Zeremi 14
14
A Sore ƴɛ̀rʋ ʋ na ƴɛ̀r a wɛr na nyɔw a ƴãw a
1Nyɛ̃ a ƴɛ̀rʋ a Sore na ƴɛ̀r kʋ̀ a Zeremi a wɛr na nyɔw a ƴãw a.
2«A Zuda nɩbɛ be n wahala pʋɔ,
a ʋ tẽ-bɛrɛ fãw siwre na.
Bɛ be n pʋ-sãwna kpɛ̃ɛ pʋɔ,
bɛ zɩ̃ n tẽw,
a Zerizalɛm cɛlsɩ dúor'ɩ saa.
3A nɩ-bɛrɛ tone nɩ a bɛ tõ-tõ-biir
kɛ́ bɛ tɩ bɔ a kʋ̃ɔ.
Bɛ mɩ́ ta n a sa-bie-kʋ̃ɔ-bɔwrɩ pɛr,
bɛ nyɛ̃ kʋ̃ɔ-bir za ɩ,
bɛ mɩ́ lɛb'a wa n bʋ̃-zawlɛ,
a bɛ tɩɛrʋ sãw,
pʋ-sãwna tɛr bɛ, bɛ su zuru.
4A saa na bɛ wa,
ɛ́ a tẽsɔw pur pur a zũú a,
a ka-kʋ́ɔrbɛ tɩɛrʋ sãw na, bɛ su n zuru.
5A wɩ̀ɛ pʋɔ a, a wala tɛɛ za
mɩ́ dɔw nɩ a ʋ bile, cen kɛ́ bɛr,
bʋ̃ʋ n'ʋ vɛ̃, va-ɓaar bɛ cãà be ɩ.
6A bòn-gaarɩ mɩ́ àr'ɩ
a tãli na kpal a zu.
A mɩ́ fõwne nɩ a sɛsɛb
mɛ̃ gbõgbo-cili a.
A mimie mɩ́ tɩ bàl'ɩ
a mʋ̃ɔ na bɛ cãà be a bɔb ƴãw.»
A nɩbɛ
7«A tɩ yel-bebe wa wule tɩ na sãw a,
fʋ̃ʋ a, Sore e,
ɩ ɩb kãw a fʋ yúor zũú.
Sɩza n'a,
kʋralɛ n'a tɩ zawrɛ fʋ,
tɩ ɩ n sãwna dem a fʋ zie.
8A fʋ̃ʋ ƴãw a Ɩsɩrayɛl na ƴãw a ʋ tɩɛrʋ a,
a fʋ̃ʋ na tɩ faa ʋ a kpɩɛrʋ daar a,
bʋ̃ʋ n'ʋ so fʋ ɩrɛ mɛ̃ sãan a,
a tẽw pʋɔ, mɛ̃ sɔr-tɔlɛ na bɩɛ
k'ʋʋ gã ìr a?
9Bʋ̃ʋ n'ʋ so fʋ ɩrɛ
mɛ̃ nɩr na bɛ tɛr fãw a,
mɛ̃ gãdaa na kʋ̃ tʋ̃ɔ́ nɩr faa a?
Ɛcɛ fʋ̃ʋ n'ɩ ŋa be a tɩ sɔgɔ,
Sore e, fʋ̃ʋ so tɩ, ta bɛr tɩ tɩ lo ɩ.»
*
10À ŋá n'a a Sore ƴɛ̀rɛ a nɩbɛ bɛ ŋa ƴãw: «Sɩza, a nɩbɛ bɛ ŋa nɔnɛ nɩ cɔlʋ, bɛ bɛ zɩnɛ zi-been ɛ.» Ɛcɛ, bɛ na bɛ pɛlɩ a Sore pʋɔ a, ƴɛrɛŋa a, ʋ lɛb'a tɩɛrɩ a bɛ sãwna ɛ́ na dɔwrɩ bɛ a bɛ yel-bebe zũú.
11A Sore yel mɛ̃ na: «Taa zɛlɛ bom kãw za a ɩ̃ zie a nɩ-bʋʋrɛ bɛ ŋa vla ƴãw ɛ. 12Bɛlɛ saa tɛr mʋta-tuo a, ɩ̃ kʋ̃ bɛr wõ a bɛ yãayãa zɛlʋ ɛ. Bɛlɛ saa maalɩ nyɩw-a-za-bagɛ, tɩr'ɩ de-kʋ̀b bome kʋ̀ m a, à á ŋá za kʋ̃ pɛlɩ a ɩ̃ pʋɔ ɩ. Ɛcɛ zɛbr, kɔ̃ nɩ jɛ̀lmɛ̃ bàalʋ n'a ɩ̃ na kʋ n bɛ pàw pɛr.»
13Ɩ̃ tɩ sɔw na: «'Woi, Sore Naaŋmɩn i, a ƴɛ̀r-manbɛ yere na kʋ̀rɛ a nɩbɛ à ŋá: “Nyɩ kʋ̃ bãw zɛbr ɛ, nyɩ kʋ̃ bãw kɔ̃ ɩ, ɛcɛ Naaŋmɩn na kʋ̀ nyɩ nɩ ƴã-ɓaarʋ mɩŋa a zie ŋa pʋɔ.”»
14A Sore tɩ sɔw mɛ̃ na: «Ziri n'ɩ a lɛ za a ƴɛ̀r-manbɛ na yere a ɩ̃ yúor ƴãw a. Ɩ̃ bɛ tõ bɛ ɩ, ɩ̃ bɛ yel yel za kʋ̀ bɛ ɩ, ɩ̃ bɛ ƴɛ̀r bɛ zie ɩ. A bɛ bʋ̃-nyɛrɩ ɩ n ziri, a yele bɛ na yere a bɛ tɛr pɛr ɛ, bɛl mɩŋa pʋ-tɩɛrʋ n'a. 15Alɛ n'a so a mãa, a Sore, ɩ̃ yere à ŋá a naaŋmɩn-ƴɛ̀r-manbɛ bɛ ŋa ƴãw: “A nɩbɛ bɛ ŋa yere na kɛ́ mãa yúor ƴãw n'a bɛ ƴɛ̀rɛ, ɛcɛ ɩ̃ bɛ tõ bɛ ɩ. Bɛ manɛ na kɛ́ zɛbr nɩ kɔ̃ kʋ̃ be a tẽw ŋa pʋɔ ɩ. Ɛcɛ a zɛbr nɩ a kɔ̃ n'a na baarɩ bɛ za! 16A kɔ̃ nɩ a zɛbr na kʋ n a bɛlɩ dem bɛ na ƴɛ̀r a naaŋmɩn-ƴɛ̀r-manbɛ ƴɛ̀rʋ ŋa kʋ̀ a. Bɛ na lɔb lɔb'ɩ a bɛ kũuni bɛr a Zerizalɛm sɛ́ɛ pʋɔ, ɛ́ nɩr za kʋ̃ be be ũù bɛ ɩ, a bɛl, a bɛ pɔwbɛ, a bɛ bidɛbr nɩ a bɛ pɔwyaar. Ɩ̃ na ɩ na a bɛ faa lɩɛbɩ lo a bɛ zu.”»
17«Fʋ na ƴɛ̀r'ɩ a ƴɛ̀rʋ ŋa kʋ̀ bɛ:
Ɩ̃ bɔbr'a k'aa ɩ̃ mʋta-kʋ̃ɔ
nãá gbɔlɛ ta tɛr ŋmãafʋ ɛ,
mʋ̃tɔ̃w nɩ tɩ̃ɩsɔw!
Bʋ̃ʋ n'ʋ vɛ̃,
kpɩɛrʋ kpɛ̃ɛ páw nɩ a ɩ̃ nɩ-bʋʋrɛ
na ɩrɛ nɩbaalʋ a,
a ʋ natɩr sɩrɩ bɛ tɛr sanʋ ɛ.
18Mãa wa yi a wɩ̀ɛ pʋɔ a,
nɩbɛ a zɛbr na kʋ a
tɛwr nɛbɛ ɩ̃ mɩ́ nyɛ̃.
Mãa wa kpɛ a tẽ-kpɛ̃ɛ pʋɔ a,
nɩbɛ a kɔ̃ na kʋrɛ a tɛwr nɛbɛ ɩ̃ mɩ́ nyɛ̃.
A naaŋmɩn-ƴɛ̀r-manbɛ nɩ a bàwr-maalbɛ
cɔlɛ nɩ a tẽw: bɛ bɛ bãw a yel pɛr ɛ.»
A nɩbɛ
19«Sore e, fʋ sɩrɩ na lɔb a Zuda bɛr bɩɩ?
A Sɩyɔ̃ vʋla baar'ɩ a fʋ zie e?
Bʋ̃ʋ n'ʋ so fʋ ƴãw tɩ bàalʋ na bɛ tɛr sanʋ a?
Ƴã-ɓaarʋ n'a tɩ tɩ gùre,
ɛcɛ bʋ̃-vla kãw za bɛ wa wa ɩ.
Tɩ tɩ gù n a sanʋ daar,
ɛcɛ dɛ̃bɩ̃ɛ n'a wa wa.
20Sore e, tɩ sàw na kɛ́ tɩ bɛ tõ vla ɩ,
tɩ sàw nɩ a tɩ sãàkʋm-kore sãwna.
Tɩ sãw fʋ na.
21A fʋ yúor zũú a, ta jɛ
a fʋ naalʋ-dà-kɔw-yúor bɛr ɛ, ta jewr'ʋ ɛ!
Lɛb tɩɛrɩ a wõ-taa fʋ na maal'ɩ tɩ a,
ta sãw ʋ bɛr ɛ.
22A nɩ-bʋʋr-yoru
ŋmɩn-bɛlɛbɛlɛ pʋɔ a,
been be n be na tʋ̃ɔ́ ɩ kɛ̀ saa wa a?
A salom tɛɛ za n'ʋ mɩ́ bɛr a kʋ̃ɔ a siw ɩ?
Fʋ̃ʋ bɛ n'ɩ a Sore tɩ Naaŋmɩn ɛ?
A fʋ ƴãw n'a tɩ ƴãw a tɩ tɩɛrʋ,
bʋ̃ʋ n'ʋ vɛ̃, fʋ̃ʋ n'ʋ maalɛ à á ŋá za.»
Currently Selected:
Zeremi 14: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
