Habakukɩ 1
1
1A ƴɛ̀rʋ ŋa n'ʋ a Naaŋmɩn ɩ a ʋ ƴɛ̀r-manɛ Habakukɩ bãw, yel-nyɛra pʋɔ.
A naaŋmɩn-ƴɛ̀r-manɛ bʋɔlɛ nɩ a Naaŋmɩn k'ʋʋ wa faa ʋ
2Sore e, debor'a ɩ̃ na bʋɔlɩ fʋ
a ɩ̃ faafʋ ƴãw tɩ ta, ɛ́ fʋ bɛ bɛrɛ wone?
Ɩ̃ kone nɩ a po-to-fãw-ɩb na ɩrɛ a ƴãw,
ɛ́ fʋ bɛ faarɛ tɩ ɛ.
3Bʋ̃ʋ n'ʋ so fʋ ɩ ɩ̃ nyɛrɛ a faalʋ?
Ŋmɩŋmɩn za n'a fʋ sàw jɩ́rɛ a tɩ kpɩɛrʋ?
Dɔwrʋ nɩ po-to-fãw-ɩb'ɩ á ŋá a ɩ̃ niŋé,
ƴɛ̀rʋ-dɩb nɩ zɛbr be n a ziir za.
4Bɛ bɛ cãà tuur a nɛ-ƴãwnɩ ɛ,
a ƴɛ̀rʋ bɛ cãà dɩrɛ a tore ɩ,
a nɩ-faa tʋ̃ɔ́ nɩ a nɩ-mɩŋa,
ɛ́ a ƴɛ̀rʋ na mɩ́ dɩ a bɛ mɩ́ tu sɔ́r ɛ.
Babɩlɔn tẽw dem na wa na wa yɛ́r pàw a tẽw
5A Sore yere na:
«Nyɩ jɩ́r a nɩ-bʋʋr-yoru pʋɔ nyɛ̃.
Nɔ-ɓãan, ʋ́ nyɔw nyɩ!
Ton kãw na tõ n a nyɩ daar,
kɛ̀ nɩr tɩ n'ʋ manɛ ʋ kʋ̀rɛ nyɩ a,
nyɩ kʋ̃ʋ sàw ɛ.
6Bʋ̃ʋ n'ʋ vɛ̃, ɩ̃ ƴãw na
a Babɩlɔn tẽw nɩbɛ waar,
nɩ-bʋʋrɛ na kpɛ po-tuo ɛ́ tʋlɛ a.
Bɛ zɔrɛ na cɔlɛ a tẽ-daa
na cere 'hɛbɛpɛpɛ a,
kɛ́ bɛ fa ziir bɛ na bɛ so a tɛr.
7Bɛ ɩrɛ nɩ dɛ̃bɩ̃ɛ, ɛ́ bɛ tɛr dɩ̃ɛnʋ ɛ,
bɛlɛ nɛbɛ mɩ́ ŋmɛ nyãa yel a lɛ-na-tu-sɔr-a,
nɩ a bɛ na tɛr fãw zuo nɩbɛ za a.
8A bɛ wie garɛ na zuo nyoru,
a zɔrɛ nɩ fɔ̃w zuo a wɛ-baar
na mɩ́ bawlɛ a zaanʋɔra a.
A bɛ wi-zɔmnbɛ garɛ na,
bɛ yi n zi-zãána ɛ́ waar,
bɛ ƴaw na waar mɛ̃ sɩla
na siwr fiii a ʋ bʋ̃-dɩra zu a.
9Bɛ waar'ɩ bɛ za a po-to-fãw-ɩb ƴãw,
a bɛ niŋe tori nɩ nidaa,
bɛ nyɔwr'ɩ a nɩ-pàwrɩ ɓanɛ taa,
bɛ́ yãwmɛ mɛ̃ biire a.
10Bɛ ɩrɛ nɩ a na-mɩnɛ laar,
ɛ́ a ten nɩ-bɛrɛ ɩ nɩ-ɩ-laarɩ a bɛ zie.
Bɛ tobr bɛ ka zɛbr-yir-kpɛn ƴãw ɛ:
bɛ mɩ́ kaal'ɩ tanɛ ɓã taa a do,
ɛ́ bɛ zɛb de a been been.
11Bɛ tɔlɛ na mɛ̃ sɛsɛb kpɛ̃ɛ a,
bɛ dãwnɛ nɩ taa wɩɛr zi-yoru,
bɛl na mɩ́ de a bɛ fãw ʋ ɩ ŋmɩn a.»
A naaŋmɩn-ƴɛ̀r-manɛ bʋɔlɛ nɩ a Naaŋmɩn a gb'a ayi sob ƴãw
12A pɛr-tib daar za, fʋ̃ʋ n'ɩ a Sore,
fʋ ɩ n a ɩ̃ Naaŋmɩn, na ɩ sõw ɛ́ bɛ tɛr kũu daar a.
Sore e, fʋ̃ʋ ɩ̃ pìir na gùre mɛ̃ a,
fʋ kaa na ír a nɩ-bʋʋrɛ bɛ ŋa,
a Babɩlɔn tẽw dem, ɩ kɛ̀ bɛ kpɛmɛ,
kɛ́ bɛ tʋ̃ɔ́ tu a lɛ fʋ na dɩ n tɩ a ƴɛ̀rʋ bin a.
13A fʋ mimie vɩɛl'a zuo,
nɩ a yel-faa fʋ na na jɩ́rɛ a,
fʋ kʋ̃ tʋ̃ɔ́ sàw jɩ́rɛ a kpɩɛrʋ ɛ.
Ɛ́ bʋ̃ʋ n'ʋ so fʋ sàw bɛlɛ a gɛgɛrɩ bɛ ŋa ɩb,
ɛ́ bɛ ƴɛ̀rɛ ƴɛ̀rʋ?
Bʋ̃ʋ n'ʋ so a nɩ-faar mɩ́ báarɛ nɩbɛ
na ɩ nɩ-mɩn zuo bɛ a, ɛ́ fʋ ɩ gbili?
14Bʋ̃ʋ n'ʋ so fʋ de a nɩsaalbɛ
bɛ ɩ mɛ̃ kʋ̃ɔ-kpɛ̃ɛ zʋ́mɛ́ a,
mɛ̃ bʋ̃-vuri na bɛ tɛr kaarɛ a?
15A Babɩlɔn tẽw dem nyɔwr'ɩ a nɩbɛ
mɛ̃ zʋ́m bɛ na nyɔw nɩ zʋm-pĩi a,
bɛ mɩ́ nyɔw bɛ nɩ a bɛ mɩ̃ɛnɩ pʋɔ.
Lɛ n'a nʋ̃ɔ̀ mɩ́ ɩrɛ bɛ, bɛ cɩlɛ bɛ za.
16Bɛ mɩ́ maal'ɩ bàwr kʋ̀ a bɛ mɩ̃ɛnɩ,
ɛ́ nyɩw tɩ-suur-zɔ̃-na-nyùur-vla-vla-a kʋ̀ a,
alɛ na n'a mɩ́ so bɛ páw bʋ̃-dɩrɩ a,
bʋ̃-dɩ-yaga, bʋ̃-dɩ-nʋʋr a.
17A ɩ à ŋá, bɛ kʋ̃ bɛr a bɛ zɛbr-sɔ-bɛrɛ vɔb towtow,
bɛ na mɩ́ vɔnɛ kʋrɛ nɩ a nɩ-bʋʋr-yoru,
ɛ́ bɛ zɔrɛ nɩbaalʋ ʋ?
Currently Selected:
Habakukɩ 1: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
