ.
8Sob nɛ na mɩ́ tɩ́ɛrɛ a faa maalʋ a, bɛ bʋɔlɛ ʋ nɩ yel-faar zu-sob. 9Tɩɛr-been yõ n'ʋ a dãbol sob tɛr: a yel-bier maalʋ! Ɛ́ a nɩbɛ bɛ nɔnɛ nɩr na ɩrɛ bom za laar a ɩ.
10A fʋ kanyir bɛ wa ka be a kpɩɛrʋ bibir a, a fʋ fãw sɩrɩ bɛ saal ɛ!
11Fáa a bɛlɩ dem bɛ na ƴãw kũu dɔwrʋ a, faa bɛ, bɛl na cere kãkarɛ wɩɛr a kʋb zie a. 12Kapaw fʋ na yel'a: «Tɩ bɛ bãw bom za ɩ!», ɛcɛ a sob nɛ na bãw a socie a bãw nɩ a yel-mɩŋa. Ʋ bãw fʋ na, ʋ bãw nɩ bom za, ʋ na mɩ́ kʋ̀ n ŋa za man taa nɩ a ʋ ɩ-ɩrɩ.
13Ɩ̃ bie e, dɩrɛ a sɩwr, bʋ̃ʋ n'ʋ vɛ̃, a sɩwr vɩɛl'a ɛ́ nʋmɛ a fʋ nʋɔrɩ́. 14Bãwnɩ a vla, à ŋá n'a a yã-bãwfʋ ŋmɛ̃ a fʋ zie. Fʋ̃ʋ wa tɛr ʋ a, fʋ na tɛr'ɩ nɩdaar, ɛ́ a fʋ tɩɛrʋ kʋ̃ wɛ ɩ. 15Nɩ-faa a, ta maalɩ yã de a nɩ-mɩŋa yir ɛ, ta ɩ k'ʋ bɛ cãà tɛr kpɛb zie ɩ. 16A nɩ-mɩŋa na tʋ̃ɔ́ na lo ta gb'a ayopõi, ʋʋ na mɩ́ lɛb'a ìr, ɛcɛ a kpɩɛrʋ mɩ́ ɩ n a nɩ-faar bɛ lo.
17Ta cɩlɛ a fʋ dɔ̃ sob loba ƴãw ɛ, ta cɩlɛ ƴawr'ɩ ʋlɛ wa dẽdere cere a loba a ɩ. 18Alɛ bɛ ɩ lɛ, a Sore na nyɛ̃ a na, ʋ na nyɛ̃ na k'aa lɛ bɛ vɩɛl ɛ, ʋʋ na lɛb'a bɛr a ʋ suur a fʋ dɔ̃ sob ƴãw.
19Ta nyɛrɛ nɩ a yel-fa-maalbɛ suur ɛ, ta nyùur'ɩ a nɩ-faar ɛ. 20Bʋ̃ʋ n'ʋ vɛ̃, a yel-fa-maalbɛ bɛ tɛr nɩdaar ɛ, ɛ́ a nɩ-faar nyɔ-vʋʋrʋ ɩ mɛ̃ fɩ̃tɩlɛ na kpiire a.
21Ɩ̃ bie e, zɔrɛ a Sore nɩ a nãà. Ta tuur a bɛlɩ dem na mɩ́ bɔbr kɛ́ bɛ lɩɛbɩ bom za a ɩ. 22Bʋ̃ʋ n'ʋ vɛ̃, a faa na tʋ̃ɔ́ na ùr lo a bɛ zu. Ɛ́ ãa bãw a dɔwrʋ al a Sore nɩ a nãà na na tʋ̃ɔ́ ƴãw bɛ a?
A yã-bãwnbɛ wulu a mɩnɛ
23Nyɛ̃ lɛ a yã-bãwnbɛ na cãà lɛb yel a: A bɛ vɩɛl kɛ́ bɛ mɩ́ owre a ƴɛ̀rʋ-dɩb daar ɛ. 24Ƴɛ̀r-dɩrɛ wa yel a sãwna sob: «Fʋ bɛ tɛr sãwna ɩ», a zu-sɛbla na ŋmɛ na ƴãw ʋ, ɛ́ a nɩbɛ kʋ̃ nɔnɛ ʋ towtow ɛ. 25Ɛcɛ bɛlɩ dem na mɩ́ kpãà a sãwna dem a, a mɩ́ ɩ n vla a bɛ zie. A nɩbɛ mɩ́ ƴɛ̀rɛ nɩ nɔ-vla kʋ̀rɛ a ƴɛ̀r-dɩrbɛ bɛ ŋa ɛ́ bɔbr a bɛ vla.
26Nɩr na sɔw a sɔwfʋ nɩ yel-mɩŋa a wule nɩ a báalʋ sɩza.
27Dãw tõ a fʋ yẽw tome baarɩ, ɛ́ cɔbrɩ a fʋ púo a bʋ̃-dieri-deb ƴãw, al pùorí, fʋ na tʋ̃ɔ́ na ŋmãa a fʋ yir.
28Ta yel a fʋ tɔ sob sãwna ɛ́ a bɛ tɛr pɛr ɛ. Fʋ nɔ̃w bɔbr'a kɛ́ fʋ ŋmãa ziri bɩɩ? 29Ta yere: «A lɛ ʋ na ɩ mɛ̃ a, lɛ n'a ɩ̃ mɩ̀ na ɩ ʋ, ɩ̃ na ya n ŋa za man nɩ a ʋ tome.»
A ƴã-tuo sob ŋmɛ̃a
30Bibir kãw, ɩ̃ tɩ tɔl'ɩ ƴã-tuo sob púo ƴãw, nɩr na bɛ tɛr kanyir a divɛ̃ tɩɩr púo ƴãw. 31A mʋ̃ɔ nɩ a gʋʋr tɩ bul'a pàw a ziir za, ɛ́ a kʋsɛbɛ dacin na tɩ viiri koli a púo a lo. 32Ɩ̃ tɩ tɩɛr'ɩ a yel ŋa ɩ̃ na nyɛ̃ a, ɛ́ wulu ŋa n'ʋ ɩ̃ tɩ nyɛ̃ a pʋɔ: 33Fʋ̃ʋ gúr blã, fʋ̃ʋ ũù a mimie zaa pʋrɩ, fʋ̃ʋ gã bɛ tɛr a yel-ɩra a, 34a lɛn daar'a a nã́w na ta a fʋ yir mɛ̃ nɩ-cɔla a, ɛ́ a nãw-woro ùr lo a fʋ zu mɛ̃ nɩ-farɛ a#24:34 A kan-nɛ́ɛ 33-34 ƴãw a, nyɛ̃ 6.10-11..
La Bible en Dagara © Alliance Biblique du Burkina Faso, 2013.