Zɔb 4
4
A ƴɛ̀rʋ a Elifaazɩ na ƴɛ̀r a: zu-nʋ̃ɔ̀ sob'ɩ a ʋlɩ sob a Naaŋmɩn na kpãanɛ a!
1Lɛ n'a a Teman tẽw, Elifaazɩ, tɩ de a ƴɛ̀rʋ yel a Zɔb:
2Ɩ̃ bɛ sàw ƴɛ̀r a fʋ zie,
a fʋ kanyir za na baar'a ƴãw.
Ɛcɛ ɩ̃ kʋ̃ tʋ̃ɔ́ cãà ɩ gbili ɛ.
3Fʋ̃ʋ na tɩ wul nɩ-yaga yaga
ɛ́ mɩ́ tɩ ɩ a bɛlɩ dem na bàl a
bɛ lɛb tɛr kanyir a,
4fʋ̃ʋ a ƴɛ̀rʋ na mɩ́ tɩ nyɔw
a bɛlɩ dem na sar lo a bɛ lɛb ìr a,
ɛ́ ɩ a bɛlɩ dem na gɔ a bɛ lɛb dʋɔ a,
5fʋ̃ʋ n'ɩ ŋan a kpɩɛrʋ ta fʋ lore!
Fʋ̃ʋ n'ɩ ŋan a kpɩɛrʋ páw fʋ yarɛ!
6A fʋ tɛra tɛwr'a tɩ so fʋ zɔrɛ a Naaŋmɩn ɩ?
A alɩ bome nɛ ƴãw fʋ na tɩ ƴãw a fʋ tɩɛrʋ a,
al tɛwr'a tɩ so fʋ ɩrɛ a vla a?
7Tɩɛrɩ vla nyɛ̃ Zɔb i: kpɩɛrʋ dãw na kʋ
nɩbɛ na bɛ tɛr sãwna a, bɩɩ kʋ nɩ-mɩn ɩ?
8Yel ŋa n'ʋ mãa nyɛ̃:
a bɛlɩ dem na kʋɔr a faalʋ
ɛ́ bʋ̀rɛ a nãw-woro a,
a faalʋ nɩ a nãw-woro n'a bɛ mɩ́ cɛ.
9Naaŋmɩn nʋɔr pɩɛlʋ mɩ́ kʋ bɛ na,
a ʋ suur vũu mɩ́ dɩ bɛ na kʋ.
10Ʋ mɩ́ ɩ n a bɛ gbẽw uoru a baarɩ,
ɛ́ kar a dʋ̃-faar á ŋá nyɩmɛ.
11Lɛ n'a a gbẽw kpi,
ʋ na bɛ tɛr bom za na dɩ a ƴãw,
ɛ́ a gbẽw-nyãw bili zɔ yaarɩ.
*
12Ƴɛ̀rʋ kãw sɔwl'a ta m,
a ɩ̃ tobr wõ n waalʋ na waalɛ zaa bɛ̀lbɛ̀l a.
13A tɩ̃ɩsɔw zánʋ pʋɔ,
a lɛn daar a nɩsaalbɛ na mɩ́ gúr kpalɩtam a,
14dɛ̃bɩ̃-mawfʋ kãw tɩ nyɔw mɛ̃ na ɩ̃ màwr ɩ̃ za.
15Pɩɛlʋ kãw tɩ ŋmɛ m'ɩ a niwn
ɛ́ ɩ zugamɛ bɩrɛ mɛ̃.
16Nɩr kãw tɩ àr'ɩ saaƴẽwn a be,
ɩ̃ tɩ bãw ʋ na gu, dasule tɩ be n a ɩ̃ niŋé.
Gbili tɩ n'a sɛr, ɛ́ a pùorí
ɩ̃ wõ a ʋ kɔkɔr ʋ yere:
17«A nɩsaal na tʋ̃ɔ́ na
ɩ nɩ-mɩŋa zuo a Naaŋmɩn ɩ?
A nɩsaal na tʋ̃ɔ́ na vɩɛl zuo a ʋ Íre e?»
18Bɛl nyɛ̃: a Naaŋmɩn bɛ mɩ́ wa ƴãw
a ʋ tɩɛrʋ a ʋ malkɩ mɩnɛ ƴãw a,
ʋlɛ mɩ́ wa nyɛ̃ sãwna yere a tõ-tõ-biir
na be a ʋ zie a salom zu a zie a,
19ŋmɩŋmɩn n'a ʋ na tʋ̃ɔ́ ƴãw a ʋ tɩɛrʋ
a nɩsaalbɛ ƴãw?
Bʋ̃ʋ n'ʋ vɛ̃, yawra n'a bɛ mɛ n bɛ,
ɛ́ a bɛ ƴã-gamɛ ɩ uuru tɛwr!
Bɛ na tʋ̃ɔ́ na taalɩ bɛ kʋ mɛ̃ nazʋɔ a.
20Mʋ̃tɔ̃-been yõ, bɛ ƴɛ́r bɛ na ŋmɛr
bɛ bɔr a nʋɔr kʋ, ɛ́ nɩr bɛ cɛlɛ be ɩ.
21Nɩ-yoru de nɩ a na-bome bɛ na páw a,
ɛ́ bɛlɛ n'ɩ bɛ ŋa kpi bɛ za,
bɛ na bɛ bãw yã a.
La Bible en Dagara © Alliance Biblique du Burkina Faso, 2013.