Zeremi 5
5
Naaŋmɩn nɩ a ʋ ƴɛ̀r-manɛ ƴɛ̀rɛ na sɔwr taa a Zerizalɛm ƴãw
A Sore
1Nyɩ cɔlɩ a Zerizalɛm tẽw sɛ́ɛ, nyɩ jɩ́r vla,
nyɩ sowri kaa nyɛ̃,
nyɩ bɔ a nɩ-yaga tuor-taa ziir.
Nyɩmɛ wa nyɛ̃ nɩr,
ʋ ɩrɛ a lɛ-na-tu-sɔr-a,
ʋ bɔbr k'ʋʋ mɩ́ yel a yel-mɩŋa a,
a lɛ pʋɔ a, ɩ̃ na dɩ n suur kʋ̀ a Zerizalɛm.
Zeremi
2Bɛ na saa mɩ́ yel:
«A Sore na vʋʋrɛ a zũú!»
a, pɔ-ziri n'a bɛ mɩ́ pɔ.
3Sore e, a yel-mɩŋa bɛ n'a fʋ bɔbr ɛ?
Fʋ ŋmɛ bɛ na, ɛ́ a bɛ ɩ bɛ bom ɛ,
fʋ tɩ bɔbr'a kɛ́ fʋ kʋ bɛ pàw pɛr,
ɛcɛ bɛ bɛ sàw a kpãàfʋ ɛ.
Bɛ nyar'ɩ a bɛ niŋe a kpɛmɛ zuo kʋsɩɛr,
bɛ zawr'ɩ a fʋ zie lɛb-waa.
4Ɩ̃ tɩɛr'ɩ ɩ̃ pʋɔ:
«Nɩ-sãsaralɛ ɩb'ɩ à à ŋá,
bɛ bɛ tɛr yã k'a sɛw ɛ,
bʋ̃ʋ n'ʋ vɛ̃, bɛ bɛ bãw a Sore pʋ-tɩɛrʋ ɛ,
nɩ ʋlɩ bom nɛ a bɛ Naaŋmɩn na bɔbr a ɩ.
5A na ɩ lɛ a, ɩ̃ na cen nɩ a nɩ-bɛrɛ zie tɩ ƴɛ̀r'ɩ bɛ.
Bɛl a, bɛ bãw nɩ a Sore pʋ-tɩɛrʋ,
nɩ a ʋlɩ bom nɛ a bɛ Naaŋmɩn na bɔbr a.»
Ɛcɛ bɛ za ɩ n been: bɛ gaarɩ na,
ɛ́ ŋma a lãw-taa mie na tɩ 'lẽ
bɛlɛ nɩ a bɛ Naaŋmɩn a bɛr.
6Alɛ so a gbẽw mɩ́ yi a tuwr pʋɔ bɛ bɛrɛ bɛ ɩ,
a wɛja-kpalɛ pʋɔ wɛ-baar 'wɔbr bɛ.
A nyũo mɩ́ gù a tẽ-bɛrɛ ƴãw
tawr nɩr za na yire a cɩɛrɛ.
Bʋ̃ʋ n'ʋ vɛ̃,
a bɛ na gaarɩ a ɩ-ɩrɩ dɔwlɛ nɩ taa,
ɛ́ nɩr kʋ̃ tʋ̃ɔ́ sɔ́r a Sore pùor-bɛ-tub ɩ-ɩrɩ ɛ.
A Sore
7A na ɩ à ŋá a, ŋmɩŋmɩn n'a
ɩ̃ na dɩ suur kʋ̀ b?
A fʋ bibiir zawrɛ mɛ̃ na bɛrɛ,
bɛ mɩ́ pɔ n nɩ ŋmɩn-bɛlɛbɛlɛ yúor.
Ɩ̃ tɩ kʋ̀ bɛ nɩ alɩ bome nɛ
a na tɩ fɛr kɛ́ bɛ tɛr a,
ɛcɛ bɛ cãà na maalɩ a pɩ̃ɔ-yele,
bɛ darɛ nɩ taa a pɔw-yɛmɛ yir.
8Wur-daar na 'wɔr 'wɔr
ɛ́ a wur-pɔw vʋla tɛr a a, à ŋá n'a bɛ ŋmɛ̃.
Ŋa mɩ́ kone nɩ a ʋ tɔ pɔw ƴãw.
9A Sore yere na:
A bɛ fɛr k'ɩ̃ɩ dɔwrɩ a nɩbɛ bɛ ŋa faa faa ɛ?
A bɛ fɛr k'ɩ̃ɩ yáa a san a nɩ-bʋʋr-ŋa-tɔ zie ɩ?
10Nyɩ do a ʋ divɛ̃ tɩɩr púo pʋɔ tɩ sãw ʋ bɛr.
Ɛcɛ nyɩ taa sãwnɛ ʋ bɛrɛ pelẽpelẽ ɩ!
Nyɩ ár a ʋ wuli bɛr, mãa bɛ so a ɩ.
11Sɩza n'a, a Ɩsɩrayɛl naalʋ-tẽw
nɩ a Zuda naalʋ-tẽw za bɛ tu m ɛ.
À à ŋá n'a a Sore yere.
A yele a Sore zawr-bɛrʋ na waar'ɩ a
12A Zuda tẽw dem bɛ bãw a Sore ɩ,
ɛ́ yere: «Ʋ bɛ tɛr fãw kãw za ɩ.
A faa kʋ̃ lo a tɩ zu ɛ,
tɩ kʋ̃ bãw zɛbr nɩ kɔ̃ ɩ.
13A naaŋmɩn-ƴɛ̀r-manbɛ ɩ n sɛsɛb!
Naaŋmɩn bɛ ƴɛ̀r a bɛ zie ɩ.
A faa ƴɛ̀rʋ bɛ na ƴɛ̀rɛ a,
a lɛb lo a bɛ zu!»
14A na ɩ à ŋá a, à ŋá n'a a Sore,
a Naaŋmɩn kpɛnʋ-za-sob, yere:
«Bɛ na faa ƴɛ̀rɛ à ŋá a, Zeremi i,
a ƴɛ̀rʋ ɩ̃ na ƴãwnɛ a fʋ nʋɔrɩ́ a
na ɩ na mɛ̃ vũu a.
A nɩbɛ bɛ ŋa na ɩ na mɛ̃ dàar
a vũu na na dɩ a.»
15A Sore yere na:
Ɩsɩrayɛl nɩbɛ ɛ, ɩ̃ na ɩ na nɩ-bʋʋr-yoru
na yi zi-zãána a wa a nyɩ ƴãw.
Nɩ-bʋʋrɛ nɩr na kʋ̃ tʋ̃ɔ́ zɛb tʋ̃ɔ́ a nɛbɛ,
nɩ-bʋʋrɛ na be koro kãw za a,
nɩ-bʋʋrɛ nyɩ na bɛ wone a ƴɛ̀rʋ,
ɛ́ bɛ mɩ́ bãw a ƴɛ̀r-bie pɛr a nɛbɛ.
16A bɛ pime mɩ́ gaalɛ nɩ a kũuni bɛrɛ,
bɛ za ɩ n soja-gãdaar.
17Bɛ na baar'ɩ a nyɩ bom za:
a nyɩ bʋ̃-dieri nɩ a nyɩ bʋ̃-dɩrɩ,
a nyɩ bidɛbr nɩ a nyɩ pɔwyaar,
a nyɩ píir nɩ a nyɩ nĩi,
a nyɩ divɛ̃ tɩɩr nɩ a nyɩ kãkã-tɩɩr wɔmɛ.
Zɛbr na sãw nɩ a tẽ-kpɛn bɛr,
al pʋɔ nyɩ na tɩɛrɛ kɛ́ nyɩ kʋ̃ bãw damnʋ a.
18A lɛn daar mɩ̀ a, a Sore n'ʋ yere, ɩ̃ kʋ̃ kʋ nyɩ pàw pɛr ɛ. 19A nɩbɛ wa sowre: “Bʋ̃ʋ n'ʋ so a Sore tɩ Naaŋmɩn ƴãw tɩ a dɔwrʋ á ŋá za?” A fʋ̃ʋ Zeremi, fʋ na sɔw na: “Nyɩ zawrɩ ʋ na bɛr ɛ́ maalɛ ŋmɩn-sãanbɛ a nyɩ mɩŋa tẽw pʋɔ. Lɛ n'a nyɩ mɩ̀ na tõ nɩ-sãanbɛ tome, tẽw na bɛ ɩ a nyɩ tẽw a pʋɔ”.
A nɩbɛ bɛ wa cãà bãw a Naaŋmɩn nɩ-kpɛ̃ɛnʋ a
20A Sore yere na:
«Nyɩ yel a yel ŋa kʋ̀ a Zakɔb bʋʋrɛ,
nyɩ ɩ a Zuda nɩbɛ wõ ʋ.
21Nyɩ bɛr wõ yel ŋa,
nyɩɩm na gem ɛ́ bɛ tɛr yã a.
Nyɩ tɛr'ɩ mimie ɛ́ bɛ nyɛrɛ ɩ,
nyɩ tɛr'ɩ tobe ɛ́ bɛ wone ɩ#5:21 Nyɛ̃ Ɩza 6.9-10, Ezek 12.2, Mark 8.18..
22A Sore yere na:
A ɩ lɛ nyɩ bɛ ƴãwnɛ mɛ̃ ʋ?
A ɩ lɛ nyɩ bɛ màwr a ɩ̃ niŋé ʋ?
Mãa n'ʋ ɩ a biire ɩ a kʋ̃ɔ-kpɛ̃ɛ tɛwfʋ zie,
tʋr-bɔw n'ʋ gã kʋralɛ
a kʋ̃ɔ-kpɛ̃ɛ kʋ̃ tʋ̃ɔ́ gãw ɛ.
A ʋ kʋ̃ɔ-mie na saa mɩ́ ìre dúor a,
ɛcɛ a bɛ tɛr fãw ɛ,
a na tʋ̃ɔ́ na mɩ́ ɩrɛ gɔmɛ,
ɛcɛ a bɛ gãwnɛ a tʋr-bɔw ɛ.
23Ɛcɛ a nyɩɩm a,
nyɩ ɩ n nɩbɛ na bɛ wone wulu
ɛ́ ɩ nɩ-gaarɩ a.
Nyɩ mɩ́ lɩɛb'a tɔlɛ cere.
24Nyɩ bɛ mɩ́ yel:
“Nyɩ ɩ tɩ tɛr ƴãwfʋ
a Sore tɩ Naaŋmɩn zie ɩ.
Ʋ mɩ́ kʋ̀ tɩ nɩ a saa a ʋ daar,
a kpãcãan nɩ a sɩ̃ɛ-kpɛ-paala,
ɛ́ yũon za, ʋ mɩ́ bãwnɩ nɩ
a tɩ bʋ̃-dieri-deb dàrʋ.”
25A nyɩ sãwna dam'ɩ à á ŋá za nyaw taa,
a nyɩ yel-bebe n'a piw nyɩ nyɩ bɛ páw
a yel-vɩɛlɩ á ŋá ɩ.
26Bʋ̃ʋ n'ʋ vɛ̃, nɩ-faar be n a ɩ nɩbɛ pʋɔ.
Bɛ mɩ́ sɔwl'a gù mɛ̃ mʋ̃ɔ pʋɔ lili-nyɔwrbɛ a.
Bɛ ƴãw nɩ bɛrɩ kɛ́ bɛ nyɔw nɩ a nɩsaalbɛ.
27A bɛ yie paal'ɩ bome
bɛ na ɩ nyãnyu-ɩb páw a,
mɛ̃ kasow na paalɩ lili a.
Alɛ so bɛ lɩɛbɩ nɩ-tɩbr nɩ tɛra dem,
28bɛ kpɛ bɛrɛ 'wɔra 'wɔra.
Bɛ de nɩ a faa maalʋ jala.
Bɛ bɛ dɩrɛ a ƴɛ̀rʋ nɩ mɩnʋ ɛ,
bɛ bɛ dɩrɛ a ƴɛ̀rʋ nɩ mɩnʋ
kʋ̀rɛ a bi-kpebe ɩ,
alɛ bɛ ɩ lɛ, a nãá mɩ́ tɛr bɛ nɩ ɩb.
Bɛ bɛ mɩ́ tu a nan dem yele pùor ɛ.
29A Sore yere na:
A bɛ fɛr k'ɩ̃ɩ ìr a bɛ ƴãw ɛ?
a bɛ fɛr k'ɩ̃ɩ yáa a san
a nɩ-bʋʋr-ŋa-tɔ zie bɩɩ?
30Yele na kpɛ faa bɛ maal'ɩ wob
ɛ́ ɩrɛ suur a ɩrɛ nɩ a tẽw pʋɔ:
31A naaŋmɩn-ƴɛ̀r-manbɛ ƴɛ̀rɛ nɩ
ŋmɩn-bɛlɛbɛlɛ yúor ƴãw,
a bàwr-maalbɛ bɔbr'ɩ a bɛl yõ tɔnɛ,
ɛ́ a ɩ̃ nɩbɛ nɔ̃w a lɛ.
Ɛcɛ a yele baarʋ daar a,
bʋ̃ʋ n'ʋ nyɩ na ɩ?»
Currently Selected:
Zeremi 5: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
