Zeremi 21
21
A Zeremi kʋ̀ n a nãà Sedesɩasɩ a Sore sɔwfʋ
1Nyɛ̃ a ƴɛ̀rʋ a Sore na tɩ ƴɛ̀r kʋ̀ a Zeremi a nãà Sedesɩasɩ#21:1 Sedesɩasɩ: A Zozɩasɩ bidɛbr ata sob tɩ n'ʋ, ɛ́ ʋlɛ n'ʋ tɩ ɩ a Zuda tẽw nãà pɛ-baara. Ʋ tɩ dɩ n a ʋ naalʋ a Zerizalɛm a Yeezu Kɩrɩta na bɛ tɩ wa sɛr a yome 597-587 vuo pʋɔ. Nyɛ̃ 2Na 24.18-19, 25.1-7. ƴãw a. A nãà tɩ tõ n Malkɩa bidɛb, Pasehuur, nɩ Maaseya bidɛb, Sefanɩa, na ɩ bàwr-maalɛ a, a Zeremi zie, kɛ́ bɛ tɩ yel ʋ à ŋá: 2«Yãayãa, sowri a Sore kʋ̀ tɩ, bʋ̃ʋ n'ʋ vɛ̃, a Babɩlɔn tẽw nãà, a Nabikodonozɔɔr, zɛbr'ɩ tɩ na. Kapaw a Sore na lɛb'a maalɩ a ʋ nɔ-ɓãa-yel kãw a tɩ vla ƴãw, ɩ k'ʋ cen zãá nɩ tɩ.»
3Lɛ n'a a Zeremi tɩ yel bɛ: «Nyɩ nyɛ̃ a lɛ nyɩ na na tɩ yel kʋ̀ a Sedesɩasɩ a: 4À ŋá n'a a Sore, a Ɩsɩrayɛl Naaŋmɩn, yere: “Nyɩ zɛbr'ɩ nɩ a Babɩlɔn tẽw nãà nɩ a ʋ zɛbr-nɩbɛ na piw nyɩ a. Ɛcɛ, ɩ̃ na fɛr'ɩ a bɛlɩ dem na zɛbr a dacĩ-kpɛ̃ɛ niŋé a, bɛ lɛb wa a tẽ-kpɛ̃ɛ pʋɔ. 5A mãa mɩŋa n'ʋ na zɛb'ɩ nyɩ nɩ a ɩ̃ su-tʋlʋ kpãkpã nɩ a ɩ̃ su-faa faa. Ɩ̃ na wul nyɩ nɩ a ɩ̃ fãw nɩ a ɩ̃ kpɛnʋ. 6Ɩ̃ na dɔwr'ɩ a bɛlɩ dem za na kpɩɛr a tẽ-kpɛ̃ɛ ŋa pʋɔ a, a nɩsaalbɛ nɩ a dʋn. Bɛ za na kpi n jɛ̀lmɛ̃ bàal-faa kũu. 7À á ŋá za pùorí a, a Sore n'ʋ yere, ɩ̃ na de nɩ a Zuda tẽw nãà, Sedesɩasɩ, a ʋ tõ-tõ-bi-bɛrɛ nɩ a nɩbɛ na na cãà vʋʋrɛ a tẽ-kpɛ̃ɛ ŋa pʋɔ, bɛ tʋ̃ɔ́ kpi a jɛ̀lmɛ̃ bàalʋ kũu, a zɛbr nɩ a kɔ̃ kũu a, ƴãw a Babɩlɔn tẽw nãà nuru pʋɔ. Ɩ̃ na de bɛ na ƴãw a bɛ dɔ̃ dem nɩ a bɛlɩ dem na tɩ bɔbr a bɛ kʋb a nuru pʋɔ. A Nabikodonozɔɔr na ƴãw na bɛ kʋ kʋ bɛ. Ʋ kʋ̃ tɛr nɩbaal-zɔba ɩ, ʋ kʋ̃ jɩɩrɩ nɩr za bɛr ɛ, ʋ kʋ̃ sàw bɛ ɓaalɩ ʋ ɛ.”»
8Alɛ wa cɛ a nɩ-bʋʋrɛ bɛ ŋa a, fʋ na yel bɛ na: «À ŋá n'a a Sore yere: Ɩ̃ na ƴãw nɩ a nyɔ-vʋʋrʋ nɩ a kũu a nyɩ niŋé. 9Nɩr za wa cãà be a tẽ-kpɛ̃ɛ ŋa pʋɔ a, ʋ na kpi n a zɛbr, a kɔ̃ bɩɩ a jɛ̀lmɛ̃ bàalʋ kũu. Ɛcɛ sob nɛ wa yi de ʋ tʋɔra kʋ̀ a Babɩlɔn tẽw dem na piw nyɩ a, ʋ na vʋʋrɛ na, ʋʋ na nyɛ̃ na k'ʋʋ tɛr'ɩ zu-nʋ̃ɔ̀, ʋ na páw a ʋ nyɔ-vʋʋrʋ a. 10A Sore yere na: Ʋ̃ʋ, ɩ̃ na lɩɛb'ɩ a tẽ-kpɛ̃ɛ ƴãw, k'ɩ̃ɩ maal'ʋ faa, ɛ́ ta maal'ʋ vla ɩ. Ʋ na lo n a Babɩlɔn tẽw dem nãà nuru pʋɔ, ʋ nyɩw ʋ bɛr.»
Ƴɛ̀rʋ a nãà yir dem ƴãw
11Ƴɛ̀rʋ na ƴɛ̀r kʋ̀ a Zuda tẽw nãà yir dem a.
Nyɩ bɛrɛ wone a Sore ƴɛ̀rʋ,
12Daviir yir nɩbɛ ɛ.
À ŋá n'a a Sore yere:
Biɓaarɛ za a, nyɩ mɩ́ dɩ a ƴɛ̀rʋ a tu mɩnʋ.
Nyɩ mɩ́ faa a sob nɛ bɛ na farɛ a,
a sob nɛ na nɛbr ʋ a nuru pʋɔ.
Alɛ bɛ ɩ lɛ, a ɩ̃ suur na 'le na mɛ̃ vũu a,
ʋ na dɩrɛ na ɛ́ nɩr za kʋ̃ be be kpiir ʋ ɛ,
a nyɩ faa nyɩ na maalɩ a zũú.
13A Sore yere na:
Mãa nɩ nyɩɩm nɛbɛ ƴɛrɛŋa,
nyɩɩm na kpɩɛr a fʋɔla pʋɔ,
a pìir zi-pãgala zu a.
Bʋ̃ʋ n'ʋ vɛ̃, nyɩ mɩ́ yere na:
“Ãa n'ʋ na siw wa zɛb'ɩ tɩ,
ãa n'ʋ na kpɛ a tɩ sɔwlʋ ziir?”
14A Sore yere na:
Ɩ̃ na ɩ nyɩ na mɛ̃ a lɛ a nyɩ ɩ-ɩrɩ na sɛw taa nɩ a.
Ɩ̃ na ƴãw nɩ vũu a sɛɛdɩr tɩɩr tuw#21:14 Sɛɛdɩr tɩɩr tuw: A nãà yir na tɩ tɛr a sɛɛdɩr tɩɩr dàar yaga a n'ʋ bɛ ƴɛ̀r jɩɛr'ɩ, ʋ bɛ ɩ tuw mɩŋa n'ʋ ɛ. Nyɛ̃ 22.7. ,
ʋ na dɩ n bom za na jil koli ʋ a.
Currently Selected:
Zeremi 21: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
