Sɔr-nɛ́ɛ 35
35
A levitɩ mɩnɛ tẽ-bɛrɛ
1A Sore tɩ ƴɛ̀r'ɩ a Moyiir zie, a Mowab tɩ̃talɛ na pɩɛlɩ a Zurdɛ̃ a pʋɔ, ɛ́ tori a Zeriko a. Ʋ tɩ yel ʋ na: 2«Yel a Ɩsɩrayɛl nɩbɛ kɛ́ bɛ kaa ír tẽ-bɛrɛ a bɛ tẽsɔwr pʋɔ kʋ̀ a Levi bʋʋrɛ, bɛ tʋ̃ɔ́ kpɩɛr a be#35:2 Nyɛ̃ Lev 25.32-34, Zoz 21.1-42, 1Bi-yel 6.39-66.. A fɛr'a kɛ́ bɛ mɩ̀ kʋ̀ bɛ dʋn mʋ̃ɔ 'wɔbrʋ ziir jil koli a tẽ-bɛrɛ á ŋá. 3A Levi bʋʋrɛ na kpɩɛr'ɩ a tẽ-bɛrɛ pʋɔ, ɛ́ so a tẽsɔwr na viiri koli a a, a bɛ dʋ̃-gbɛ́ɛ anaɩ ƴãw, nɩ a bɛ dʋ̃-yoru al za na cɛ a ƴãw. 4-5A dʋn mʋ̃ɔ 'wɔbrʋ ziir á ŋá na mɩ́ yi n a dacine na piw a tẽw a ƴãw, ɛ́ cen tɩ ta mɛtɩr kɔbr anũu (500), a saa-pɛrɩ́ lowr, a saa-pɛrɩ́-dʋrʋ-lowr lowr, a mʋ̃tɔ̃w-kpɛb-lowr lowr, nɩ a saa-pɛrɩ́-gʋba-lowr lowr. A na ɩ à ŋá a, nyɩ na ŋmãa na ír ɓãgala-sɛw-taa, a lõbowr na mɩ́ ɩ mɛtɩr túr (1 000) a, ɛ́ a tẽ-kpɛ̃ɛ be a sɔwlɩsɔw. 6Bɛ na kʋ̀ n a levitɩ mɩnɛ a naayir zɔ-kpɛb zie tẽ-bɛrɛ ayʋɔb, a be nɩr na bɛ bãw kɛ́ kʋ nɩr a, na na mɩ́ tʋ̃ɔ́ zɔ tɩ kpɛ a. Bɛ mɩ̀ na kʋ̀ bɛ nɩ tẽ-bɛrɛ lɩz'a ayi nɩ ayi ƴãw pʋɔ. 7A za na ɓã n taa ɩ tẽ-bɛrɛ lɩz'a ayi nɩ ani, de nɩ a dʋn mʋ̃ɔ 'wɔbrʋ ziir na viiri koli a. 8Dɔwlʋ za na mɩ́ kʋ̀ bɛ nɩ tẽ-bɛrɛ man nɩ a ʋ tẽsɔw zɛ̃a: dɔwlʋ na ɩ kpɛ̃ɛ a na tɩr'ɩ yaga, ɛ́ dɔwlʋ na ɩ pʋrɩ a tɩr blã.»
A naayir zɔ-kpɛb zie tẽ-bɛrɛ yele
9A Sore tɩ yel'ɩ a Moyiir à ŋá: 10«Ƴɛ̀r a Ɩsɩrayɛl nɩbɛ zie yel bɛ à ŋá: Nyɩmɛ wa lo gãw a Zurdɛ̃ kpɛ a Kanãa tẽw pʋɔ baar'a, 11nyɩ na kaa na ír tẽ-bɛrɛ a mɩnɛ a ɩ naayir zɔ-kpɛb zie tẽ-bɛrɛ. Be n'a sob nɛ na bɛ bãw kɛ́ kʋ nɩr a na tʋ̃ɔ́ mɩ́ zɔ tɩ kpɛ naayir#35:11 Nyɛ̃ Wl-ayi 4.41-43, 19.1-13, Zoz 20.1-9.. 12À ŋá n'a a nɩr ʋl a na fɛr k'ʋʋ kʋ ʋ yáa a san a kʋ̃ páw ʋ ɛ. Bɛ kʋ̃ kʋ ʋ ɛ́ a lãw bɛ dɩ a ƴɛ̀rʋ sɛr ɛ. 13A naayir zɔ-kpɛb zie tẽ-bɛrɛ na ɩ n ayʋɔb, 14ata be a Zurdɛ̃ saa-pɛrɩ́, ɛ́ ata be a Kanãa tẽw. 15Nɩr za, ʋ ɩ n Ɩsɩrayɛl nɩr bɩɩ sãan kpɩɛr a Ɩsɩrayɛl nɩbɛ pʋɔ, bɩɩ sãan na tɔlɛ a, ʋlɛ bɛ wa bãw kɛ́ kʋ nɩr a, ʋ na tʋ̃ɔ́ na zɔ tɩ kpɛ naayir a ten á ŋá kãw pʋɔ.
16Nɩr wa ŋmɛ nɩr nɩ kure bom ʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ. 17Ʋlɛ wa lɔb'ɩ kʋsɩɛr na na tʋ̃ɔ́ kʋ ʋ, ʋʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ. 18Ʋlɛ wa ŋmɛ n ʋ dàa na na tʋ̃ɔ́ kʋ ʋ, ʋʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ. 19A nɩr ʋl a na fɛr k'ʋʋ yaa a sob nɛ bɛ na kʋ a san a, ʋlɛ n'ʋ na kʋ a nɩ-kʋrɛ, ʋlɛ wa dɛ nyɛrɛ ʋ a. 20Nɩr wa dáa ʋ tɔ sob ʋ na hɩ̃ɛn ʋ a zũú, bɩɩ ʋlɛ wa tɛr tɩɛr-faar lɔb'ɩ ʋ bʋ̃-kãw a yi kũu a, 21bɩɩ ʋlɛ wa gùr nũu ŋmɛ n ʋ nɩ po-tuo, ʋ kpi a, nɩ-kʋrɛ n'ʋ: a fɛr'a kɛ́ bɛ kʋ ʋ. A nɩr ʋl a na fɛr k'ʋʋ yaa a sob nɛ bɛ na kʋ a san a na kʋ ʋ na, ʋlɛ dɛ wa nyɛrɛ ʋ a.
22Ɛcɛ nɩr na tʋ̃ɔ́ na dáa nɩr lɔb ʋ kpi, ɛ́ a bɛ ɩ ʋ tɩɛr'a tɔ kɛ́ ɩ ɛ, bɩɩ a bɛ ɩ dɔ̀nʋ zũú n'a ɩ, bɩɩ a na tʋ̃ɔ́ na ɩ lɔbrʋ n'a ʋ lɔb'ɩ ʋ bom ʋ kpi, ɛ́ a bɛ ɩ tɩɛr-faar'a ʋ tɛr lɔb'ɩ ʋ ɛ. 23A mɩ̀ na tʋ̃ɔ́ na ɩ kʋsɩɛr na na tʋ̃ɔ́ kʋ nɩr a n'ʋ, ʋ ɩ k'ʋ lo nɩr ʋ na bɛ nyɛ̃ a zu, ɛcɛ ʋ bɛ ɩ a sob nɛ dɔ̃ sob ɛ, ʋ bɛ bɔbr ʋ faa ɩ. 24A lãw na tu n a nɛ́ɛ na ƴãw càar'ɩ a yele á ŋá taabɛ a, dɩ a ƴɛ̀rʋ a nɩr na bɛ bãw kɛ́ kʋ nɩr a nɩ a nɩ-kũu san-yarɛ cara pʋɔ. 25A lãw na piw nɩ a nɩ-kʋrɛ na bɛ bãw kɛ́ kʋ a tɛr a san-yarɛ ƴãw, ɛ́ tɛr ʋ lɛb wa n a tẽ-kpɛ̃ɛ ʋl pʋɔ ʋ na zɔ tɩ kpɛ a naayir a.
A sob na bɛ bãw kɛ́ kʋ a nɩr a na be n a naayir zɔ-kpɛb zie tẽ-kpɛ̃ɛ pʋɔ, ɛ́ gù a bàwr-maal-kara bɛ na cir a kãá ƴãw a zũú, ʋ ɩ Naaŋmɩn nɩ-sora a, tɩ kpi. 26Ɛcɛ ʋlɛ wa yi zaa a naayir zɔ-kpɛb zie tẽ-kpɛ̃ɛ tʋr-bɔwrɩ pʋɔ, 27ɛ́ a nɩ-kũu san-yarɛ wa nyɛ̃ ʋ a, ʋ na tʋ̃ɔ́ na kʋ ʋ, ɛ́ bɛ tɛr sãwna ɩ. 28Bʋ̃ʋ n'ʋ vɛ̃, a nɩr na bɛ bãw kɛ́ kʋ nɩr a, a fɛr'a k'ʋʋ be a naayir zɔ-kpɛb zie tẽ-kpɛ̃ɛ pʋɔ, ɛ́ gù a bàwr-maal-kara kũu daar. A bàwr-maal-kara wa kpi baar'a n'a ʋ na tʋ̃ɔ́ lɛb cen a ʋ tẽw pʋɔ.
29Nyɩ na tɛr'ɩ a ƴɛ̀rʋ-dɩb tub ŋa kʋralɛ, zie nɛ za nyɩ na kpɩɛr a.
30Nɩr kʋb yel za pʋɔ a, nɩ-yaga dãsɩɛ dɩb tɛwr zũú n'a bɛ na ƴãw a nɩ-kʋrɛ a kũu dɔwrʋ. Bɛ bɛ ƴãwnɛ nɩr kũu dɔwrʋ nɩ-been yõ dãsɩɛ dɩb zũú ɛ#35:30 Nyɛ̃ Wl-ayi 17.6, 19.15, Mat 18.16, 2Ko 13.1, 1Tim 5.19, Eb 10.28.. 31Nyɩ bɛ sàwr dier libir nɩ-kʋrɛ na sɛw k'ʋʋ kpi a nyɔ-vʋʋrʋ ƴãw ɛ: a fɛr'a k'ʋʋ kpi. 32Nyɩ mɩ̀ bɛ sàwr dier libir ɛ́ bɛrɛ nɩr ʋ zɔrɛ cere naayir zɔ-kpɛb zie tẽ-kpɛ̃ɛ pʋɔ, ɛ́ a pùorí ʋ lɛb cen a ʋ tẽw pʋɔ, ɛ́ a bàwr-maal-kara bɛ kpi sɛr ɛ.
33Nyɩ bɛ dɛwr a tẽw nyɩ na na kpɩɛr a bɛrɛ ɩ. Ɛcɛ nɩr kʋb dɛwr'ɩ a tẽw. Ɛ́ a nɩ-kʋrɛ kũu yõ n'a pɛ́wr a zɩ̃ɩ na dɛw a tẽw a. 34A na ɩ à ŋá a, nyɩ na gù n vla taa dɛwr a tẽw nyɩ na na kpɩɛr a bɛrɛ ɩ, a be mãa mɩŋa na na kpɩɛr a nyɩ sɔgɔ a. Yel-mɩŋa n'a, a mãa Sore, ɩ̃ kpɩɛr'ɩ a Ɩsɩrayɛl nɩbɛ sɔgɔ.»
Currently Selected:
Sɔr-nɛ́ɛ 35: DBDC
Highlight
Share
Compare
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
