Zeremi 22
22
1À ŋá n'a a Sore tɩ yel a Zeremi: «Siw a Zuda tẽw nãà yir. A be a, tɩ ƴɛ̀r a ƴɛ̀rʋ ŋa. 2Fʋ na tɩ yel'a: “A fʋ̃ʋ, Zuda tẽw nãà, na zɩ̃ a Daviir naalʋ-dà-kɔw zu a, a fʋ̃ʋ, a fʋ tõ-tõ-bi-bɛrɛ nɩ a fʋ nɩbɛ za na tuur a dɩ̃dɛɛ á ŋá ƴãw kpɩɛr a, nyɩ wone a Sore ƴɛ̀rʋ.” 3À ŋá n'a a Sore yere: nyɩ ɩrɛ a lɛ-na-tu-sɔr-a, ɛ́ tuur a mɩnʋ. Nyɩ ta dɔwrɛ ɛ́ ta ɩrɛ a kpɩɛr a nʋʋrɩ, a bi-kpebe nɩ a pɔw-kɔbɛ ɩ. Nyɩ ta cãà kʋrɛ nɩbɛ na bɛ tɛr sãwna a, a zie ŋa pʋɔ ɩ. 4Nyɩmɛ wa sɩrɩ ɩrɛ à à ŋá a, na-mɩnɛ na be n be kʋralɛ zɩnɛ a Daviir naalʋ-dà-kɔw zu, ɛ́ mɩ́ zɔm wur bɩɩ kpɛ zɛbr-torko pʋɔ cɔlɛ nɩ. Bɛ na cãà na tuur a dɩ̃dɛɛ á ŋá ƴãw kpɩɛr, a bɛl, a bɛ tõ-tõ-bi-bɛrɛ nɩ a nɩbɛ. 5Ɛcɛ nyɩmɛ bɛ wa bɛrɛ wone a ƴɛ̀rʋ á ŋá a, à ŋá n'a a mãa, a Sore, yere: ɩ̃ pɔrɛ nɩ nɩ a mãa mɩŋa, a yir ŋa na lo na lɩɛbɩ kʋsɛbɛ na gbõ taa a.»
6A Zuda tẽw nãà yir ƴãw a, à ŋá n'a a Sore yere:
«Ɩ̃ na saa nyɛ b fʋ vɩɛl
man Galaadɩ tẽw tuwr a,
bɩɩ ɩ mɛ̃ a Libã tẽw tan nyʋɔr a,
ɩ̃ bɛ bʋ́nɛ nɩ na ɩ
fʋ lɩɛbɩ a wɛja-kpalɛ ɩ,
tẽ-kpɛ̃ɛ nɩr za na bɛ kpɩɛr a ɩ.
7Ɩ̃ cɔbrɛ nɩ nɩbɛ na na ŋmɛr fʋ bɛr a,
ŋa za tɛr'ɩ a ʋ tõ-tõ-bome.
Bɛ na cɛ n a fʋ sɛɛdɩr tɩɩr dàar
kpul-vɩɛlɩ ŋma lɔb a ƴãw vũumí.»
8A lɛn daar a nɩ-bʋʋr-yoru nɩbɛ nãà mɩ́ wa tɔlɛ pɩɛlɛ a tẽ-kpɛ̃ɛ ŋa a, bɛ na mɩ́ sowre nɩ taa: «Bʋ̃ʋ n'ʋ so a Sore ɩ a tẽ-kpɛ̃ɛ ŋa à ŋá?» 9Bɛ na mɩ́ sɔw bɛ na: «Bɛ na zawrɩ a Sore bɛ Naaŋmɩn wõ-taa bɛr, ɛ́ gbĩ dume gũu tɩ tɔ tẽw ŋmɩn-yoru niŋé maalɩ a a n'a so.»
Bɛ nɩ̃ɛ kone a nãà Salum
10Zuda tẽw dem i,
nyɩ ta kone a sob nɛ na kpi a ɩ,
a nãà Zozɩasɩ, nyɩ ta kone ʋ ɛ.
Nyɩ nɩ̃ɛ kone a sob nɛ na cere a,
a nãà Salum#22:10 A Salum, bɛ mɩ́ na bʋɔlɛ kɛ́ Zoakaazɩ a, tɩ dɩ n naalʋ cuwr ata. Al pùorí bɛ tɩ diw ʋ na cen nɩ Eziptɩ tẽw: Nyɛ̃ 2Na 23.30-34..
Bʋ̃ʋ n'ʋ vɛ̃, ʋ kʋ̃ lɛb wa ɩ,
ʋ kʋ̃ lɛb nyɛ̃ a ʋ tẽ-dɔwra ɩ.
11À ŋá n'a a Sore yere a Salum ƴãw, a Zuda tẽw nãà, na tɩ lɩɛrɩ a ʋ sãà Zozɩasɩ, ɛ́ bɛ cãà a ka a: «Ʋ kʋ̃ lɛb wa ɩ. 12Ʋ na tɩ kpi n a be bɛ na diw ʋ cen nɩ a, ʋ kʋ̃ lɛb nyɛ̃ a tẽw ŋa ɩ.»
A ƴɛ̀rʋ a Sore na ƴɛ̀r càar'ɩ a Yoyakim a
13«Baw-bio páw fʋ na, Yoyakim#22:13 Yoyakim: A Zozɩasɩ bidɛb kãw n'ʋ. Ʋ tɩ dɩ n a naalʋ a Yeezu Kɩrɩta na bɛ tɩ wa sɛr a yome 609 tɩ tɔ 598. Nyɛ̃ 2Na 23.34—24.6. i!
Fʋ ƴãw na bɛ mɩɛr yir kʋ̀rɛ fʋ
ɛ́ a bɛ tuur a yel-mɩnʋ ɛ.
Fʋ mɩɛr'ɩ bɔwpɩɩr dɔwlɛ
ɛ́ a lɛ-na-tu-sɔr a nɩbɛ ƴãw a,
fʋ bɛ cɛlɛ be ɩ.
Fʋ ƴãw na a nɩbɛ tone zawla,
ɛ́ fʋ bɛ yarɛ bɛ ɩ.
14Fʋ yere na:
“Ɩ̃ na ɩ na bɛ mɛ nãà yir-kpɛ̃ɛ kʋ̀ m
na tɛr bɔwpɩ-bɛrɛ bɛrɛ a.”
Fʋ puo nɩ tokoro vɛɛ,
ɛ́ pàw a dacine nɩ sɛɛdɩr tɩɩr dàar
fʋ na bʋl'ɩ bʋ̃-zɩɛ a.
15Fʋ nɔ̃w bɔbr'a
kɛ́ fʋ wul fʋ na ɩ nãà,
a sɛɛdɩr tɩɛ dàa fʋ na kaa ír
kɛ́ fʋ wul'ɩ fʋ tʋɔra a bɩɩ?
A fʋ sãà bɛ tɩ dɩrɛ ɛ́ nyúur bɩɩ?
Ɛcɛ ʋ tɩ ɩrɛ nɩ a lɛ-na-tu-sɔr-a,
ɛ́ tuur a mɩnʋ.
Ɛ́ a yele za tɩ cere nɩ vla a ʋ zie.
16Ʋ mɩ́ tɩ de nɩ a bãbàal
nɩ a nã́w sob yele
ƴãw a ʋ nuru pʋɔ,
ɛ́ a yele za tɩ cere vla.
Sob nɛ na ɩrɛ à à ŋá a
wul'a k'ʋʋ bãw mɛ̃ na.
A Sore n'ʋ yel.
17Ɛcɛ a fʋ̃ʋ a,
a fʋ mɩŋa tɔnɛ tɛwr'a fʋ jɩ́rɛ,
nɩbɛ na bɛ sãw a
kʋb tɛwr'a fʋ bɔbr,
nɩ po-to-fãw-ɩb a nɩbɛ zie.»
18A na ɩ à ŋá a, à ŋá n'a a Sore yere a Zozɩasɩ bidɛb, Yoyakim, na ɩ a Zuda tẽw nãà a ƴãw:
«A ʋ kũu daar a,
bɛ kʋ̃ kõ lãwnɩ yel:
“'Woi, ɩ̃ yɛb i!
'Woi, ɩ̃ yeepuule e!”
Bɛ kʋ̃ kõ lãwnɩ yel:
“'Woi, ɩ̃ Zu-sob i!
'Woi, ɩ̃ Nãà a!”
19Bɛ na ũù ʋ na mɛ̃ bõw a.
Bɛ na vu n a ʋ kũu tɩ lɔb bɛr
zãá nɩ a Zerizalɛm tẽw dɩ̃dɛɛ.»
A Zerizalɛm vĩ nɩ a ʋ yo-sãwna
20«Zerizalɛm i, do a Libã tãw zu tɩ lɔbr cɛlsɩ,
ɩ bɛ wõ a fʋ kɔkɔr a Basan tã-sɛr zu.
Lɔbr cɛlsɩ a Avarim tan zu,
a fʋ sɛnbɛ za na bɛ cãà be a ƴãw.
21Ɩ̃ tɩ ƴɛ̀r'ɩ a fʋ zie a lɛn daar bom za
na bɛ tɩ damnɛ fʋ a, ɛcɛ fʋ tɩ sɔw na:
“Ɩ̃ bɛ bɔbr k'ɩ̃ɩ wõ bom za ɩ.”
À ŋá n'a fʋ ɩ a fʋ pɔ̀lʋ daar za,
fʋ bɛ dãw bɛr wõ a ɩ̃ ƴɛ̀rʋ ɛ!
22Sɛsɛb de nɩ a fʋ nɩ-bɛrɛ za cen nɩ,
bɛ diw nɩ a fʋ nɩ-nɔnɩ cen nɩ tẽ-yũo.
A fʋ̃ʋ a, a fʋ yúor na sãw na,
vĩ na nyɔw fʋ nɩ a faa al za
fʋ na maalɩ a zũú.
23Fʋ̃ʋ na kpɩɛr a Libã tuw pʋɔ,
ɛ́ tɛr a cow a sɛɛdɩr tɩɩr zu a,
fʋ na kõ n a lɛn daar
a 'wɔbrʋ wa ùr lo a fʋ zu a,
a lɛn daar fʋ na na wone tuo
mɛ̃ pɔw na dɔwr a!»
A Sore ƴɛ̀rʋ ʋ na ƴɛ̀r càar'ɩ a nãà Yoyakim bidɛb Konɩahu a
24«Nyɛ̃ a ʋlɩ bom fʋ na na tɩ yel kʋ̀ a Yoyakim bidɛb nɩ a Zuda tẽw nãà Konɩahu a: “A Sore yere na: Ɩ̃ pɔrɛ nɩ nɩ a ɩ̃ nyɔ-vʋʋrʋ à ŋá: Fʋ̃ʋ mɩ̀ saa tɩ ɩ ŋmaarʋ-bʋ̃-ƴãwna a ɩ̃ dʋrʋ nũú a, ɩ̃ nãà for fʋ nɩ a ɩ̃ nobirí. 25Ɩ̃ dier fʋ na ƴãwnɛ a bɛlɩ dem na bɔbr a fʋ kʋb a nuru pʋɔ, a nɩbɛ bɛl dɛ̃bɩ̃ɛ fʋ na zɔrɛ yaga za a, a Babɩlɔn tẽw nãà Nabikodonozɔɔr nɩ a ʋ zɛbr-nɩbɛ nuru pʋɔ. 26Ɩ̃ na diw nɩ a fʋ̃ʋ nɩ a fʋ mã na dɔw fʋ a, cen nɩ tẽ-yũo pʋɔ, be nyɩ na bɛ dɔw a, ɛ́ be n'a nyɩ na tɩ kpi. 27Nyɩ na bɔbr'a nɩ a nyɩ fãw za kɛ́ nyɩ lɛb wa a nyɩ tẽw, ɛcɛ nyɩ kʋ̃ lɛb wa ɩ.”»
28Nɩbɛ sowre na: «La-ŋmɛrnyɛ̃ na bɛ tɛr yel-ɩra a nɔ̃w n'ɩ a dɛb ŋa, a Konɩahu? Laa bɛ na bɛ cãà bɔbr a a? Bʋ̃ʋ n'ʋ so bɛ diw ʋlɛ nɩ a ʋ bibiir cen nɩ tẽ-yũo bɛ na bɛ bãw a?»
29'Woi, ɩ̃ tẽw i, ɩ̃ tẽw i, bɛr wõ a Sore ƴɛ̀rʋ! 30À ŋá n'a a Sore yere: «Nyɩ sɛb a Konɩahu ƴãw à ŋá: A nɩr ŋa bɛ tɛr bibiir ɛ, nɩ-guura n'ʋ. A ʋ bibiir za pʋɔ a, been kãw za kʋ̃ páw a nãà Daviir naalʋ-dà-kɔw zɩ̃ ɛ́ dɩ nɩ-kpɛ̃ɛnʋ a Zuda zu ɛ.»
Currently Selected:
Zeremi 22: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
