Zɔb 8
8
A ƴɛ̀rʋ a Bɩldaadɩ na ƴɛ̀r a
1Lɛ n'a a Bɩldaadɩ na yi Suwa a, tɩ de a ƴɛ̀rʋ yel a Zɔb:
2Fʋ ƴɛ̀rɛ na bɛ tɛr baarʋ daar ɛ.
A ɩ na mɛ̃ saa-sɛsɛb a.
3Fʋ tɩɛr k'aa Naaŋmɩn mɩ́ nyɔw nɩ a yel na tu sɔ́r a lɩɛbɩ bɩɩ?
Bɩɩ k'aa Kpɛnʋ-za-sob mɩ́ lɩɛb'ɩ a mɩnʋ?
4A fʋ bibiir tɔ̃w ɩ na sãw ʋ,
alɛ so ʋ ɩ bɛ páw a bɛ ɩ-faar sã-ya.
5Ɛcɛ a fʋ̃ʋ a, fʋ̃ʋ wa tori niwn bɔbr a Naaŋmɩn a,
fʋ̃ʋ wa lɔbr nuru zɛlɛ nɩ a Kpɛnʋ-za-sob yãayãa a,
6fʋ̃ʋ bɛ wa tɛr sãwna, ɛ́ tuur a yel-na-tu-sɔr-a pùor a,
a lɛn daar a, ʋ na kaarɛ nɩ fʋ zie,
ʋ na lɛb'a ƴãw fʋ a fʋ mɩnʋ pʋɔ.
7A lɛ fʋ na tɩ ŋmɛ̃ a tib daar a kʋ̃ ɩ bom za
a lɛ fʋ nãá wa ŋmɛ̃ a zie ɩ.
*
8Sowri a bɛl na de niwn dɔw a kaa,
ƴãw tobr a bãwfʋ a bɛ sãàkʋm-kore na bãw a ƴãw.
9Tɩɩm a, zãa ŋa nɩbɛ n'ɩ tɩ, tɩ bɛ bãw bom za ɩ.
Bʋ̃ʋ n'ʋ vɛ̃, a tɩ nyɔ-vʋʋrʋ a tẽw zu ka ɩ n ɓaarʋ lɩɛbɛ cere.
10Ɛcɛ bɛl a, bɛ na wul fʋ nɩ yã,
bɛ na ƴɛ̀r'ɩ fʋ na, bɛ na lɛb'a tɩɛrɩ zʋkpaɩ á ŋá lɔb kʋ̀ b:
11«Jimur dãw na bul zi-yoru a bɛ ɩ bà-ƴɔrɛ pʋɔ ɩ?
Bàa-kɛkɛr na tʋ̃ɔ́ na bàa ɛ́ bɛ páwr kʋ̃ɔ ɩ?
12A kʋ̃ɔ wa sɩrɛ wa báarɛ a, alɛ n'a mɩ́ de niwn ko,
a lɛn daar a na mɩ́ cãà ɩ cãpili bɛ kʋ̃ tʋ̃ɔ́ cɛ ɩ n bom a.»
*
13À ŋá n'a a bɛlɩ dem na yiire
a Naaŋmɩn bɛrɛ a yele mɩ̀ ŋmɛ̃.
A nɩ-faar tɩɛrʋ na wɛ na.
14A bɛ bɛ-mĩin-a na baar'a,
ɛ́ a tɩɛrʋ bɛ na ɓãá ƴãw bɛr a ɩ mʋ̃dɛr cow.
15Bɛlɛ wa yel kɛ́ bɛ tɩɛ a bɛ yir ƴãw a,
a yir mɩ́ dãdawlɛ na,
bɛlɛ saa fɩɩr'ʋ tɛr a, ʋ mɩ́ cãà na lo.
16Bɛlɛ n'ɩ bɛ ŋan mɛ̃ tɩ-ɓaar vib na àr mʋ̃tɔ̃w pʋɔ a,
tɩ-ɓaar na yɛ́r a ʋ wuli pàw a zaadɛ̃ a.
17A nyɩgɛ siw na tɩ lɩr taa a kʋsɛbɛ pʋɔ,
a tɔl'a siw kpɛ a pie bɔwrɩ pʋɔ.
18Ɛcɛ nɩr wa vʋ̃ɔ ʋ bɛr a ʋ beba zie a,
a ʋ beba zie mɩ́ yel'a k'ʋʋ bɛ dãw nyɛ̃ ʋ ɛ!
19A nɩ-faar nʋ̃ɔ̀ bɛ mɩ́ kɔwrɩ ɛ!
Ɛ́ nɩ-yoru nɛbɛ mɩ́ wa de a bɛ zie.
20Naaŋmɩn bɛ zawrɛ nɩr na bɛ tɛr sãwna a bɛrɛ ɩ,
ɛ́ mɩ̀ bɛ sõwne ɩ-fa-maalbɛ ɩ.
21Ʋ na ɩ na fʋ ŋmɛrɛ laarʋ, ɛ́ lɔbr kuryii.
22A fʋ dɔ̃ dem na nyɛ̃ nɩ vĩ, ɛ́ a nɩ-faar kʋ̃ cãà ɩ.
La Bible en Dagara © Alliance Biblique du Burkina Faso, 2013.