A Lãw-mʋɔlɛ 2
2
A Sore ɩ n a ɩb mɛ̃ a ʋ nɩ-bʋʋrɛ dɔ̃ sob'ʋ a
1'Woi! A ʋ suur pʋɔ a,
a Sore ɩ na zũzu-sɛblɛ pàw
a Sɩyɔ̃ tẽ-kpɛ̃ɛ!
A ʋlɩ bom nɛ na tɩ ɩ a Ɩsɩrayɛl yúor#2:1 Ɩsɩrayɛl yúor: A Zerizalɛm nɩ a Ŋmɩn-yir-kpɛ̃ɛ n'a. a,
ʋ lɔb ʋ na bɛr ʋ yi a saa-zu wa lo tẽw.
A ʋ suur na tɩ ìr a Sɩyɔ̃ ƴãw a,
ʋ yiir'a kɛ́ ʋlɛ n'ɩ a ʋ gbɛ́ɛ dɔwlʋ zie.
2A Sore ɩ na
a ʋ nɩ-bʋʋrɛ Ɩsɩrayɛl zi-sóri za bɔr,
ʋ bɛ zɔ nɩbaalʋ ɛ.
A ʋ su-yãyaar pʋɔ a,
ʋ sãw nɩ a Zuda tẽw tẽ-kpɛn za bɛr.
Ʋ ɩ na a naalʋ-tẽw nɩ a nɩ-bɛrɛ lo,
ʋʋ ƴãw bɛ vĩ.
3A ʋ su-tʋlʋ kpãkpã pʋɔ a,
ʋ sãw nɩ a Ɩsɩrayɛl fãw za bɛr.
A dɔ̃ sob na wa ta a,
a Sore bɛ tɩ bɔbr k'ʋʋ sõw a ʋ nɩ-bʋʋrɛ ɩ.
Ɛcɛ ʋ nyɩw nɩ vũu a dɩ bom za
na viiri koli ʋ a.
4Ʋ dúor'ɩ a ʋ tam mɛ̃ dɔ̃ sob a,
a ʋ dʋrʋ nũu gù n a tɛb.
Mɛ̃ dɔ̃ sob a, ʋ kʋ n a bɛlɩ dem
tɩ na tɩ nɔnɛ a jɩ́rʋ a.
Ʋ bɛr'ɩ a ʋ suur ʋ siw
a Sɩyɔ̃ Ŋmɩn-yir-kpɛ̃ɛ zu mɛ̃ vũu a.
5A Sore ɩ n a ɩb mɛ̃ dɔ̃ sob a.
Ʋ sãw nɩ a Ɩsɩrayɛl nɩ a ʋ yir-vɩɛlɩ bɛr.
Ʋ ŋmɛr'ɩ a ʋ zɛbr-yir-kpɛn bɛr,
ƴãw kon nɩ pʋ-sãwna a zie za,
a Zuda nɩbɛ pʋɔ.
6Ʋ kpɛ n nɩ fãw a ʋ zie na ŋmãa pàw a pʋɔ.
Ʋ sãw nɩ a zie ʋl ʋ na mɩ́ tɩ tuori tɩ a bɛr.
A Sɩyɔ̃ tẽw a,
a Sore ɩ na bɛ yiiri a cuwr bibie
nɩ a pɩ̃ɛnʋ-bibie bɛr.
A ʋ su-tʋlʋ pʋɔ a,
ʋ jewr'ɩ a nãà nɩ a bàwr-maalbɛ.
7A Sore zawr'ɩ a ʋ bàwr-maal-kuur bɛr,
ʋ jɛ n a ʋ zi-sõw bɛr.
Ʋ bɛr'ɩ a Sɩyɔ̃ yir-vɩɛlɩ
a lo a dɔ̃ dem nuru pʋɔ.
Gɔmɛ tɩ pàw nɩ a Sore yir mɛ̃ cuw bibir a.
8A Sore tɩ yel'a k'ʋʋ na ŋmɛr'ɩ a dacine
na piw a Sɩyɔ̃ tẽw a bɛr.
Ʋ dɔl'ɩ a miw-máná,
ʋ bɛ bɛr a ŋmɛr-bɛrʋ ɛ,
ɛ́ gù bom bɛ tɩ cãà be ɩ.
Ʋ ŋmɛ n a dacine a za ayi, ɛ́ a za ayi lo.
9A tẽ-kpɛ̃ɛ pamɛ sãw na,
a Sore kar kár'ɩ a pamɛ bʋ̃-kparɩ bɛr.
A ʋ nãà nɩ a ʋ tõ-tõ-bi-bɛrɛ
lɩɛb'ɩ nɩ-pàwrɩ a nɩ-bʋʋr-yoru sɔgɔ.
Nɩr bɛ cãà be tɩrɛ a Sore wulu ɛ.
A naaŋmɩn-ƴɛ̀r-manbɛ tɛɛ za bɛ cãà páwr
ƴɛ̀rʋ na yire a Sore zie a ɩ.
10A Sɩyɔ̃ tẽ-kpɛ̃ɛ nɩ-kore
zɩ̃ n gbili gbili a tẽw.
Bɛ 'wɔ̃w nɩ tanɛ ƴãw a zurú,
bɛ su n vʋɔrɩ kparɩ.
A Zerizalɛm pɔwsɩrali su n zuru.
*
11A ɩ̃ mimie kõ na tɩ bàl,
a ɩ̃ tɩɛrʋ za dam'a,
ɩ̃ mɩ́ nyɔw nɩ ɩ̃ tʋɔra gú,
a dɔwrʋ na páw a ɩ̃ nɩ-bʋʋrɛ a ƴãw.
Bʋ̃ʋ n'ʋ vɛ̃, a bibiir
nɩ a bi-pɩɩlɛ fãw báarɛ nɩ
a nɩbɛ tuor-taa ziir a tẽ-kpɛ̃ɛ pʋɔ.
12Bɛ sowre nɩ a bɛ mã mɩnɛ:
«Nyɩnɛ n'a a bʋ̃-dɩrɩ be?»
Bɛ lore nɩ a nɩbɛ tuor-taa ziir
a tẽ-kpɛ̃ɛ pʋɔ mɛ̃ nɩbɛ bɛ na ƴãw bàalʋ a,
ɛ́ kpiir a bɛ mã mɩnɛ gbɛ́ɛ zu.
*
13Zerizalɛm i, ɩ̃ bɛ bãw bom nɛ
ɩ̃ na na yel kʋ b a ɩ.
A fʋ yele bɛ ŋmɛ̃ taa nɩ yel kãw za ɩ.
Ɩ̃ de fʋ man nɩ anʋ, tʋ̃ɔ́ mɔwlɩ fʋ,
Sɩyɔ̃ tẽ-kpɛ̃ɛ-vla a?
A fʋ dɔwrʋ ɩ n kpɛ̃ɛ sɛw a kʋ̃ɔ-kpɛ̃ɛ.
Ãa n'ʋ na tʋ̃ɔ́ sanɩ fʋ?
14Yel-ziri nɩ yele na bɛ tɛr pɛr a n'a
a fʋ naaŋmɩn-ƴɛ̀r-manbɛ nyɛ̃ a fʋ ƴãw.
Bɛ bɛ ɩ a fʋ sãwna ʋ sãá,
kɛ́ bɛ tʋ̃ɔ́ ɩ a fʋ yele lɩɛbɩ ɛ.
Ziri nɩ ƴɛ̀r-ziri n'a bɛ ƴɛ̀r kʋ̀ b.
15Zerizalɛm i, a bɛlɩ dem za na tɔlɛ pɩɛlɛ fʋ a
puore nɩ nuru a fʋ loba ƴãw.
Bɛ fuole na gɔwrɛ nɩ zuru
kɛ́ bɛ tʋ̃ɔ́ ɩ b la:
«A tẽ-kpɛ̃ɛ ŋa n'ʋ bɛ tɩ bʋɔlɛ a vɩɛl-bɛ-cɛ
nɩ a tẽ-daa za nʋ̃ɔ̀ ʋ?»
16A fʋ dɔ̃ dem za ƴɛ̀rɛ nɩ ƴɛ̀r-faar cáarɛ nɩ fʋ.
Bɛ fuole na nyɩrɛ nɩ nyɩmɛ a fʋ ƴãw,
Bɛ yere na: «Tɩ vɔl ʋ na.
A bibir tɩ na gùre a n'ʋ pãa nanɩ ta.
Ʋ vɩɛ na, tɩ nyɛ̃ ʋ na!»
17A Sore ɩ n a lɛ ʋ na tɩɛrɩ bin a,
ʋ tu n a lɛ ʋ na yel a,
a lɛ ʋ na ƴãw a nʋɔr a koro kãw za a.
Ʋ sãw nɩ bom za bɛr, ɛ́ bɛ zɔ nɩbaalʋ ɛ.
Ʋ ɩ na a dɔ̃ sob cɩlɛ a fʋ kpɩɛrʋ ƴãw,
ʋ ɩ na a fʋ bɛ-nɔnbɛ tɛr fãw dɔwlɩ.
*
18A Zerizalɛm nɩbɛ lãw nɩ socir been
cɩɩrɛ nɩ a Sore zie.
Sɩyɔ̃ tẽw dacĩ-kpɛ̃ɛ ɛ,
bɛr a fʋ mʋta-kʋ̃ɔ a gbɔlɛ
mɛ̃ bà-fʋɔla kʋ̃ɔ a,
mʋ̃tɔ̃w nɩ tɩ̃ɩsɔw.
Taa yel kɛ́ fʋ pɩ̃ɛnɛ na ɩ,
a mʋta-kʋ̃ɔ, a taa ŋmaarɛ towtow ɛ.
19Taa nyɔwr fʋ tʋɔra ɩ:
kone a tɩ̃ɩsɔw, tɛm tɛm za.
Wɛl a fʋ pʋɔ za a Sore niŋé.
Zɛw a fʋ nuru cɔw ʋ,
tʋ̃ɔ́ faa a fʋ bibiir
na kpiir a kɔ̃ a sɛ́ɛ gõgone za pʋɔ a.
*
20Sore e, jɩ́r nyɛ̃: ãa n'ʋ fʋ dɔwrɩ à à ŋá?
Pɔwbɛ na tʋ̃ɔ́ na tɛr tɩ 'wɔb a bɛ bibiir,
a bɛ bibi-pʋrmɛ bɛ na nɔnɛ nɔnɛ a bɩɩ?
Nɩr na tʋ̃ɔ́ na kʋ bàwr-maalbɛ
nɩ naaŋmɩn-ƴɛ̀r-manbɛ a fʋ zi-sõw pʋɔ bɩɩ?
21A pɔlbili nɩ a dɛb-nyamɛ lo na gã gã a sɛ́ɛ zu.
A zɛbr-sɔ-kpɛ̃ɛ kʋ n a ɩ̃ pɔwsɩrali nɩ a ɩ̃ pɔlbili.
A fʋ suur bibir a, fʋ kʋ bɛ na,
fʋ ŋmaarɩ bɛ nɩ a kɔkɛɛ bɛ zɔ n nɩbaalʋ ɛ.
22Fʋ bʋɔl'ɩ a ɩ̃ kpɛ-pɩɛl dem na ɩrɛ mɛ̃ dɛ̃bɩ̃ɛ a,
mɛ̃ cuw bibir ƴãw a.
Sore e, a fʋ suur bibir a,
nɩr bɛ tɩ cɩ̃ɛ ɩ, nɩr bɛ tɩ cãà vʋʋrɛ ɩ.
A bɛlɩ dem ɩ̃ na tɩ guoli ɛ́ nɔ̃w yaga za a,
a ɩ̃ dɔ̃ sob kʋ n bɛ za pàw pɛr.
Currently Selected:
A Lãw-mʋɔlɛ 2: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
