Zɔb 34
34
A Elihu manɛ nɩ a Zɔb sãwna
1Lɛ n'a a Elihu tɩ lɛb de a ƴɛ̀rʋ yel:
2Yã-bãwnbɛ ɛ, nyɩ bɛr wõ a ɩ̃ ƴɛ̀rʋ,
ɛ́ nyɩɩm bãw-bãwnbɛ ɛ, nyɩ ƴãw tobr.
3Bʋ̃ʋ n'ʋ vɛ̃, tobr so a ƴɛ̀rʋ vɩɛlʋ bãwfʋ,
mɛ̃ a lɛ a zɛl na so a bʋ̃-dɩrɩ nʋ̃ɔ̀ bãwfʋ a#34:3 Nyɛ̃ 12.11 nɩ a manʋ..
4Tɩ lãw bɔ a lɛ-na-tu-sɔr-a,
tɩ lãw jɛl a lɛ na vɩɛl a kaa.
*
5Mɛ̃ a Zɔb taa yel: «Ɩ̃ ɩ n nɩ-mɩŋa,
ɛcɛ a Naaŋmɩn bɛ sàwr a ɩ̃ mɩnʋ ɛ.
6Ɩ̃ na saa tɛr yel-mɩŋa a,
bɛ mɩ́ nyɛ̃ m'a ɩ̃ ɩ zir-ŋmarɛ,
pĩi nyɔw mɛ̃ na faar na kʋ,
ɩ̃ɩ bɛ maalɩ yel-bier ɛ.»
7A Zɔb tɛr'ɩ ʋ tɔ ɔ?
Ʋ mɩ́ ɩ n a nɩr la mɔlɛ mɔlɛ
mɛ̃ ŋmale pʋɔ kʋ̃ɔ ʋ na nyũ a!
8Ʋlɛ nɩ a yel-fa-maalbɛ nɛbɛ lãwnɛ,
ɛ́ ʋlɛ nɩ nɩ-faar'a lãw dɛnɛ.
9Mɛ̃ ʋ taa yel:
«Tɔnɛ kãw za bɛ ka be a nɩsaal na bɔbr
kɛ́ ʋlɛ nɩ Naaŋmɩn kpɛ taa a ɩ.»
*
10A na ɩ à ŋá a, nyɩɩm yã-bãwnbɛ,
nyɩ bɛrɛ wone mɛ̃:
A Naaŋmɩn kʋ̃ tʋ̃ɔ́ maalɩ yel-faa towtow ɛ,
a Kpɛnʋ-za-sob kʋ̃ tʋ̃ɔ́ ɩ ɩb na bɛ tu sɔ́r a ɩ!
11Bʋ̃ʋ n'ʋ vɛ̃, ʋ mɩ́ kʋ̀ n a nɩsaal
a ʋlɩ bom nɛ ʋ na sɛw taa nɩ a,
ɛ́ ya ŋa za man nɩ a ʋ ɩb.
12Yel-mɩŋa n'a, Naaŋmɩn bɛ ɩrɛ faa towtow ɛ,
a Kpɛnʋ-za-sob bɛ sãwnɛ yel-na-tu-sɔr-a bɛrɛ ɩ,
13Nɩ-yũo n'ʋ kʋ̀ ʋ a tẽw k'ʋʋ tɛlɛ bɩɩ?
Nɩ-yũo n'ʋ ƴãw ʋ kaarɛ a tẽ-daa zie e?
14A Naaŋmɩn tɩ ɩ mɛ̃ ʋ tɩɛrɛ nɩ ʋl yõ yele a,
ʋlɛ tɩ ɩ mɛ̃ ʋ lɛb'a de a ʋ vʋʋrʋ
na ɩrɛ a nɩsaalbɛ vʋʋrɛ a,
15a bʋ̃-vʋʋrɩ za nãá lãw na ŋmãa vʋʋrʋ,
ɛ́ a nɩsaal nãá lɛb'a lɩɛbɩ tanɛ.
*
16Zɔb i, fʋ̃ʋ na tɛr yã a, bɛr wõ a yel ŋa,
ƴãw tobr vla a ɩ̃ ƴɛ̀rʋ ƴãw.
17A yel-na-tu-sɔr-a dɔ̃ sob na tʋ̃ɔ́ na dɩ naalʋ ʋ?
Fʋ na sàw na yel k'aa Kpɛnʋ-za-sob
na ɩ a Mɩŋa sob a, sãw na a?
18Ʋl yõ n'ʋ na tʋ̃ɔ́ yel a nãà: «Fʋ bɛ tɛr pɛr ɛ!»
ɛ́ yel a nɩ-bɛrɛ: «Nɩ-kʋrbɛ n'ɩ nyɩ!»
19Ʋl yõ n'ʋ bɛ mɩ́ kpɛ a nɩ-bɛrɛ ɩ,
ɛ́ bɛ mɩ́ ƴãw a tɛra sob zuo a nã́w sob ɛ,
bʋ̃ʋ n'ʋ vɛ̃, bɛ za ɩ n a ʋ nuru bʋ̃-maalɩ.
20Bɛ mɩ́ wa ur'a kpi tɩ̃ɩsɔw-bɩ̃ɩn:
a nɩbɛ mɩ́ gaarɩ na ɛ́ kʋ a tẽ-kaarbɛ,
bɛ mɩ́ kʋ n a po-to-sob mɔlɛ mɔlɛ lɛ.
21Bʋ̃ʋ n'ʋ vɛ̃, a Naaŋmɩn jɩ́rɛ nɩ a nɩsaal ɩb,
ʋ piwre nɩ a ʋ gbɛ-ceni za.
22Liw-sɛbla varkpara bɛ be be
a yel-fa-maalbɛ na tʋ̃ɔ́ sɔwlɩ ɛ.
*
23A bɛ tɛr k'aa Naaŋmɩn piwri a nɩsaal kɔwrɩ
tʋ̃ɔ́ bʋɔl'ʋ ƴɛ̀rʋ zie a ʋ niŋé ɩ.
24Ʋ mɩ́ ŋmɛ n a fãw dem lɔb
ɛ́ bɛ sowri bãw a bɛ sãwna ɩ,
ɛ́ zɩɩlɩ nɩ-yoru bɛ lɩɛrɩ bɛ.
25Ʋ bãw nɩ a bɛ ɩ-ɩrɩ,
alɛ n'a so tɩ̃ɩsɔw-been
ʋ mɩ́ ŋmɛ bɛ lɔb ɛ́ taalɩ bɛ kʋ.
26Ʋ mɩ́ ɓa ɓa bɛ nɩ a nɩ-yaga niŋé mɛ̃ nɩ-kʋrbɛ a.
27Bʋ̃ʋ n'ʋ vɛ̃, a nɩbɛ bɛ ŋa tɩ gur'ɩ pùor cɔw ʋ,
bɛ bɛ tɩ bɔbr kɛ́ bɛ bãw a ʋ wulu ɛ.
28À ŋá n'a bɛ ɩ ƴãw a bãbàal nɩ a nã́w sob
kõ bʋɔlɩ ʋ k'ʋʋ faa bɛ.
Ɛ́ a kon á ŋá taabɛ a, ʋ mɩ́ bɛr'a wõ.
*
29Ɛcɛ ʋlɛ saa ɩ gbili a,
ãa n'ʋ na yel k'ʋʋ sãw na?
Ʋlɛ wa sɔwlɛ a, ãa n'ʋ na tʋ̃ɔ́ cãà nyɛ̃ ʋ?
Ɛcɛ ʋ gùre nɩ a ten nɩ a nɩbɛ,
30bɛ bɔbr kɛ́ nɩ-faa dɩ naalʋ ɛ,
nɩ k'ʋʋ bɛ̀lɛ a nɩbɛ ɩ.
31Ɛcɛ nɩr wa yel a Naaŋmɩn:
«Ɩ̃ maal'ɩ a ɩ̃ sãwna dɔwrʋ baarɩ, ɩ̃ kʋ̃ lɛb sãw ɛ.
32Bom nɛ ɩ̃ na bɛ nyɛ̃ a,
a fʋ̃ʋ mɩŋa a, wul mɛ̃ ɩ̃ nyɛ̃ ʋ.
Mãa wa ɩ ɩ-faa a, ɩ̃ kʋ̃ lɛb ɩ ɛ.»
33Fʋ̃ʋ na nyɛ̃ a, a Naaŋmɩn sɛw na
k'ʋʋ dɔwrɩ a nɩr ŋa a?
A bɛ ɩrɛ fʋ bom ɛ, ɩ̃ bãwnɩ a na.
Ɛcɛ fʋ zie n'a a be, mãa zie bɛ n'a ɩ,
yel a lɛ fʋ na tɩɛr a.
*
34A nɩbɛ na tɛr yã a, nɩ a yã-bãwnbɛ
na bɛr wõ m a na yel mɛ̃ na:
35«A Zɔb ƴɛ̀rɛ na ɛ́ bɛ bãw
bom nɛ ƴɛ̀rʋ ʋ na ƴɛ̀rɛ a ɩ,
a ʋ ƴɛ̀rʋ wule na k'ʋʋ bɛ bãw bom za ɩ.
36Ʋ na ƴɛ̀rɛ mɛ̃ a yel-fa-maalbɛ a,
ɩ̃ bɔbr'a kɛ́ bɛ ɩ ʋ kaa tɩ tɔ.
37Bʋ̃ʋ n'ʋ vɛ̃, ʋ gaarɛ na
ƴãw pʋɔ a ʋ sãwna ƴãw,
ʋ lɛb'a bãw zɛbr'ɩ a Naaŋmɩn bɛ dɩ vuo ɩ
ƴãw tɩ bʋ́nɛ.»
La Bible en Dagara © Alliance Biblique du Burkina Faso, 2013.