Zɔb 7
7
A Zɔb zɛbr'ɩ nɩ a Naaŋmɩn
1A nɩsaal nyɔ-vʋʋrʋ a tẽw zu tɛr'ɩ tuo yaga,
a ʋ bibie za nyɔ-vʋʋrʋ ɩ n nuru tõ-tõ-bie nyɔ-vʋʋrʋ.
2Mɛ̃ a lɛ gbãgbaa na tone mʋ̃tɔ̃w pʋɔ
bɔbr k'ʋʋ nãá kpɛ ɓaarʋ́ a,
mɛ̃ nuru tõ-tõ-bie na gùre a ʋ sã-ya a,
3lɛ n'a a ɩ̃ yele ŋmɛ̃:
cuwr za a, ɩ̃ kʋ̃ nyɛ̃ bom ɛ, ɛ́ a tɩ̃ɩsɔwr ɩ
kpɩɛrʋ tɩ̃ɩsɔwr a ɩ̃ zie.
4Ɩ̃ mɩ́ ganɛ na wa báarɛ ɛ́ yere: «Debor'a ɩ̃ na ìr?»
A zie mɩ́ sɔb'a bɛ tɛr vɩɛfʋ daar ɛ,
ɩ̃ɩ mɩ́ ƴaw lɩɛbɩ a tɩ̃ɩsɔw tɩ vɩɛ nɩ a zie.
5Zãzule nɩ natɩ-kowle n'a pàw a ɩ̃ ƴã-gan.
A ɩ̃ ƴã-gan za pur pur'a cire mɛ̀rɛ́.
6A ɩ̃ bibie tɔl'ɩ fɔ̃w zuo pɛn-wobre balɛ̃w,
a vʋʋrʋ ɩ̃ na tɩɛrɛ a fomiwr baar'a, a vʋʋrʋ mɩ̀ baarɩ.
*
7Naaŋmɩn i, lɛb tɩɛrɩ nyɛ̃:
pɩɛlʋ tɛwr'ɩ a ɩ̃ nyɔ-vʋʋrʋ,
ɩ̃ bɛ be za na lɛb bãw nʋ̃ɔ̀ ɩ.
8Fʋ̃ʋ na mɩ́ tɩ jɩ́rɛ mɛ̃ a, fʋ kʋ̃ lɛb nyɛ̃ m ɛ.
Fʋ na mɩ́ jɩ́r mɛ̃ na, ɩ̃ɩ kʋ̃ cãà be ɩ.
9Mɛ̃ a lɛ zũzuwr na mɩ́ nyɩl ɛ́ bɔr a,
lɛ n'a a nɩsaal na siwr a kpɩmɛ tẽw
kʋ̃ lɛb do wa a, ŋmɛ̃.
10Ʋ kʋ̃ lɛb wa a ʋ yir ɛ,
ɛ́ bɛ yiir ʋ bɛr a be ʋ na tɩ kpɩɛr a.
11A na ɩ à ŋá a, ɩ̃ kʋ̃ cãà ɩ a gbili ɛ,
suur kʋrɛ mɛ̃ na, alɛ so ɩ̃ na ƴɛ̀rɛ.
A ɩ̃ suur sãw nɩ ʋ za, lɛ so ɩ̃ na zɛbr.
12Mãa n'ɩ a kʋ̃ɔ-kpɛ̃ɛ bɩɩ a kʋ̃ɔ-kpɛ̃ɛ Dʋ̃-bɩɛ#7:12 Kʋ̃ɔ-kpɛ̃ɛ bɩɩ kʋ̃ɔ-kpɛ̃ɛ Dʋ̃-bɩɛ: A Levɩatã nɩ a Arahab n'a: koro kãw za dem suolu dʋ̃-bɛrɛ n'a. Bɛ manɛ nɩ a suolu á ŋá pʋɔ kɛ́ a Naaŋmɩn na ír a bome a, tɩ zɛb'a tʋ̃ɔ́ a Kʋ̃ɔ-kpɛ̃ɛ nɩ a kʋ̃ɔ-kpɛ̃ɛ Dʋ̃-bɩɛ, nyɔw a ƴãw gaso pʋɔ. Bʋ̃ʋ n'ʋ vɛ̃, a koro za dem nɩbɛ bɛ ŋa tɩ tɩɛrɛ na kɛ́ a Kʋ̃ɔ-kpɛ̃ɛ tɩ n'ɩ a Faalʋ kpɛnʋ kpɛb zie.,
fʋ ƴãw gùrbɛ gù m a ziir za a?
13Mãa wa yel k'ɩ̃ɩ na nyɛ̃ nɩ pɩ̃ɛnʋ a ɩ̃ gado zu a,
k'aa ɩ̃ bʋ̃-gana na ɩ n a ɩ̃ kpɩɛrʋ sɛw a,
14a lɛn daar'a fʋ mɩ́ ƴãw zán-faar a ƴãw mɛ̃ dɛ̃bɩ̃ɛ,
a lɛn daar'a fʋ mɩ́ ɩ ɩ̃ nyɛ̃ bʋ̃-nyɛrɩ
na vʋ̃ɔnɛ mɛ̃ pʋ̀lá a.
15A kɔ̃tɔ̃-suwle kpɛb tɩɛrʋ be n a ɩ̃ zie.
A kũu sa ɩ̃ na na cãà nyɛrɛ a kpɩɛrʋ a.
16Ɩ̃ tobr bɛ ka be ɩ! Ɩ̃ kʋ̃ cãà kʋralɛ ɩ!
A ɩ̃ nyɔ-vʋʋrʋ bɛ tɛr pɛr ɛ, bɛr mɛ̃ ɩ̃ pɩ̃ɛnɩ.
*
17Bʋ̃ʋ n'ɩ a nɩsaal fʋ tɩɛrɛ a ʋ yele sɛw à ŋá?
Bʋ̃ʋ n'ʋ so fʋ maal kaarɛ a ʋ zie sɛw à ŋá,
18fʋ jiele ʋ kaar biɓaarɛ za,
ɛ́ ɩrɛ ʋ kaar kʋrakʋralɛ?
19Debor'a fʋ na bɛr a ɩ̃ piwru?
Debor'a fʋ na bɛr mɛ̃ ɩ̃ vɔl mʋtaar?
20Ɩ̃ maal'ɩ yel-bier bɩɩ?
A ɩrɛ fʋ nɩ ŋmɩn nɩsaal-piwre e?
Bʋ̃ʋ n'ʋ so fʋ jɩɛrɛ mɛ̃? Ɩ̃ bɛ cãà tɛr tɛrʋ bɩɩ?
21Fʋ kʋ̃ tʋ̃ɔ́ de a ɩ̃ nɩ-gaara ɩb bɛr a baar ɛ?
Fʋ kʋ̃ tʋ̃ɔ́ dɩ a ɩ̃ sãwna suur kʋ̀ m ɛ?
Mãa n'ɩ ŋan gã uuru pʋɔ,
fʋ̃ʋ wa bɔblɛ bɔbr mɛ̃ a lɛn daar a, ɩ̃ kʋ̃ cãà ɩ.
La Bible en Dagara © Alliance Biblique du Burkina Faso, 2013.