Zɔb 35
35
A Elihu nyɛ̃ na k'aa Zɔb bɛ tɛr ƴɛ̀r-sɩza na ƴɛ̀r ɛ
1Lɛ n'a a Elihu tɩ lɛb de a ƴɛ̀rʋ yel:
2-3Fʋ̃ʋ zie a, Zɔb i, fʋ tɛr'ɩ yel-mɩŋa
fʋ na mɩ́ wa yel a Naaŋmɩn:
«Mãa bɛ wa tɛr sãwna a, a bɛ ɩrɛ fʋ bom za ɩ!
Mãa kɔnɩ a, ɩ̃ bɛ nyɛrɛ tɔnɛ kãw za a pʋɔ ɩ!»
Fʋ tɩɛrɛ nɩ sɩza kɛ́ fʋ mɩ́ yel'ɩ yel-mɩŋa a Naaŋmɩn niŋé e?
4Cɛlɛ, mãa na sɔw na kʋ̀ b,
fʋ̃ʋ nɩ a fʋ bárɩ za!
5Jɩ́r a salom vla, bɛl a zũzuge kaa:
a do na gãw fʋ pol pol!
6Fʋ̃ʋ wa maalɛ a yel-bier a,
a Naaŋmɩn n'ʋ fʋ malɛ ɛ?
Fʋ̃ʋ wa zawrɛ a nɛ́ɛ suwle taa a,
bʋ̃ʋ n'a a ɩrɛ ʋ?
7Fʋ̃ʋ wa ɩ nɩ-mɩŋa a,
ʋ nyɛrɛ nɩ tɔnɛ kãw a pʋɔ bɩɩ?
Bʋ̃ʋ n'ʋ ʋ páwr a fʋ zie?
8A fʋ nɩsaal-taabɛ nɛbɛ a fʋ nɩ-fa-ɩb malɛ,
bɛl tɛwr nɛbɛ nyɛrɛ tɔnɛ a fʋ nɩ-mɩŋa ɩb pʋɔ.
*
9A dɔwrʋ na mɩ́ wa zuo a nɩbɛ a,
bɛ mɩ́ kone na, bɛ mɩ́ ŋmɩɛr'ɩ cɛlsɩ
a na-mɩnɛ na mɩ́ ɩrɛ a kpɩɛr bɛ a ƴãw.
10Ɛcɛ kãw za kʋ̃ yel:
«Nyɩnɛ n'a a Naaŋmɩn na maalɩ mɛ̃ a be?
Ʋl na mɩ́ ƴãw tɩ yielu tɩɛrʋ a kpɩɛrʋ daar a,
11ʋl na mɩ́ ɩ tɩ bãw yele zuo a wɛ-dʋn a,
ɛ́ ɩ tɩ ɩ yã-bãwnbɛ zuo a saa-zu lili a?»
12A nɩbɛ mɩ́ ŋmɩɛr'ɩ cɛlsɩ ziir za bɔbr'ɩ sõwfʋ,
a yel-fa-maalbɛ na ɩ pɔ̀lʋ tɛwr a zũú,
ɛcɛ a Naaŋmɩn bɛ mɩ́ sɔw bɛ ɩ.
13Sɩza n'a, a Naaŋmɩn kpɛnʋ-za-sob
bɛ bɛrɛ wone a bɛ ƴɛ̀rʋ na bɛ tɛr pɛr a ɩ,
ʋ bɛ ŋmɛlɛ kaar a ɩ.
*
14Ɛcɛ, Zɔb i, fʋ sʋ̃ɔm'a bul yel kɛ́ fʋ bɛ nyɛ̃ ʋ ɛ,
kɛ́ fʋ man nɩ a fʋ yele kʋ̀ ʋ ɛ́ pãa gùre ʋ!
15Ɛcɛ ƴɛrɛŋa a, a Naaŋmɩn suur bɛ wa ìr a,
ɛ́ ʋlɛ bɛ wa bãw bʋ̃ʋ n'ʋ so a nɩsaal gaarɛ a,
16a Zɔb ƴɛ̀rʋ na bɛ tɛr pɛr a n'a so,
ʋ ƴɛ̀rɛ nɩ yaga yaga suwle taa
ɛ́ bɛ bãw bom nɛ ʋ na yere a ɩ.
La Bible en Dagara © Alliance Biblique du Burkina Faso, 2013.