Nahum 3
3
Kũuni paal'ɩ a Nɩnɩɩvʋ tẽw
1Baw-bio páw nɩ a Nɩnɩɩvʋ tẽ-kpɛ̃ɛ,
be zɩ̃ɩ na gbɔlɛ a,
ziri nɩ po-to-fãw-ɩb'a paalɩ ʋ,
ɛ́ a nɩbɛ fáb bɛ be na baarɩ a ʋ zie ɩ!
2A fʋbr siwr'ɩ wɩb wɩb a wie zu,
a torkori gbɛ́ɛ ɩrɛ gɔmɛ,
a wie garɛ, ɛ́ a zɛbr-torkori ƴawr dúor.
3A wi-zɔmnbɛ garɛ na waar,
a zɛbr-sɔ-bɛrɛ nyɩwrɛ nɩ pɩnpɩn,
a kafine mɩ̀ nyɩwrɛ mɛ̃ saa a.
Kũuni n'a a ziir za,
a kũuni gbone nɩ taa, a bɛ tɛr sɔ́rʋ ɛ,
a nɩbɛ kawr'ɩ a kũuni ƴãw lore!
Vĩ nyɔw nɩ a Nɩnɩɩvʋ tẽw
4A Nɩnɩɩvʋ tẽw ɩ n pɔw-yɛm
a pɩ̃ɔ-ɩb na yãwmɛ yaga a.
A ʋ vɩɛlʋ nɩ a ʋ sɔ-ɩb ʋ na bãw a,
tɩ tawr'ɩ nɩbɛ waar'ɩ a ʋ zie.
Nɩ-bʋʋr-yoru nɩ dɔwlʋ bʋʋrɛ bʋʋrɛ
tɩ lɩɛb'ɩ a ʋ gbãgbaar,
a ʋ pɩ̃ɔ ɩ-ɩrɩ nɩ a ʋ sɔ-ɩb zũú.
5A Sore, a Kpɛnʋ-za-sob, yere na kʋ̀rɛ ʋ:
Mãa n'ɩ ŋan ìr a fʋ ƴãw,
ɩ̃ na vaar'ɩ a fʋ kparʋ do n tɩ tɔ a fʋ niwn,
ɩ̃ na wul'ɩ a fʋ faalʋ a nɩ-bʋʋr-yoru,
bɛ za na nyɛ̃ nɩ a fʋ vĩ.
6Ɩ̃ na cir'ɩ sagɛ pàw fʋ, ɩ̃ na ɩ na vĩ kpɛ b.
Ɩ̃ na ɩ na a nɩbɛ za jɩ́rɛ fʋ.
7Lɛ n'a a bɛlɩ dem nãà mɩ́ wa nyɛ̃ b a na mɩ́ lɩɛb zɔ.
Bɛ na ŋmɩɛr'ɩ cɛlsɩ yere nɩ:
«Nɩnɩɩvʋ tẽw sãw na,
ãa n'ʋ na zɔrɛ a ʋ nɩbaalʋ?
Nyɩnɛ n'a bɛ na nyɛ̃ mɔwl-mɔwlbɛ a ʋ ƴãw?»
A Nɩnɩɩvʋ tẽw yele na ŋmɛ̃ na taa nɩ Tɛb tẽw yele
8Nɩnɩɩvʋ ʋ, fʋ sa n a Tɛb#3:8 Tɛb: Ʋ be n a Eziptɩ tẽw. A Asiiri tẽw nãà Asuurbanipal tɩ zɛb'a de ʋ, ɛ́ za a ʋ bome a Yeezu Kɩrɩta na bɛ tɩ wa sɛr a yome 663 daar. tẽw bɩɩ?
Ʋl na tɩ be a Nɩl man-gbɛ́ɛ sɔgɔ, kʋ̃ɔnɩ viiri koli ʋ,
ɛ́ a kʋ̃ɔ-kpɛ̃ɛ piw ʋ tɛr vla vla mɛ̃ dacin a.
9Etiopi nɩ Eziptɩ ten
tɩ kʋ̀rɛ ʋ nɩ na-bome na bɛ tɛr baarʋ a.
Putɩ nɩ Libi ten dem tɩ n'ɩ a ʋ kpɛ-ta-dem.
10Ɛcɛ bɛ mɩ̀ tɩ diw nɩ a Tɛb tẽw dem
cen nɩ gbãgbaalʋ pʋɔ, tẽ-yũo.
Bɛ mɩ̀ tɩ kʋ n a ʋ bibiir a sɔ-carɩ za pʋɔ.
Bɛ tɩ ƴãw nɩ a ʋ nɩ-bɛrɛ za bamɛ,
bɛ tɩ ŋmɛ n gbãw põ a ʋ nɩ-yée.
11Nɩnɩɩvʋ ʋ, a kpɩɛrʋ mɩ̀ na kpɛ b'a tɩ sɩw,
fʋ na lim'ɩ fʋ za a kpɩɛrʋ pʋɔ,
fʋ mɩ̀ na bɔ n sɔwlʋ zie,
k'aa fʋ dɔ̃ dem ta páw fʋ ɛ.
A Nɩnɩɩvʋ tẽw lore na
12A fʋ zɛbr-yir-kpɛn za
ŋmɛ̃ na taa nɩ kãkã-mɔmɛ:
bɛlɛ wa mĩine a tɩɛ wa báarɛ a,
a mɩ́ lo n a sob nɛ na bɔbr k'ʋʋ 'wɔb a a nʋɔrɩ́.
13A fʋ zɛbr-nɩbɛ ɩ na mɛ̃ pɔwbɛ na bɛ tɛr fãw a,
a fʋ tẽw dɩ̃dɛɛ yuo nɩ 'he'hee a fʋ dɔ̃ dem niŋé:
vũu dɩ n a fʋ dà-jɩ̀rɩ́.
14Nɩnɩɩvʋ tẽw dem i, nyɩ 'wɔ̃w kʋ̃ɔ
gùre nɩ bɛ na na wa piw nyɩ a,
nyɩ lɛb cɔbrɩ a nyɩ zɛbr-yir-kpɛn ƴãw,
nyɩ kpɛ a mɛ̃mɛrɛ pʋɔ,
nyɩ nɛb a yawra, nyɩ cɔbrɩ a birki-laar.
15Ɛcɛ a nyɩ tẽw bɛ na na nyɩw a,
vũu na dɩ nyɩ na kʋ,
bɩɩ a zɛbr-sɔ-kpɛ̃ɛ na baarɩ nyɩ na
mɛ̃ sãsowe na mɩ́ baarɩ tɩ-vaar a.
A Nɩnɩɩvʋ tẽ-kpɛ̃ɛ nɩbɛ na baar'a
A nyɩ nɩbɛ tɩ ƴɔ̃ƴɔ̃wn na
mɛ̃ sãsowe na mɩ́ mɛ taa a, mɛ̃ sɩw-zam a.
16A nyɩ yɛ-yɛrbɛ tɩ yãwmɛ na zuo saa ŋmar-bie.
Ƴɛrɛŋa a, bɛ bɔr'a mɛ̃ sãsow-nãa-nʋrɩ na mɩ́ ƴawrɩ a.
17A nyɩ gùrbɛ tɩ bʋwl'ɩ a ziir za mɛ̃ sãsowe a,
ɛ́ a nyɩ tõ-tõ-bi-bɛrɛ ɩ mɛ̃ bʋ̃-biir
na mɛ taa mɛ̃ sɩw-zam a,
a mɩ́ mɛ mɛ n a dabawr ƴãw a ƴawr daar,
ɛ́ a mʋ̃tɔ̃w wa pure a,
a mɩ́ bɔr'a, bɛ bɛ bãw a zi-cena ɩ.
Nyɩnɛ n'a a pãa cen a?
Yele na sãw bɛ tɛr maalʋ a
18Asiiri tẽw nãà a,
a nɩ-bɛrɛ fʋ na ƴãw a ten pʋɔ a,
bɛ gúr'a kʋ̃ lɛb ìr ɛ,
a fʋ sojarɩ nɩ-bɛrɛ bɛ cãà damnɛ ɩ.
A fʋ nɩbɛ yàar'a pàw a tan,
ɛ́ nɩr bɛ ka be na lɛb kaalɩ bɛ ɓã taa ɩ.
19A fʋ yele sãw na bɛ lɛb tɛr maalʋ ɛ,
a fʋ natɩɛ bɛ tɛr tɩ̃ɩ ɛ,
bɛlɩ dem za na mɩ́ wone a fʋ yele a,
bɛ mɩ́ ŋmɩɛr'ɩ kuryii a faa na ta b a ƴãw,
bʋ̃ʋ n'ʋ vɛ̃, ãa zie n'a
fʋ bɛ ɩ a fʋ po-to-ɩb kʋralɛ?
Currently Selected:
Nahum 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
