Zeremi 4
4
A Sore
1A Sore yere na:
«Ɩsɩrayɛl i, fʋ̃ʋ wa lɛbr waar a,
fʋ̃ʋ lɛb wa a ɩ̃ zie,
fʋ̃ʋ wa ír a fʋ tɩb-faar faar bɛr a ɩ̃ niŋé a,
fʋ kʋ̃ cãà ɩ nɩ-cɔla ɩ#4:1 Nyɛ̃ Oze 14.2..
2A fʋ pɔb pʋɔ fʋ̃ʋ mɩ́ wa yel:
“Ɩ̃ pɔ n nɩ a Sore na vʋʋrɛ a,”
ɛ́ a tu a yel-mɩŋa,
a lɛ-na-tu-sɔr-a nɩ a mɩnʋ a,
a nɩ-bʋʋr-yoru na mɩ́ zɛlɛ na
k'ɩ̃ɩ maalɩ bɛ,
ɛ́ bɛ na mɩ́ nyʋʋr'ɩ a ɩ̃ ƴãw.
3À ŋá n'a a Sore yere a Zuda tẽw dem
nɩ a Zerizalɛm nɩbɛ zie:
nyɩ cɛ pire, nyɩ ta bʋ̀r a gʋʋr pʋɔ ɩ!»
4Bɛ ŋma nyɩ nɩ a yɛɛ,
a lɛ pʋɔ a, nyɩ ɩ nɩbɛ na ŋma yɛɛ
a mãa Sore ƴãw a.
Zuda tẽw dem i,
Zerizalɛm nɩbɛ ɛ,
nyɩ de a nyɩ nyɔ-vʋʋrʋ kʋ̀ m.
Alɛ bɛ ɩ lɛ, a ɩ̃ suur na ìr'ɩ kel mɛ̃ vũu a,
ʋ na dɩrɛ na ɛ́ nɩr bɛ be na tʋ̃ɔ́ ʋ kpiiri ɛ,
a faa nyɩ na maalɩ a zũú.
Cɛl na ŋmɛ a Zuda tẽw a
5Nyɩ yel a yel a Zuda tẽw,
nyɩ ɩ bɛ wõ ʋ a Zerizalɛm,
nyɩ pɛblɩ ɩɩl a tẽw pʋɔ!
Nyɩ cɩɩrɩ kpɛ̃w kpɛ̃w za,
nyɩ yel: «Nyɩ ɓã taa a tẽ-bɛrɛ
bɛ na cɔbrɩ a kpɛmɛ a zɛbr ƴãw a pʋɔ!»
6Nyɩ zɛw bãwfʋ bom ʋ sãá a Sɩyɔ̃ tẽw lowr!
Nyɩ cen tɩ sɔwlɩ!
Nyɩ taa tɛwr àrɛ sɔ́r zu ɛ!
Bʋ̃ʋ n'ʋ vɛ̃, ɩ̃ na ɩ na faa yi
a saa-pɛrɩ́-gʋba-lowr#4:6 Saa-pɛrɩ́-gʋba-lowr: Nyɛ̃ 1.14 nɩ a manʋ. waar,
kpɩɛrʋ kpɛ̃ɛ n'ʋ.
7A gbẽw yi n a ʋ tuw pʋɔ,
a nɩ-bʋʋr-yoru sãw-sãwnɛ lo n a sɔ́r,
ʋ yi n a ʋ beba zie, k'ʋʋ tʋ̃ɔ́ sãw a fʋ tẽw bɛr:
a fʋ tẽ-bɛrɛ na dɩ n vũu,
ɛ́ kʋ̃ cãà tɛr nɩbɛ bɛ kpɩɛr a pʋɔ ɩ.
8A na ɩ à ŋá a, nyɩ su vʋɔrɩ kparɩ!
Nyɩ kone a nyɩ kpɩɛrʋ!
Nyɩ ùore! Bʋ̃ʋ n'ʋ vɛ̃, a Sore bɛ bɛr
a ʋ su-tʋlʋ kpãkpã a tɩ ƴãw ɛ.
9A Sore yere na:
«A yele á ŋá wa ta a,
a nãà nɩ a tõ-tõ-bi-bɛrɛ kanyir na bɔr'a,
a na ɓãa nɩ a bàwr-maalbɛ nʋɔr,
ɛ́ pʋl-vʋ̃ɔ tɛr a naaŋmɩn-ƴɛ̀r-manbɛ.
10Bɛ na yere na:
“Áa! Sore Naaŋmɩn i,
fʋ sɩrɩ na bɛ̀lɩ a nɩ-bʋʋrɛ bɛ ŋa
nɩ a Zerizalɛm nɩbɛ,
fʋ na yel kɛ́ bom bɛ ɩrɛ, ɛ́ a wa ɩ
a zɛbr-sɔ-kpɛ̃ɛ n'ʋ jɩɛrɛ tɩ a!”»
A dɔ̃ dem yire nɩ ziir za waar
11A lɛn daar a,
a Sore na yel'ɩ a Zerizalɛm nɩbɛ:
«A tan zu sɛsɛb-tʋlʋ yi n
a wɛja-kpalɛ pʋɔ waar.
Sɛsɛble na mɩ́ fu
bɛ yɛ́lɩ bom a bɛ n'ʋ ɛ.
12Sɛsɛb na tɛr fãw a n'ʋ
ɩ̃ ƴãw k'ʋ yi a be waar.
Ƴɛrɛŋa a, ɩ̃ na ɩ na bɛ bãw
a lɛ ɩ̃ na dɩ n bɛ a ƴɛ̀rʋ a.»
A nɩbɛ
13«Nyɛ̃ a dɔ̃ dem:
bɛ waar'a mɛ̃ saa na ìre a zũzuge a.
A bɛ zɛbr-torkori pawr'a mɛ̃ saa-sɛsɛb a,
a bɛ wie garɛ nɩ fɔ̃w zuo sɩlɩ.
'Woi tɩɩm i! Tɩ kpi na!»
A Sore
14«Zerizalɛm i, fʋ̃ʋ wa bɔbr
kɛ́ fʋ nyɛ̃ a faafʋ a,
fʋ̃ʋ pɛ́w a fʋ socir faalʋ za bɛr.
Debor'a a pʋ-tɩɛr-faar
na yi zaa a fʋ pʋɔ?
15Bɛr wõ a kɔkɔr ŋa
na cɩɩrɛ yire a Dan tẽw a,
ʋ yere nɩ a kpɩɛrʋ na yi
a Efarayim tẽw tan vuo pʋɔ waar a.
16Nyɩ ɩ a nɩ-bʋʋrɛ za bãwnɩ a,
nyɩ yel a yel kʋ̀ a Zerizalɛm:
A dɔ̃ dem pɩɛlɛ na,
bɛ yi n tẽ-zãána waar,
bɛ ŋmɩɛr'ɩ a zɛbr cɛlsɩ
a Zuda tẽ-bɛrɛ ƴãw.
17Bɛ jil'a koli a Zerizalɛm
mɛ̃ bʋ̃-gùrbɛ na jil koli púo a.
A Sore yere na:
“Ʋ na gaarɩ a ɩ̃ zu a n'a so.”
18Zerizalɛm i,
a fʋ cenu, a fʋ ɩ-ɩrɩ n'a wa n
à á ŋá za a fʋ zu.
A fʋ faalʋ tɔnɛ n'a, sɩza n'a, a tuo tɔ!
A kpɛ b'a tɩ tɔ!»
A Zeremi ɩ n bàal a faa ʋ na nyɛ̃ a waar a zũú
19'Woi! Ɩ̃ pʋɔ! Ɩ̃ pʋɔ!
A 'wɔbrʋ 'wɔbr mɛ̃ na!
A ɩ̃ socir na ŋmãa na!
A ɩ̃ socir za damnɛ na!
Ɩ̃ kʋ̃ tʋ̃ɔ́ ɩ gbili ɛ,
bʋ̃ʋ n'ʋ vɛ̃, ɩ̃ wõ n a ɩɩl pɛblʋ,
nɩ a zɛbr cɛlsɩ.
20Bɛ cɩɩrɛ na:
«Yel-sãwnɩ n'a dɔwlɩ dɔwlɩ taa wɛ!»
Sɩza, a tẽw za sãw na.
Bɛ ùr'a wɩl a tɩ pɛnɛ-sɛwr,
a tɩ sɔwlʋ ziir ŋmʋr'a bɔr.
21Debor daar'a ɩ̃ na nyɛ̃
a zɛbr dɩrapo#4:21 Dɩrapo: Pɛn bɛ na mɩ́ 'lẽ ƴãw dàa ƴãw, ʋ ɩ nɩbɛ bɛ mɩnɛ kãw, bɩɩ bom kãw bãwfʋ a n'ʋ. Nyɛ̃ Ety 17.15, Sɔr-n 1.52, 10.25, Ssy 20.6, 74.4, Ɩza 5.26. tɩ ta,
ɛ́ wõ a ɩɩl pɛblʋ tɩ ta?
22A Sore yere n'a:
«A ɩ̃ nɩbɛ bol'a, bɛ bɛ bãw mɛ̃ ɩ.
Bibiir na bɛ tɛr yã a nɛbɛ,
bɛ bɛ bãw bom za ɩ.
Bɛ bãw nɩ a faa maalʋ vla
ɛ́ bɛ bãw a vla maalʋ ɛ.»
23Ɩ̃ jɩ́rɛ nɩ a tẽw:
ʋ ɩ n vuo ɛ́ bɛ tɛr ŋmɛ̃a ɩ,
ɛ́ a salom cãà bɔr.
24Ɩ̃ jɩ́rɛ nɩ a tan: a gbiwre na,
ɛ́ a tãli za dãdawlɛ.
25Ɩ̃ jɩ́rɛ na: nɩsaalbɛ bɛ cãà be ɩ,
ɛ́ a saa-zu lili za zɔ.
26Ɩ̃ jɩ́rɛ na: a tuwr tẽw ŋa
lɩɛb'ɩ wɛja-kpalɛ,
a ʋ tẽ-bɛrɛ za lo na.
A Sore zie n'a a yi,
a ʋ su-tʋlʋ kpãkpã zie.
27À ŋá n'a a Sore yere:
a tẽ-daa za na lɩɛb'ɩ wɛja-kpalɛ
na ɩrɛ nɩbaalʋ a,
ɛcɛ, ɩ̃ kʋ̃ sãw ʋ za bɛr pelẽpelẽ ɩ.
28Alɛ so a tẽw be a wahala pʋɔ,
ɛ́ a saa-zu, a lige pàw a salom.
Bʋ̃ʋ n'ʋ vɛ̃, ɩ̃ yel'ɩ a lɛ
ɩ̃ na tɩ yel k'ɩ̃ɩ na ɩ na a,
ɩ̃ kʋ̃ lɩɛbɩ bɛr ɛ,
ɛ́ ɩ̃ kʋ̃ lɛb pùor ɛ.
A Zerizalɛm be n nɩ-kʋrbɛ niŋé
29A wi-zɔmnbɛ
nɩ a tã-tɛbrbɛ gɔmɛ
ƴãw nɩ a tẽ-bɛrɛ za nɩbɛ zɔrʋ.
Bɛ kpɩɛr'ɩ a tuwr pʋɔ,
bɛ dúor'ɩ a pie zu.
A tẽ-bɛrɛ za gã nɩ zawlɛ,
nɩr za bɛ cãà be ɩ.
30Ɛcɛ a fʋ̃ʋ, Zerizalɛm i,
bʋ̃ʋ n'ʋ fʋ na ɩ?
Fʋ su n pɛn-vɩɛlɩ vɩɛlɩ,
ƴãw salm-zɩɛ pɩ̃ɛmɛ,
ɛ́ ƴãw mimi-laara yɛ̀lɩ nɩ a fʋ mimie.
Ɛcɛ zawla n'a fʋ maalɛ fʋ tʋɔra kɛ́ fʋ vɩɛl,
a bɛlɩ dem na zɔrɛ tuur fʋ a jewre fʋ na,
a fʋ kũu n'a bɛ bɔbr.
31Ɩ̃ wone nɩ cɛlsɩ na ɩ mɛ̃
pɔw na dɔwr a cɛlsɩ a,
cɛlsɩ na ɩ mɛ̃ pɔwsɩrale
na zanɩ dɔwr a cɛlsɩ a.
A Sɩyɔ̃ tẽw na kone
ture nɩ nuru a cɛlsɩ n'a.
«'Woi, mãa a!
Ɩ̃ kpiir'ɩ nɩ-kʋrbɛ nuru pʋɔ!»
Currently Selected:
Zeremi 4: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
