Zɔb 37
37
1Alɛ n'a so a ɩ̃ socir màwr, ɛ́ tʋɔr a ɩ̃ nyãa pʋɔ.
2Nyɩ wone, nyɩ bɛrɛ wone
a Naaŋmɩn kɔkɔr na pure a,
nɩ a tanʋ ʋ na tanɛ a.
3Ʋ ɩ n a saa-tanʋ ta a salom zu ziir za,
ɛ́ a saa-nyɩwrʋ tɔ a tẽw zu ziir za.
4Al pùorí, a Naaŋmɩn kɔkɔr ùore na,
ʋ tanɛ nɩ kpɛ̃w kpɛ̃w za.
Ɛ́ a ʋ kɔkɔr na dɛ wa tanɩ yi a,
ʋ lɛb'a ƴãw a saa-nyɩwrʋ yi.
5A Naaŋmɩn mɩ́ maal'ɩ nɔ-ɓãa-yele nɩ a ʋ kɔkɔr-kpɛ̃w,
ʋ mɩ́ maal'ɩ yel-bɛrɛ a nɩsaal na kʋ̃ tʋ̃ɔ́ bãw a.
*
6A lɛn daar a Naaŋmɩn
na mɩ́ wa yel a sa-pupure:
«Nyɩ lore a tẽw zu»,
a lɛn daar ʋ na mɩ́ ƴãw a saa waar,
ʋ waar gbʋrʋgbʋrʋ a,
7ʋ mɩ́ gbɛ̀r'ɩ a nɩsaalbɛ tome tɛr,
k'aa nɩsaalbɛ ʋ na maalɩ a,
mɩ́ tɩɛrɩ bãw a ʋ ɩ-ɩrɩ.
8A wɛ-dʋ̃w mɩ́ lɛb'a kpɛ a ʋ gaa zie,
ʋ mɩ́ kpɛ na gã a ʋ bɔw pʋɔ.
9Saa-pɛrɩ́-dʋrʋ-lowr'a a saa-sɛsɛb mɩ́ yi,
ɛ́ a ƴawr yi saa-pɛrɩ́-gʋba-lowr.
10A Naaŋmɩn mɩ́ wa pɛblɩ a ʋ pɩɛlʋ a,
a kʋ̃ɔ mɩ́ lɩɛb'ɩ kʋ̃ɔ-kuur,
ɛ́ a kʋ̃ɔ zu-sɔw kpawlɩ mɛ̃ kure a.
*
11Naaŋmɩn n'ʋ mɩ̀ mɩ́ ɩ a zũzuge tɛr kʋ̃ɔ,
ʋʋ ɩ a yaarɩ pàw a ziir za,
ɛ́ ɩ saa-nyɩwrʋ tɛwr.
12À ŋá n'a ʋ mɩ́ ɩ a zɔrɛ gʋɔr a ziir za,
k'aa maalɩ bom nɛ za
ʋ na yel k'aa maalɩ a tẽ-daa zu a,
k'aa maalɩ ʋ, mɛ̃ a lɛ ʋ na bɔbr a.
13Alɛ n'a a Naaŋmɩn mɩ́ tõ a tẽw zu
k'aa tɩ dɔwrɩ a nɩbɛ bɩɩ wul bɛ
a Naaŋmɩn nɔ̃wfʋ ɩb.
*
14 Zɔb i, ƴãw tobr à á ŋá za ƴãw,
ìr àr ɛ́ nyɛ̃ a Naaŋmɩn nɔ-ɓãa-yele a!
15Fʋ bãw nɩ a lɛ a Naaŋmɩn na kaarɛ
a nɔ-ɓãa-yele á ŋá zie a?
Fʋ bãw nɩ a lɛ ʋ na mɩ́ ɩ a saa-nyɩwrʋ
yi a zũzuge pʋɔ a?
16Fʋ bãw nɩ a lɛ ʋ na ɩ a zũzuge àr
a saa-zu ɛ́ bɛ lore a?
Bãwfʋ na bãw tɔ a,
nɔ-ɓãa-yel-maala n'ɩ à ŋá.
17Fʋ̃ʋ a bʋ̃-suuri na mɩ́ tʋlɛ zuo
a lɛn daar a saa-pɛrí-dʋrʋ-lowr sɛsɛb-tʋlʋ
na mɩ́ ɩ a tẽsɔw tʋlɛ kpãkpã a,
18fʋ tɩ sõwne nɩ a Naaŋmɩn na tɩ dɔlɛ a salom,
ɛ́ ɩrɛ ʋ kpɛmɛ mɛ̃ kure caala a?
*
19Wul mɛ̃ bom nɛ tɩ na na tʋ̃ɔ́ yel kʋ̀ a Naaŋmɩn a.
— Tɩ kʋ̃ tʋ̃ɔ́ ƴɛ̀r ƴɛ̀rʋ na tori a ɩ,
tɩ na be lige pʋɔ a ƴãw.
20Ɩ̃ na mɩ́ wa ƴɛ̀rɛ a,
a mɩ́ fɛr'a kɛ́ bɛ ɩ ʋ bãwnɩ a bɩɩ?
A mɩ́ fɛr'a kɛ́ bɛ yel kʋ̀ ʋ, ʋ tʋ̃ɔ́ bãwnɩ a?
21A mɩ́ wa bere na a nɩbɛ bɛ cãà nyɛrɛ vla ɩ.
A zũzuge mɩ́ pàw nɩ a mʋ̃tɔ̃w,
al pùorí a sɛsɛb ìr fu pɩɩrɩ a cen nɩ.
22Cãà na ɩ mɛ̃ salm-zɩɛ cãà a
yi n a saa-pɛrɩ́-gʋba-lowr waar,
cãà na ɩrɛ dɛ̃bɩ̃ɛ a viir'a koli a Naaŋmɩn.
23A Kpɛnʋ-za-sob tɩ na kʋ̃ tʋ̃ɔ́ ta a n'ʋ,
ʋ ɩ n kpɛ̃ɛ a fãw nɩ a mɩnʋ lowr,
ʋ bɛ dɔwrɛ sob nɛ na ɩ nɩ-mɩŋa mɩŋa a ɩ.
24Alɛ so a nɩsaalbɛ ƴãwnɛ ʋ,
ɛcɛ ʋl bɛ ŋmɛlɛ kaar a bɛlɩ dem
na tɩɛr kɛ́ bɛ ɩ n yã-bãwnbɛ a ɩ.
La Bible en Dagara © Alliance Biblique du Burkina Faso, 2013.