Zeremi 8
8
1A lɛn daar a, a Sore n'ʋ yere, bɛ na yaw nɩ a Zuda tẽw na-mɩnɛ, a tõ-tõ-bi-bɛrɛ, a bàwr-maalbɛ, a naaŋmɩn-ƴɛ̀r-manbɛ nɩ a bɛlɩ dem na kpɩɛr a Zerizalɛm a kɔbɛ. 2Bɛ na dɩ̀ɛl'a nɩ a mʋ̃tɔ̃w, a cuw nɩ a ŋmar-bie niŋé, al a nɩbɛ bɛ ŋa na tɩ nɔ̃w, na tɩ maalɩ, na tɩ tu, na tɩ sowri ɛ́ puori a. Nɩr za kʋ̃ wob a kɔbɛ á ŋá tɩ ũù ɛ, a na lɩɛb'ɩ pʋɔrʋ a tẽsɔw zu. 3A bɛlɩ dem za nãà wa cɛ vʋʋrɛ a nɩ-bʋʋr-faa nɩbɛ bɛ ŋa pʋɔ, ɛ́ be a ziir al za pʋɔ ɩ̃ nãà wa diw bɛ zɔ yaarɩ be a, bɛ na bɔbr'ɩ a kũu zuo a nyɔ-vʋʋrʋ. A Sore, a kpɛnʋ-za-sob, ʋlɛ n'ʋ yel.
A Zerizalɛm nɩbɛ zawr'a na lɛb wa a Sore zie
4«Fʋ na tɩ yel bɛ na:
“À ŋá n'a a Sore yere:
Nɩr wa lo a, ʋ bɛ mɩ́ lɛb ìr bɩɩ?
Nɩr wa tuli a sɔ́r a,
ʋ bɛ mɩ́ lɛb lɩɛb wa pùor bɩɩ?
5Ɛ́ bʋ̃ʋ n'ʋ so a Zerizalɛm nɩbɛ na tuli a sɔ́r a,
cãà zawrɩ a ɩ̃ tub?
A nɩbɛ bɔbr'ɩ a bɛ ŋmɩn-bɛlɛbɛlɛ á ŋá tuotuo,
bɛ zawr'a na lɛb wa a ɩ̃ zie.
6Ɩ̃ bɛr'a wõ a lɛ bɛ na yere a vla vla:
a lɛ za bɛ na yere a bɛ tɛr pɛr ɛ.
A bɛ kãw za bɛ bɛr a ʋ ɩ-faar ɛ,
ɛ́ bɛ sowre ʋ tʋɔra:
“Bʋ̃ʋ n'ɩ à ŋá ɩ̃ na ɩ a?”
Ŋa za mɩ́ lɛb'a nyɔw a zɔba,
mɛ̃ wur na garɛ zɛbr zie a.
7A gʋ̃ɔnagʋ̃ɔna tɛɛ za a salom zu,
bãw nɩ a lɛn daar ʋ na mɩ́ yi zie ŋa
cen tɩ kpɩɛr zie ŋa a.
A ŋmam, a bɛlaarɛkule nɩ a tɩ̃ɩtɩ̃ɩ
bãw nɩ a lɛb-waa daar.
Ɛcɛ a ɩ̃ nɩbɛ bɛ bãw a tub al ɩ̃ na ƴãw a ɩ.”»
A yã-bãw-ziri dem
8Nyɩ yere na: «Yã-bãwnbɛ n'ɩ tɩ,
tɩmɛ nɛbɛ tɛr a Sore wulu.»
Ɛcɛ ŋmɩŋmɩn n'a nyɩ na tʋ̃ɔ́ yere a lɛ?
A wulu bãw-bãw-karɩ ɩ n zir-ŋmarbɛ
na ɩ a wulu bɛ cãà tori a.
9Vĩ n'a a yã-bãwnbɛ zie.
Bɛ bɛ bãw ŋmɩŋmɩn za n'a ɩ,
bɛlɛ n'ɩ bɛ ŋa lo bɛra pʋɔ.
Bɛ na bɛ bɔbr a Sore ƴɛ̀rʋ a,
bʋ̃ʋ yel-ɩra n'ʋ a bɛ yã-bãwfʋ na tɛr a bɛ zie?
A nɩbɛ yere n'a k'aa yele cere nɩ vla
10A Sore yere na:
«Ɩ̃ na de nɩ a bɛ pɔwbɛ kʋ̀ nɩ-yoru,
ɛ́ kʋ̀ a bɛ póru a bɛlɩ dem na na de a a.
Bʋ̃ʋ n'ʋ vɛ̃, a pʋrmɛ tɩ tɔ a bɛrɛ a,
bɛ za bɔbr'ɩ a bɛ tɔnɛ.
A naaŋmɩn-ƴɛ̀r-manbɛ
tɩ tɔ a bàwr-maalbɛ a,
bɛ za tɛr'ɩ libelibe yã.
11Bɛ de nɩ dɩ̃ɛnʋ ƴãw a ɩ̃ nɩbɛ kpɩɛrʋ ƴãw, mɩ́ yel:
“A yele za cere nɩ vla, a yele za cere nɩ vla!”
Ɛcɛ bom za bɛ cere ɩ.
12Vĩ ɩrɛ bɛ na,
bɛ na ɩ ɩ-faar na bɛ maal'ɩ wob a?
Towtow! Bɛ bɛ bãw k'aa tɩ sɛw na
kɛ́ bɛ sàw a bɛ sãwna ɩ.
A Sore yere na:
Alɛ n'a so bɛ na lo mɛ̃ a nɩbɛ za a,
bɛ na lo n tẽw a lɛn daar
ɩ̃ nãà wa ìr a bɛ ƴãw a.»
A tɩɛrʋ wɛ na!
A Sore
13A Sore yere na:
«Mãa wa bɔbr bʋ̃-dieri deb a bɛ zie a,
divɛ̃ tɩ-wɔmɛ bɛ mɩ́ be a divɛ̃ tɩɛ zu ɛ!
Kãkamɛ bɛ mɩ́ be a kãkã-tɩɛ zu ɛ!
A váar tɛɛ za mɩ́ vàr'a.
A na ɩ lɛ a, ɩ̃ na bɛr'a na kʋ̀ sɔr-tɔlbɛ.»
A nɩbɛ
14«Bʋ̃ʋ n'ʋ so tɩ zɩ̃ bɛ damnɛ damnʋ?
Nyɩ ɩ tɩ ɓã taa,
tɩ kpɛ a tẽ-bɛrɛ bɛ na cɔbrɩ a kpɛmɛ
a zɛbr ƴãw a pʋɔ, tɩ gù a kũu a be.
Bʋ̃ʋ n'ʋ vɛ̃, a Sore tɩ Naaŋmɩn
bɛ sàw tɩ na dam ɛ,
ʋ ɩ na tɩ nyũ kʋ̃ɔ na tɛr lɔw a,
tɩ na sãw ʋ a ƴãw.
15Tɩ tɩ gùre nɩ a ƴã-ɓaarʋ,
ɛcɛ bʋ̃-vla za bɛ wa ɩ.
Tɩ tɩ gùre nɩ a sanʋ daar,
ɛcɛ dɛ̃bɩ̃ɛ n'a waar.
16A dɔ̃ sob ta n a Dan tẽw#8:16: Nyɛ̃ 1.14 nɩ a manʋ. baarɩ.
A ʋ wie na vʋʋrɛ nɩ fãw a vʋʋrʋ yire nɩ
a tẽ-kpɛ̃ɛ ŋa pʋɔ.
A gɔmɛ a na kone ɩrɛ a ɩ na a tẽw za màwr.
A waar'a k'aa wa sãw a tẽw nɩ bom za
na be a ʋ pʋɔ a bɛr, a tẽ-kpɛ̃ɛ nɩ a ʋ nɩbɛ.»
A Sore
17Ɩ̃ na bɛr'ɩ wɩɩr a wa a nyɩ ƴãw.
Dɔpamɛ na bɛ wone bɛ̀lʋ a,
ɛ́ a na wa dʋnɛ nyɩ na.
A Sore n'ʋ yel.
A Zeremi kpɩɛrʋ
Zeremi
18A ɩ̃ pʋ-sãwna bɛ tɛr tɩ̃ɩ ɛ,
a ɩ̃ socir kone nɩ a ɩ̃ pʋ̃ɔmɩ za.
19Nyɩ wone:
a ɩ̃ nɩbɛ nɛbɛ kone zɛlɛ sõwfʋ a tẽw za pʋɔ:
«A Sore bɛ cãà be a Sɩyɔ̃ tẽw pʋɔ bɩɩ?
A Sɩyɔ̃ tẽw bɛ cãà tɛr nãà bɩɩ?»
A Sore
«Bʋ̃ʋ n'ʋ so bɛ sãwnɛ mɛ̃ a suur nɩ a bɛ tɩbɛ,
a nɩ-bʋʋr-yoru ŋmɩn-bɛlɛbɛlɛ
na bɛ tɛr pɛr a?»
A Zeremi
20A bʋ̃-dieri de na baarɩ,
a tʋlʋ tɔl'a, ɛ́ tɩ cãà bɛ nyɛ̃ a faafʋ ɛ!
21A kpɩɛrʋ na páw a ɩ̃ nɩbɛ a ɩ na a ɩ̃ fãw za baarɩ.
Pʋ-sãwna nyɔw mɛ̃ na, a ɩ̃ tɩɛrʋ wɛ na.
22Kãá na mɩ́ ɩ a 'wɔbrʋ siwri a
bɛ cãà a Galaadɩ tẽw pʋɔ bɩɩ?
Tɩ̃ɩ-ɩrɛ bɛ cãà a be bɩɩ?
Bʋ̃ʋ n'ʋ so a ɩ̃ nɩbɛ wʋ̀ʋr kʋ̃ tʋ̃ɔ́ baarɩ mɔ̃?
23Ãa n'ʋ na lɩɛbɩ a ɩ̃ zu ʋ ɩ bule,
ɛ́ a ɩ̃ mimie ɩ mʋta-kʋ̃ɔ̀ bul-nɛ́ɛ,
ɩ̃ tʋ̃ɔ́ kone a ɩ̃ nɩbɛ kũuni mʋ̃tɔ̃w nɩ tɩ̃ɩsɔw a?
Currently Selected:
Zeremi 8: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
