Zeremi 23
23
A dʋ̃-cɩ̃ɩn-faar nɩ a nãà na faarɛ a
1A Sore yere na: «Nyɛ̃ baw-bio a! A ɩ̃ nɩbɛ kaarbɛ ɩ n dʋ̃-cɩ̃ɩn-faar na bɛr a ɩ̃ dʋn a kpiir ɛ́ bɔrɛ gʋɔr a.» 2À ŋá n'a a Sore, a Ɩsɩrayɛl Naaŋmɩn, yere a dʋ̃-cɩ̃ɩnbɛ bɛ ŋa ƴãw: «Nyɩ bɛr'ɩ a ɩ̃ dʋn a bɔrɛ ɛ́ yaarɛ a ziir za. Nyɩ bɛ kaa a zie ɩ. A lɛ pʋɔ a, a mãa, ɩ̃ na kaa nɩ a nyɩ zie, a faa nyɩ na maalɩ a zũú, a Sore n'ʋ yel!
3Mãa mɩŋa na ɓã n a ɩ̃ dʋn al na cɛ a taa, a ten al za pʋɔ ɩ̃ na diw a yaarɩ a. Ɩ̃ na lɛb'a tɛr a wa n a mʋ̃ɔ 'wɔbrʋ ziir. A na wa dɔw na yɛ̀r a be yaga za. 4Ɩ̃ na ƴãw nɩ dʋ̃-cɩ̃ɩn-sɩza mɩnɛ bɛ cɩ̃ɩnɛ a. Ɛ́ a bɛl zũú a, a kʋ̃ cãà bãw dɛ̃bɩ̃ɛ nɩ pʋl-vʋ̃ɔ ɩ. Been za bɛ lɛb cɩ́ɛr ɛ, a Sore n'ʋ yere.»
5A Sore yere na:
«A bibir vɩɛrɛ na,
ɩ̃ na ɩ Daviir bi-mɩŋa dɔw.
Ʋ na ɩ n nãà
na bãw a naalʋ-dɩb a,
ʋ na ɩrɛ nɩ a lɛ-na-tu-sɔr-a,
ɛ́ tuur a mɩnʋ a tẽw pʋɔ.
6A ʋ daar a,
a Zuda na nyɛ̃ nɩ a faafʋ,
a Ɩsɩrayɛl na vʋʋrɛ nɩ zoom
bɛ bãw damnʋ ɛ.
Nyɛ̃ a yúor bɛ na na bʋɔlɛ ʋ a:
“A Sore n'ɩ a tɩ mɩnʋ.”
7A Sore yere na: Bibir na vɩɛ na, nɩr kʋ̃ mɩ́ lɛb yel: “Ɩ̃ pɔrɛ nɩ nɩ a Sore na vʋʋrɛ a, ʋl na ɩ a Ɩsɩrayɛl nɩbɛ yi a Eziptɩ tẽw a ɩ...!” 8Ɛcɛ bɛ na mɩ́ yel'a: “Ɩ̃ pɔrɛ nɩ nɩ a Sore na vʋʋrɛ a, ʋl na ɩ a Ɩsɩrayɛl nɩbɛ yi a saa-pɛrɩ́-gʋba-lowr ten nɩ a ziir al za ʋ na diw bɛ yaarɩ a, lɛb wa zɩ̃ a bɛ tẽw pʋɔ a!”»
Naaŋmɩn-ƴɛ̀r-manbɛ na bɛ sɛw taa nɩ a naaŋmɩn-ƴɛ̀r-manbɛ ɩb a
9Ƴɛ̀rʋ na ƴɛ̀r càar'ɩ
a naaŋmɩn-ƴɛ̀r-manbɛ a.
A ɩ̃ pʋɔ za sãw na,
a ɩ̃ ƴã-gan za màwr'a.
Ɩ̃ ɩ na mɛ̃ dã-kuole a,
mɛ̃ nɩr divɛ̃ na tʋ̃ɔ́ a.
A Sore,
a Naaŋmɩn na ɩ
sõw a ƴãw n'a,
nɩ a ʋlɩ bom nɛ
ʋ na yel a:
10«A tẽw paal'ɩ pɩ̃ɔ-yel-maalbɛ.
A faa maalʋ ƴãw n'a bɛ mɩ́ zɔrɛ,
bɛ tɛr'ɩ kanyir a yele al na bɛ sɛwnɩ ɩb a ƴãw.
A tẽw be n wahala pʋɔ ŋmɛ-ƴãw kãw zũú.
A dʋn mʋ̃ɔ 'wɔbrʋ ziir ko n a za.»
11A Sore yere na:
«A naaŋmɩn-ƴɛ̀r-manbɛ
nɩ a bàwr-maalbɛ
ɩ n nɩ-faar:
a ɩ̃ yir tɛɛ za pʋɔ a,
ɩ̃ nyɛ̃ nɩ a faa
bɛ na maalɩ a.
12Alɛ n'a so a bɛ sɔ́r
na lɩɛbɩ sãsaalʋ.
Bɛ na ŋmɩɛr'ɩ taa
a lige pʋɔ lore.
Ɩ̃ na ɩ na
kpɩɛrʋ wa a bɛ zu,
a yũon ʋl ɩ̃ nãà wa
sowre bɛ bom a.»
À à ŋá na a Sore yere.
A Zerizalɛm tẽw naaŋmɩn-ƴɛ̀r-manbɛ kpɛ n faa zuo a Samaari tẽw naaŋmɩn-ƴɛ̀r-manbɛ
13«A ʋlɩ bom ɩ̃ na tɩ nyɛ̃
a Samaari tẽw dem
naaŋmɩn-ƴɛ̀r-manbɛ zie a
tɩ dam mɛ̃ nɩ yaga za,
a Sore n'ʋ yel.
Bɛ tɩ ƴɛ̀rɛ nɩ
a Báàl yúor ƴãw,
bɛ tɩ ɩrɛ nɩ a ɩ̃ nɩ-bʋʋrɛ,
a Ɩsɩrayɛl, ʋ bɔrɛ.
14Ɛcɛ a Zerizalɛm
naaŋmɩn-ƴɛ̀r-manbɛ zie,
ɩ̃ nyɛ̃ nɩ yele na kpɛ faa
ɩrɛ dɛ̃bɩ̃ɛ a:
bɛ maalɛ nɩ pɩ̃ɔ-yele,
bɛ vʋʋrɛ nɩ a gɛgɛrʋ pʋɔ,
ziri n'ɩ a bɛ bom,
bɛ mɩ́ tɩ̀ɛ nɩ a bɛlɩ dem
na maalɛ a faa a.
A na ɩ à ŋá a,
nɩr za kʋ̃ tʋ̃ɔ́
lɛb bɛr a faa maalʋ ɛ.
Mãa zie a,
bɛ za ŋmɛ̃ na mɛ̃
a Sodɔm tẽw dem a.
A Zerizalɛm tẽw dem
ŋmɛ̃ na mɛ̃
a Gomɔɔr tẽw dem a.»
15A lɛ pʋɔ a,
à ŋá n'a a Sore,
a kpɛnʋ-za-sob yere
a naaŋmɩn-ƴɛ̀r-manbɛ
ƴãw:
«Ɩ̃ na ƴãw na bɛ 'wɔb
tɩ-va-tuo,
ɛ́ ƴãw bɛ nyũ kʋ̃ɔ
na tɛr lɔw a,
bʋ̃ʋ n'ʋ vɛ̃,
a Zerizalɛm tẽw
naaŋmɩn-ƴɛ̀r-manbɛ
zie n'a a faalʋ yire
pàwr a tẽw za.»
Naaŋmɩn-ƴɛ̀r-manbɛ na ŋmarɛ ziri a
16À ŋá n'a a Sore, a kpɛnʋ-za-sob yere:
«Nyɩ ta bɛrɛ wone
a naaŋmɩn-ƴɛ̀r-manbɛ
bɛ ŋa ƴɛ̀rʋ ɛ,
bɛ bɛlɛ nyɩ na.
A yele bɛ na yere
kʋ̀rɛ nyɩ a
ɩ n a bɛl mɩŋa pʋ-tɩɛrʋ,
a bɛ yi a mãa zie ɩ.
17Bɛ mɩ́ nyɔw nɩ nyãa
ɛ́ yel kʋ̀ a bɛlɩ dem
na ɩrɛ mɛ̃ laar a à ŋá:
“A Sore yel'a:
A yele za na ɩ n vla
a nyɩ zie!”
Ɛ́ yel a bɛlɩ dem na tuur
a bɛl mɩŋa pʋ-tɩɛrʋ
tɛwr a:
“Faa kʋ̃ páw nyɩ ɛ.”
18Ɛcɛ ãa n'ʋ tɩ be
a ɩ̃ yã-wulbɛ kpaarʋ pʋɔ?
Ãa n'ʋ nyɛ̃ ɛ́ wõ a ɩ̃ ƴɛ̀rʋ?
Ãa n'ʋ cɛlɩ a ɩ̃ ƴɛ̀rʋ ƴãw,
ɛ́ bãw a pɛr?»
A Zeremi
19A Sore saa-sɛsɛb
tarɛ na,
a ʋ suur ìre na.
Sɛsɛb-pɩl kãw lɩɛbɛ na,
ʋ lore nɩ a nɩ-faar zurú.
20A Sore suur bɛ ɓãanɛ
ʋlɛ bɛ wa tõ
a lɛ za ʋ na yel a ɩ.
A pùorí n'a
nyɩ na bãw a pɛr.
A Sore
21«Ɩ̃ bɛ tõ
a naaŋmɩn-ƴɛ̀r-manbɛ
bɛ ŋa ɩ, ɛ́ bɛ zɔrɛ.
Ɩ̃ bɛ ƴɛ̀r ƴɛ̀rʋ za
a bɛ zie ɩ,
ɛ́ bɛ ƴɛ̀rɛ a ɩ̃ yúor ƴãw.
22Bɛlɛ tɩ be
a ɩ̃ yã-wulbɛ
kpaarʋ pʋɔ a,
bɛ nãà ɩ na a ɩ̃ nɩbɛ
bãw a ɩ̃ ƴɛ̀rʋ,
bɛ nãà ɩ na a nɩbɛ bɛr
a bɛ sɔr-faa
nɩ a bɛ ɩ-faar
bɛ na ɩrɛ a.»
A Sore be n a tẽ-daa za zu
23A Sore yere na:
«Ɩ̃ nɔ̃w ɩ n bom na pɩɛlɩ a
Naaŋmɩn tɛwr bɩɩ?
Ɩ̃ mɩ̀ bɛ ɩ bom na zãá a Naaŋmɩn ɛ?»
24A Sore sowre na:
«Nɩr saa sɔwlɩ a,
a mãa, ɩ̃ kʋ̃ nyɛ̃ ʋ bɩɩ?
Ɩ̃ be n zie za,
a salom zu nɩ a tẽw zu.»
À à ŋá n'a a Sore yel.
A ùr nɩ a bʋ̃-bie bɛ ɩ been ɛ
25«A mãa, a Sore a, ɩ̃ wõ n a naaŋmɩn-ƴɛ̀r-manbɛ ƴɛ̀rʋ. Bɛ yel'a kɛ́ bɛ ƴɛ̀rɛ nɩ a ɩ̃ yúor ƴãw, ɛcɛ ziri n'a. Bɛ yere na: “Ɩ̃ zánɩ nɩ zánʋ! Ɩ̃ zánɩ nɩ zánʋ!” 26Debor'a a na ɩ à à ŋá tɩ ta? Bʋ̃ʋ n'ʋ be a naaŋmɩn-ƴɛ̀r-manbɛ bɛ ŋa zuru pʋɔ, bɛ na mɩ́ wa yere yele na ɩ ziri a, nɩ bome bɛl mɩŋa na tɩɛrɩ a? 27Bɛ mɩ́ tɩɛr'a kɛ́ bɛ ɩ a ɩ̃ nɩbɛ yiiri a ɩ̃ yúor, a bɛ zánʋ bɛ na mɩ́ manɛ kʋ̀rɛ taa a zũú, mɛ̃ a lɛ a bɛ sãàkʋm-kore na tɩ tu a bɛ Báàl yiiri a ɩ̃ yúor bɛr a. 28Naaŋmɩn-ƴɛ̀r-manɛ wa zánɩ zánʋ a, ʋ manɩ a ʋ zánʋ! Ɛcɛ ʋlɛ wa tɛr a ɩ̃ ƴɛ̀rʋ na ƴɛ̀r a, ʋ ƴɛ̀r a tori!»
A Sore yere na:
«Ùr nɩ bʋ̃-bie na tʋ̃ɔ́ na ɩ been bɩɩ?
29A ɩ̃ ƴɛ̀rʋ bɛ ɩ mɛ̃ vũu a ɩ?
A bɛ ɩ mɛ̃ 'hama
na mɩ́ ŋmɛ pìir wɛl a ɩ?»
30«A na ɩ à ŋá a, ɩ̃ na ìr'ɩ a naaŋmɩn-ƴɛ̀r-manbɛ bɛ ŋa na zure taa a ɩ̃ ƴɛ̀rʋ a ƴãw, a Sore n'ʋ yere. 31Ʋ̃ʋ, a Sore yere na, ɩ̃ na ìr'ɩ a naaŋmɩn-ƴɛ̀r-manbɛ bɛ ŋa na mɩ́ de a bɛl mɩŋa ƴɛ̀rʋ ɩ a ɩ a mãa ƴɛ̀rʋ a ƴãw. 32Ɩ̃ na ìr'ɩ a bɛ ƴãw. A bɛ zánʋ ɩ n ziri tɛwr. Bɛlɛ wa manɛ a a, bɛ mɩ́ bɛlɛ nɩ a nɩbɛ nɩ a bɛ ƴɛ̀r-ziri nɩ a bɛ ƴɛ̀r-zawlɛ. Mãa a, ɩ̃ bɛ yel kɛ́ bɛ ɩ bom ɛ. Bɛ bɛ tɛr yel-ɩra kãw za a ɩ̃ nɩbɛ zie ɩ.» A Sore n'ʋ yel.
A Sore ƴɛ̀rʋ nɔ̃w ɩ n tuor a nɩbɛ zie bɩɩ?
33A Sore yel'ɩ a Zeremi: «Naaŋmɩn-ƴɛ̀r-manɛ, bɩɩ bàwr-maalɛ, bɩɩ nɩ-sãsaralɛ wa sowri fʋ: “A Sore ƴɛ̀rʋ n'ɩ buor? Tuor-buor'ʋ ʋ tuo tɩ a?” Fʋ na sɔw na: “Nyɩmɛ nɛbɛ ɩ tuor, ɩ̃ɩ na tow nyɩ na bɛr.” 34Naaŋmɩn-ƴɛ̀r-manɛ, bɩɩ bàwr-maalɛ, bɩɩ nɩ-sãsaralɛ wa ƴɛ̀rɛ “tuor a Sore na tuo ʋ a” ƴɛ̀rʋ a, ɩ̃ na ìr'ɩ a nɩr nɛ nɩ a ʋ yir dem ƴãw. 35Nyɩ nyɛ̃ a lɛ nyɩ na na sowre taa a: “A Sore sɔw na kɛ́ bʋnʋ?”, “A Sore yel'a kɛ́ bo?” 36Ɛcɛ nyɩ kʋ̃ lɛb ƴɛ̀r “tuor Sore na tuo nɩr a” ƴɛ̀rʋ towtow ɛ. Ŋa za ƴɛ̀rʋ n'ʋ na mɩ́ ɩ a tuor, bʋ̃ʋ n'ʋ vɛ̃, nyɩ mɩ́ sãw nɩ a Naaŋmɩn na vʋʋrɛ a, a Sore kpɛnʋ-za-sob, a tɩ Naaŋmɩn ƴɛ̀rʋ bɛr. 37Nyɛ̃ a lɛ fʋ na na mɩ́ sowri naaŋmɩn-ƴɛ̀r-manɛ a: “A Sore sɔw fʋ na kɛ́ bʋnʋ? A Sore yel'a kɛ́ bo? 38Ɛcɛ, nyɩmɛ wa cãà ƴɛ̀rɛ “tuor a Sore na tuo nyɩ a” ƴɛ̀rʋ, ɩ̃ na saa diw nyɩ kɛ́ nyɩ ta yere a lɛ a, à ŋá n'a a mãa, a Sore, yere: 39Ɩ̃ na tuo nyɩ na mɛ̃ tuor a, ɩ̃ɩ na lɔb nyɩ na bɛr a ɩ̃ niŋé nyɩ zãá, a nyɩɩm nɩ a tẽw ʋl ɩ na kʋ̀ nyɩ, a nyɩɩm nɩ a nyɩ sãàkʋm-kore a. 40Ɩ̃ na ƴãw nyɩ nɩ vĩ nɩ yo-sãw kʋralɛ, nɩr na kʋ̃ tʋ̃ɔ́ yiiri a.»
Currently Selected:
Zeremi 23: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
