Zeremi 16
16
A Zeremi ɩ n ʋ yõ
1A Sore tɩ ƴɛ̀r'ɩ a ɩ̃ zie à ŋá: 2«Fʋ kʋ̃ kul pɔw ɛ, fʋ kʋ̃ tɛr bidɛbr nɩ pɔwyaar a tẽw ŋa pʋɔ ɩ. 3Bʋ̃ʋ n'ʋ vɛ̃, à ŋá n'a a mãa, a Sore, yere cáarɛ nɩ a bidɛbr nɩ a pɔwyaar bɛl na na dɔw a tẽw ŋa pʋɔ a, nɩ a sãà nɩ mã mɩnɛ bɛl na na dɔw bɛ a. 4Bɛ na kpi n kũu-tuo. Nɩr kʋ̃ kõ a bɛ kuor ɛ, nɩr kʋ̃ ũù bɛ ɩ. Bɛ na lɩɛb'ɩ pʋɔrʋ a tẽw zu. Bɛ na kpi n zɛbr nɩ kɔ̃ kũu: a bɛ kũuni na lɩɛb'ɩ sidume nɩ gbõgbo-cili dɩb.»
5Nyɛ̃ a lɛ a Sore na cãà lɛb yel mɛ̃ a: «Taa kpɩɛr yir pʋɔ nɩbɛ na ɓanɛ taa kuor ƴãw a ɩ, taa cere kuor ɛ. Taa puore nɩr za a wahala ɩ. Bʋ̃ʋ n'ʋ vɛ̃, ɩ̃ lɛb'a de a ɩ̃ ƴã-ɓaarʋ, a ɩ̃ báalʋ nɩ a ɩ̃ su-ɓaarʋ a nɩ-bʋʋrɛ bɛ ŋa zie. Mãa n'ʋ yere, a mãa, a Sore. 6A tẽw ŋa pʋɔ a, a na-mɩnɛ nɩ a nan dem na kpi na, ɛ́ nɩr kʋ̃ ka be ũù bɛ ɩ, nɩr za kʋ̃ kõ bɛ ɩ. Nɩr kʋ̃ cɩr cɩr a ʋ ƴã-gan bɩɩ fɔr a ʋ zu wul'ɩ a ʋ pʋ-sãwna ɩ. 7Nɩr za kʋ̃ ka be lãw dɩ nɩ a kuor yir dem, mɔwlɩ bɛ ɩ. Nɩr mɩ̀ kʋ̃ kʋ̀ bʋ̃-nyúuri a bɛlɩ dem sãà mɩnɛ bɩɩ mã mɩnɛ na kpi a, tʋ̃ɔ́ mɔwlɩ bɛ ɩ.»
8«Mɩ̀ taa kpɩɛr yir pʋɔ bɛ na maalɛ cuw, kɛ́ fʋ tɩ lãw zɩ̃ nɩ a nɩ-bʋɔlɩ dɩ ɛ́ nyũ ɛ. 9Bʋ̃ʋ n'ʋ vɛ̃, à ŋá n'a a mãa, a Sore kpɛnʋ-za-sob, a Ɩsɩrayɛl Naaŋmɩn, yere: “Ɩ̃ na ɩ n a cuwr gɔmɛ, a nʋ̃ɔ̀ cɛlsɩ, a dɛb-sãan nɩ a pɔw-sãan yielu baarɩ a zie ŋa pʋɔ a nyɩ mimirí, a nyɩ cãafʋ daar.”
10A lɛn daar fʋ nãà wa ƴɛ̀r a ƴɛ̀rʋ á ŋá za kʋ̀ a nɩbɛ bɛ ŋa a, bɛlɛ wa sowre fʋ: “Bʋ̃ʋ n'ʋ so a Sore yel k'ʋʋ na ƴãw tɩ nɩ a kpɩɛrʋ kpɛ̃ɛ ŋa? Bʋnʋ yel-faa n'ʋ tɩ maalɩ? Bʋ̃ʋ n'ʋ tɩ sãw a Sore tɩ Naaŋmɩn?” 11A lɛ pʋɔ a, fʋ na sɔw bɛ nɩ à ŋá: “À ŋá n'a a Sore yere: A nyɩ sãàkʋm-kore na zawrɩ mɛ̃ bɛr ɛ́ tu ŋmɩn-yoru pùor, maalɩ a ɛ́ gbĩ dume gũu tɩ tɔ tẽw a niŋé a n'a so. Mãa a, bɛ zawrɩ mɛ̃ na bɛr, bɛ bɛ sàw tu a ɩ̃ wulu ɛ. 12Ɛ́ a nyɩɩm a, nyɩ ɩrɛ nɩ faa zuo a nyɩ sãàkʋm-kore. Ŋa za mɩ́ tuur'ɩ a ʋ pʋ-tɩɛr-faa ɛ́ nɩ̃ɛ bɛr a ɩ̃ bɛr-wob. 13Ɩ̃ na diw nyɩ nɩ a tẽw ŋa pʋɔ cen nɩ tẽ-yoru a nyɩɩm nɩ a nyɩ sãàkʋm-kore na bɛ bãw a pʋɔ. A be a, mʋ̃tɔ̃w nɩ tɩ̃ɩsɔw a, nyɩ na maalɛ nɩ ŋmɩn-yoru. Bʋ̃ʋ n'ʋ vɛ̃, ɩ̃ kʋ̃ cãà wul nyɩ a ɩ̃ pʋ-pɩɛlʋ ɛ.”»
A Sore na ɩ na a nɩ-diw-ceni lɛb wa a bɛ tẽw pʋɔ
14A Sore yere na: «Bibie na vɩɛ na bɛ kʋ̃ mɩ́ lɛb pɔ yel: “Ɩ̃ pɔrɛ nɩ nɩ a Sore na vʋʋrɛ a, ʋl na ɩ a Ɩsɩrayɛl nɩbɛ yi a Eziptɩ tẽw a!” 15Ɛcɛ bɛ na nɩ̃ɛ na mɩ́ yel: “Ɩ̃ pɔ n nɩ a Sore na vʋʋrɛ a, na ɩ a Ɩsɩrayɛl nɩbɛ yi a tẽw saa-pɛrɩ́-gʋba-lowr nɩ a ten al za pʋɔ ʋ na diw bɛ yaarɩ a!” Sɩza n'a, ɩ̃ na lɛb'a tɛr bɛ wa n a tẽsɔw ʋl ɩ̃ na tɩ kʋ̀ a bɛ sãàkʋm-kore a pʋɔ.»
Sãwna sob kãw za bɛ cɩ̃ɛnɛ ɩ
16A Sore yere na: «Ɩ̃ na tõ n zʋm-nyɔwrbɛ yaga bɛ tɩ nyɔw bɛ. Al pùorí ɩ̃ tõ nabawlbɛ yaga bɛ tɩ bawlɩ bɛ a tan zu, a tãli zu tɩ lãwnɩ a pie bɔwrɩ pʋɔ. 17Ɩ̃ jɩ́rɛ nɩ a bɛ ɩ-ɩrɩ za, a kʋ̃ tʋ̃ɔ́ sɔwlɩ a ɩ̃ zie ɩ, a bɛ ɩ-faar kùre mɛ̃ nɩ mimir. 18Ɩ̃ na ɩ na bɛ ya a bɛ sãwna san za kpɛ̃lɛ̃kpɛ̃lɛ̃, a sãwna tɔr za san nɩ a ʋ maal-ƴãwfʋ san. Bʋ̃ʋ n'ʋ vɛ̃, bɛ dɛw nɩ a ɩ̃ tẽw nɩ a bɛ tɩb-faar faar na bɛ vʋʋrɛ a. Bɛ paal'ɩ a ɩ̃ zi-sóra nɩ a bɛ ŋmɩn-bɛlɛbɛlɛ al na kpɛ faa a.»
A nɩ-bʋʋrɛ za na bãw nɩ a Naaŋmɩn-sɩza
19Sore e, fʋ̃ʋ n'ɩ a ɩ̃ fãw
na mɩ́ piw mɛ̃ tɛr a,
fʋ̃ʋ n'ɩ a ɩ̃ sɔwlʋ zie a kpɩɛrʋ daar.
Fʋ̃ʋ zie n'a a nɩ-bʋʋr-yoru na yi
a tẽw baarʋ ziir za wa,
wa yere à ŋá:
«A tɩ sãàkʋm-kore
bʋ̃-sori bɛ na páw a ɩ n ziri tɛwr,
bome na bɛ tɛr pɛr
ɛ́ mɩ̀ bɛ tɛr yel-ɩra a n'a.
20Nɩsaal kʋ̃ tʋ̃ɔ́ maalɩ ŋmɩmɛ tɛr ɛ.
A alɩ bome nɛ bɛ na maalɩ a bɛ ɩ ŋmɩmɛ ɛ!»
21A Sore yere na: «A na ɩ à ŋá a,
ƴɛrɛŋa ʋl a, ɩ̃ na sɩrɩ na ɩ bɛ bãw
a ɩ̃ fãw nɩ a ɩ̃ kpɛnʋ.
Lɛ n'a bɛ na bãw k'aa ɩ̃ yúor'ɩ a Sore.»
Currently Selected:
Zeremi 16: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
