Zʋkpaɩ 26
26
A dãbole yele
1A ƴawr nɩ a tʋl-hɛ̃hɛ̃ bɛ lãw daar ɛ, a saa bɛ sɛwnɩ a bʋ̃-dieri-deb daar ɛ, lɛ mɩ̀ n'a a ƴãwfʋ bɛ sɛwnɩ a dãbol ɛ.
2A lɛ a bɛlaarɛkule na mɩ́ tɔl, nɩ a lɛ a lile na mɩ́ ƴaw tɔl a, lɛ mɩ̀ n'a a ŋmɛ-ƴãw na bɛ tu sɔ́r a bɛ páwr nɩr ɛ.
3A wur so a fʋba, a bõw so a nɔ-bãw, ɛ́ a dãbole zikur so a dabɔl.
4Ta sɔw a dãbol tu n a ʋ dãbolu ɛ, fʋ mɩ̀ nãà mab'a ŋmɛ̃ mɛ̃ a ʋl a.
5Sɔw a dãbol tu n a ʋ dãbolu, ʋ taa wa mab tɩ́ɛrɛ k'ʋʋ ɩ n yã-bãwnɛ ɩ#26:5 A kan-nɛ́ɛ 4 nɩ 5 bɛ ɩ tulu bɛ tuli ɛ. A kan-nɛ́ɛ 4 sob tub tɛr'ɩ a ʋ daar, a 5 tub sob mɩ́ tɛr a ʋ daar. Nɩr za n'ʋ mɩ́ sɛw k'ʋʋ bãw a lɛ a na sɛw k'ʋʋ ɩ wul a dãbol sob yã a..
6Nɩr na tõ dãbol nɩ a ʋ ƴɛ̀rʋ a ɩ na mɛ̃ ʋ cɩɛr'ɩ a ʋl mɩŋa gbɛ́ɛ ŋmarɛ a. Bʋ̃ʋ n'ʋ vɛ̃, kpɩɛrʋ n'a ʋ bɔbr kʋ̀rɛ ʋ tʋɔra.
7A gbɛr gbɛ́ɛ bɛ tɛr fãw ɛ, lɛ mɩ̀ n'a a zʋkpar na be a dãbol nʋɔrɩ́ a mɩ̀ bɛ tɛr fãw ɛ.
8Dãbol fʋ na mʋʋrɛ a, a ɩ na mɛ̃ kʋsɩɛr fʋ na 'lẽ mɛr'ɩ kpala a.
9Zʋkpar na be dãbol nʋɔrɩ́ a ŋmɛ̃ na mɛ̃ pĩi-zɛl na be dã-kuole nũú a.
10Nɩ-kpɛ̃ɛ na de dãbol sob bɩɩ nɩ-sãsaralɛ na tɔlɛ a tome a, ʋ malɛ nɩ a nɩbɛ.
11Mɛ̃ a lɛ a baa na mɩ́ lɛb dɩrɛ a ʋ tiiru a, lɛ mɩ̀ n'a a dãbol mɩ̀ lɛb de a ʋ dãbol-yele#26:11 Nyɛ̃ 2Pɩ 2.22..
12Fʋ̃ʋ wa nyɛ̃ nɩr ʋ yel k'ʋʋ ɩ n yã-bãwnɛ a, fʋ̃ʋ bãwnɩ a: fʋ na gùre bom dãbol sob zie a sa fʋ na na gùre bom a nɩr ŋa tɔ zie a.
A ƴã-tuo sob ŋmɛ̃a
13A ƴã-tuo sob mɩ́ yel'a: «Wɛ-dʋ̃-faa kãw be n a sɔ́r zu, gbẽw be n a sɔrle zu.»
14A pan mɩ́ lɩɛbɛ nɩ a ʋ dàar zu, ɛ́ a ƴã-tuo sob lɩɛbɛ a ʋ gado zu.
15A ƴã-tuo sob mɩ́ tõ n a ʋ nũu a bʋ̃-dɩrɩ laa pʋɔ, ɛcɛ ʋ mɩ́ nyɛ̃ nɩ a nʋɔrɩ́ lɛb dob a ɩ bàlʋ.
16A ƴã-tuo sob mɩ́ tɩɛr'a k'ʋʋ tɛr'ɩ yã-bãwfʋ zuo nɩbɛ ayopõi na sɔw sɔwfʋ nɩ yã a.
Zʋkpaɩ a mɩnɛ
17Sɔr-tɔlɛ na ƴáw kpɛ zɛbr na bɛ jɩ́rɛ ʋ a pʋɔ a ŋmɛ̃ na taa nɩ nɩr na bɔbr k'ʋʋ nyɔw baa a tobe ƴãw a.
18Yãyaar sob na lɔbr dàar na dɩrɛ vũu, ɛ́ tɛbr pime na kʋrɛ a jile nɩ a ʋ tʋɔra a, 19lɛ n'a a nɩr na mɩ́ bɛ̀lɩ a ʋ tɔ, ɛ́ a pùorí ʋ yel: «Dɩ̃ɛnʋ n'a ɩ̃ tɩ dɩ̃ɛnɛ!» a ŋmɛ̃.
20A dàar wa dɩ baar'a, a vũu mɩ́ kpiir'a, a gɛgɛra bɛ wa lɛb cãà be a, a zɛbr mɩ́ baar'a.
21A saala n'a mɩ́ tɩr a vũu-bie, dàar'a mɩ́ ɩ a vũu dɩrɛ, lɛ mɩ̀ n'a nɩr na nɔnɛ a zɛbr a mɩ́ ɩ a zɛbr tɔlɛ nidaa.
22A gɛgɛra ƴɛ̀rʋ ɩ na mɛ̃ bʋ̃-dɩ-nʋ̃ɔ̀ na mɩ́ siw tɩ tɔ a nɩsaal pʋ̃ɔmɩ za a.
23Nɔ̃wfʋ ƴɛ̀rʋ na ƴɛ̀r'ɩ tɩɛr-faar a ŋmɛ̃ na mɛ̃ salm-pla bɛ na bɛ ír a dɛwr bɛr sɛr, ɛ́ de a nyɩl pàw yawra lale a.
24A nɩr na tɛr'ɩ a ʋ taabɛ dɔ̃ a mɩ́ piwle nɩ ʋ tʋɔra a ʋ ƴɛ̀rʋ pʋɔ, ɛ́ cɔbrɛ yel-faa a ʋ pʋ̃ɔmɩ.
25Ʋlɛ wa ƴɛ̀rɛ a fʋ zie nɩ nɔ̃wfʋ a, taa ƴãwnɛ a fʋ tɩ́ɛrʋ a ʋ ƴãw ɛ, bʋ̃ʋ n'ʋ vɛ̃, a ʋ socir paal'ɩ tɩɛr-faar na bɛ maal'ɩ wob a tɛwr.
26Ʋ cɩ na a sɛw ʋ na tʋ̃ɔ́ piwli a ʋ dɔ̃, ɛcɛ a nɩbɛ za nãà wa cãà na bãw a ʋ faalʋ.
27Nɩr na tuwr bɔw a na lo n a ʋ pʋɔ. Nɩr na bile kʋsɩɛr a, a kʋsɩɛr na lɛb'a wa lo dĩ ʋ.
28A zir-ŋmarɛ bɛ nɔnɛ a bɛlɩ dem ʋ na mɩ́ ɩ a kpɛ a ɩ. A nɔ-kãá waar'ɩ nɩ a nɩbɛ loba.
La Bible en Dagara © Alliance Biblique du Burkina Faso, 2013.