Zɔb 9
9
A Zɔb sɔw nɩ a Bɩldaadɩ ƴɛ̀rʋ yel: a Naaŋmɩn kpɛmɛ na zuo mɛ̃
1Lɛ n'a a Zɔb tɩ de a ƴɛ̀rʋ yel:
2Sɩza n'a, ɩ̃ bãw na kɛ́ à ŋá n'a a ɩ.
Ŋmɩŋmɩn za n'a nɩsaal na tɛr yel-mɩŋa a Naaŋmɩn niŋé?
3Alɛ ɩ mɛ̃ bɛ ŋmɩɛr'ɩ ʋ nɩ nɔkpɛn a,
bɛ na ƴɛ̀r'ɩ ƴɛ̀r-bie túr, ʋʋ bɛ sɔw been ɛ.
4Yã-bãwfʋ za nãà nɩ fãw za sob,
ãa n'ʋ ga bawr a ʋ zu ɛ́ bɛ nyɛ̃ a?
5Ʋ mɩ́ ɓáw nɩ a tan tɩ bin zi-yoru, ɛ́ a bɛ bãwnɩ a ɩ,
ʋ mɩ́ nyɛ̃ nɩ suur da a lɔb.
6Ʋ mɩ́ ɩ n a tẽsɔw ʋ gbiwri tɩ tɔ a pɛr
ɛ́ ɩ a kpule na tɩɛ ʋ tɛr a, a damnɛ.
7Ʋ mɩ́ ɩ n a mʋ̃tɔ̃w ʋ bɛ pur ɛ,
ɛ́ piw a ŋmar-bie tɛr a bɛ nyɩwrɛ ɩ.
8Ʋ mɩ́ dɔl'ɩ a salom ʋ yõ,
ɛ́ cere a kʋ̃ɔ-kpɛ̃ɛ kʋ̃ɔ-mie zu.
9Ʋlɛ n'ʋ maalɛ a Dɛ-kʋɔr-lɛjãw,
a Baa-nɩ-ŋmãam-nɩ-pɔw-nyãw,
a Kɔ̃wmɛ nɩ a ŋmar-bie al bɛ na bʋɔlɛ
Saa-pɛrɩ́-dʋrʋ-lowr diru a.
10Ʋlɛ n'ʋ maalɛ yel-bɛrɛ na bɛ tɛr bãwfʋ a,
nɩr kʋ̃ tʋ̃ɔ́ sɔ́r a ʋ nɔ-ɓãa-yele ɩ.
11Ʋ mɩ́ tɔl'a pɩɛlɩ mɛ̃ ɩ̃ɩ bɛ nyɛ̃ ʋ ɛ,
ʋ mɩ́ tɔl'a cen ɩ̃ɩ bɛ bãwnɩ a ɩ.
12Ʋlɛ wa de bom nɩ fãw a,
ãa n'ʋ na yel k'ʋʋ lɛb tɩr?
Ãa n'ʋ na sàw sowr'ʋ:
«Bʋ̃ʋ n'ɩ à ŋá fʋ na pãa ɩrɛ a?»
13Naaŋmɩn bɛ nyɔwr a ʋ suur ɛ.
A kʋ̃ɔ-kpɛ̃ɛ pʋɔ dʋ̃-bɩɩr,
a Arahab#9:13 Arahab: Nyɛ̃ 7.12 nɩ 26.12. nɩ a ʋ kpɛ-ta-dem gã nɩ a ʋ pile.
*
14A na ɩ à ŋá a, ɩ̃ na tʋ̃ɔ́ na ƴɛ̀r lɩɛr'ɩ ʋ bɩɩ?
Ƴɛ̀r-bie abobe n'a ɩ̃ na ƴɛ̀r tʋ̃ɔ́ nɩ ʋ?
15Mãa saa tɛr yel-mɩŋa a, ɩ̃ bɛ tɛr sɔwfʋ na sɔw ɛ.
A ɩ̃ ƴɛ̀r-maalɛ n'ʋ a fɛr k'ɩ̃ɩ zɛlɛ.
16Mãa saa bʋɔl'ʋ ƴɛ̀rʋ zie ʋ sàw a,
ɩ̃ kʋ̃ sàw tɩɛrɛ k'ʋʋ bɛr'a wõ m ɛ.
17Ʋ dɔwrɛ mɛ̃ na ɛ́ a bɛ tɛr pɛr ɛ,
ɛ́ ƴãwnɛ mɛ̃ natɩɛ dɔwlɛ taa zawlalɛ.
18Ʋ bɛ sàwr ɩ̃ na vʋʋrɩ ɛ, ɛ́ ƴãw mɛ̃ ɩ̃ wone tuo.
19Fãw yele wa n'a a, ʋlɛ n'ɩ fãw.
Ƴɛ̀rʋ maalʋ yele wa n'a a,
ãa n'ʋ na bʋɔlɩ mɛ̃ a ƴɛ̀rʋ zie?
20Mãa saa tɛr yel-mɩŋa a,
a ɩ̃ nʋɔr na yel'a k'ɩ̃ɩ sãw na,
ɩ̃ za saa n'ɩ ŋa a, ʋ na wul'a k'ɩ̃ɩ ɩ n nɩ-faa.
21Ɩ̃ za saa n'ɩ ŋa a, a mãa tɔr za kʋ̃ bãwnɩ a ɩ.
A nyɔ-vʋʋrʋ bɛ ɩrɛ mɛ̃ vʋla ɩ.
22Mãa zie a, nɩr na bɛ tɛr sãwna
bɩɩ nɩr na tɛr sãwna a, a za ɩ n been,
alɛ so ɩ̃ sàw yel k'aa Naaŋmɩn mɩ́ kʋ n
a nɩr na bɛ tɛr sãwna a
lãwnɩ a nɩr na tɛr sãwna a.
23Yel-faa wa ùr ta kʋrɛ nɩbɛ na bɛ tɛr sãwna a,
a Naaŋmɩn mɩ́ laar'a, a na wone bɛ a ƴãw.
24Tẽw kãw wa lo nɩ-kʋrbɛ nuru pʋɔ a,
ʋ mɩ́ ƴãw na a ƴɛ̀r-maalbɛ bɛ nyɛ̃ a ɩ!
Ʋlɛ bɛ wa n'ʋ mɩ́ ɩ à à ŋá, ãa pãa n'ʋ a?
*
25A ɩ̃ bibie baar'ɩ fɔ̃w zuo zɔ-zɔrɛ na zɔrɛ a,
a tɔl'a ɛ́ bɛ bãw nʋ̃ɔ̀ ɩ,
26a tɔl'a mɛ̃ bàa-kɛkɛɛ gbor-kpɛ̃ɛ na tʋ̃ɔ̀nɛ kʋ̃ɔ zu a,
a tɔl'a mɛ̃ sɩla na siw fĩi ʋ nɛn ƴãw a.
27Mãa wa yel ɩ̃ tʋɔra: yiiri a fʋ kpɩɛrʋ,
ɩ a fʋ niwn ʋ vɩɛl, laar,
28a ɩ̃ kpɩɛrʋ za mɩ́ ƴãwnɛ mɛ̃ nɩ dɛ̃bɩ̃ɛ,
ɩ̃ɩ bãwnɩ a a Naaŋmɩn na kʋ̃ yel k'ɩ̃ɩ bɛ tɛr sãwna a.
29Mãa wa ɩ sãwna sob a fʋ zie a,
ɩ̃ lɛb bãw bàlɛ ɩ̃ tʋɔra zawlalɛ bʋnʋ ƴãw?
30Mãa saa ɩ mɛ̃ ɩ̃ so n kʋ̃ɔ nɩ sɩfan a,
mãa saa pɛ́w a ɩ̃ nuru nɩ zɩ̃ɛ a,
31fʋ na nyɔw mɛ̃ na 'lɔr mɛ̃mɛrɛ pʋɔ,
ɛ́ a lɛn daar a, a ɩ̃ bʋ̃-suuri tɛɛ za na jewre mɛ̃ na.
32Bʋ̃ʋ n'ʋ vɛ̃, a Naaŋmɩn bɛ ɩ nɩsaal mɛ̃ a mãa a ɩ.
Ɩ̃ kʋ̃ tʋ̃ɔ́ sɔw ʋ ɛ, ɛ́ tɩ kʋ̃ tʋ̃ɔ́ lãw cen ƴɛ̀rʋ-dɩb zie ɩ.
33A tɩ cara pʋɔ a, yel-maalɛ bɛ ka be
na ír nũu dɔwlɩ a tɩ za ayi zu ɛ#9:33 A yel-maalɛ na ír nũu dɔwlɩ nɩbɛ ayi na zɛbr taa a zu a, a wul'ɩ a fãw ʋ na tɛr na ɩ bɛ lɛb kpɛ taa a. A ka a, a Naaŋmɩn nɩ a Zɔb nɛbɛ.!
34Ʋ nãá piw nɩ a Naaŋmɩn tɛr ʋ ta ŋmɩɛr mɛ̃ ɩ,
ɛ́ a dɛ̃bɩ̃ɛ kʋ̃ʋ cãà kʋrɛ mɛ̃ ɩ.
35Ɛcɛ a Naaŋmɩn na faa ƴãwnɛ mɛ̃ a pʋl-vʋ̃ɔ a,
ɩ̃ kʋ̃ tʋ̃ɔ́ ƴɛ̀r faa ɩ̃ tʋɔra mɛ̃ a lɛ ɩ̃ nãá ɩ a ɩ.
La Bible en Dagara © Alliance Biblique du Burkina Faso, 2013.