A Lãw-mʋɔlɛ 1
1
A Zerizalɛm ɩ na mɛ̃ pɔw-kʋɔr bɛ na zawrɩ bɛr a
1'Woi! Bɛ jɛ ʋ na bɛr,
a tẽ-kpɛ̃ɛ ŋa na tɩ ɩ nɩbɛ kʋrkʋrkʋr a!
Ʋ ɩ na mɛ̃ pɔw-kʋɔr a,
ʋl a yúor na tɩ yi yaga
a nɩ-bʋʋr-yoru sɔgɔ a,
ʋl na tɩ ɩ pɔw-nãà so a tẽ-ŋma-kʋ̀rɩ a,
ʋlɛ n'ɩ ŋan wa ɩ gbãgbaa!
2Ʋ mɩ́ kõ n a tɩ̃ɩsɔw
a ʋ kɔ́rɛ za tɩ vʋɔrɛ mʋta-kʋ̃ɔ.
A bɛlɩ dem za na tɩ nɔnɛ ʋ a pʋɔ a,
nɩr bɛ ka be mɔwlɛ ʋ ɛ.
A ʋ bárɩ za mɩl ʋ na,
ƴɛrɛŋa a, bɛ lɩɛb'ɩ a ʋ dɔ̃ dem.
3Vĩ nɩ gbãgba-tuo pʋɔ n'a
bɛ diwr a Zuda tẽw nɩbɛ za cere nɩ.
Bɛ kpɩɛr'ɩ nɩ-bʋʋr-yoru sɔgɔ,
ɛ́ bɛ nyɛrɛ zie na zɩ̃ ɛ.
A bɛlɩ dem za na tɩ diwr bɛ a
páw bɛ nɩ zie vo-yira na bɛ ka be a.
4A Sɩyɔ̃ tẽw sɛ́ɛ be n wahala pʋɔ,
nɩr bɛ cãà tuur a waar a cuwr ƴãw ɛ,
a ʋ nɩbɛ tuor-taa ziir gã nɩ zawlɛ.
A ʋ bàwr-maalbɛ kone na,
Pʋ-sãwna tɛr'ɩ a ʋ pɔwsɩrali.
Nyɛ̃ kpɩɛrʋ na tɛr a Sɩyɔ̃ a!
5A ʋ dɔ̃ dem tʋ̃ɔ́ ʋ na,
a ʋ dɔ̃dɔmɛ ƴãw ɓãa na.
Bʋ̃ʋ n'ʋ vɛ̃, a Sore n'ʋ dɔwrɛ ʋ,
a ʋ sãwna na yãwmɛ a zũú.
A nɩbɛ na zɛb tʋ̃ɔ́ bɛ a
dáa nɩ a bɛ bi-pɔlɛ ƴãw niŋé
bɛ cere a gbãgbaalʋ pʋɔ.
6A Sɩyɔ̃ tẽ-kpɛ̃ɛ nyɛ̃ nɩ a alɩ bome nɛ
na tɩ ɩ a ʋ yúor a, a cere.
A ʋ tõ-tõ-bi-bɛrɛ ɩ na mɛ̃ dʋn
na bɛ nyɛrɛ mʋ̃ɔ na 'wɔb a.
Bɛ bɛ tɛr fãw na zɔ
a bɛlɩ dem na diwr bɛ a niŋé ɩ.
7A ʋ bibie al ʋ na tɩ bɔrɛ gʋɔr ɛ́ nyɛrɛ vĩ a,
a Zerizalɛm tɩ lɛb'a tɩɛrɛ a ʋ bʋ̃-vɩɛlɩ za
ʋ na tɩ tɛr a koro za a.
A lɛn daar a ʋ nɩbɛ na tɩ lo
a bɛ dɔ̃ dem nuru pʋɔ a,
nɩr kãw za bɛ tɩ wa sõw ʋ ɛ.
A ʋ dɔ̃ dem tɩ nyɛ̃ ʋ na
ɛ́ ɩ ʋ la ʋ na tɩ lo a ƴãw.
8A Zerizalɛm sãw nɩ faa faa,
alɛ n'a so ʋ lɩɛbɩ sagɛ.
A bɛlɩ dem za na tɩ ƴãwnɛ ʋ a, yàalɛ ʋ na,
bʋ̃ʋ n'ʋ vɛ̃, bɛ nyɛ̃ nɩ a ʋ ƴã-gã-kpãkpol.
Ʋl ƴãw a, ʋ lɩɛb'a kone cere nɩ.
9A ʋ dɛwr mar'ɩ a ʋ kparʋ.
Ʋ bɛ tɩ tɩɛr k'aa na wa ŋmɛ̃ ʋ nɩ à ŋá ɩ.
A ʋ loba ŋa ùr ʋ na,
ɛ́ nɩr za bɛ ka be na mɔwl'ʋ ɛ.
Ʋ yere na: «Sore e, nyɛ̃ a ɩ̃ vĩ a,
nyɛ̃ a dɔ̃ sob na tʋ̃ɔ́ mɛ̃ a.»
10A dɔ̃ dem de nɩ a Zerizalɛm na-bome za.
Mɔ̃ mɩ̀, a tẽ-kpɛ̃ɛ ŋa nyɛ̃ nɩ a nɩ-bʋʋr-yoru
bɛ kpɛ a ʋ zi-sõw pʋɔ.
Ɛcɛ Sore e, fʋ tɩ piw bɛ nɩ sɔ́r,
kɛ́ bɛ ta kpɛ a fʋ lãw nɩbɛ pʋɔ ɩ.
11A ʋ nɩbɛ za kone na, bɛ bɔbr'ɩ bʋ̃-dɩrɩ.
Bɛ de nɩ a bɛ bʋ̃-vɩɛlɩ bɛ na tɩ tɛr a
tɛw nɩ bʋ̃-dɩrɩ, kɛ́ bɛ tʋ̃ɔ́ dɩ lɛb páw fãw.
A Zerizalɛm yere na:
«Sore e, nyɛ̃ a lɛ bɛ na yàalɛ mɛ̃ a.»
*
12A nyɩɩm za na tɔlɛ a ka a,
a faa ŋa bɛ páw nyɩ ɛ.
Nyɩ jɩ́r nyɛ̃: kpɩɛrʋ be n be ŋmɛ̃ mɛ̃ a ɩ̃ dem,
bɩɩ ŋmɛ̃ mɛ̃ a ʋl a Sore na ɩ ʋ lo a ɩ̃ zu
a ʋ su-tʋlʋ bibir a?
13Ʋ ɩ na vũu yi a saa-zu siw kpɛ a ɩ̃ ƴã-ganɩ́.
Ʋ ƴãw nɩ bɛra a ɩ̃ gbɛ́ɛ pile,
ɛ́ ɩ ɩ̃ 'law tɩ lo n kpaar.
Ʋ ɩ na ɩ̃ ɩ ɩ̃ yõ daadaa, a ɩ m bàalʋ bibie za.
14Ʋ ír'ɩ mimir ƴãw a ɩ̃ sãwna ƴãw.
Ʋ 'lẽ a na ɓã taa ɛ́ de a dɔwlɩ a ɩ̃ bawŋmamɛ zu.
A Sore siwr'ɩ a ɩ̃ fãw,
ʋ de mɛ̃ n'a ƴãw nɩbɛ
ɩ̃ na kʋ̃ tʋ̃ɔ́ ɩ bom a nuru pʋɔ.
15A Sore jɛ n a soja-gãdaar za
na tɩ be a ɩ̃ zie a bɛr.
Ʋ ɓã n zɛbr-nɩbɛ taa a ɩ̃ ƴãw,
k'ʋʋ tʋ̃ɔ́ nɩ a ɩ̃ pɔ́lɛ́ za pelẽpelẽ.
Ʋ nɛb'ɩ mɛ̃ nɩ gbɛ́ɛ,
a mãa, a Zuda tẽw Sɩyɔ̃,
mɛ̃ divɛ̃ tɩ-wɔmɛ a nɛbrʋ zie a.
16Alɛ n'a so ɩ̃ kone.
A ɩ̃ mimie ɩ n mʋta-kʋ̃ɔ cɔb!
Bʋ̃ʋ n'ʋ vɛ̃, a sob nɛ nãá mɔwlɩ mɛ̃
ɛ́ lɛb kʋ̀ m fãw ɩ̃ vʋʋrɛ a zãá nɩ mɛ̃ na.
A ɩ̃ bibiir bɔr'a, bʋ̃ʋ n'ʋ vɛ̃,
a dɔ̃dɔmɛ tɩ tɛr'ɩ fãw zuo.
17A Sɩyɔ̃ tùre nɩ a nuru,
ɛ́ nɩr bɛ mɔwlɛ ʋ ɛ.
A Sore na yel a zũú a,
a nɩbɛ na kpɩɛr pɩɛlɩ a Ɩsɩrayɛl a,
bɛ lɩɛb'ɩ a bɛ dɔ̃ dem.
A bɛ sɔgɔ a, a Zerizalɛm lɩɛb'ɩ sagɛ.
18A Sore dem de na,
bʋ̃ʋ n'ʋ vɛ̃, ɩ̃ bɛ tɩ sàw tu a lɛ ʋ na yel a ɩ.
Nyɩ bɛr wõ vla, nɩ-bʋʋrɛ za a, ɛ́ nyɛ̃ a ɩ̃ kpɩɛrʋ.
Bɛ diw nɩ a ɩ̃ pɔwsɩrali nɩ a ɩ̃ pɔlbili cen nɩ.
19Ɩ̃ tɩ bʋɔl'ɩ a bɛlɩ dem na nɔnɛ mɛ̃ a,
ɛcɛ, bɛ tɩ bɛ̀lɩ mɛ̃ na.
A ɩ̃ bàwr-maalbɛ nɩ a ɩ̃ yã-wulbɛ
tɩ kpi n a tẽ-kpɛ̃ɛ pʋɔ,
a lɛn daar bɛ na tɩ bɔbr a bʋ̃-dɩrɩ,
kɛ́ bɛ dɩ lɛb páw fãw a.
20Sore e, nyɛ̃ a ɩ̃ kpɩɛrʋ a!
A ɩ̃ pʋɔ 'lere mɛ̃ na!
A ɩ̃ tɩɛrʋ za dam'a,
bʋ̃ʋ n'ʋ vɛ̃, ɩ̃ sɩrɩ na ɩ nɩsaal-gaara!
A sɛ́ɛ pʋɔ a, a zɛbr-sɔ-kpɛ̃ɛ kʋ n a ɩ̃ bibiir.
A yir a, fʋ mɩ́ manɛ kɛ́ a kũuni tẽw n'a.
21A nɩbɛ wone na ɩ̃ na kone a,
ɛcɛ, nɩr bɛ mɔwlɛ mɛ̃ ɩ.
A ɩ̃ dɔ̃ dem za wõ n a ɩ̃ kpɩɛrʋ,
a ɩrɛ bɛ nɩ nʋ̃ɔ̀ a lɛ fʋ na ɩ m a:
fʋ ƴãw nɩ a bibir#1:21 Bibir ʋl fʋ na tɩ yel a: A Sore bibir'ʋ, a bibir ʋl ʋ na na dɩ n a nɩsaalbɛ za ƴɛ̀rʋ a. Nyɛ̃ Am 5.18, Ɩza 2.12 nɩ Zow 1.15. ʋl fʋ na tɩ yel a ʋ ta.
A mɩ̀ ŋmɛ̃ bɛ mɛ̃ a mãa a!
22Jɩ́r a bɛ ɩ-faar za kaa
ɛ́ ɩ bɛ mɛ̃ a lɛ fʋ na ɩ m
a ɩ̃ nɛ́ɛ-zawrʋ za zũú a.
Fʋ nyɛ̃ na: a 'woi 'woi n'a ɩ̃ dɛ mɩ́ tɛr,
ɛ́ a ɩ̃ mɩŋa za ɩ bàal.
Currently Selected:
A Lãw-mʋɔlɛ 1: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
