Zɔb 5
5
1Ŋmɛ cɛl kaa, ãa n'ʋ na sɔw fʋ?
Malkɩ buor zie n'a fʋ na ƴɛ̀rɛ?
2Suur'a mɩ́ kʋ a dãbol sob, ɛ́ nyuur kʋ a gẽgemi sob.
3Ɩ̃ tɩ nyɛ̃ nɩ dãbol sob a yele za na cere vla a,
ɛcɛ ɩ̃ tɩ ŋmɛ na ƴãw a ʋ yir daadaalɛ, yel:
4«A ʋ bibiir, bɛ taa nyɛrɛ sõwfʋ kãw za ɩ,
bɛ dɩ n bɛ ƴɛ̀rʋ, ƴãw bɛ kũu-dɔwrʋ ɛ́ nɩr taa ƴɛ̀rɛ sɔwr ɛ!
5A bʋ̃-kʋ́ɔrɩ ʋ na de a, a maalɛ nɩ-yoru!
Bɛlɛ saa mɩl gʋʋr pàw a a, bɛ̃ɛ cen tɩ de a!
A nɩ-foli, bɛ de a ʋ bʋ̃-tɛrɩ za!»
6Bʋ̃ʋ n'ʋ vɛ̃, tẽsɔw bɛ n'a a faalʋ yire ɩ,
tẽw bɛ n'a a nãw-woro mɩ́ bul yi ɛ.
7Ɛcɛ nãw-woro ƴãw n'a a nɩsaal dɔw,
mɛ̃ a vũu-zɛlɛ na be saa-zu ƴaw-dob ƴãw a.
*
8Mãa tɩ n'ɩ fʋ̃ʋ a, Naaŋmɩn zie n'a ɩ̃ nãá ƴɛ̀rɛ,
ʋlɛ n'ʋ ɩ̃ nãá tɩ manɩ a ɩ̃ yel kʋ̀.
9Ʋlɛ n'ʋ maalɛ yel-bɛrɛ na bɛ tɛr bãwfʋ a,
nɩr kʋ̃ tʋ̃ɔ́ sɔ́r a ʋ nɔ-ɓãa-yele ɩ.
10Ʋlɛ n'ʋ mɩ́ ƴãw a saa mĩ ƴãw a tẽw za,
ɛ́ ƴãw a sa-bie lo a póru pʋɔ.
11Ʋlɛ n'ʋ mɩ́ zɛw a bɛlɩ dem bɛ na siwri a,
ɛ́ ɩ a pʋ-sãwnɩ dem bɛ nyɛ̃ a faafʋ.
12Ʋlɛ n'ʋ mɩ́ sãw a cɩbɛ dem pʋ-tɩɛrʋ bɛr,
bɛ bɛ mɩ́ tʋ̃ɔ́ ɩ a lɛ bɛ na bɔbr kɛ́ bɛ ɩ a ɩ.
13Ʋlɛ n'ʋ mɩ́ nyɔw a yã-bãwnbɛ a bɛ cɩbɛ bɛrɩ pʋɔ,
ɛ́ mɩ́ de niwn bãw a nɩsaal-libelibe pʋ-tɩɛrʋ.
14Bɛ mɩ́ gbõgbore nɩ lige pʋɔ a mʋ̃tɔ̃-tuo
ɛ́ bɔblɛ a mʋ̃tɔ̃-tuo mɛ̃ tɩ̃ɩsɔw a.
15Ɛcɛ Naaŋmɩn mɩ́ faa nɩ a nɩr
a kanyir na baar'a a bɛ nuru pʋɔ,
ɛ́ ír a nã́w sob a fãw dem nuru pʋɔ.
16À ŋá n'a tɩɛrʋ mɩ́ lɛb be be a bãbàal ƴãw,
ɛ́ a ɩ-fa-maalbɛ pàw a bɛ nɛ́ɛ.
17Nyɛ̃: zu-nʋ̃ɔ̀ sob'ɩ a sob nɛ a Naaŋmɩn na kpãanɛ a.
A na ɩ lɛ a, taa zawrɛ a wulu a kpɛnʋ-za-sob na kʋ̀rɛ fʋ a ɩ.
*
18Naaŋmɩn n'ʋ mɩ́ ƴãw a natɩr ɛ́ lɛb 'lẽ,
a ʋ nũu n'ʋ mɩ́ ŋmɛ ƴãw a bàalʋ ɛ́ lɛb sanɩ.
19Gb'a à ŋá za, ʋ na faa fʋ nɩ a kpɩɛrʋ pʋɔ,
ɛ́ a baarʋ daar a, a faa bɛ lɛb páwr fʋ ɛ.
20A kɔ̃ daar a, ʋ kʋ̃ sàw fʋ kpi ɛ,
ɛ́ a zɛbr pʋɔ, ʋ na faa nɩ a fʋ nyɔ-vʋʋrʋ.
21Ʋ na piw fʋ na tɛr a gɛgɛ-ƴɛ̀rʋ ƴãw,
ɛ́ ɩ fʋ bɛr dɛ̃bɩ̃ɛ a zie sãwfʋ daar.
22Fʋ tobr kʋ̃ ka a zie na sãw a nɩ a kɔ̃ ƴãw ɛ,
fʋ kʋ̃ zɔrɛ a wɛ-dʋ̃-faar dɛ̃bɩ̃ɛ ɩ.
23Fʋ kʋ̃ bãw a yele á ŋá na mɩ́ sãwnɛ a fʋ póru a ɩ:
a kʋsɛbɛ bɛ na mɩ́ lɔb ƴãw a, nɩ a dʋn na mɩ́ tɔlɛ a.
24Fʋ na bãw nɩ a ƴã-ɓaarʋ a fʋ yir za pʋɔ.
Fʋ̃ʋ wa jɩ́rɛ a fʋ dʋn kaar a, a za na be n be.
25Fʋ na nyɛ̃ nɩ a fʋ bibiir bɛ yãwmɛ bɛ tɛr vuo ɩ,
ɛ́ a bɛ yan ɩ mɛ̃ póru pʋɔ mʋ̃ɔ a.
26Fʋ na tɛr'ɩ fãw tɩ ta n a fʋ kũu daar
mɛ̃ ble zuru bɛ na 'lẽ ɓã taa a bʋ̃-dieri-deb daar a.
27Nyɛ̃, tɩ zanɩ nɩ a yel ŋa tɩ tɔ:
à ŋá n'a ʋ sɩrɩ ŋmɛ̃, bɛr wõ ɛ́ ɩ ʋ sõw fʋ.
La Bible en Dagara © Alliance Biblique du Burkina Faso, 2013.