Zɔb 6
6
A Zɔb sɔw nɩ a Elifaazɩ ƴɛ̀rʋ
1Lɛ n'a a Zɔb tɩ de a ƴɛ̀rʋ yel:
2'Woi, bʋ̃ʋ pãa ɩ bɛ bɛ ker a ɩ̃ kpɩɛrʋ tɩbrʋ bãw a!
Bʋ̃ʋ pãa ɩ bɛ bɛ wob a ɩ̃ wʋ̀ʋr dɔwlɩ bʋ̃-kera zu a!
3A tɩbrɛ na zuo kʋ̃ɔ-kpɛ̃ɛ nʋɔr biire, alɛ so ɩ̃ bʋ̀nɛ ƴɛ̀rɛ.
4Bʋ̃ʋ n'ʋ vɛ̃, a Kpɛnʋ-za-sob pime kpɛ n a ɩ̃ ƴã-ganɩ́,
ɛ́ a lɔw de a ɩ̃ ƴã-gan za.
Pʋl-vʋ̃ɔ bʋʋrɛ bʋʋrɛ na yi a Naaŋmɩn zie a cɔrɩ nɩ a ɩ̃ ƴãw.
5Bõw-gaara dãw na àr kɔw mɔ̃-ɓaar ɛ́ kone e?
Náab dãw na nyɛ̃ mʋ̃ɔ bɛr ɛ́ ùore e?
6Ãa dɩrɛ bʋ̃-ɓaar-fɔb ɛ́ bɛ ƴãw nyaarʋ?
Nɔ̃-jɛl-kɛr kʋ̃ɔ-pla tɛr'ɩ nʋ̃ɔ̀ ɔ?
7Ɩ̃ bɛ bɔbr k'ɩ̃ɩ tɔ a bʋ̃-dɩrɩ á ŋá kãw za ɩ.
A ɩ̃ kpɩɛrʋ ɩ n bʋ̃-dɩra na gele mɛ̃ pʋɔ a.
*
8Ãa n'ʋ na ɩ a ɩ̃ zɛlʋ tu?
Ãa n'ʋ na ƴãw a Naaŋmɩn kʋ̀ m a bom ʋl ɩ̃ na tɩɛrɛ a?
9A Naaŋmɩn nãá nɩ̃ɛ ƴɛ́r mɛ̃ ŋmɛr a nʋɔr kʋ,
ʋ ír a ʋ nũu na piw mɛ̃ tɛr a, ɛ́ báa kʋ m!
10Ɩ̃ nãá nyɛ̃ nɩ mɔwlʋ blã,
ɩ̃ nãá wõ n nʋ̃ɔ̀ zaa pʋrɩ a dɔwr-kpɛ̃ɛ ŋa pʋɔ,
ɩ̃ kʋ̃ʋ tɩ yiiri a lɛ a Naaŋmɩn na ɩ sõw a na yel a bɛr ɛ.
11A ɩ̃ fãw wa, ɩ̃ na cãà ƴãw a ɩ̃ tɩɛrʋ bom ƴãw?
Debor nɩ̃ɛ nɩ a ɩ̃ kũu daar
ɩ̃ na cãà fɛrɛ ɩ̃ tʋɔra k'ɩ̃ɩ vʋʋrɛ?
12Pìir fãw n'a ɩ̃ tɛr bɩɩ?
A ɩ̃ ƴã-gan kpɛmɛ na man kur-zɩɛ bɩɩ?
13A ɩ lɛ a sõwfʋ ɩ̃ na gùre a ɩ zi-vuo bɩɩ?
Ɩ̃ bɛ nyɛ̃ sõwfʋ za ʋ?
*
14A nɩr a kanyir na baar'a sɛw na
k'ʋʋ mɩ́ nyɛ̃ mɔwlʋ a ʋ tɔ zie,
alɛ bɛ ɩ lɛ, ʋ kʋ̃ cãà zɔrɛ a Kpɛnʋ-za-sob ɛ.
15A ɩ̃ bárɩ yi m'ɩ pùor mɛ̃ fʋɔla kʋ̃ɔ na zɔrɛ a,
mɛ̃ kʋ̃ɔ na zɔ kɛ́ bɛr a bà-dĩo a.
16A sa-ƴɔɔ daar a, a fʋɔlɩ mɩ́ tuore nɩ a kʋ̃ɔ-ɓʋ̃tʋrʋ,
a lɛn daar a kʋ̃ɔ na gúr kpawlɩ
nɩ a kʋ̃ɔ-kube na mɩ́ wa nyɩlɛ a.
17Ɛcɛ a ũon a, a mɩ́ sɩr'a,
a tʋlʋ daar a, a mɩ́ ko na gã.
18A al ƴãw a, a nɩbɛ na mɩ́ zɔm nyɔ̃wmɩ
tɔ̃w tu taa cere a, mɩ́ bɩɛ na tɔl kpɛ
a wɛja-kpalɛ pʋɔ tɩ bɔr.
19A nɩbɛ na zɔm nyɔ̃wmɩ tɔ̃w tu taa
yi n Teman tẽw a, tɩ jɩ́rɛ nɩ a fʋɔlɩ á ŋá,
a sɔr-tɔlbɛ na yi a Saba a tɩ tɩɛrɛ a na.
20Ɛcɛ vĩ tɩ nyɔw bɛ na bɛ na tɩ tɩɛrɛ a a.
Bɛ na tɩ ta a fʋɔlɩ á ŋá pɛr a, a ɩ na mɛ̃ bɛ ɩ ŋmɩn a.
21À à ŋá n'a nyɩ ŋmɛ̃ a nyɩ bá zie,
nyɩ na wa nyɛ̃ a ɩ̃ kpɩɛrʋ a, dɛ̃bɩ̃ɛ nyɔw nyɩ na.
22Ɩ̃ dãw na zɛlɩ bom a nyɩ zie e?
Ɩ̃ dãw na yel kɛ́ nyɩ ír a nyɩ tɛra bʋ̃-kãw kʋ̀ m,
23tʋ̃ɔ́ faa mɛ̃ dɔ̃ sob kãw nuru pʋɔ
ɛ́ ír mɛ̃ bɛr a po-to-sob nuru pʋɔ ɔ?
24Nyɩ caalɩ a ɩ̃ yã, ɩ̃ɩ na pàw nɩ a ɩ̃ nʋɔr.
Nyɩn lowr'a ɩ̃ tuli? Nyɩ wul ɩ̃ nyɛ̃.
25Yel-mɩŋa ƴɛ̀r-bie bɛ sãwnɛ nɩr pʋɔ ɩ,
ɛcɛ nyɩ na yel k'ɩ̃ɩ sãwna a, a sãwna n'ɩ buor?
26A ƴɛ̀rʋ ɩ̃ na ƴɛ̀r sãw a n'a nyɩ bɔbr kɛ́ nyɩ yere bɩɩ?
Ɛcɛ, nɩr a tɩɛrʋ za na wɛ a ƴɛ̀rʋ bɛ mɩ́ tɛr pɛr ɛ.
27Nyɩ na tʋ̃ɔ́ na ŋmɛ gbãw de bi-kpieb,
ɛ́ sàw nyɔw a nyɩ bá kʋɔrɩ!
28A na ɩ lɛ a, nyɩ maal jɩ́r mɛ̃!
Ɩ̃ na sàw na ŋmãa ziri kpɩlɩlɩ lɛ kʋ̀ nyɩ ɩ?
29-30A ɩ̃ ƴɛ̀rʋ ɩ n zir-ŋmarɛ ƴɛ̀rʋ bɩɩ?
Ɩ̃ na tʋ̃ɔ́ na bɛ bãw bom na ɩ faa a bɩɩ?
Nyɩ jɩ́r mɛ̃ nyɛ̃: ziri ta ka mãa nɩ a nyɩɩm cará ɩ!
Ɩ̃ lɛb maal yel, nyɩ jɩ́r mɛ̃ nyɛ̃,
ɛ́ nyɩ na nyɛ̃ na k'ɩ̃ɩ bɛ tɛr sãwna ɩ.
La Bible en Dagara © Alliance Biblique du Burkina Faso, 2013.