Zɔb 3
3
A ZƆB NƖ A Ʋ BÁRƖ ATA ƳƐ̀R-SƆW-TAA
3—31
A Zɔb zɛbr'a yere: «Bʋnʋ ƴãw n'a ɩ̃ cãà vʋʋrɛ?»
1A Zɔb pãa wa tɩ háa nɩ nʋɔr ŋmɛ ƴãw a ʋ dɔwfʋ bibir. 2Ʋ tɩ de nɩ a ƴɛ̀rʋ yel à ŋá:
3A ɩ̃ dɔwfʋ bibir, ʋ bɔr
nɩ a tɩ̃ɩsɔw ʋl na yel: «Bɛ ŋmãa nɩ dɛble sɩɛ!»
4A bibir ŋa, ʋ lɩɛbɩ lige!
A Naaŋmɩn na be a saa-zu za a,
ʋ taa ŋmɛlɛ kaar ʋ ɛ!
Cãà kãw za taa caalɛ ʋ ɛ!
5Liw-varkpara, ʋ so a bibir ŋa,
zũzuwr sɛbla malmal, ʋ piw ʋ tɛr,
a zie, ʋ sɔb a mʋ̃tɔ̃-tuo.
6A tɩ̃ɩsɔw ŋa, ʋ lɛb bãw liw,
bɛ ta sɔ́r ʋ ƴãw a yũon bibie pʋɔ ɩ,
ʋ ta pʋɔ a cuwr sɔ́rʋ pʋɔ ɩ!
7Pɔw za, ʋ ta lɛb ŋmãa bie sɩɛ a tɩ̃ɩsɔw ŋa ɩ!
Nʋ̃ɔ̀ cɛlnyɛ̃ za ta lɛb ŋmɛ a tɩ̃ɩsɔw ŋa ɩ!
8A bɛlɩ dem na ŋmɩɛr ƴãwn a bibie a,
bɛ ŋmɛ ƴãw ʋ,
bɛl na bãw a wa-bɩɛ Levɩatã#3:8 Wa-bɩɛ Levɩatã: Koro za dem suolu pʋɔ dʋ̃-bɩɛ kãw n'ʋ. Ʋlɛ tɩ n'ɩ a faalʋ kpɛnʋ za bãwfʋ, ɛ́ bɛ tɩ tɩɛrɛ na k'ʋʋ mɩ́ tʋ̃ɔ́ na vɔl a mʋ̃tɔ̃w. Bɛ mɩ́ tɩ tɩɛrɛ na k'ʋʋ ɩ n dʋ̃-bɩɛ kãw na tɛr zuru ayopõi a, bɩɩ k'ʋʋ ɩ n waab, bɩɩ ɩba. Nyɛ̃ Zɔb 40.25—41.26. sɩ̃wfʋ a.
9A ʋ vɩɛfʋ daar ŋmar-bie, a lɩɛbɩ lige!
A tɩ̃ɩsɔw ŋa, ʋ tɩɛrɛ a cãà ɛ́ taa nyɛrɛ ʋ ɛ!
Ʋ taa nyɛrɛ a zie na vɩɛrɛ a cãà ɩ.
10Ʋ na bɛ ɩ bom za piw a ɩ̃ dɔwfʋ a ƴãw,
ɛ́ bɛ ɩ bom za ʋ sɔwlɩ a kpɩɛrʋ a ɩ̃ zie a ƴãw.
*
11Bʋ̃ʋ pãa ɩ, ɩ̃ bɛ kpi a ɩ̃ mã púorí a?
Bʋ̃ʋ pãa so bɛ bɛ dɔw mɛ̃ lɔbr
wa báarɛ ɩ̃ ŋmãa vʋʋrʋ a?
12Bʋ̃ʋ pãa ɩ gbɛ́ɛ ayi be be de m
ɛ́ bɩrɛ ayi be be ɩ̃ ƴɛnɩ a?
13Yi dɩ̃a a, ɩ̃ nãá tɩ be n bɔw pʋɔ gã zoom,
ɩ̃ nãá tɩ gúre na pɩ̃ɛnɛ,
14mãa nɩ a na-mɩnɛ nɩ a tẽw nɩ-bɛrɛ,
a bɛl na mɩ́ lɛb líbre a deboru a,
15bɩɩ mãa nɩ a na-mɩnɛ bɛl
na so a salm-zɩɩr a nãá tɩ n'a,
a bɛl na tɛr salm-pɛlɛ paal'ɩ a bɛ yie a.
16Bɩɩ mɛ̃ bi-cur-bɛra bɛ na ga pàw a,
ɩ̃ kʋ̃ʋ tɩ be ɩ, mɛ̃ a bibiir na bɛ tɩ nyɛ̃ a cãà a.
17A bɔw pʋɔ a, a nɩ-faar ɩb mɩ́ baar'a,
ɛ́ a bɛlɩ dem na bàl a pãa páw pɩ̃ɛnʋ.
18A gaso pʋɔ nɩbɛ mɩ̀ mɩ́ nyɛ̃ nɩ ƴã-ɓaarʋ,
bɛ bɛ mɩ́ cãà wone a gɔmɛ a bɛ gùre na pàwr a ɩ.
19A be a, nɩr na tɛr yúor
nɩ nɩr na bɛ tɛr yúor a bɛ ka be ɩ,
ɛ́ a gbãgbaa mɩ́ lɛb'a so ʋ tʋɔra.
*
20Bʋ̃ʋ n'ʋ so a Naaŋmɩn mɩ́ ɩ a tuo-wonbɛ nyɛ̃ a cãà?
Bʋ̃ʋ n'ʋ so ʋ mɩ́ kʋ̀ a nyɔ-vʋʋrʋ a wʋ̀ʋr dem?
21Bɛ mɩ́ gùre nɩ a kũu, ʋʋ bɛ waar ɛ.
Bɛ mɩ́ bɔbr ʋ na zuo na-bom.
22Bɛlɛ tɩ nyɛ̃ ũufʋ zie a,
nʋ̃ɔ̀ nãá ɩrɛ bɛ na bɛ dɩ vuo ɩ,
bɛ nãá tɩ ŋmɩɛr'ɩ nʋ̃ɔ̀ cɛlsɩ.
23Ɩ̃ ɩ n nɩr na bɛ bãw be ʋ na cere a ɩ,
ɛ́ a Naaŋmɩn mɛ dacin piw nɩ mɛ̃!
24A kon ɩ̃ na kone siwre a n'ɩ a ɩ̃ dɩb,
ɛ́ a ɩ̃ kpɩɛrʋ cɛlsɩ yire bɛ tɛr ŋmãafʋ daar ɛ.
25A ʋlɩ bom nɛ ɩ̃ na zɔrɛ a, ʋlɛ n'ʋ mɩ́ ta m,
ɛ́ a bom ʋl na vʋ̃ɔnɛ mɛ̃ pʋ̀lá a,
ʋlɛ n'ʋ mɩ́ lo a ɩ̃ zu.
26Ɩ̃ bɛ cãà bãw zɩ̃-zoom,
ƴã-ɓaarʋ nɩ pɩ̃ɛnʋ ɛ,
wob tɛwr'a wone mɛ̃.
La Bible en Dagara © Alliance Biblique du Burkina Faso, 2013.