Zeremi 3
3
A Ɩsɩrayɛl ɩ na mɛ̃ pɔw-yɛm a zu na kpɛmɛ a
1A Sore yel'a: A ɩ mɛ̃ dɛb
zawr'ɩ a ʋ pɔw bɛr,
ʋ yi a ʋ zie tɩ kul dɛb-yũo a,
ʋ tɛr'ɩ sɔ́r na lɛb kul a pɔw ŋa a#3:1 Nyɛ̃ Wl-ayi 24.1-4.?
Ʋ̃ʋ'hʋ̃! A tẽw na dɛw nɩ ʋ za.
Ɛcɛ a fʋ̃ʋ a, Ɩsɩrayɛl i,
fʋ tõ n pɔw-yɛm tome nɩ nɩ-yaga
ɛ́ bɔbr kɛ́ fʋ lɛb wa a ɩ̃ zie!
A Sore n'ʋ yel.
2Dʋɔ a zu a tãli lowr ɛ́ jɩ́r nyɛ̃,
tãli-been be n be zie fʋ bɛ gã nɩ
a fʋ sɛn kãw ɛ?
Fʋ mɩ́ tɩ zɩ̃ n a sɔ́r nʋɔr gùre a fʋ sɛnbɛ,
mɛ̃ a wɛja-kpalɛ pʋɔ nɩ-yʋɔra na gùre
a nɩbɛ ʋ na na ŋmãa a.
Fʋ dɛw nɩ a tẽw nɩ a fʋ pɔw-yɛm ɩ-ɩrɩ,
nɩ a fʋ cenu na bɛ vɩɛl a.
3Lɛ n'a ɩ̃ bɛ tɩ bɛr a saa kʋ̀ b ɛ,
ɛ́ a saa bɛ wa a sɩ̃ɔ ɛ.
Ɛcɛ fʋ cãà na kpãa tobr
tone a fʋ pɔw-yɛm tome,
fʋ bɛ sàw a fʋ sãwna ɩ.
4Ɛ́ ƴɛrɛŋa fʋ sʋ̃ɔmɩ sàw
kone cɔwr mɛ̃ yere:
«Ɩ̃ sãà, fʋ̃ʋ ɩ̃ pɔ̀lʋ daarɩ́ bá a!»
Fʋ sowre nɩ fʋ tʋɔra:
5«Ʋ na tɛr'ɩ a ʋ suur kʋralɛ bɩɩ?
Ʋ kʋ̃ bɛr a baarɩ ɛ?»
À ŋá n'a fʋ mɩ́ yere ɛ́ cãà maalɛ a faa a,
ɛ́ mɩ́ bãw ʋ maalɩ vla za!
Ɩsɩrayɛl a tɩɛrʋ na lɩɛbɛ a nɩ Zuda na bɛ tu a Sore a
6A nãà Zozɩasɩ#3:6 Zozɩasɩ tɩ ɩ n a Zuda tẽw nãà a Yeezu Kɩrɩta na bɛ tɩ wa sɛr a yome 640 tɩ ta n 609 vuo pʋɔ. A ka a, a Ɩsɩrayɛl tẽw tɩ n'ɩ a naalʋ-tẽw ʋl na be saa-pɛrɩ́-gʋba-lowr a, ɛ́ a Zuda tẽw ɩ a saa-pɛrɩ́-dʋrʋ-lowr naalʋ-tẽw. daar a, a Sore tɩ yel mɛ̃ na: «Fʋ nyɛ̃ nɩ a ʋlɩ bom nɛ a Ɩsɩrayɛl a tɩɛrʋ na lɩɛbɛ a na ɩ a? Ʋ do n tãw za na kɛrɩ a zu, ʋ cen nɩ tɩ-zimpiri za pile tɩ tõ a pɔw-yɛm tome a be. 7Ɩ̃ tɩ tɩɛr'ɩ ɩ̃ pʋɔ à ŋá: “À á ŋá za pùorí a, ʋ na lɛb'a wa a ɩ̃ zie.” Ɛcɛ a ʋ yɛb, a Zuda na bɛ tu a Sore a, nyɛ̃ a na. 8Ɩ̃ zawr'ɩ a Ɩsɩrayɛl a tɩɛrʋ na lɩɛbɛ a bɛr, ʋ na tɩ maalɩ pɩ̃ɔ-yele a ƴãw, ɛ́ kʋ̀ ʋ a zawr-bɛrʋ sɛbɛ. Ɛcɛ, ɩ̃ nyɛ̃ na k'aa ʋ yɛb, a Zuda na bɛ tu a Sore a, bɛ zɔ dɛ̃bɩ̃ɛ kãw za ɩ. Ʋ mɩ̀ nɩ̃ɛ na cen tɩ tõ a pɔw-yɛm tome. 9Ʋ maal'ɩ pɩ̃ɔ-yele nɩ kʋsɩɛr nɩ dàa ŋmɩmɛ, ʋ dɛw nɩ a tẽw nɩ a ʋ pɔw-yɛm ɩ-ɩrɩ na ɩrɛ vĩ a. 10Ɛ́ a na saa ɩ à ŋá a, a Ɩsɩrayɛl yɛb Zuda na bɛ tu a Sore a bɛ lɛb wa ɩ̃ zie nɩ ʋ pʋɔ za ɩ: a ʋ ɩb-lɩɛbʋ bɛ ɩ sɩza ɩ, a mãa, a Sore, mãa n'ʋ yere.»
11A Sore tɩ yel'a ƴãw pʋɔ: «A Zuda na bɛ tu a Sore a niŋé a, a Ɩsɩrayɛl a tɩɛrʋ na lɩɛbɛ a na tʋ̃ɔ́ na yel k'ʋʋ ɩ n nɩ-mɩŋa. 12Cen tɩ cɩɩrɛ a ƴɛ̀r-bie á ŋá bɛrɛ a saa-pɛrɩ́-gʋba-lowr:
“Lɛb wa, fʋ̃ʋ Ɩsɩrayɛl a tɩɛrʋ na lɩɛbɛ a!
Ɩ̃ kʋ̃ cãà sãw niwn ƴãw fʋ ɛ.
Sɩza, ɩ̃ ɩ n bá na-bɛ-lɛbr-pùor a,
ɩ̃ bɛ tɛrɛ nɩ fʋ suur kʋralɛ ɩ,
mãa n'ʋ yel, a mãa, a Sore.
13Dɛ́ sàw a fʋ sãwna: fʋ gáarɩ nɩ a ɩ̃ zu,
a mãa Sore fʋ Naaŋmɩn zu.
Fʋ zɔ na cɔlɩ a ziir za,
a ŋmɩn-sãanbɛ zie,
a tɩ-zimpiri za pile,
ɛ́ bɛ bɛr wõ a ɩ̃ ƴɛ̀rʋ ɛ,
a Sore n'ʋ yel.”»
A Zuda tẽw nɩbɛ lɛb-waa yele
14Bibiir a tɩɛrʋ na lɩɛbɛ a, nyɩ lɛb wa, a Sore n'ʋ yere, bʋ̃ʋ n'ʋ vɛ̃, mãa n'ʋ ɩ a nyɩ zu-sob! Ɩ̃ na de nyɩ na, nɩ-been tẽ-kpɛ̃ɛ pʋɔ, nɩbɛ ayi tẽle pʋɔ, ɩ̃ɩ na lɛb'a tɛr nyɩ wa n a Sɩyɔ̃ tẽw pʋɔ. 15Ɩ̃ na kʋ̀ nyɩ nɩ cɩ̃ɩnbɛ#3:15 Cɩ̃ɩnbɛ: A Wõ-ta-kʋra sɛbɛ pʋɔ a, gb'a à ŋá za, bɛ mɩ́ bʋɔl'ɩ a nɩ-bʋʋrɛ kaarbɛ kɛ́ cɩ̃ɩnbɛ. Nyɛ̃ Ɩza 44.28. na pɛlɩ a ɩ̃ pʋɔ a. Bɛ na kaarɛ nyɩ na nɩ yã nɩ yã-bãwfʋ.
16«A Sore cãà na lɛb yere: a lɛn daar a, nyɩ na yãwmɛ na ɛ́ dɔw paalɩ a tẽw. Bɛ kʋ̃ lɛb ƴɛ̀rɛ a wõ-taa daga ƴɛ̀rʋ ɛ, nɩr kʋ̃ cãà tɛr a ʋ tɩɛrʋ ɛ, bɛ na yiir ʋ na bɛr, bɛ kʋ̃ bãwnɩ ʋ na bɛ ka be a ɩ, nɩr bɛ lɛb maalɛ bʋ̃-yoru ɛ. 17A lɛn daar a, bɛ na bʋɔlɛ nɩ a Zerizalɛm kɛ́ “Sore naalʋ-dà-kɔw”. A nɩ-bʋʋr-yoru na zɔ na ɓã taa a ɩ̃ zie, a Sore yúor na kʋ̀ a Zerizalɛm a zũú, ɛ́ bɛ na zawr'ɩ a bɛ tɩɛr-faar bɛr. 18A lɛn daar a, a Zuda tẽw nɩbɛ na cen na tɩ páw a Ɩsɩrayɛl nɩbɛ, ɛ́ bɛ za ɓã taa yi a saa-pɛrɩ́-gʋba-lowr tẽw wa a tẽw ʋl ɩ̃ na kʋ̀ a bɛ sãàkʋm-kore k'ʋʋ ɩ a bɛ sób a pʋɔ#3:18 Nyɛ̃ 3.12 nɩ a manʋ..»
A nɩ-bʋʋrɛ a tɩɛrʋ na lɩɛbɛ a Sore zie lɛb-waa yele
A Sore
19Ɩ̃ tɩ tɩɛr'ɩ ɩ̃ pʋɔ à ŋá:
«Ɩ̃ tɩ bɔbr'a k'ɩ̃ɩ nãà sɔr fʋ ƴãw a ɩ̃ bidɛbr pʋɔ,
ɛ́ kʋ̀ b tẽw na vɩɛl vɩɛl a,
a tẽ-daa zi-vla za zie!»
Ɩ̃ tɩ tɩɛr'ɩ ɩ̃ pʋɔ:
Fʋ na bʋɔlɛ mɛ̃ na: “Ɩ̃ sãà”,
ɛ́ fʋ kʋ̃ lɛb gùr pùor cɔw mɛ̃ ɩ.
20Ɛcɛ, Ɩsɩrayɛl nɩbɛ ɛ,
mɛ̃ a lɛ pɔw na mɩ́ bɛ̀lɩ a ʋ sɩr a,
lɛ n'a nyɩ bɛ̀lɩ mɛ̃.
A mãa, a Sore, mãa n'ʋ yel a lɛ.
21Cɛlsɩ yire nɩ a maalʋ-ziir:
a Ɩsɩrayɛl nɩbɛ nɛbɛ kone zɛlɛ nɩ yãayãa.
Bʋ̃ʋ n'ʋ vɛ̃, bɛ tuli nɩ a sɔ́r,
bɛ yiiri mɛ̃ na bɛr,
a mãa, a Sore bɛ Naaŋmɩn.
22«Bibiir na bɛ tu m a, nyɩ lɛb wa a ɩ̃ zie,
ɩ̃ na sanɩ nɩ a nyɩ na-bɛ-tu-m a ɩ-ɩrɩ za!»
A nɩbɛ
«Tɩmɛ n'ɩ bɛ ŋa! Tɩ waar'ɩ a fʋ zie,
bʋ̃ʋ n'ʋ vɛ̃, a fʋ̃ʋ Sore a,
fʋ̃ʋ n'ʋ ɩ a tɩ Naaŋmɩn!
23Yel-mɩŋa sɩza,
a gɔmɛ á ŋá za na ɩrɛ a tan zu a,
a maalʋ á ŋá za na maalɛ a tãli zu a,
a bɛ̀lɛ nɩ a nɩbɛ.
Yel-mɩŋa sɩza,
a Sore tɩ Naaŋmɩn zie n'a
a Ɩsɩrayɛl páwr a faafʋ.
24Ɛcɛ, a tɩ pɔ̀lʋ daarɩ́ za a,
a Báàl maalʋ na ɩrɛ vĩ a
baar'ɩ a alɩ bome nɛ za
a tɩ sãà mɩnɛ na tɩ bàl bɛ tʋɔra páw a,
a bɛ píir, a bɛ bʋʋr, a bɛ nĩi,
a bɛ bidɛbr nɩ a bɛ pɔwyaar.#3:24 A na ɩ n a dʋn nɩ a bibiir bɛ na mɩ́ maal'ɩ a bagɛ kʋ̀ a Báàl nɩ a ŋmɩn-yoru a mɩnɛ a.
25Tɩ gã nɩ a tɩ vĩ,
tɩ sàw a tɩ yúor na sãw a.
Bʋ̃ʋ n'ʋ vɛ̃, tɩɩm nɩ a tɩ sãàkʋm-kore mɩnɛ
maal'ɩ yel-bier sãw nɩ a Sore tɩ Naaŋmɩn,
a tɩ pɔ̀lʋ daarɩ́ za wa tɔ a dɩ̃a.
Tɩ bɛ bɛr wõ a lɛ
a Sore tɩ Naaŋmɩn na tɩ yere kʋ̀rɛ tɩ a ɩ.»
Currently Selected:
Zeremi 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
