Zeremi 30
30
A yele a Sore na yel k'ʋʋ na maal'ɩ a Ɩsɩrayɛl nɩbɛ nɩ a Zuda nɩbɛ ƴãw a
1A Sore tɩ ƴɛ̀r'ɩ a Zeremi zie à ŋá: 2«À ŋá n'a a mãa, a Sore, a Ɩsɩrayɛl Naaŋmɩn, yere: Sɛb a ƴɛ̀rʋ al za ɩ̃ na ƴɛ̀r kʋ̀ b a ƴãw sɛbɛ pʋɔ. 3Bʋ̃ʋ n'ʋ vɛ̃, ɩ̃ yere na kʋ̀rɛ fʋ: bibir waar'a na vɩɛ, ɩ̃ na na lɛb maalɩ a ɩ̃ nɩ-bʋʋrɛ Ɩsɩrayɛl ƴãw a, nɩ a Zuda nɩbɛ mɩ̀ a. Ɩ̃ na tɛr bɛ na lɛb wa n a tẽw ʋl ɩ̃ na tɩ kʋ̀ a bɛ sãàkʋm-kore a pʋɔ, ɛ́ bɛ na lɛb'a so ʋ. A mãa Sore n'ʋ yere.»
4-5A na ɩ lɛ a, nyɛ̃ a ƴɛ̀rʋ a Sore na ƴɛ̀r kʋ̀ a Zeremi a Ɩsɩrayɛl nɩbɛ ƴãw nɩ a Zuda nɩbɛ ƴãw mɩ̀ a: «À ŋá n'a a Sore yere:
Tɩ wone nɩ pʋl-vʋ̃ɔ cɛlsɩ,
zɔ-ŋmɛ-taa n'a, ƴã-ɓaarʋ bɛ n'a ɩ.
6Nyɩ sowri kaa ɛ́ jɩ́r nyɛ̃:
Dɛb mɩ́ dɔw na a?
Ɛ́ bʋ̃ʋ n'ʋ so ɩ̃ nyɛ̃ a dɛbr za bɛ tɩɛ tɩɛ sɩɩr
mɛ̃ pɔw na dɔwr a?
A bɛ niŋe lɩɛb'a pɛlɩ pɛlɩ.
7Nyɛ̃ baw-bio a!
Bibir na bɛ tɛr dɩ̃ɛnʋ a n'ʋ.
Bibir kãw za bɛ ŋmɛ̃ taa nɩ ʋ ɛ.
Kpɩɛrʋ daar'ʋ a Zakɔb bʋʋrɛ ƴãw,
ɛcɛ bɛ na nyɛ̃ nɩ faafʋ.»
*
8«A daar wa ta a, a Sore, a kpɛnʋ-za-sob'ʋ yere, ɩ̃ na ír'ɩ a fãw ʋl na tɩ dĩ bɛ mɛ̃ a na-kʋ́ɔra-dàa a bɛr, ɩ̃ na ŋma n a bɛ mie bɛr. A lɛ pʋɔ a, bɛ kʋ̃ cãà ɩ sãanbɛ gbãgbaar ɛ. 9Ɛcɛ bɛ na tone nɩ a ɩ̃ tome, a mãa bɛ Naaŋmɩn. Bɛ na tone nɩ a Daviir yir nɩr ʋl, a bɛ nãà, ɩ̃ na na ɩ ʋ lɛb be be a, tome.»
*
10«A fʋ̃ʋ, Ɩsɩrayɛl, ɩ̃ tõ-tõ-bie e,
ta zɔrɛ dɛ̃bɩ̃ɛ ɩ, a Sore n'ʋ yere.
Pʋl-vʋ̃ɔ ta tɛr fʋ ɛ,
fʋ̃ʋ, a sãàkʋm-kʋra na n'ɩ Zakɔb a.
Ɩ̃ na faa fʋ nɩ a tẽ-zãánɩ pʋɔ,
ɛ́ faa a fʋ bibiir a tẽw ʋl pʋɔ
bɛ na diw bɛ cen nɩ a.
Ɩsɩrayɛl i, fʋ na lɛb'a wa,
wa vʋʋrɛ zoom ɛ́ bɛ bãw damnʋ ɛ.
Ɛ́ nɩr za kʋ̃ lɛb ƴãw fʋ dɛ̃bɩ̃ɛ ɩ.
11Bʋ̃ʋ n'ʋ vɛ̃, ɩ̃ lãw nɩ fʋ na
k'ɩ̃ɩ tʋ̃ɔ́ faa fʋ, a Sore n'ʋ yel.
Ɩ̃ na kʋ n a nɩ-bʋʋr-yoru pàw pɛr,
a bɛl pʋɔ ɩ̃ na diw fʋ cen nɩ a.
Ɛcɛ a fʋ̃ʋ a, ɩ̃ bɛ bɔbr k'ɩ̃ɩ kʋ b pàw pɛr ɛ.
Sɩza n'a, ɩ̃ kpãa fʋ na mɛ̃ a lɛ a na sɛw a.
Bʋ̃ʋ n'ʋ vɛ̃, ɩ̃ kʋ̃ tʋ̃ɔ́ ɩrɛ a fʋ zie
mɛ̃ fʋ bɛ tɛr sãwna a ɩ!»
*
12À ŋá n'a a Sore yere:
«Zerizalɛm i, a fʋ bàalʋ bɛ tɛr tɩ̃ɩ ɛ,
a fʋ natɩr kʋ̃ tʋ̃ɔ́ sanɩ ɛ.
13Nɩr za bɛ tu a fʋ yele pùor ɛ.
Bɛ mɩ́ tʋ̃ɔ́ na sanɩ a natɩɛ,
ɛcɛ a fʋ̃ʋ dem ƴãw a, tɩ̃ɩ bɛ ka be ɩ.
14A fʋ sɛnbɛ za yiire fʋ na bɛrɛ,
bɛ bɛ cãà ŋmɛlɛ kaar fʋ ɛ.
Zerizalɛm i, ɩ̃ ŋmɛ b'a,
mɛ̃ ɩ̃ ɩ n a fʋ dɔ̃ sob a,
ɩ̃ kpãa fʋ nɩ faa faa.
15Bʋ̃ʋ n'ʋ so fʋ kone nɩ a fʋ bàalʋ,
fʋ kone a fʋ natɩr na bɛ tɛr sanʋ a ƴãw?
A fʋ ɩ-faar na bɛ tɛr nʋɔr a,
nɩ a fʋ sãwna na yãwmɛ a zũú n'a
ɩ̃ ɩ b à à ŋá.
16Ɛcɛ a bɛlɩ dem za na báarɛ fʋ a,
bɛ mɩ̀ na baarɩ bɛ na.
Bɛ na diw nɩ a fʋ dɔ̃ dem za pap
cen nɩ tẽ-yũo.
A bɛlɩ dem za na fárɛ a fʋ bome a,
bɛ mɩ̀ na fá n a bɛ bome.
A bɛlɩ dem za na zarɛ a fʋ bome a,
bɛ mɩ̀ na za n a bɛ bome.
17Bɛ bʋɔlɛ fʋ nɩ “pɔw-diw-bɛra”,
“Sɩyɔ̃ nɩr za na bɛ ŋmɛlɛ kaar a”.
Ɛcɛ a mãa, a Sore, ɩ̃ yere na:
ɩ̃ na sanɩ nɩ a fʋ natɩɛ,
ɩ̃ na ɩ na a ɓãá.»
*
18À ŋá n'a a Sore yere:
«Ɩ̃ na ɩ na a Ɩsɩrayɛl yie
lɛb ŋmɛ̃ mɛ̃ a koro za a,
ɩ̃ na zɔ n a bɛ yie nɩbaalʋ.
A tẽ-bɛrɛ na lɛb'a mɛ a be a na tɩ be wa lo a,
ɛ́ yir-vɩɛlɩ lɛb mɛ a debo-kore zu.
19Yielu nɩ nʋ̃ɔ̀ cɛlsɩ na mɩ́ yire nɩ a pʋɔ.
A Zakɔb bibiir nʋɔr kʋ̃ lɛb siwri ɛ,
ɩ̃ na ɩ na bɛ yɛ̀r yãwmɛ.
Bɛ kʋ̃ lɛb ɩ nɩ-ɩ-laarɩ ɛ,
ɩ̃ na zɛw bɛ nɩ yaga za.
20Bɛ na lɛb'a ɩ mɛ̃ a dãwdãw a,
bɛ na lɛb'a ɓanɛ taa a ɩ̃ niŋé,
ɩ̃ɩ na dɔwr'ɩ a bɛlɩ dem za na dɔwrɛ bɛ a.»
21A Sore yere na:
«A bɛ kãw n'ʋ na ɩ a bɛ nɩ-kpɛ̃ɛ,
a bɛ kaarɛ na dɔw nɩ a bɛ sɔgɔ.
Ɩ̃ na sàw na ʋ taw ta, ʋ na wa n a ɩ̃ zie.
Bʋ̃ʋ n'ʋ vɛ̃, ãa n'ʋ na sàw cɛ kũu-pire
taw pɩɛlɩ mɛ̃?
22A lɛ pʋɔ a, nyɩ na lɛb'a ɩ a ɩ̃ nɩbɛ,
ɩ̃ɩ ɩ a nyɩ Naaŋmɩn.»
*
23A Sore saa-sɛsɛb tarɛ na,
a ʋ suur ìr'a.
Sɛsɛb na fure lɩɛbɛ nɩ fãw a
lo n a nɩ-faar zurú.
24A Sore su-tʋlʋ kpãkpã bɛ ɓãanɛ,
ʋlɛ bɛ wa maalɩ a lɛ ʋ na tɩɛrɩ
a yele bin baarɩ a ɩ.
Bibir kãw n'a nyɩ na bãw a pɛr.
Currently Selected:
Zeremi 30: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
