Zeremi 17

A Sore bɛ bɛrɛ a Zuda tẽw dem a bɛ sãwna ƴãw ɛ

1«A Zuda nɩbɛ sãwna

sɛb'a nɩ kur-nɔ-cɩlʋ

bɩɩ kʋsɛ-bi-nyɩla kãw

bɛ na bʋɔlɛ dɩamã a nɔ-cɩlʋ.

Ʋ sɛb'ɩ a bɛ socie pʋɔ

nɩ a bɛ bàwr-maal-kube ɩ́lɛ́ zu.

2Bɛ mɩ́ tɩɛrɛ nɩ a bɛ bàwr-maal-kube,

a bɛ dà-barɩ nɩ a tɩ-zimpiri zimpiri

a tãli-kɛrɩ zu,

mɛ̃ a lɛ bɛ na mɩ́ tɩɛrɛ a bɛ bibiir a.

3Zuda nɩbɛ ɛ,

nyɩɩm na maalɛ a ŋmɩn-bɛlɛbɛlɛ

a tan zu nɩ a wɩ̀ɛ pʋɔ a,

ɩ̃ na de nɩ a nyɩ tɛra,

a nyɩ na-bome nɩ a nyɩ maalʋ-ziir tɩr bɛ zá.

Ɩ̃ na ɩ n à à ŋá za a sãwna nyɩ na sãw

a nyɩ tẽw za pʋɔ a zũú.

4A na fɛr'a kɛ́ nyɩ bɛr a tẽw nyɩ na so a,

a ʋl ɩ̃ na tɩ kʋ̀ nyɩ a.

Ɩ̃ na ɩ na nyɩ ɩ

a nyɩ dɔ̃ dem gbãgbaar tẽ-yũo

nyɩ na bɛ bãw a pʋɔ.

Bʋ̃ʋ n'ʋ vɛ̃, nyɩ ɩ na a ɩ̃ suur vũu 'le,

ɛ́ na dɩrɛ kʋralɛ.»

A Sore mɩ́ maal'ɩ a ʋlɩ sob nɛ na mɩ́ ƴãw a ʋ tɩɛrʋ a ʋ ƴãw

5À ŋá n'a a Sore yere:

«Ŋmɛ-ƴãw, a páw a sob nɛ

na ƴãw a ʋ tɩɛrʋ a nɩsaal ƴãw a,

na bɔbr a ʋ fãw a nɩsaal bʋ̃-tɛrɩ pʋɔ,

ɛ́ a ʋ socir zãá nɩ mɛ̃ a!

6Ʋ ŋmɛ̃ na mɛ̃ tɩle na be dɩlãpʋɔ pʋɔ a:

ʋ kʋ̃ nyɛ̃ a nʋ̃ɔ̀ waa ɩ.

Ʋ na be n a wɛja-kpalɛ

kʋsɛbɛ pʋɔ, nyaarʋ tẽsɔw zu,

be nɩr za na bɛ kpɩɛr a.

7Ɛcɛ maalʋ, a páw a sob nɛ

na ƴãw a ʋ tɩɛrʋ a ɩ̃ ƴãw,

ɩ̃ɩ lɩɛbɩ a ʋ tɩ̀ɛrɛ a.

8Ʋ ɩ na mɛ̃ tɩɛ na sɛl kʋ̃ɔ nʋɔr

ɛ́ a ʋ nyɩgɛ tɛ siw a bàa lowr a.

A tʋlʋ wa waar'a,

ʋ bɛ zɔrɛ bom za ɩ,

a ʋ váar mɩ́ sɔb'ɩ kʋralɛ.

Wɛr yũon tɔr za bɛ vʋ̃ɔnɛ ʋ pʋ̀lá ɩ,

ʋ mɩ́ wɔnɛ nɩ kʋralɛ#17:8 Nyɛ̃ Ssy 1.3..

9Bom bɛ be be bɛ̀lɛ zuo a nɩsaal socir ɛ.

Nɩr kʋ̃ tʋ̃ɔ́ ʋ sanɩ ɛ, nɩr kʋ̃ tʋ̃ɔ́ ʋ bãw ɛ.

10A mãa, a Sore, ɩ̃ mɩ́ jiel'ɩ

a nɩsaalbɛ za tɩɛrʋ nɩ a bɛ bʋ̃-bɔbrɩ.

À ŋá n'a ɩ̃ mɩ́ tʋ̃ɔ́

ya ŋa za man nɩ a ʋ ɩ-ɩrɩ,

man nɩ a ʋlɩ bom nɛ a ʋ tome na wa n a.

11Kɔrnyɛ̃ na ũú nɩ jɛlɛ ʋ na bɛ lɔb a,

à ŋá n'a nɩr na kpɛ nyãnyu-naalʋ a ŋmɛ̃.

A ʋ nyɔ-vʋʋrʋ põ-zɛ̃-taa pʋɔ a,

a ʋ naalʋ mɩ́ bɛr ʋ na,

ɛ́ a baarʋ daar ʋ ɩ mɛ̃ dãbol a.»

A Sore yõ n'ʋ tɩrɛ a nyɔ-vʋʋrʋ

12Naalʋ-dà-kɔw-yúor be n a saa-zu

a pɛr-tib daar za:

a tɩ zi-sõw beba zie n'a.

13Sore e, a Ɩsɩrayɛl ƴãw nɩ a ʋ tɩɛrʋ a fʋ ƴãw.

Vĩ, a nyɔw a bɛlɩ dem na zawrɛ fʋ bɛrɛ a!

A bɛlɩ dem na zãánɛ nɩ fʋ a,

bɛ ɩ mɛ̃ yée na sɛb tanɛ pʋɔ a!

Bʋ̃ʋ n'ʋ vɛ̃, bɛ zawrɩ fʋ na bɛr,

Sore e, fʋ̃ʋ na ɩ a bul-nʋɔr

na tɩrɛ a nyɔ-vʋʋrʋ a.

A Zeremi puoru

14Sanɩ mɛ̃ Sore e, ɩ̃ɩ na sanɩ na.

Faa mɛ̃, ɩ̃ɩ na nyɛ̃ nɩ a faafʋ.

Bʋ̃ʋ n'ʋ vɛ̃, a fʋ danʋ n'a ɩ̃ yiele.

15A nɩbɛ yere nɩ a ɩ̃ zie à ŋá:

«A Sore ƴɛ̀rʋ ʋ na ƴɛ̀r a wa?

A ƴɛ̀rʋ ŋa ʋ tu wɛ!»

16Ɩ̃ bɛ fɛr fʋ kɛ́ fʋ ɩ a kpɩɛrʋ wa ɩ, Sore e.

Ɩ̃ bɛ tɩ bɔbr k'aa bibi-faa ŋa ta ɩ,

fʋ bãwnɩ a na.

A ʋlɩ bom nɛ ɩ̃ na yel a,

a fʋ niŋé na ɩ̃ yel.

17Ta ɩ dɛ̃bɩ̃-bom a ɩ̃ zie ɩ,

a fʋ̃ʋ na ɩ a ɩ̃ tɩ̀ɛrɛ a kpɩɛrʋ bibir a.

18Vĩ, a nyɔw a bɛlɩ dem na dɔwrɛ mɛ̃ a,

ɛ́ bɛr a mãa!

Dɛ̃bɩ̃ɛ, a tɛr bɛ bɛ màwr, ɛ́ bɛr a mãa!

Ɩ a kpɩɛrʋ bibir wa a bɛ zu,

sãw bɛ bɛr pelẽpelẽ!

Tub a pɩ̃ɛnʋ-bibir ƴãw

19À ŋá n'a a Sore yel mɛ̃: «Cen tɩ àr a dɩ̃dɔ-kpɛ̃ɛ ʋl a Zuda tẽw na-mɩnɛ na mɩ́ tuur kpɩɛr ɛ́ yire a ƴãw. Al pùorí, ɩ a lɛ mɩ̀ a Zerizalɛm dɩ̃dɛɛ za ƴãw.» 20Fʋ na yel bɛ nɩ à ŋá: Zuda tẽw na-mɩnɛ ɛ, Zuda tẽw nɩbɛ nɩ a nyɩɩm za na kpɩɛr a Zerizalɛm, ɛ́ tuur a dɩ̃dɛɛ á ŋá ƴãw kpɩɛr a, nyɩ bɛr wõ a Sore ƴɛ̀rʋ. 21À ŋá n'a a Sore yere: A pɩ̃ɛnʋ-bibir a, nyɩ gù nyɩ tʋɔra vla taa tuore tuor ɛ, ɛ́ taa ɩrɛ a yire a Zerizalɛm dɩ̃dɛɛ ƴãw ɛ#17:21 A pɩ̃ɛnʋ-bibir ƴãwfʋ ƴãw a, nyɛ̃ Nee 13.15-22.. 22Nyɩ mɩ̀ kʋ̃ tuo tuor kãw za yi n a nyɩ yie pʋɔ a pɩ̃ɛnʋ-bibir ɛ, nyɩ bɛ tone ton kãw za ɩ. Ɛcɛ nyɩ na de nɩ a pɩ̃ɛnʋ-bibir ʋ ɩ bibi-tuo mɛ̃ a lɛ ɩ̃ na tɩ ƴãw a nʋɔr kʋ̀ a nyɩ sãàkʋm-kore a#17:22 Pɩ̃ɛnʋ-bibir: Nyɛ̃ Ety 20.8-10, Wl-ayi 5.12-14. . 23Bɛl a, bɛ bɛ tɩ bɛr wõ ɩ, bɛ bɛ tɩ ƴãw tobr ɛ, bɛ tɩ tãa nɩ kpaar, bɛ bɛ tɩ bɔbr kɛ́ bɛ bɛr wõ ɛ́ de a wulu ɛ.

24A Sore yere na: «Ɛcɛ a nyɩɩm a, nyɩ bɛrɛ wone vla. A pɩ̃ɛnʋ-bibir a, nyɩ taa ɩrɛ tuor a yire a tẽ-kpɛ̃ɛ ŋa dɩ̃dɛɛ ƴãw ɛ, nyɩ de a bibir ŋa kʋ̀ m ɛ́ taa tone ton kãw za ɩ. 25A lɛn daar a, a na-mɩnɛ na zɩnɛ a Daviir naalʋ-dà-kɔw zu, ɛ́ mɩ́ zɔm a wur bɩɩ zɩ̃ a zɛbr-torko zu a, na tuur'a yire a tẽ-kpɛ̃ɛ ŋa dɩ̃dɛɛ ƴãw kʋralɛ. A bɛ tõ-tõ-bi-bɛrɛ, a Zuda tẽw nɩbɛ nɩ a bɛlɩ dem na kpɩɛr a Zerizalɛm a mɩ̀ na tuur'a yire a be, ɛ́ a tẽ-kpɛ̃ɛ ŋa na tɛr'ɩ nɩbɛ kʋralɛ. 26Nɩbɛ na yi n a Zuda tẽ-bɛrɛ pʋɔ, a ziir na viiri koli a Zerizalɛm a, nɩ a Bɛ̃zamɛ dɔwlʋ tẽw pʋɔ, bɛ na yi n a Ba-Peyi, a Tãw nɩ a Negɛɛvʋ vuo pʋɔ wa. Bɛ na wa n a Ŋmɩn-yir-kpɛ̃ɛ pʋɔ nɩ nyɩw-a-za-bagɛ, bàwr-yoru, de-kʋ̀b bome, tɩ-suur-zɔ̃-na-nyùur-vla-vla-a lãwnɩ danʋ bàwr-maal-bome. 27Ɛcɛ nyɩmɛ bɛ wa bɛr wõ m a, nyɩmɛ bɛ wa sàw de a pɩ̃ɛnʋ-bibir kʋ̀ m ʋ ɩ a ɩ̃ bibir a, nyɩmɛ wa tuore tuor yire nɩ a Zerizalɛm dɩ̃dɛɛ ƴãw a pɩ̃ɛnʋ-bibir a, ɩ̃ na ƴãw nɩ vũu a tẽ-kpɛ̃ɛ ŋa. A vũu na dɩ n a ʋ yir-vɩɛlɩ vɩɛlɩ ɛ́ kʋ̃ kpiiri ɛ.»

Currently Selected:

Zeremi 17: DBDC

Highlight

Copy

Compare