Zeremi 20
20
Pasehuur 'lẽ nɩ a Zeremi dàa ƴãw
1Ɩmɛɛr bidɛb, Pasehuur, na tɩ ɩ a Ŋmɩn-yir-kpɛ̃ɛ gùrbɛ nɩ-kpɛ̃ɛ a, tɩ wõ n a ƴɛ̀rʋ al za a Zeremi na tɩ ƴɛ̀r a Sore yúor ƴãw a. 2Lɛ n'a ʋ tɩ ɓa a naaŋmɩn-ƴɛ̀r-manɛ, a Zeremi, ɛ́ ƴãw bɛ 'lẽ ʋ ƴãw dàa ƴãw, a Bɛ̃zamɛ dɩ̃dɔ-kpɛ̃ɛ ƴãw, a be bɛ na mɩ́ tuur kpɩɛr a Ŋmɩn-yir-kpɛ̃ɛ pʋɔ a. 3A dãw-bio daarɩ́, a Pasehuur tɩ ƴãw na bɛ cɛ̀r a Zeremi a dàa ƴãw. Lɛ n'a a Zeremi tɩ yel ʋ: «A Sore kʋ̃ cãà bʋɔlɛ fʋ Pasehuur ɛ, ʋ na bʋɔlɛ fʋ nɩ “Pʋl-vʋ̃ɔ-a-ziir-za”. 4Bʋ̃ʋ n'ʋ vɛ̃, à ŋá n'a a Sore yere: “Dɩ̃a na ta a, ɩ̃ na ɩ na fʋ lɩɛbɩ pʋl-vʋ̃ɔ bom, a fʋ̃ʋ tɛɛ za ƴãw nɩ a fʋ bárɩ ƴãw. A bɛl a, a bɛ dɔ̃ dem zɛbr-sɔ-kpɛ̃ɛ na kʋ bɛ na, ɛ́ a fʋ̃ʋ a, fʋ na nyɛ̃ nɩ a bɛ kũu. Ɩ̃ na ƴãw nɩ a Zuda tẽw nɩbɛ a Babɩlɔn tẽw dem nãà nuru pʋɔ. Ʋ na tɛr bɛ na cen nɩ a Babɩlɔn tẽw bɩɩ ʋ na ƴãw na bɛ kʋ bɛ. 5A tẽ-kpɛ̃ɛ ŋa naalʋ za, a alɩ bome nɛ ʋ na páw a ʋ tome pʋɔ, a ʋ bʋ̃-vɩɛlɩ vɩɛlɩ za, a Zuda tẽw na-mɩnɛ na-bome za a, ɩ̃ na de a na ƴãw a bɛ dɔ̃ dem nuru pʋɔ. Bɛ na zá a na, wob a cen nɩ a Babɩlɔn tẽw. 6Ɛ́ a fʋ̃ʋ, Pasehuur i, fʋ na cen nɩ gbãgbaalʋ pʋɔ, fʋ̃ʋ nɩ a bɛlɩ dem za na lãw kpɩɛr'ɩ fʋ a. Fʋ̃ʋ wa ta a Babɩlɔn a, fʋ na kpi na, ɛ́ a be n'a bɛ na ũù fʋ, fʋ̃ʋ nɩ a fʋ bárɩ bɛl za zie fʋ na tɩ ɩ naaŋmɩn-ƴɛ̀r-man-ziri sob a.”»
A Zeremi zɛbr'ɩ a Naaŋmɩn zie
7Sore e, fʋ bɛlɩ mɛ̃ na,
ɩ̃ɩ bɛr fʋ bɛlɩ mɛ̃ nyɔw.
Fãw n'a fʋ ɩ n mɛ̃, tʋ̃ɔ́ mɛ̃.
A nɩbɛ ɩrɛ mɛ̃ na laar bibie za,
bɛ za kpɔwrɛ mɛ̃ na.
8Kʋralɛ alɛ wa fɛr k'ɩ̃ɩ ƴɛ̀r a,
a mɩ́ fɛr'a k'ɩ̃ɩ cɩɩrɛ yere:
«Po-to-fãw-ɩb nɩ sãw-bɛrʋ!»
A Sore ƴɛ̀rʋ zũú a,
a nɩbɛ tʋʋr mɛ̃ na
ɛ́ ɩrɛ mɛ̃ laar bibie za.
9Mãa wa yel: «Ɩ̃ bɛ lɛb tɩ́ɛrɛ
a Sore yele ɩ, ɩ̃ kʋ̃ lɛb ƴɛ̀r a ʋ yúor ƴãw a»,
a lɛn daar a, a mɩ́ ɩ na mɛ̃ vũu na dɩrɛ
a ɩ̃ pʋ̃ɔmɩ za a.
Ɩ̃ mɩ́ bàl'ɩ ɩ̃ tʋɔra k'ɩ̃ɩ tʋ̃ɔ́ ʋ tɛr, ɛcɛ ɩ̃ bɛ mɩ́ tʋ̃ɔ́ ɩ.
10Ɩ̃ wone nɩ nɩ-yaga na sãwnɛ a ɩ̃ yúor a.
Bɛ bʋɔlɛ mɛ̃ nɩ «Pʋl-vʋ̃ɔ-a-ziir-za!»
Bɛ mɩnɛ yere na: «Nyɩ wo a ʋ sãwna!»
A ŋmaarɛ sɔwr:
«Ʋ̃ʋ, tɩ wo a ʋ sãwna!»
A ɩ̃ bárɩ tɛɛ za jɩɛrɛ nɩ a ɩ̃ loba.
Bɛ yere na: «Kapaw ʋ na ɩ na tɩ bɛ̀lɩ nyɔw ʋ.
Tɩ na tɛr'ɩ fãw zuo ʋ,
ɛ́ tɩ na yáa nɩ a tɩ san a ʋ zu.»
11Ɛcɛ a Sore lãw nɩ mɛ̃ na
mɛ̃ zɛbr-nɩr na kpɛmɛ a.
A bɛlɩ dem za na dɔwrɛ mɛ̃ a na lo na,
bɛ kʋ̃ tʋ̃ɔ́ ɩ a lɛ bɛ na tɩ́ɛrɛ a ɩ.
Vĩ na nyɔw bɛ na, bɛ na gúu a.
A na ɩ bɛ nɩ vĩ kʋralɛ,
ɛ́ nɩr za kʋ̃ yiiri ʋ bɛr ɛ.
12Sore kpɛnʋ-za-sob i,
fʋ mɩ́ nyɛ̃ nɩ a nɩr na tu b a bãw.
Fʋ bãw nɩ a tɩ bʋ̃-bɔbrɩ nɩ a tɩ tɩɛrʋ.
Fʋ̃ʋ n'ʋ ɩ̃ de a ɩ̃ yele kʋ̀.
Wul mɛ̃ a lɛ fʋ na na yáa a san kʋ̀ m a.
13Nyɩ yiele a Sore ƴãw!
Nyɩ danɛ a Sore!
Bʋ̃ʋ n'ʋ vɛ̃, ʋ faa nɩ a nã́w sob
a ɩ-fa-maalbɛ nuru pʋɔ.
*
14Ŋmɛ-ƴãw, ʋ páw a ɩ̃ dɔwfʋ bibir!
A bibir ʋl a ɩ̃ mã na dɔw mɛ̃ a, ʋ ta nyɛ̃ maalʋ ɛ!
15Ŋmɛ-ƴãw, ʋ páw a nɩr ʋl na tɩ yel a ɩ̃ sãà:
«Bɛ dɔw nɩ bidɛb kʋ̀ b!»,
a ɩ ʋ nʋ̃ɔ̀ yaga za a!
16A nɩr ŋa, ʋ ŋmɛ̃ taa nɩ a tẽ-bɛrɛ
a Sore na sãw bɛr a baarɩ a.
A biɓaara a, ʋ mɩ́ wone kon cɛlsɩ,
ɛ́ a mʋ̃tɔ̃-tuo ʋ wone zɛbr cɛlsɩ!
17Ɛ́ a Naaŋmɩn a, bʋ̃ʋ n'ʋ ɩ ʋ bɛ ɩ
ɩ̃ kpi a ɩ̃ mã puori?
A ɩ̃ mã nãá lɩɛb'ɩ a ɩ̃ yaa,
ʋ nãá tɛr mɛ̃ nɩ a ʋ puori kʋralɛ.
18Bʋ̃ʋ n'ʋ so ɩ̃ yi a ɩ̃ mã puori,
alɛ wa ɩ k'ɩ̃ɩ nyɛrɛ wʋ̀ʋr nɩ kpɩɛrʋ,
ɛ́ wa kpi n vĩ a?
Currently Selected:
Zeremi 20: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
