Zeremi 18
18
A yawra nɩ a yawr-mɩɛrɛ
1A Sore tɩ ƴɛ̀r'ɩ a Zeremi zie yel ʋ à ŋá: 2«Zeremi i, ìr a ƴɛrɛŋa siw a yawr-mɩɛrɛ zie. Be n'a ɩ̃ na tɩ ɩ fʋ wõ a ɩ̃ ƴɛ̀rʋ.» 3Lɛ n'a ɩ̃ tɩ siw a yawr-mɩɛrɛ zie, ɛ́ tɩ nyɛ̃ ʋ tone nɩ a ʋ bome bʋ̃-mɩɛra. 4A lale ʋ na tɩ mɩɛr a tɩ nyɩ́r a, mɛ̃ a lɛ a na mɩ́ ta yaw-mɩɛrɛ za na tɛr a yawra a ʋ nũú a. Lɛ n'a a yawr-mɩɛrɛ tɩ lɛb maalɩ bʋ̃-yũo mɛ̃ a lɛ ʋ na bɔbr a. 5A lɛ n'a a Sore tɩ ƴɛ̀r a ɩ̃ zie à ŋá: 6«Ɩsɩrayɛl nɩbɛ ɛ, ɩ̃ kʋ̃ tʋ̃ɔ́ ɩ a nyɩ zie mɛ̃ a yawr-mɩɛrɛ ŋa a bɩɩ? A mãa Sore n'ʋ yere. Nyɩ be n a ɩ̃ nuru pʋɔ mɛ̃ a lɛ a yawra na be a yawr-mɩɛrɛ nuru pʋɔ a. 7A mɩnɛ kãw, ɩ̃ mɩ́ ƴɛ̀rɛ nɩ vʋ̃ɔ-bɛrʋ, da-lɔbrʋ nɩ sãw-bɛrʋ ƴɛ̀rʋ nɩ-bʋʋrɛ kãw bɩɩ naalʋ-tẽw kãw ƴãw. 8Ɛcɛ a bʋʋrɛ bɛ ŋa wa lɩɛbɩ a bɛ ɩb, bɛr a faa na ɩ ɩ̃ ƴɛ̀r a, ɩ̃ mɩ̀ lɛb'a bɛr a faa ɩ̃ na tɩ tɩɛr k'ɩ̃ɩ maalɩ bɛ a. 9A mɩnɛ kãw, ɩ̃ mɩ́ ƴɛ̀rɛ nɩ mɛb nɩ sɛlʋ ƴɛ̀rʋ nɩ-bʋʋr-yoru kãw bɩɩ naalʋ-tẽw kãw ƴãw. 10Ɛcɛ a nɩ-bʋʋrɛ bɛ ŋa bɛ wa bɛr wõ mɛ̃, ɛ́ maalɩ a lɛ na bɛ vɩɛl a ɩ̃ zie a, ɩ̃ mɩ́ lɛb'a bɛr a vla ɩ̃ na tɩ yel k'ɩ̃ɩ na maalɩ bɛ na a.
11Ƴɛrɛŋa a, Zeremi i, ƴɛ̀r a Zuda nɩbɛ nɩ a bɛlɩ dem na kpɩɛr a Zerizalɛm a zie à ŋá: “À ŋá n'a a Sore yere: ɩ̃ cɔbrɛ nɩ kpɩɛrʋ a nyɩ ƴãw, ɩ̃ tɩɛrɛ nɩ yele a nyɩ ƴãw. A nyɩ kãw za, ʋ mɩ́ bɛr a ʋ ɩ-faa. Sɩza, nyɩ lɩɛbɩ a nyɩ vʋʋrʋ nɩ a nyɩ ɩb.”»
12Ɛcɛ bɛ na sɔw na: «Fʋ bàlɛ nɩ fʋ tʋɔra! Tɩ na ɩ n a lɛ tɩ na yel a, tɩ na tuur'ɩ a tɩ tɩɛr-faar.»
A Ɩsɩrayɛl yiir'ɩ a ʋ Sore bɛr
13A lɛ pʋɔ a, à ŋá n'a a Sore yere:
«Nyɩ sowri a nɩ-bʋʋr-yoru za pʋɔ nyɛ̃:
nyɩ dãw na wõ a yele á ŋá taabɛ ɛ?
A Ɩsɩrayɛl sɩrɩ na ɩ ɩ-faa na bɛ maal'ɩ wob a.
14A sa-pupure bɛ mɩ́ pàw
a Libã tan pie nɩr na bɛ kpɩɛr a kʋralɛ ɩ?
A fʋɔlɩ kʋ̃ɔ na mɩ́ zɔrɛ siwr ɓaarɓaar a
na tʋ̃ɔ́ na ŋmãa bɩɩ? Ʋ̃ʋ'hʋ̃!
15Ɛcɛ a ɩ̃ nɩ-bʋʋrɛ yiiri mɛ̃ na bɛr.
Bɛ maalɛ nɩ bagɛ kʋ̀rɛ ŋmɩmɛ na bɛ ɩ ŋmɩmɛ a.
A ŋmɩmɛ á ŋá ƴãw na bɛ ŋmɩɛr gbɛ́ɛ a sɔ́r zu.
A ƴãw na bɛ bɛr a sɔ́r
bɛ na tuur a koro za a,
ɛ́ cere sɔrle na bɛ puo a zu.
16A ɩ̃ nɩ-bʋʋrɛ ɩ n
a bɛ tẽw ʋ lɩɛbɩ zie na sãw ʋ za a,
ƴãw a nɩbɛ lɔbr pʋl-vʋ̃ɔ cɛlsɩ kʋralɛ.
A mɩ́ dam'ɩ a sɔr-tɔlbɛ bɛ viire zuru.
17A dɔ̃ sob wa tarɛ a,
ɩ̃ na diw nɩ a ɩ̃ nɩ-bʋʋrɛ yaarɩ,
mɛ̃ a lɛ a saa-pɛrɩ́ sɛsɛb
na mɩ́ de a uuru cen nɩ a.
A bɛ kpɩɛrʋ bibir a,
ɩ̃ na wul bɛ nɩ a ɩ̃ kpaar,
ʋ kʋ̃ ɩ a ɩ̃ niwn ɛ.»
Bʋ-taa na bʋ a Zeremi kʋb ƴãw a, nɩ a puoru ʋ na puori a
18A dɔ̃ dem bɛ mɩnɛ tɩ yel'a: «Nyɩ wa tɩ wa cɔbrɩ cɔbrʋ a Zeremi ƴãw. Tɩ na cãà na páwr a Naaŋmɩn wulu a bàwr-maalbɛ zie, a yã a yã-bãwnbɛ zie, a Naaŋmɩn ƴɛ̀rʋ a ʋ ƴɛ̀r-manbɛ zie. Nyɩ wa tɩ ƴɛ̀r sãw a ʋ yúor, tɩ ta cɛlɛ a ʋ ƴɛ̀rʋ kãw za ƴãw ɛ.»
19Ɛcɛ fʋ̃ʋ a, Sore e,
wul kɛ́ fʋ cɛlɛ nɩ a ɩ̃ yele zie.
Bɛr wõ a bɛlɩ dem na yere
k'ɩ̃ɩ sãw na a ƴɛ̀rʋ.
20Bɛ mɩ́ maal'ɩ faa yáa nɩ vla a?
Bɛl a, bɛ tuw nɩ bɔw kɛ́ bɛ ɩ ɩ̃ lo.
Ɛcɛ, lɛb tɩɛrɩ ɩ̃ na tɩ àr a fʋ niŋé
k'ɩ̃ɩ ƴɛ̀r a bɛ vla ƴãw,
ɩ a fʋ suur ʋ zãá nɩ bɛ a.
21A na ɩ lɛ a, ɩ kɛ̀ kɔ̃ lo a bɛ bibiir zu,
a zɛbr-sɔ-kpɛ̃ɛ, ʋ kʋ bɛ fɔ̃w fɔ̃w.
A bɛ pɔwbɛ, bɛ ta cãà tɛr a bɛ bibiir ɛ,
bɛ lɩɛbɩ pɔw-kɔbɛ.
Jɛ̀lmɛ̃ bàalʋ, ʋ kʋ a bɛ sɩrbɛ!
A pɔlbili, bɛ kpi a zɛbr zie!
22Bɛ wone kpɩɛrʋ gɔmɛ a bɛ yie pʋɔ,
a lɛn daar fʋ nãà wa bɛr nɩbɛ
na yãwmɛ ɛ́ tɛr zɛbr bome
bɛ ùr wa a bɛ ƴãw a!
Bʋ̃ʋ n'ʋ vɛ̃, bɛ tuw nɩ bɔw
kɛ́ bɛ nyɔw nɩ mɛ̃,
bɛ sɔwl'ɩ bɛrɩ a ɩ̃ gbɛ́ɛ ƴãw.
23Ɛ́ a fʋ̃ʋ, Sore e,
fʋ bãw nɩ a bɛ nɩ-kʋ yele al za
bɛ na cɔbrɛ a ɩ̃ ƴãw a.
Ta dɩ a bɛ yel-bier suur ɛ,
ta ír a bɛ sãwna bɛr ɛ.
Bɛ lo a fʋ niŋé!
Ɩ ɩb kãw a bɛ ƴãw a fʋ suur daar!
Currently Selected:
Zeremi 18: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
