Zeremi 2
2
A Ɩsɩrayɛl zawr'ɩ a ʋ Naaŋmɩn bɛr, ɛ́ tuur ŋmɩn-yoru na bɛ tɛr pɛr a
1A Sore tɩ ƴɛ̀r'ɩ a ɩ̃ zie à ŋá: 2«Cen tɩ ƴɛ̀r à ŋá a Zerizalɛm tẽw nɩbɛ zie:
À ŋá n'a a Sore yere:
Ɩ̃ cãà na bãwnɩ a lɛ fʋ na tɩ ŋmɛ̃ a koro za a.
Fʋ na tɩ ɩ a pɔwsɩrale a, fʋ tɩ tu m'a.
Fʋ na tɩ ɩ a ɩ̃ ƴãw-nɩ-yúor#2:2 A ka nɩ a Sɛb-sõw sɛbr a mɩnɛ pʋɔ a, bɛ mɩ́ de nɩ a Ɩsɩrayɛl nɩ-bʋʋrɛ man cɔwr'ɩ pɔwsɩrale. a, fʋ tɩ nɔnɛ mɛ̃ na!
Fʋ tɩ tuur mɛ̃ nɩ a wɛja-kpalɛ pʋɔ,
tẽsɔw zu bom za na bɛ bule a.
3Ɩsɩrayɛl i, mãa yõ tɩ so b
mɛ̃ a bʋ̃-dieri bʋ̃-dan a.
Bɛlɩ dem za na mɩ́ tɩ tʋɔr fʋ a,
mãa nɩ bɛl mɩ́ tɩ nɛbɛ!
Faa mɩ́ tɩ páw bɛ nɩ daadaalɛ.
À à ŋá n'a a Sore yel.
4Nyɩ bɛr wõ a Sore ƴɛ̀rʋ,
a nyɩɩm Zakɔb bʋʋrɛ,
Ɩsɩrayɛl dɔwlʋ za nɩbɛ ɛ.
5À ŋá n'a a Sore yere:
Bʋ̃ʋ n'ʋ a nyɩ sãàkʋm-kore
nyɛ̃ a ɩ̃ zie a bɛ sɛw, bɛ pɩl?
Bɛ zɔ na tu bʋ̃-zawlɛ pùor
mɩ̀ lɩɛbɩ bʋ̃-zawlɛ.
6Bɛ bɛ yel bɛ tʋɔra:
“Nyɩnɛ n'a a Sore be,
ʋl na ír tɩ yi n a Eziptɩ tẽw,
ʋl na tɛr tɩ tɔl'ɩ a wɛja-kpalɛ pʋɔ,
zi-faa na ɩ gbʋlãkowe tɛwr a,
zie na ko ɛ́ liw a,
zie nɩr za na bɛ tɔlɛ a,
zie nɩr za na bɛ kpɩɛr a?”
7Ɩ̃ ɩ na nyɩ kpɛ tɩ-wɔnɩ tẽw
a tẽsɔw na pʋ̃ɔ́ a pʋɔ,
kɛ́ nyɩ tɩ tʋ̃ɔ́ íre tɔnɛ
a ʋ bʋ̃-kʋ́ɔrɩ nɩ a ʋ na-bome pʋɔ.
Ɛcɛ nyɩ na wa kpɛ a ʋ pʋɔ a,
nyɩ dɛw nɩ a ɩ̃ tẽw bɛr,
ɛ́ ɩ a ɩ̃ zi-sóra lɩɛbɩ zi-faa faa.
8A bàwr-maalbɛ bɛ sowri kɛ́:
“Nyɩnɛ n'a a Sore be ɩ?”
A Wulu bãw-bãw-karɩ bɛ bãw mɛ̃ ɩ.
A nɩ-bɛrɛ gaar'ɩ a ɩ̃ zu,
a ƴɛ̀r-manbɛ ƴɛ̀r'ɩ a ŋmɩn Báàl yúor ƴãw,
bɛ zɔ na tu bʋ̃-zawlɛ pùor.
9Lɛ so ɩ̃ na cãà tɛr'ɩ nyɩ ƴɛ̀rʋ
ɛ́ tɛr'ɩ a nyɩ bibiir mɩ̀ bibiir ƴɛ̀rʋ.
A Sore n'ʋ yel.
10Nyɩ cen a Gɩrɛkɩ mɩnɛ
kʋ̃ɔ-kpɛ̃ɛ-sɔgɔ-ten pʋɔ tɩ jɩ́r nyɛ̃.
Nyɩ tõ nɩbɛ a Arabʋ mɩnɛ tẽw Kedaar#2:10 Kedaar: Ʋ be n a Arabi tẽw wɛja-kpalɛ saa-pɛrɩ́-gʋba-lowr nɩ a saa-pɛrɩ́ cará.
bɛ tɩ sowri vla bãw.
Nyɩ na nyɛ̃ na bɛlɛ wa ɩrɛ a be
mɛ̃ a lɛ nyɩ na ɩrɛ a ka a!
11Nɩ-bʋʋrɛ mɩ́ lɩɛr'ɩ a bɛ ŋmɩmɛ ɛ?
Ŋmɩmɛ bɛ n'a mɩ̀ ɛ!
A ɩ̃ nɩbɛ bɛl a,
bɛ de m'a tɛw nɩ ŋmɩmɛ na kʋ̃ tʋ̃ɔ́ ɩ bom za a,
mãa na ɩ a bɛ dɛpaalʋ a.
12Salom zu dem i, a yel ŋa a,
ʋ ɓãa nyɩ nʋɔr, ʋ ƴãw nyɩ damnʋ,
ɛ́ a ʋ faalʋ gbini nyɩ!
A mãa, a Sore, mãa n'ʋ yel.
13A ɩ̃ nɩbɛ sãw nɩ gb'a ayi:
bɛ zawrɩ mɛ̃ na bɛr,
a mãa na ɩ a nyɔ-vʋʋrʋ kʋ̃ɔ bul-nʋɔr a,
ɛ́ tuw sa-bie-kʋ̃ɔ-bɔwrɩ,
bɔw-wɛrɩ na bɛ ganɛ kʋ̃ɔ a.»
A Sore zawr-bɛrʋ waar'ɩ nɩ kpɩɛrʋ nɩ tuo
14«A Ɩsɩrayɛl lɩɛb'ɩ gbãgbaa,
bɩɩ ʋ taa dɔw a gbãgbaalʋ pʋɔ ɔ?
Ʋ̃ʋ'hʋ̃. Ɛ́ bʋ̃ʋ n'ʋ so
a nɩ-bʋʋr-yoru ɩrɛ ʋ
mɛ̃ zɛbr-nɩ-nyɔwra a?
15Bɛ ùore na mɛ̃ gben a,
bɛ ŋmɛrɛ nɩ kɔkɛɛ a ʋ ƴãw.
Bɛ sãw nɩ a tẽw za bɛr pelẽpelẽ.
Bɛ nyɩw nɩ a ʋ tẽ-bɛrɛ bɛr,
nɩr bɛ cãà kpɩɛr a pʋɔ ɩ.
16A Mɛmfisɩ nɩ a Dafine#2:16 Mɛmfisɩ nɩ Dafine: Eziptɩ tẽw tẽ-bɛrɛ na be a tẽw saa-pɛrɩ́-gʋba-lowr a n'a. ten dem
tɛɛ za fɔrɛ nɩ a ʋ zu#2:16 À à ŋá n'a bɛ mɩ́ tɩ ɩ a nɩbɛ bɛ na zɛb tʋ̃ɔ́ a..
17Ɩsɩrayɛl i, à á ŋá za bɛ ta b
fʋ na tɩ zawrɩ a Sore fʋ Naaŋmɩn bɛr,
a lɛn daar ʋ na tɩ tɛr fʋ cere nɩ a sɔ́r zu a ɩ?
18Ɛ́ ƴɛrɛŋa a,
bʋnʋ ƴãw n'a fʋ na cen a Eziptɩ tẽw
kɛ́ fʋ tɩ nyũ a Nɩl kʋ̃ɔ?
Bʋnʋ ƴãw n'a fʋ na cen a Asiiri tẽw
kɛ́ fʋ tɩ nyũ a Efaratɩ kʋ̃ɔ?
19A fʋ ɩ-faa, ʋ dɔwrɩ fʋ!
A fʋ pùor-lɛbrʋ ɩ-ɩrɩ, a kpãà fʋ!
Lɛ n'a fʋ na nyɛ̃ ɛ́ bãw yel ŋa:
a mãa, a Sore fʋ Naaŋmɩn zawr-bɛrʋ
sɩrɩ na kpɛ faa ɛ́ buore!
Sɩza n'a, fʋ bɛ cãà màwr a ɩ̃ niŋé ɩ.
A Sore, a kpɛnʋ-za-sob'ʋ yel.»
A Ɩsɩrayɛl ɩ na mɛ̃ pɔw na bɛ be a ʋ sɩr yõ ƴãw a
20«Koro za n'a fʋ gáarɛ a ɩ̃ zu.
Fʋ ɩ na a baarɩ mãa nɩ a fʋ̃ʋ cara pʋɔ,
ɛ́ fʋ yel: “Ɩ̃ bɛ cãà bɔbr k'ɩ̃ɩ ɩ gbãgbaa ɩ.”
Bʋ̃ʋ n'ʋ vɛ̃, tãle za zu, tɩ-zimpiri za pile,
fʋ mɩ́ gã na mɛ̃ pɔw-yɛm a.
21Ɛcɛ, mãa a, ɩ̃ tɩ sɛl fʋ na
mɛ̃ divɛ̃ tɩ-bʋʋrɛ na vɩɛl vɩɛl a,
mɛ̃ tɩ-mɩŋa a.
Ŋmɩŋmɩn n'a fʋ wa lɩɛbɩ divɛ̃ tɩ-yɛrɛ,
a wɔmɛ na bɛ vɩɛl towtow a?
22Fʋ̃ʋ saa na so kʋ̃ɔ nɩ zɩ̃ɛ a,
fʋ̃ʋ saa na so kʋ̃ɔ nɩ sɩfan-yaga yaga a,
a fʋ faalʋ dɛwr na cãà na be a ɩ̃ niŋé,
a Sore Naaŋmɩn n'ʋ yel.
23Ŋmɩŋmɩn za n'a fʋ sʋ̃ɔmɩ yere:
“Ɩ̃ bɛ dɛw ɩ̃ tʋɔra ɩ, ɩ̃ bɛ tu a Báàl mɩnɛ ɩ”!
Jɩ́r a lɛ fʋ na ɩrɛ a bà-fʋɔla#2:23 Bà-fʋɔla: A Hinom bà-fʋɔla na be a Zerizalɛm saa-pɛrɩ́-dʋrʋ-lowr a tɔ̃w n'ʋ bɛ yere. Be n'a a nɩbɛ mɩ́ tɩ maalɩ a bagɛ kʋ̀ a ŋmɩn-bɛlɛbɛlɛ. Nyɛ̃ Zer 7.31-32. pʋɔ a.
Sàw a lɛ fʋ na ɩ a.
Fʋ ŋmɛ̃ na mɛ̃ nyɔ̃wmɛ-nyãw-pɔl
na mɩ́ zɔ tɩ sãá ka, zɔ tɩ sãá ka a.
24Fʋ ŋmɛ̃ na mɛ̃ bõw-nyãw-gaara na mili
a wɛja-kpalɛ ziir a.
A bʋ̃-daar vʋla wa tɛr ʋ a,
ʋ mɩ́ fõwne nɩ a sɛsɛb.
A bʋ̃-daar vʋla wa ìr ʋ a,
ãa n'ʋ na tʋ̃ɔ́ nyɔw ʋ?
A bòn-daar na bɔbr ʋ a
kʋ̃ tʋ̃ɔ́ bàlɛ a tʋɔra ɩ.
A bʋ̃-daar vʋla wa dɛ tɛrɛ ʋ wa báarɛ a,
a mɩ́ nyɛ̃ ʋ na.
25“Maal ɩrɛ, Ɩsɩrayɛl i!
Fʋ na ƴãw nɩ a fʋ gbɛ́ɛ bàalʋ
ɛ́ a fʋ kɔkɔr ko.”
Ɛcɛ fʋ sɔw na:
“Nyɩ ta dɩ tuo bàlɛ nyɩ tʋɔra ɩ!
Ɩ̃ nɔnɛ nɩ a ŋmɩn-sãanbɛ
ɛ́ bɔbr k'ɩ̃ɩ tu a!”
26Mɛ̃ a lɛ vĩ na mɩ́ nyɔw
nyãnyuwe bɛ na ùr nyɔw a,
lɛ n'a a Ɩsɩrayɛl nɩbɛ mɩ́ na nyɛ̃ vĩ,
a bɛl, a bɛ na-mɩnɛ, a bɛ tõ-tõ-bi-bɛrɛ,
a bɛ bàwr-maalbɛ nɩ a bɛ naaŋmɩn-ƴɛ̀r-manbɛ.
27Nyɩ mɩ́ yel'ɩ dàa tɩɩb: “Fʋ̃ʋ n'ɩ a ɩ̃ sãà!”
ɛ́ yel kʋsɩɛr tɩɩb: “Fʋ̃ʋ n'ʋ dɔw mɛ̃.”
Nyɩ bɛr'ɩ a ɩ jɩ́rʋ ɛ́ lɩɛbɩ zikur cɔw mɛ̃.
Ɛcɛ, a kpɩɛrʋ dɛ wa páwr nyɩ a,
nyɩ na yere nɩ a ɩ̃ zie: “Ìr! Faa tɩ!”
28Ɛcɛ, ɩ̃ na sɔw nyɩ na:
“A nyɩ ŋmɩmɛ nyɩ na maalɩ a wa?”
A ìr, alɛ na na tʋ̃ɔ́ faa nyɩ
a lɛn daar nyɩ nãà wa be a kpɩɛrʋ pʋɔ a!
Bʋ̃ʋ n'ʋ vɛ̃, Zuda nɩbɛ ɛ,
a nyɩ ŋmɩmɛ yãwmɛ na mɛ̃ a nyɩ tẽ-bɛrɛ a!”
*
29A mãa, a Sore, ɩ̃ sowre na:
Bʋ̃ʋ n'ʋ so nyɩ tɛr'ɩ mɛ̃ ƴɛ̀rʋ?
A nyɩɩm za, nyɩ gaar'ɩ a ɩ̃ zu.
30Zawla lɛ n'a ɩ̃ ŋmɛ nyɩ.
Nyɩ bɛ sàw de a kpãàfʋ ɛ.
Nyɩ nɩ̃ɛ na kʋ a nyɩ naaŋmɩn-ƴɛ̀r-manbɛ
mɛ̃ gben na kpɛ po-tuo a.
31—A nyɩɩm, dɩ̃a nɩbɛ ɛ,
nyɩ ƴãw tobr vla a Sore ƴɛ̀rʋ ƴãw!—
Ɩsɩrayɛl nɩbɛ ɛ, ɩ̃ lɩɛb'ɩ wɛja-kpalɛ a nyɩ zie
bɩɩ tẽw a zie na sɔb kʋralɛ a?
Bʋ̃ʋ n'ʋ so a ɩ̃ nɩbɛ yel:
“Be tɩ na bɔbr a n'a tɩ cere,
tɩ kʋ̃ lɛb wa a fʋ zie ɩ?”
32Pɔwsɩrale na tʋ̃ɔ́ na yiiri
a ʋ dɛpaal-bome bɛr ɩ?
Pɔw na maalɩ kul-taa a na tʋ̃ɔ́ na yiiri
a ʋ kul-taa kparʋ kpàwr bɛr ɩ?
Ɛcɛ a ɩ̃ nɩbɛ yiiri mɛ̃ na bɛr koro kãw za.
33Nyɛ̃ fʋ na bãw na-ɩ-lɛ
a nɔ̃wfʋ pùor zɔ-tub ƴãw a!
Ɛ́ a al ƴãw a, fʋ tɛr'a tɩ mili nɩ a nɩr kʋb.
34A nan dem nɩ a nɩbɛ
na bɛ tɛr sãwna a zɩ̃ɩ be n a fʋ kparɩ nɛ́ɛ ƴãw.
Ɛcɛ fʋ bɛ ùr nyɔw bɛ
bɛ bɔbr a fʋ pan kárʋ ɛ!
Ɛ́ à á ŋá za pʋɔ a,
35fʋ yel'a: “Ɩ̃ ɩ n nɩr na bɛ tɛr sãwna a.
A bɛ tɛr à ŋá ɩ,
a Sore kʋ̃ cãà nyɛ̃ nɩ mɛ̃ suur ɛ!”
Ɛcɛ mãa a, ɩ̃ na maal'ɩ fʋ nɩ ƴɛ̀rʋ,
bʋ̃ʋ n'ʋ vɛ̃, fʋ yel'a: “Ɩ̃ bɛ maalɩ faa ɩ.”
*
36Nyɛ̃ lɩɛrʋ fʋ na mɩ́ lɩɛrɩ
a fʋ kpɛ-ta-tɔ mɔlɛ lɛ a!
Ɛcɛ fʋ nyɛ̃ nɩ vĩ a Eziptɩ tẽw
mɛ̃ a lɛ fʋ na tɩ nyɛ̃ a vĩ a Asiiri tẽw a.
37Fʋ mɩ̀ na yi n a tẽw ŋa pʋɔ tuo nuru zũú,
bʋ̃ʋ n'ʋ vɛ̃, a mãa Sore a,
ɩ̃ bɛ nɔnɛ a tɩɛfʋ ŋa bʋʋrɛ fʋ na bɔbr a ɩ.
À ŋá bɛ n'a a yele na ɩ vla a fʋ zie ɩ.»
Currently Selected:
Zeremi 2: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
