Zɔb 36
36
A lɛ a Naaŋmɩn na wule a nɩsaalbɛ a
1A Elihu tɩ cãà na cow a ʋ ƴɛ̀rʋ yel:
2Cãà alɛ blã, Zɔb i, ɩ̃ wul fʋ yã:
ƴɛ̀rʋ cãà nɩ be ɩ̃ na ƴɛ̀r kpɛ a Naaŋmɩn.
3Ɩ̃ na wul nyɩ nɩ lɛ a ɩ̃ bãwfʋ na ɩ kpɛ̃ɛ a,
nɩ a lɛ a ɩ̃ Íre na tɛr yel-mɩŋa a.
4Sɩza, a ɩ̃ ƴɛ̀rʋ bɛ ɩ ziri ɛ,
nɩr na sɩrɩ bãw a n'ʋ àr kɔw fʋ.
5Nyɛ̃, Naaŋmɩn kpɛmɛ na zuo nɩ a nɩr jewru,
ʋ so nɩ bom za, a lɛ ʋ na mɩ́ yel a bɛ tɛr lɩɛb-bɛrʋ ɛ.
6Ʋ bɛ mɩ́ bɛr a nɩ-faa ʋ vʋʋrɛ ɩ,
ɛcɛ a bɛlɩ dem bɛ na dɔwrɛ a,
ʋ mɩ́ wul'ɩ a bɛ yel-mɩŋa.
7Ʋ bɛ ŋmɛlɛ kpaar cɔwr a nɩ-mɩn ɛ.
*
Tɩ mɩ̀ ƴɛ̀r a na-mɩnɛ na zɩ̃ naalʋ-dà-kɔw zu a ƴɛ̀rʋ.
A Naaŋmɩn zɩɩlɩ bɛ na k'aa bɛ naalʋ kɔwrɩ.
Ɛcɛ bɛl mɩ́ ɩrɛ nɩ pɔ̀lʋ.
8Bɛlɛ n'ɩ bɛ ŋan ɩ nɩ-pàwrɩ bɛ 'lẽ nɩ bɛ bamɛ,
bɛ be n kpɩɛrʋ pʋɔ.
9À ŋá n'a a Naaŋmɩn mɩ́ wul bɛ a bɛ ɩ-faa:
al zũú a, bɛ gaar'ɩ a ʋ zie.
10Ʋ yuo nɩ a bɛ tobe kɛ́ bɛ wõ a ʋ kpãàfʋ,
ʋ yel bɛ na kɛ́ bɛ bɛr a bɛ ɩ-faa.
11Bɛlɛ wa bɛrɛ wone
ɛ́ sàw a Naaŋmɩn so bɛ a,
a bibie nɩ a yome na cɛ bɛ a,
bɛ na baarɩ a nɩ nʋ̃ɔ̀-kpɛ̃ɛ pʋɔ.
12Ɛcɛ bɛlɛ bɛ wa bɛrɛ wone a,
kafin n'ʋ na kʋ bɛ,
bɛ na kpi na ɛ́ bɛ bãwnɩ a ɩ.
13A nɩ-faar bɛl a,
bɛl na mɩ́ nyɛ̃ suur kʋ̃ bɛr a,
a Naaŋmɩn mɩ́ wa ƴãwnɛ bɛ bamɛ a,
bɛ bɛ mɩ́ zɛlɛ ʋ k'ʋʋ bɛr bɛ ɩ.
14A bɛ daar'a bɛ mɩ́ kpi,
ɛ́ a bɛ nyɔ-vʋʋrʋ baarɩ vĩ pʋɔ.
*
15Ɛcɛ a sob nɛ bɛ na dɔwrɛ a,
a dɔwrʋ n'a a Naaŋmɩn mɩ́ faa nɩ ʋ,
ɛ́ kpɩɛrʋ n'a ʋ mɩ́ yuo nɩ a ʋ tobe.
16A Naaŋmɩn tɩ dãw na ɩ a kpɩɛrʋ zãá nɩ fʋ,
ʋʋ kʋ̀ b tɛra a ʋr.
Bʋ̃-dɩ-nʋʋr'a mɩ́ tɩ paalɩ a fʋ dɩb tabal.
17Ɛcɛ bɛ dɩ n fʋ nɩ ƴɛ̀rʋ ƴãw fʋ dɔwrʋ,
ɛ́ a dɔwrʋ ʋl na lo a fʋ zu a bɛ tɛr lɩɛb-bɛrʋ ɛ.
18Gù vla a libir taa wa bɔrɛ fʋ ɛ!
ɛ́ a nʋɔr-ŋmɛb bʋ̃-kʋ̀rɩ taa wa sãwnɛ fʋ bɛrɛ ɩ.
19A fʋ na-bome nɩ a fʋ salm-zɩɛ bɛ zɛ̃ bom ɛ,
ɛ́ a fʋ fãw za mɩ̀ kʋ̃ tʋ̃ɔ́ sõw fʋ ɛ.
20Mɩ̀ ta tɩɛrɛ ƴãwn a tɩ̃ɩsɔw ʋl
a nɩ-bʋʋrɛ za na na baarɩ a ƴãw ɛ.
21Nɩ̃ɛ gù fʋ tʋɔra ta lɩɛbɩ tu a faalʋ pùor ɛ,
alɛ n'a na so fʋ be a kpɩɛrʋ pʋɔ.
A Naaŋmɩn so nɩ bom za
22Sɩza n'a, a Naaŋmɩn so bom za a ʋ kpɛnʋ zũú.
Wul-wule buor'ʋ na tʋ̃ɔ́ wul vla zuo ʋ?
23Nɩr be n be piwre a ʋ ɩb bɩɩ?
Nɩr be n be na sàw yel ʋ k'ʋʋ maal'ɩ faa a?
24Taa yiire na danɛ a ʋ tome
a nɩsaalbɛ za na mɩ́ yiele danɛ nɩ a ɩ!
25A nɩsaalbɛ za jɩ́rɛ a na,
ɛ́ nɩr za mɩ́ zãá na ɛ́ nyɛ̃ a.
*
26Nyɛ̃, a Naaŋmɩn ɩ n kpɛ̃ɛ zuo,
tɩ kʋ̃ tʋ̃ɔ́ bãw ʋ pɩɩrɩ ɛ,
a ʋ yome nʋɔr bɛ tɛr sɔ́rʋ ɛ.
27Ʋ mɩ́ de nɩ a kʋ̃ɔ a tẽw,
tɩ ɩ a lɩɛbɩ a sa-bie.
28Ʋ mɩ́ bɛr'ɩ a saa
ʋ yi a zũzuge pʋɔ waar caaa
a nɩsaalbɛ za zu.
29Ãa n'ʋ na tʋ̃ɔ́ yel
k'ʋʋ bãw nɩ a lɛ a zũzuge na cere a?
Nɩ a lɛ a saa na mɩ́ tanɩ a salom zu a?
30Nyɛ̃, ʋlɛ n'ʋ mɩ́ ɩ a saa nyɩwrɩ pàw a salom,
ɛ́ ɩ a kʋ̃ɔ paalɩ a kʋ̃ɔ-kpɛ̃ɛ tɩ tɔ a pɛr.
31A saa ʋ na mɩ́ tɩr a n'ʋ mɩ́ so a bʋ̃-dɩrɩ ʋr,
ɛ́ alɛ n'a ʋ guole nɩ a nɩbɛ.
32Ʋ tɛr'ɩ a saa a ʋ nuru ayi pʋɔ,
ɛ́ wul ʋ a be ʋ na na siw a.
33A saa-tanʋ n'a mɩ́ yel k'ʋʋ waar'a,
ɛ́ a dʋn tɛɛ za mɩ́ bãwnɩ a k'ʋʋ pɩɛl'a.
La Bible en Dagara © Alliance Biblique du Burkina Faso, 2013.