Zeremi 9
9
A Zuda naalʋ-tẽw nɩbɛ sãw nɩ bɛ za
1Bʋ̃ʋ pãa ɩ ɩ̃ bɛ tɛr gaa zie
a wɛja-kpalɛ pʋɔ mɛ̃ a sɔr-tɔlbɛ a?
Ɩ̃ nãá tɩ bɛr'ɩ a ɩ̃ nɩbɛ, ɛ́ tɩ cen zãá nɩ bɛ.
Bʋ̃ʋ n'ʋ vɛ̃, bɛ za ɩ n pɩ̃ɔ-yel-maalbɛ,
nɩ-mɩlbɛ bʋʋrɛ nɛbɛ.
2A Sore yere na:
«A bɛ zɛl ɩ na mɛ̃ tam bɛ na dúori a.
A yel-mɩŋa zũú bɛ n'a bɛ so a tẽw ɛ,
ɛcɛ a ziri zũú n'a.
Bɛ mɩ́ maal'ɩ a faa tɩ lʋ̃ɔ nɩ faa,
ɛ́ a mãa a, bɛ bɛ bãw mɛ̃ ɩ.
3Ŋa za ʋ mɩ́ gù ʋ tʋɔra a ʋ bá ƴãw,
ɛ́ nɩr taa ƴãwnɛ a ʋ tɩɛrʋ a ʋ yɛb ƴãw ɛ.
Bʋ̃ʋ n'ʋ vɛ̃, yɛb za mɩ́ bãw nɩ lɛ
ʋ na na nɛb fʋ a,
ɛ́ bá za ɩ gɛgɛra gɛrɛ fʋ.
4Ŋa za mɩ́ bɛ̀lɛ nɩ a ʋ tɔ,
nɩr za bɛ yere yel-mɩŋa ɩ,
bɛ za ŋma n a ziri mili.
Bɛ maal'ɩ a faa zuo,
kʋ̃ tʋ̃ɔ́ lɛb wa a ɩ̃ zie ɩ.
5Bɛ mɩ́ ɩ n po-to-fãw-ɩb
tɩ lʋ̃ɔ nɩ po-to-fãw-ɩb,
ŋma ziri tɩ lʋ̃ɔ nɩ ziri.
Bɛ zawr'a na bãw mɛ̃.
A mãa, a Sore, mãa n'ʋ yel.»
6A na ɩ à ŋá a, à ŋá n'a a Sore,
a kpɛnʋ-za-sob yere:
«Vũu n'a ɩ̃ na ír'ɩ a bɛ dɛwr bɛr,
ɩ̃ɩ na nyɛ̃ nɩ a lɛ bɛ na ŋmɛ̃ a.
Bʋ̃ʋ n'ʋ ɩ̃ na lɛb tʋ̃ɔ́ ɩ
a ɩ̃ nɩbɛ yel-faar ƴãw?
7A nɩbɛ bɛ ŋa zɛl ɩ na
mɛ̃ pĩi-zɛl na kʋrɛ a.
Ziri n'a yire a bɛ nɛ̃ɛ́.
Nʋɔr'ʋ bɛ mɩ́ ƴɛ̀rɛ nɩ ƴã-ɓaarʋ ƴɛ̀r-bie
kʋ̀rɛ a bɛ tɔ,
ɛcɛ a bɛ pʋ̃ɔmɩ za bɛ ƴãwnɛ ʋ bɛra.
8A Sore yere na:
A bɛ fɛr k'ɩ̃ɩ dɔwrɩ a nɩbɛ bɛ ŋa bɩɩ?
A bɛ sɛw k'ɩ̃ɩ yáa a san
a nɩ-bʋʋr-ŋa-tɔ zie bɩɩ?»
A kon nɩ a lãw-mʋɔlɛ daar
9Ɩ̃ kone na ƴɛ̀rɛ nɩ a tan zu,
ɩ̃ kone nɩ lãw-mʋɔlɛ
a dʋn mʋ̃ɔ 'wɔbrʋ ziir ƴãw.
Bʋ̃ʋ n'ʋ vɛ̃, a za dɩ n vũu,
nɩr za bɛ cãà tɔlɛ a be ɩ.
Bɛ bɛ cãà wone a dʋn kon a be ɩ.
A lili nɩ a dʋn za zɔ na zãá,
bom za bɛ cãà be ɩ.
10A Sore yere na:
«Ɩ̃ na ɩ na a Zerizalɛm
lɩɛbɩ kʋsɛbɛ na gbõ taa a,
gbõgbo-cili gaa zie,
ɛ́ ɩ a Zuda tẽ-bɛrɛ a lɩɛbɩ zie bom za
na bɛ cãà be a,
zie nɩr za na bɛ cãà kpɩɛr a.»
11Nɩr ɩ n yã-bãwnɛ a sɛw ʋ na bãw
a yele á ŋá pɛr ɩ?
A Sore wa ƴɛ̀r a ʋ zie a,
ʋ̃ʋ ɩ bɛ bãw bʋ̃ʋ n'ʋ so a tẽw sãw,
bʋ̃ʋ n'ʋ so ʋ dɩ a vũu
mɛ̃ wɛja-kpalɛ a,
ɛ́ ɩ zie nɩr za na bɛ tuur tɔlɛ a?
12A Sore cãà na yere: «Bɛ na zawrɩ a wulu ɩ̃ na tɩ kʋ̀ bɛ a bɛr a n'a so. Bɛ zawr'a na bɛr wõ ɛ́ tu a lɛ za ɩ̃ na tɩ yere kʋ̀rɛ bɛ a. 13Bɛ tu n a bɛl mɩŋa tɩɛrʋ tɛwr pùor, nɩ a Báàl mɩnɛ puoru pùor a bɛ sãà mɩnɛ na tɩ mili nɩ bɛ a. 14A na ɩ à ŋá a, à ŋá n'a a mãa, a Sore, a kpɛnʋ-za-sob, a Ɩsɩrayɛl Naaŋmɩn, yere: Ɩ̃ na ɩ na a nɩbɛ bɛ ŋa 'wɔb tɩ-va-tuo, ɛ́ nyũ kʋ̃ɔ na tɛr lɔw a. 15Ɩ̃ na diw bɛ na yaarɩ nɩ-bʋʋr-yoru sɔgɔ, a bɛl nɩ a bɛ sãà mɩnɛ na bɛ bãw a. Ɩ̃ na ɩ na a zɛbr ta tu bɛ tɩ kʋ bɛ pàw pɛr.» 16À ŋá n'a a Sore, a kpɛnʋ-za-sob yere.
A nɩbɛ
«Nyɩ bãwnɩ a pɔw-kõ-konbɛ bʋɔlʋ,
nyɩ ƴãw bɛ wa!
Nyɩ tõ bɛ tɩ bʋɔlɩ a bɛl
na bãw kon vla vla a bɛ wa!
17Kɛ́ bɛ wa fɔ̃w za
wa kõ lãw-mʋɔlɛ a tɩ ƴãw!
K'aa tɩ mimie ɩ mʋta-kʋ̃ɔ cɔb!
K'aa tɩ mimi-gamɛ bùr a za!»
A Zeremi
18Lãw-mʋɔlɛ kone na yire
a Sɩyɔ̃ tẽw lowr:
«'Woi, bɛ sãw tɩ na bɛr, vĩ kʋrɛ tɩ na!
A fɛr'a kɛ́ tɩ yi ɛ́ bɛr a tẽw,
bʋ̃ʋ n'ʋ vɛ̃, bɛ dá n a tɩ yie lɔb.»
19Pɔwbɛ ɛ, nyɩ bɛr wõ a Sore ƴɛ̀rʋ!
Nyɩ yuo a nyɩ tobe wõ a lɛ ʋ na yere a.
Nyɩ zanɩ nɩ a nyɩ pɔwyaar a lãw-mʋɔlɛ ŋa,
ŋa za mɩ́ zanɩ nɩ a ʋ tɔ a lãw-mʋɔlɛ ŋa kon:
20«A kũu dúor'ɩ a tɩ tokori-vɛɛ ƴãw kpɩɛr,
ʋ kpɩɛr'ɩ a tɩ yir-vɩɛlɩ vɩɛlɩ pʋɔ.
Ʋ ŋmɩɛr'ɩ a tɩ bibiir kʋrɛ a sɛ́ɛ zu,
ɛ́ ŋmɩɛr a pɔlbili kʋrɛ a tuor-taa ziir.»
A Sore
21«A fʋ̃ʋ Zeremi a,
cãà lɛb yel a lɛ a mãa, a Sore, na yere a:
“A kũuni na gã gã nɩ a tẽsɔw
mɛ̃ pʋɔrʋ na gã póru pʋɔ a,
mɛ̃ ka-zuru na gã a ka-ŋmarɛ pùorí,
ɛ́ nɩr za bɛ wobr a a.”»
A Sore bãwfʋ n'ɩ a yã-bãwfʋ sɩza
22À ŋá n'a a Sore yere:
«A yã-bãwnɛ, ʋ ta pɔrɛ nɩ a ʋ yã-bãwfʋ ɛ!
A fãw sob,
ʋ ta zɛwr ʋ tʋɔra nɩ a ʋ fãw ɛ!
A nãà, ʋ ta zɛwr ʋ tʋɔra nɩ a ʋ naalʋ ɛ!
23Nɩr wa bɔbr k'ʋʋ pɔrɛ a,
ʋ pɔrɛ ʋ na tɛr yã a sɛw
ʋ na tʋ̃ɔ́ bãw mɛ̃ a.
Bʋ̃ʋ n'ʋ vɛ̃, a mãa,
a Sore a, ɩ̃ tone na k'ɩ̃ɩ ƴãw a nɔ̃wfʋ,
a lɛ-na-tu-sɔr-a nɩ a mɩnʋ a tẽw zu.
Sɩza, à á ŋá n'a mɩ́ pɛlɩ a ɩ̃ pʋɔ.»
A Sore n'ʋ yel.
A yʋ̀ɔr ŋmãafʋ bɛ íre nɩr bɛrɛ dɔwrʋ pʋɔ ɩ
24A Sore yere na: Bibir na vɩɛ na ɩ̃ na ìr a bɛlɩ dem na ŋma a yɛɛ tɛwr a ƴãw, 25a Eziptɩ, a Zuda, a Edɔm, a Amɔ̃ nɩ a Mowab ten dem ƴãw, nɩ a bɛlɩ dem na mɩ́ põ a bɛ tacɩ-kɔblʋ ɛ́ kpɩɛr a wɛja-kpalɛ pʋɔ a ƴãw. Bʋ̃ʋ n'ʋ vɛ̃, a nɩ-bʋʋrɛ bɛ ŋa bɛ sɩrɩ ŋma a yɛɛ sɩza ɩ, ɛ́ a Ɩsɩrayɛl tẽw nɩbɛ tɛɛ za bɛ ŋma a yɛɛ a Sore ƴãw ɛ.
Currently Selected:
Zeremi 9: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
