A Lãw-mʋɔlɛ 4
4
A Zerizalɛm tẽw lo na
1'Woi! A salm-zɩɛ bɛ cãà nyɩwrɛ ɩ,
a salm-zɩɛ mɩŋa mɩŋa nyɩwrʋ baar'a,
a kʋsɛ-son#4:1 Kʋsɛ-son: A Zerizalɛm Ŋmɩn-yir-kpɛ̃ɛ a Babɩlɔn tẽw nãà, Nabikodonozɔɔr, na tɩ ŋmɛr bɛr a kʋsɛbɛ n'a. yàar'a pàw a ziir za!
2'Woi! A Sɩyɔ̃ tẽw nɩbɛ
na ɩ nɩbɛ man a salm-zɩɛ mɩŋa mɩŋa a,
bɛlɛ n'ɩ bɛ ŋan bɛ de bʋɔlɛ tanɛ la-sãsarɩlɛ,
yawr-mɩɛrɛ bʋ̃-mɩɛrɩ!
3A gbõgbo-cili tɛɛ za
mɩ́ ƴãw nɩ bɩrɛ a bili a ƴɛnɩ,
a mɩ́ guol'ɩ a bili.
Ɛcɛ, a ɩ̃ nɩ-bʋʋrɛ ɩ na mɛ̃ mã-po-tuo sob a,
mɛ̃ wɛja-kpalɛ pʋɔ kʋlãdisowle#4:3 Kʋlãdisowle: A kʋlãdisowle mɩ́ zawr'ɩ a ʋ jɛlɛ bɛr a mʋ̃tɔ̃w pʋɔ, alɛ n'a so bɛ bʋɔlɛ ʋ mã faa. Nyɛ̃ Zɔb 39.14. a.
4A kʋ̃ɔ-nyúur ɩ na a bi-pɩɩlɛ zɛ̀lɛ mɛrɛ a bɛ lán.
A bibiir zɛlɛ nɩ a bʋ̃-dɩrɩ, ɛ́ nɩr bɛ ka be kʋ̀rɛ bɛ ɩ.
5A bɛlɩ dem na tɩ dɩrɛ a bʋ̃-dɩ-kãánɩ a kpiir'ɩ a sɛ́ɛ pʋɔ.
A bɛlɩ dem na tɩ baa a tɛra pʋɔ a jɛlɛ nɩ a sagɛ nɩ a bɛ nuru.
6A ɩ̃ nɩ-bʋʋrɛ sãwna kpɛ n faa zuo
a Sodɔm tẽw#4:6 Sodɔm tẽw: Ʋ wule nɩ tẽw na ɩ faa tɛwr a. Nyɛ̃ Yzt 19.1-29. dem yel-bebe.
A tẽw ŋa wa sãw nɩ fɔ̃wlɛ ɛ́ nuru bɛ dam a ʋ pʋɔ ɩ.
7A Naaŋmɩn nɩ-sori tɩ vɩɛl'a zuo sa-pupure,
pɛlɩ zuo bʋ̀rʋ.
A bɛ ƴã-gamɛ tɩ ɩ n zɩɩr mɛ̃ kʋsɩɛr kãw
bɛ na bʋɔlɛ koraɩ a,
a bɛ jiile tɩ sɔb'a mɛ̃ kʋsɩɛr kãw
bɛ na bʋɔlɛ safɩɩr a.
8Ƴɛrɛŋa a, bɛ sɔb'a zuo vuule,
a sɛ́ɛ pʋɔ a, a nɩbɛ bɛ cãà bãw bɛ ɩ.
A bɛ ƴã-gamɛ vãamɩ na mɛr a kɔbɛ,
a ko na mɛ̃ dàa a.
9A zɛbr zie kũu sa n a kɔ̃ kũu
na mɩ́ ɩ fʋ sɩrɛ tɩ baarɩ,
a bʋ̃-dɩrɩ na bɛ ka be a ƴãw a.
10A lɛn daar a kpɩɛrʋ á ŋá na tɩ ta a ɩ̃ nɩbɛ a,
mã mɩnɛ na paalɩ nɔ̃wfʋ yaga a,
dʋw nɩ a bɛl tɛɛ za bibiir 'wɔb.
11A Sore ɩ na a ʋ suur ìr tɩ tɔ,
a ʋ su-tʋlʋ yɛ́r'a pàw a ziir za.
Ʋ ƴãw nɩ vũu a Sɩyɔ̃,
ʋ dɩ a tẽ-kpɛ̃ɛ tɩ tɔ a ʋ dacĩ-pɛr.
12A tẽw zu na-mɩnɛ nɩ nɩr kãw za a tẽ-daa zu
bɛ tɩ sàw k'aa dɔ̃ sob na zɛb tʋ̃ɔ́ a
nãà tu n a Zerizalɛm dɩ̃dɛɛ ƴãw kpɛ ɩ.
13À á ŋá za ta na,
a naaŋmɩn-ƴɛ̀r-manbɛ yel-bebe
nɩ a ʋ bàwr-maalbɛ sãwna zũú.
Bʋ̃ʋ n'ʋ vɛ̃, bɛ kʋ n a bɛlɩ dem
na tɩ sàwr a Naaŋmɩn nɛ́ɛ a, a tẽw sɔwlɩsɔw.
14Ƴɛrɛŋa a, a naaŋmɩn-ƴɛ̀r-manbɛ
nɩ a bàwr-maalbɛ gbõgbore nɩ a sɛ́ɛ pʋɔ mɛ̃ zɔn a.
A bɛ bʋ̃-suuri za ɩ n zɩ̃ɩ, nɩr bɛ tɛr sɔ́r na tɔ bɛ ɩ#4:14 Nyɛ̃ Sɔr-n 35.33-34..
15Bɛlɛ wa waar a, a nɩbɛ mɩ́ cɩɩrɛ na:
«Nyɩ taw zãá! Bɛ ɩ n nɩ-dɛgɛ!
Nyɩ taw zãá! Nyɩ taw zãá! Nyɩ taa tʋɔr bɛ ɩ!»
Bɛ zɔrɛ na ɛ́ bɛ bãw ʋlɩ zie nɛ bɛ na na cen a ɩ.
Ɛcɛ a nɩ-bʋʋr-yoru yere na:
«Bɛ kʋ̃ tʋ̃ɔ́ be a tɩ zie ka ɩ.»
16A Sore tɛɛ za n'ʋ diw bɛ yaarɩ,
ʋ bɛ cãà bɔbr bɛ nyɛ b ɛ.
A nɩbɛ bɛ cãà ƴãwnɛ a bàwr-maalbɛ ɩ,
bɛ cãà zɔrɛ a nɩ-kore nɩbaalʋ ɛ.
*
17A tɩ mimie piwri nɩ sõwfʋ na bɛ waar a tɩ bàl.
Tɩ be n a tɩ zie gub ziir gùre nɩ-bʋʋrɛ kãw
na kʋ̃ tʋ̃ɔ́ faa tɩ a waa.
18Bɛ piwre nɩ a tɩ gbɛ-ceni: tɩ kʋ̃ tʋ̃ɔ́ lɛb cen
a tɩ nɩ-yaga tuor-taa ziir ɛ.
A tɩ baarʋ tarɛ na,
a tɩ nyɔ-vʋʋrʋ baar'a, a baarʋ n'a.
19A Bɛlɩ dem na diwr tɩ a
páwr'a zuo a saa-zu sɩlɩ.
Bɛ diwr tɩ nɩ a tan zuru,
bɛ ƴãwnɛ tɩ nɩ bɛrɩ ziir nɩbɛ na bɛ kpɩɛr a.
20A sob nɛ na tɩ so kɛ̀ tɩ vʋʋrɛ a,
a nɩr nɛ a Sore na tɩ ƴãw
bɛ cir a kãá ƴãw a zũú a lo n a bɛ bɛrɩ pʋɔ.
A ʋl ƴɛ̀rʋ n'a tɩ mɩ́ tɩ ƴɛ̀r à ŋá:
«A ʋ gub zũú a, tɩ na vʋʋrɛ nɩ
a nɩ-bʋʋr-yoru sɔgɔ.»
*
21Edɔm tẽw dem i, nyɩ na tʋ̃ɔ́ na cɩlɛ ƴawr'ɩ,
nyɩɩm na kpɩɛr a Usɩ tẽw a!
Ɛcɛ, a Naaŋmɩn suur koli-nyúura
mɩ̀ na ta nyɩ na, nyɩ na nyũ ʋ na tɩ kuoli,
yaarɩ a bʋ̃-suuri bɛr ɛ́ cɛ ƴã-gã-kpãkpole.
22 Sɩyɔ̃ tẽ-kpɛ̃ɛ ɛ, a fʋ dɔwrʋ pãa baar'a.
Bɛ bɛ lɛb diwr fʋ cere nɩ zie ɩ.
Ɛcɛ a fʋ̃ʋ Edɔm#4:22 A Zerizalɛm bɛ na tɩ sãw bɛr a lɛn daar a, a Edɔm tẽw dem tɩ pʋɔ nɩ a bɛlɩ dem na tɩ zà a tẽ-kpɛ̃ɛ bome a.,
a Sore na dɔwrɩ fʋ nɩ a fʋ sãwna zũú,
ʋ na ɩ n a fʋ yel-bebe a yi cãamɩ́.
Currently Selected:
A Lãw-mʋɔlɛ 4: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
