Zeremi 31
31
*
1A Sore yere na: «A daar ʋl ɩ̃ na na ɩ a Ɩsɩrayɛl yie za Naaŋmɩn, ɛ́ a ɩ a ɩ̃ nɩ-bʋʋrɛ a na ta na.»
A saa-pɛrɩ́-gʋba-lowr Ɩsɩrayɛl nɩbɛ lɛbr'a waar a bɛ tẽw
2À ŋá n'a a Sore yere:
«A wɛja-kpalɛ pʋɔ a,
ɩ̃ wul'ɩ a ɩ̃ nɔ̃wfʋ a nɩbɛ na bɛ tʋ̃ɔ́ kpi a.
A na ɩ lɛ a, a Ɩsɩrayɛl na tʋ̃ɔ́ na nyɛ̃ a pɩ̃ɛnʋ.
3Ʋ tɩ yere na:
“A Sore wul mɛ̃ nɩ ʋ tʋɔra zi-zãána.”
Ɩ̃ɩ tɩ sɔw ʋ na:
“Ɩ̃ nɔnɛ fʋ na nɩ nɔ̃wfʋ na be kʋralɛ a.
Alɛ n'a so ɩ̃ cãà tu b yaga za.
4Ɩ̃ na lɛb'a maalɩ fʋ ƴãw,
ɩ̃ nɩ-nɔna Ɩsɩrayɛl i, ɩ̃ na lɛb'a mɛ b.
Fʋ na lɛb'a de a fʋ gãgali-vɩɛlɩ
tɩ lãw nɩ a bɩn-ƴawrbɛ na maalɛ cuw a.
5Fʋ na lɛb'a sɛl divɛ̃ tɩɩr a Samaari tan zu,
ɛ́ a divɛ̃ tɩ-wɔmɛ pɔrbɛ na pãa tʋ̃ɔ́ na mɩ́ ír
a divɛ̃ tɩɩr bɛ na sɛl a tɔnɛ.
6Bibir na vɩɛ na, a zi-gùrbɛ
na na cɩɩrɛ yere à ŋá a Efarayim tãli zu a:
Nyɩ ìr! Nyɩ ɩ tɩ do a Sɩyɔ̃,
a Sore tɩ Naaŋmɩn zie!”»
*
7À ŋá n'a a Sore yere:
«Nyɩ lɔbr nʋ̃ɔ̀ cɛlsɩ a Ɩsɩrayɛl ƴãw,
nyɩ cɩɩrɛ nɩ nyɩ pʋɔ za
a nɩ-bʋʋr-yoru niw-diere ƴãw!
Nyɩ ɩ bɛ wone a nyɩ danʋ, ɛ́ nyɩ yere:
“Sore e, faa a fʋ nɩbɛ,
a Ɩsɩrayɛl nɩbɛ bɛl na cɛ a!”
8Ɩ̃ na sɩrɩ na ɩ bɛ yi
a tẽw saa-pɛrɩ́-gʋba-lowr lɛb wa,
ɩ̃ na tɛr bɛ nɩ a tẽw zi-zãánɩ za lɛb wa ɓã taa.
A bɛ pʋɔ a, zɔn, wʋbr, pɔw-pée
nɩ pɔ-dɔwrbɛ be n be.
Zu-sɛbla na bɛ tɩ dɩ vuo a nɛbɛ
lɛbr waar a ka.
9Bɛ kone na lɔbr'ɩ nɩbaal-nuru tarɛ nɩ,
ɩ̃ɩ bɩɛlɛ bɛ.
Ɩ̃ na tɛr bɛ na cen nɩ
bàrʋ na paalɩ kʋ̃ɔ a zie.
Ɩ̃ na tu n bɛ nɩ sɔ́r na man taa ʋ za
bɛ kʋ̃ʋ tʋ̃ɔ́ ŋmɛ gbɛ́r lo a.
Bʋ̃ʋ n'ʋ vɛ̃, ɩ̃ ɩ n sãà a Ɩsɩrayɛl zie,
ɛ́ a Efarayim ɩ a ɩ̃ bidɛb-dãw.»
*
10Nɩ-bʋʋr-yoru u,
nyɩ bɛrɛ wone a Sore ƴɛ̀rʋ!
Nyɩ hieri ʋ a kʋ̃ɔ-kpɛ̃ɛ-sɔgɔ-ten na zãá a pʋɔ.
Nyɩ yel:
«A Sore tɩ diw nɩ a Ɩsɩrayɛl yaarɩ,
ɛcɛ ƴɛrɛŋa a, ʋ lɛb'a ɓanɛ bɛ taa
ɛ́ gùre bɛ mɛ̃ dʋ̃-cɩ̃ɩnɛ na gùre ʋ dʋn a.»
11Bʋ̃ʋ n'ʋ vɛ̃, a Sore faa nɩ a Ɩsɩrayɛl nɩbɛ,
ʋ ír bɛ nɩ nɩr na kpɛmɛ zuo bɛ a nuru pʋɔ.
12Bɛ na lɔb'ɩ nʋ̃ɔ̀ cɛlsɩ ta n a Sɩyɔ̃ tãw zu.
A bɛ niŋe na caal'ɩ a za a Sore bʋ̃-vɩɛlɩ niŋé:
a ble, a divɛ̃-paala, a kãá-paala, píir, bʋʋr nɩ nĩi.
Bɛ na ɩ na mɛ̃ zaadɛ̃ bɛ na cɔ̀r vla vla a,
ɛ́ a bɛ fãw kʋ̃ lɛb siwri towtow ɛ.
13Lɛ n'a nʋ̃ɔ̀ na ɩrɛ a pɔwsɩrali bɛ ƴawr,
lãwnɩ a pɔlbili nɩ a dɛb-nyamɛ.
Ɩ̃ na ɩ na a bɛ wahala lɩɛbɩ nʋ̃ɔ̀,
ɩ̃ na mɔwlɩ bɛ na.
A pʋ-sãwna pùorí a, a na ɩ n a nʋ̃ɔ̀.
14Ɩ̃ na kʋ̀ n a bàwr-maalbɛ
nɛ̃-kãánɩ yaga za,
ɛ́ paalɩ a ɩ̃ nɩbɛ nɩ a ɩ̃ maalʋ.
À à ŋá n'a a Sore yel.
*
15À ŋá n'a a Sore yere:
«Kon kone na yire Arama#31:15 Arama: Tẽle kãw na be a Zerizalɛm saa-pɛrɩ́-gʋba-lowr a n'ʋ. Be n'a a Zuzɛb nɩ a Bɛ̃zamɛ mã, a Arasɛl, yaa be. Nyɛ̃ Yzt 35.16. A Arasɛl mɩ̀ ɩ n a Ɩsɩrayɛl naalʋ-tẽw za bãwfʋ. Nyɛ̃ Yzt 30.3. A kan-nʋɔr ŋa mɩ̀ be n Mat 2.18 pʋɔ. tẽw pʋɔ,
mʋta-zɩ̃ɩ kon a,
Arasɛl'ʋ kone a ʋ bibiir,
ɛ́ bɛ sàwr bɛ na mɔwl'ʋ,
a ʋ bibiir na bɛ cãà a ƴãw.»
16Ɛcɛ à ŋá n'a a Sore yere kʋ̀rɛ ʋ:
«Ta cãà kone siwre nɩ ɛ,
fɩɛlɩ a fʋ mʋta-kʋ̃ɔ bɛr!
A mãa, a Sore, ɩ̃ yere nɩ à ŋá:
Ɩ̃ na ya b'ɩ a hanʋ fʋ na hanɩ a.
A fʋ bibiir na yi n a bɛ dɔ̃ dem tẽw lɛb wa.»
17A Sore yere na:
«A na ɩ lɛ a, fʋ na tʋ̃ɔ́ na ƴãw tɩɛrʋ
a fʋ nɩdaar ƴãw.
A fʋ bibiir na lɛb'a wa a bɛ tẽ-dɔwra pʋɔ.
18Ɩ̃ sɩrɩ na wõ a Efarayim tẽw nɩbɛ
na kone zɛbr yere nɩ a:
“Sore e, fʋ kpãa tɩ nɩ faa faa,
mɛ̃ a lɛ bɛ na mɩ́ dɔwrɩ
nadɛr-pɔl na bɛ sàwr cere a.
Ɛcɛ ɩ tɩ lɛb wa a fʋ zie,
kɛ̀ tɩ tʋ̃ɔ́ sɩrɩ lɛb wa a fʋ zie.
Bʋ̃ʋ n'ʋ vɛ̃, a fʋ̃ʋ a, Sore e,
fʋ̃ʋ n'ɩ a tɩ Naaŋmɩn.
19Sɩza, tɩ cen na zãá nɩ fʋ,
ɛcɛ ƴɛrɛŋa a, tɩ ciire nɩ a tɩ sãwna.
Fʋ ɩ na tɩ bãw a tɩ sãwna pɛr,
ɛ́ ƴɛrɛŋa a, tɩ wore a na.
A tɩ yúor sãw na ɛ́ vĩ nyɔw tɩ.
Tɩ bɛ ɩ vla a tɩ pɔ̀lʋ daarɩ́ ɛ, a lɛb lo a tɩ zu.”»
20A Sore yere na:
«A Efarayim n'ɩ a ɩ̃ bidɛb-nɔna nɔna za,
ɩ̃ nɔnɛ ʋ na zuo a ʋ taabɛ.
Alɛ n'a so, kʋralɛ mãa wa yere ʋ a,
ɩ̃ mɩ́ cãà na tɛr a ʋ tɩɛrʋ.
Ɩ̃ nɔnɛ ʋ na bɛ dɩ vuo ɩ.
Sɩza, ɩ̃ sɩrɩ na zɔrɛ a ʋ nɩbaalʋ.»
*
21Ƴãw kʋsɛbɛ tu n a fʋ sɔ́r,
ƴãw ƴãw bãwfʋ.
Cɛlɛ a sɔ́r fʋ na de a zie, a sɔ́r fʋ na tu a,
ɛ́ lɛb wa, ɩ̃ nɩ-nɔna za Ɩsɩrayɛl i,
lɛb wa a tẽ-bɛrɛ fʋ na so a pʋɔ.
22Pɔwli-gaara a, debor'a
fʋ na cere a ziir za tɩ ta?
Bʋ̃ʋ n'ʋ vɛ̃, a Sore ír'ɩ yel-sãw a tẽw zu:
a pɔw n'ʋ na bɔ a dɛb#31:22 Bɛ de nɩ a Ɩsɩrayɛl nɩ-bʋʋrɛ man nɩ pɔw na ƴãw nɩ a Sore yúor a..
A Sore na lɛb'a maalɩ a Zuda nɩ a Ɩsɩrayɛl ƴãw
23À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Mãa wa lɛb maalɩ a Zuda tẽw nɩ a ʋ tẽ-bɛrɛ ƴãw a lɛn daar a, a nɩbɛ na lɛb'a yere a ƴɛ̀r-bie á ŋá:
“A Sore, ʋ maalɩ fʋ, Sɩyɔ̃ tãli-sõw i,
fʋ na ɩ zie a faafʋ na kpɩɛr a!”
24Lɛ n'a a Zuda tẽw kura nɩ a ʋ tẽ-bɛrɛ nɩbɛ za na lãw kpɩɛr, a ka-kʋ́ɔrbɛ nɩ a bɛlɩ dem na mɩ́ cɔlɛ nɩ a bɛ dʋn a. 25Bʋ̃ʋ n'ʋ vɛ̃, ɩ̃ na ɓãa nɩ a bɛlɩ dem za na bàl a kʋ̃ɔ-nyúur, ɩ̃ na kʋ̀ n a bɛlɩ dem za na bɛ cãà tɛr fãw a, a alɩ bome nɛ na fɛrɛ a. 26Lɛ n'a ɩ̃ tɩ zaw ìr ɛ́ tɩ nyɛ̃ k'aa ɩ̃ gʋ̃ɔ́ tɩ maalɩ mɛ̃ na.
27A Sore yere na: Ɩ̃ kʋ̃ yaa kɛ́ ɩ nɩsaalbɛ nɩ dʋn yɛ̀r pàw a Ɩsɩrayɛl nɩ a Zuda naalʋ-ten, mɛ̃ a lɛ bɛ na mɩ́ yaarɩ bʋ̃-bʋʋrɛ púo pʋɔ a ɩ. 28Wa tɩ tɔ ka a, ɩ̃ tɩ àr'ɩ a bɛ ƴãw k'ɩ̃ɩ vɔ̃ bɛr, k'ɩ̃ɩ ŋmɛ lɔb, k'ɩ̃ɩ da lɔb, k'ɩ̃ɩ sãw bɛr, k'ɩ̃ɩ ɩ a kpɛ. Ɛcɛ ƴɛrɛŋa a, ɩ̃ na lɩɛb'a cɔw bɛ, k'ɩ̃ɩ lɛb mɛ ɛ́ lɛb sɛl, a Sore n'ʋ yere. 29Lɛ n'a nɩr kʋ̃ mɩ́ lɛb lɔb a zʋkpar ŋa ɩ:
“A dɔwrbɛ 'wɔb'ɩ suw-kɛrɛ
ɛcɛ a bibiir nyɩmɛ n'a mĩi#31:29 Nyɛ̃ Ezek 18.2..”
30Bʋ̃ʋ n'ʋ vɛ̃, nɩr wa 'wɔb divɛ̃ tɩ-wɔ̃-kɛrɛ a, ʋl mɩŋa nyɩmɛ n'a na mĩi. Ŋa za n'ʋ na mɩ́ kpi a ʋ sãwna kũu.
31A Sore yere na: Ɩ̃ kʋ̃ yaa kɛ́ maal'ɩ a Ɩsɩrayɛl nɩbɛ nɩ a Zuda nɩbɛ wõ-ta-paala ɩ. 32Ʋ kʋ̃ ŋmɛ̃ mɛ̃ a ʋl ɩ̃ na tɩ maal'ɩ a bɛ sãàkʋm-kore, a lɛn daar ɩ̃ na tɩ nyɔw bɛ a nũú k'ɩ̃ɩ ɩ bɛ yi a Eziptɩ tẽw pʋɔ a ɩ. A wõ-taa ʋl a, bɛ sãw ʋ na bɛr, a mãa na saa tɩ n'ɩ a bɛ zu-sob a. A mãa, a Sore, mãa n'ʋ yere. 33A Sore cãà na yere: Nyɛ̃ a wõ-taa ʋl ɩ̃ na na maal'ɩ a Ɩsɩrayɛl nɩbɛ a lɛn daar a: Ɩ̃ na ƴãw nɩ a ɩ̃ wulu a bɛ pʋ̃ɔmɩ za, ɩ̃ na sɛb a na ƴãw a bɛ socie pʋɔ. Ɩ̃ na ɩ n a bɛ Naaŋmɩn, ɛ́ bɛ ɩ a ɩ̃ nɩbɛ. 34A Sore yere na: Nɩr za kʋ̃ mɩ́ lɛb wule a ʋ tɔ sob bɩɩ a ʋ yɛb yere nɩ: “Nyɩ bãw a Sore!” ɩ. Bʋ̃ʋ n'ʋ vɛ̃, bɛ za na bãw mɛ̃ na, a pʋrɩ za zie tɩ tɔ a kpɛ̃ɛ za zie. Ɩ̃ na dɩ n a bɛ sãwna suur kʋ̀ bɛ, ɩ̃ kʋ̃ cãà bãwnɩ a bɛ yel-bebe ɩ.»
*
35À ŋá n'a a Sore yere:
Ãa n'ʋ mɩ́ ƴãw a mʋ̃tɔ̃w k'ʋʋ caalɛ a bibir?
Ãa n'ʋ mɩ́ yel a cuw nɩ a ŋmar-bie
k'aa caalɛ a tɩ̃ɩsɔw?
Ãa n'ʋ mɩ́ dam a kʋ̃ɔ-kpɛ̃ɛ
ƴãw a kʋ̃ɔ-mie ɩrɛ gɔmɛ?
A Sore, a kpɛnʋ-za-sob'ʋ, a ʋ yúor'ɩ a lɛ.
36A na ɩ lɛ a, à ŋá n'a a Sore yere:
«Mãa wa sàw bibir kãw
k'aa tẽ-daa nɛ́ɛ á ŋá bɛ cãà pʋɔ a,
ɩ̃ mɩ̀ na sàw nɩ a lɛn daar
k'aa Ɩsɩrayɛl nɩbɛ bɛ cãà ɩ nɩ-bʋʋrɛ a ɩ̃ niŋé ɩ.»
37À ŋá n'a a Sore yere:
«Nɩr wa tʋ̃ɔ́ manɩ a salom kɛrʋ,
ʋlɛ wa tʋ̃ɔ́ manɩ a tẽsɔw zulu a,
a lɛ pʋɔ a, ɩ̃ na zawr'ɩ
a Ɩsɩrayɛl bʋʋrɛ bɛr,
a faa bɛ na maalɩ a zũú!»
À à ŋá n'a a Sore yel.
*
38A Sore yere na: «Bɛ kʋ̃ yaa kɛ́ lɛb mɛ a Zerizalɛm tẽ-kpɛ̃ɛ a ɩ̃ ƴãw ɛ. Bɛ na yi n ʋ nɩ a Hananeyɛl yir-cõcowla ƴãw tɩ sãá nɩ a Gõgon dɩ̃dɔr ƴãw. 39Bɛ na de nɩ niwn tʋɔrɩ a tẽ-kpɛ̃ɛ tʋr-bɔw-paalɛ tu n a mʋ̃tɔ̃w-kpɛb-lowr, a Garɛvʋ tãle lowr, ɛ́ a be a, a na lɩɛb'a tu Gowa lowr. 40A kũuni nɩ a tãpɛl-kãánɩ bà-fʋɔla#31:40 Kũuni nɩ tãpɛl-kãánɩ bà-fʋɔla: A Hinom bà-fʋɔla tɔ̃w n'ʋ bɛ yere. Nyɛ̃ Zer 2.23 nɩ a manʋ. Tãpɛlʋ: A dʋn bɛ na mɩ́ maal'ɩ a bagɛ a tãpɛlʋ n'a. za nɩ a ziir al za na cen tɩ tɔ a Sedrɔ̃ bà-fʋɔla ɛ́ tɩ sãá a Wie dɩ̃dɔr gõgon ƴãw a, na ɩ n a Sore zi-sóra. Bɛ bɛ vʋ̃ɔnɛ bom, bɛ sãwnɛ bom za bɛrɛ a ziir á ŋá pʋɔ ɩ.»
Currently Selected:
Zeremi 31: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
