A Lãw-mʋɔlɛ 3
3
Nɩr saa be kpɩɛrʋ pʋɔ a, ʋ mɩ́ cãà na ƴãw a ʋ tɩɛrʋ a Sore ƴãw
1Ɩ̃ ɩ n a nɩr#3:1 A sob nɛ na sɛb a sɛbɛ ŋa a na tɔ̃w n'ʋ, bɩɩ nɩ-yũo kãw n'ʋ. ʋl na nyɛ̃ a kpɩɛrʋ
a Sore su-yãyaar ŋmɩɛrʋ pʋɔ a.
2Ʋ dáa mɛ̃ na ƴãw niŋé
ɩ ɩ̃ cere lige pʋɔ ɛ́ bɛr a cãà.
3Sɩza, mãa yõ zu n'a a ʋ nũu siwr a bibie za.
4Ʋ ɩ na a ɩ̃ ƴã-gan sɩr ʋ za,
ʋ kar mɛ̃ nɩ a kɔbɛ.
5Ʋ piw mɛ̃ na, ʋ ɩ na kɛ̀ pʋ-sãwna
nɩ kpɩɛrʋ jil koli mɛ̃.
6Ʋ ɩ na ɩ̃ kpɩɛr lige pʋɔ
mɛ̃ a bɛlɩ dem na kpi koro za a.
7A Sore mɛ n dacĩ-kpɛ̃ɛ piw nɩ mɛ̃,
k'ɩ̃ɩ taa wa yire ɩ, ʋ ƴãw mɛ̃ nɩ bãzɔl-tɩbrʋ.
8Ɩ̃ na saa mɩ́ ŋmɩɛr a cɛlsɩ zɛlɛ nɩ sõwfʋ a,
ʋ mɩ́ fur'ɩ a ʋ tobe a ɩ̃ puoru ƴãw.
9Ʋ fur'ɩ a ɩ̃ sɔ́r nɩ kʋsɛ-bɛrɛ,
ʋ ɩ na ɩ̃ tuli a ɩ̃ sɔ́r.
10A Sore ɩ n a ɩ̃ zie mɛ̃ wɛ-dʋ̃-faa kãw
bɛ na bʋɔlɛ ursɩ na cɔbrɩ gù bom a,
mɛ̃ gbẽw na ũú gù bom a.
11Ʋ ɩ na ɩ̃ tuli a ɩ̃ sɔ́r,
ʋ taw mɛ̃ na cɩɛrɩ, ɛ́ sãw mɛ̃ bɛr.
12Ʋ dúor'ɩ a ʋ tam,
ʋ lɩɛb'ɩ a ʋ pime cɔw mɛ̃.
13A ʋ lɔw pime za kpɛ n a ɩ̃ sɩɛmɩ́.
14A ɩ̃ bʋʋrɛ nɩbɛ za kpɔwrɛ mɛ̃ na,
bɛ yiele na ɩrɛ nɩ mɛ̃ laar bibie za.
15A Sore ɩ na k'ɩ̃ wõ to-lawlaw,
ʋ kʋ̀ mɛ̃ nɩ lɔw ɩ̃ nyũ.
16Ʋ fɛr mɛ̃ na ƴãw ɩ̃ 'wɔb kʋsɛbɛ,
ʋ nɛb'ɩ mɛ̃ nɩ gbɛ́ɛ uuru pʋɔ.
17Ʋ ɩ na ɩ̃ bɛ tɛr ƴã-ɓaarʋ ɛ,
ɩ̃ yiir'ɩ a nʋ̃ɔ̀ bɛr.
18Lɛ n'a ɩ̃ yel: ɩ̃ bɛ cãà tɛr nɩdaar ɛ,
ɩ̃ bɛ lɛb gùre bom za a Sore zie ɩ.
*
19Ɩ̃ ɩ n nɩ-cɔla nɩ vĩ-nɩr,
a ɩ̃ kpɩɛrʋ tɩɛrʋ ɩ na mɛ̃ lɔw-tuo a, a ɩ̃ zie.
20Tɩɛrʋ ƴãw a, ɩ̃ tɩɛrɛ na, ɩ̃ kʋ̃ tʋ̃ɔ́ yiiri ɛ, ɩ̃ɩ bàl'a.
21Ɛcɛ, nyɛ̃ a ʋlɩ bom nɛ ɩ̃ na bɔbr k'ɩ̃ɩ bãwnɩ a,
a ʋlɩ bom nɛ na n'ʋ so ɩ̃ na tɩɛrɛ a:
22A Sore vɩɛlʋ-ɩb bɛ baar ɛ,
ʋ bɛ wul a ʋ nɔ̃wfʋ baarɩ ɛ.
23A ʋ vɩɛlʋ-ɩb nɩ a ʋ nɔ̃wfʋ
mɩ́ lɩɛb'ɩ paalɛ biɓaarɛ za.
Sore e, a fʋ na ŋmɛ̃ a fʋ ŋmɛ̃a a sɩrɩ na ɩ kpɛ̃ɛ.
24Ɩ̃ yel'a: a Sore n'ɩ a ɩ̃ na-bom,
alɛ n'a so ɩ̃ ƴãw a ɩ̃ tɩɛrʋ a ʋ ƴãw.
25A Sore ɩ n nɩ-vla a sob nɛ na tɩ́ɛrɛ ʋ a zie,
a sob nɛ na bɔbr ʋ a zie.
26Yel-vla n'ʋ kɛ́ fʋ ɩ gbili ɛ́ gùre a Sore faafʋ.
27Yel-vla n'ʋ k'aa nɩsaal bãw yel-fɛrɩ a ʋ pɔ̀lʋ daarɩ́.
28A fɛr'a k'ʋʋ mɩ́ taw yi pùor tɩ zɩ̃ gbili
a lɛn daar a Sore na mɩ́ wa ƴãw ʋ kpɩɛrʋ a,
29k'ʋʋ mɩ́ siwri ʋ tʋɔra,
vɔblɩ a ʋ niwn a tẽw, kapaw, a nãà tɛr'ɩ ɩb!
30K'ʋʋ mɩ́ lɩɛbɩ a kɔ́r cɔw
a sob nɛ na ɓarɛ ʋ a, ɛ́ sàw ɩ a zʋmɛ nɩr.
31Bʋ̃ʋ n'ʋ vɛ̃, a Sore bɛ lɔbr nɩr bɛrɛ a nʋɔr kʋrɛ ɛ.
32Ʋlɛ saa mɩ́ dɔwrɩ a nɩr a,
ʋ mɩ́ cãà na ɩ nɔ̃wfʋ tɛwr,
bʋ̃ʋ n'ʋ vɛ̃, a ʋ nɔ̃wfʋ ɩ n kpɛ̃ɛ.
33Ʋ na mɩ́ wa ƴãw a nɩsaalbɛ vĩ
bɩɩ ɩ a kpɛ bɛ a, a bɛ mɩ́ ɩ ʋ nʋ̃ɔ̀ ɩ.
*
34Bɛlɛ wa dɔwrɛ tẽw kãw gaso-biir za a,
35bɛlɛ bɛ wa sàw kʋ̀ nɩr a lɛ a na tɛr sɔ́r k'ʋʋ ɩrɛ
a Naaŋmɩn-na-do-saa-bɛ-pɩɛl-a niŋé a,
36bɛlɛ mɩ́ wa dɩ a ƴɛ̀rʋ a bɛ tu mɩnʋ a,
a Sore bɛ mɩ́ nyɛ̃ a bɩɩ?
37Ãa n'ʋ mɩ́ ƴɛ̀r, ɛ́ a bome be?
A Sore bɛ n'ʋ mɩ́ yel ɛ?
38A Naaŋmɩn-na-do-saa-bɛ-pɩɛl-a
nʋɔrɩ́ bɛ n'a a faa nɩ a nʋ̃ɔ̀ mɩ́ yi e?
39A lɛ pʋɔ a, bʋ̃ʋ n'ʋ so nɩsaal na mɩ́ zɛbr
ʋ na saa mɩ́ tɛr sãwna ɛ́ cãà vʋʋrɛ a?
40Tɩ maal jieli a tɩ ɩb kaa vla, ɛ́ lɛb wa a Sore zie.
41Tɩ puori nɩ a tɩ socir za, zɛw nɩ a tɩ nuru
cuw a Naaŋmɩn na be a salom zu a.
42Tɩɩm a, tɩ gaarɩ na, tɩ ɩ n nɔ-zawrbɛ,
ɛ́ fʋ̃ʋ a, Sore e, fʋ bɛ dɩ suur ɛ!
43A fʋ suur na tɩ pili pàw fʋ a zũú a,
fʋ ta na tu tɩ ɛ́ kʋ tɩ faa faa bɛ zɔ n nɩbaalʋ ɛ.
44Fʋ sɔwlɩ nɩ zũzuwr pʋɔ, k'aa tɩ puoru ta ta b ɛ.
45Fʋ ɩ na tɩ ɩ sagɛ, bom na bɛ tɛr vʋla a,
a nɩ-bʋʋr-yoru sɔgɔ.
46A tɩ dɔ̃ dem za bɔbr tɩ nɩ nɔhaarʋ.
47Tɩmɛ so dɛ̃bɩ̃ɛ, niw-viir, zi-sãwna nɩ yel-sãwna.
48A mʋta-kʋ̃ɔ gbɔlɛ mɛ̃ na mɛ̃ kʋ̃ɔ a,
a ɩ̃ nɩbɛ yele na sãw a ƴãw.
49A ɩ̃ mʋta-kʋ̃ɔ cire mɛ̃ na bɛ tɛr ŋmãafʋ ɛ,
pɩɛlʋ ŋmɛb na bɛ ka be a ƴãw,
50ɛ́ gù k'aa Sore na be a salom zu a wa gũu bɛl nyɛ̃.
51A ɩ̃ mimie 'wɔbr mɛ̃ na, ɩ̃ na mɩ́ nyɛ̃
a alɩ bome nɛ na mɩ́ tarɛ a ɩ̃ tẽ-kpɛ̃ɛ powli a.
*
52A bɛlɩ dem na tɛr'ɩ mɛ̃ dɔ̃
ɛ́ a bɛ tɛr pɛr a diw mɛ̃ na mɛ̃ lile a.
53Bɛ pàw mɛ̃ nɩ mimir bɔw pʋɔ,
ɛ́ de kʋsɩɛr fur pàw a bɔw nʋɔr.
54A kʋ̃ɔ tɩ lim'ɩ a ɩ̃ zu za, ɩ̃ɩ tɩ yel: «Ɩ̃ kpi na!»
55Sore e, a bɔw-zulu pɛrɩ́ be a, ɩ̃ bʋɔlɩ fʋ na.
56Fʋ wõ n a ɩ̃ kɔkɔr:
«Ta fur a fʋ tobe a ɩ̃ puoru nɩ a ɩ̃ bʋɔlʋ ƴãw ɛ.»
57Ɩ̃ na tɩ bʋɔlɩ fʋ a, fʋ taw na pɩɛlɩ, ɛ́ yel mɛ̃:
«Ta zɔrɛ dɛ̃bɩ̃ɛ ɩ!»
58Sore e, fʋ ƴɛ̀r'a kpɛ m, fʋ faa nɩ a ɩ̃ nyɔ-vʋʋrʋ.
59Sore e, nyɛ̃ a lɛ bɛ na ɩ a kpɛ m a, ɩ a ɩ̃ dem de!
60Fʋ nyɛ̃ nɩ a lɛ bɛ na yáa a san a ɩ̃ zu a,
fʋ nyɛ̃ nɩ a lɛ za bɛ na cɔbrɩ a ɩ̃ ƴãw a.
61Sore e, fʋ wõ n a zʋmɛ bɛ na tʋʋr a,
nɩ a lɛ za bɛ na cɔbrɩ a ɩ̃ ƴãw a.
62Bibie za a, a ɩ̃ dɔ̃ dem ƴɛ̀rʋ nɩ a tɩɛrʋ
bɛ mɩ́ vɩɛl a ɩ̃ ƴãw ɛ.
63Bɛ zɩ̃ na o, bɛ àr'ɩ saaƴẽwn o,
jɩ́r bɛ kaa, mãa n'ʋ bɛ ƴãw nɩ a yielu.
64Sore e, ɩ bɛ mɛ̃ a lɛ bɛ na ɩ m a.
65Liw a bɛ yã, a na ɩ n a fʋ ŋmɛ-ƴãw a bɛ zu.
66Ta tu bɛ nɩ suur tɩ ír bɛ bɛr a tẽw zu.
Currently Selected:
A Lãw-mʋɔlɛ 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
