Ɩzayi 66
66
A pãtɩ-nakaar ɩ-ɩrɩ a puoru pal pʋɔ
1À ŋá n'a a Sore yere:
«A salom ɩ n a ɩ̃ naalʋ-dà-kɔw
ɛ́ a tẽsɔw ɩ a ɩ̃ gbɛ́ɛ dɔwlʋ zie.
Yir bʋ̃ʋ n'ʋ nyɩ na tʋ̃ɔ́ ŋmãa kʋ̀ m?
A zie n'ɩ buor ɩ na na tʋ̃ɔ́ kpɩɛr a?
2A bome á ŋá za a,
ɩ̃ nuru n'a maalɩ a, mãa so a,
a mãa Sore, mãa n'ʋ yere.
Ɛcɛ a ʋlɩ sob ɩ̃ na mɩ́ jɩ́rɛ a,
ʋlɛ n'ɩ a bãbàal, a pʋ-sãwna sob,
a sob nɛ ɩ̃ na mɩ́ ƴɛ̀r ʋ màwr a.
3Ɛcɛ a bagɛ maalʋ ƴãw a,
a nɩbɛ mɩ́ kʋ n náab, ɛ́ mɩ̀ kʋ nɩr.
Bɛ mɩ́ ŋmaar'ɩ pɛ́rʋ kɔkɔr,
ɛ́ mɩ̀ ŋmɛ baa kʋ.
Bɛ mɩ́ de nɩ de-kʋ̀b bom tɩr,
ɛ́ mɩ̀ de dobaa zɩ̃ɩ tɩr.
Bɛ mɩ́ nyɩw nɩ
tɩ-suur-zɔ̃-na-nyùur-vla-vla-a,
ɛ́ mɩ̀ maalɩ tɩɩb na bɛ vɩɛl a.
A nɩbɛ bɛ ŋa kaa na ír a bɛ sɛ́ɛ,
ɛ́ a bɛ ɩ-faar na bɛ maal'ɩ wob a ɩrɛ bɛ nʋ̃ɔ̀.
4A na ɩ à ŋá a, a mãa mɩ̀,
ɩ̃ na kaa na ír bɛr bɛ kʋ̀
a alɩ bome nɛ bɛ na mɩ́ wa ùr ɩrɛ
a lɛ bɛ na nɔnɛ a na waar'ɩ a.
Ɩ̃ na ɩ na a ʋlɩ bom nɛ
na ɩrɛ bɛ dɛ̃bɩ̃ɛ a wa a bɛ zu.
Bʋ̃ʋ n'ʋ vɛ̃, ɩ̃ bʋɔl'a ɛ́ nɩr za bɛ sɔw ɛ,
ɩ̃ ƴɛ̀r'a, ɛ́ nɩr za bɛ bɛr wõ ɩ.
Bɛ ɩ n a ʋlɩ bom nɛ na bɛ vɩɛl a a ɩ̃ zie,
bɛ kaa na ír a ʋlɩ bom nɛ
na bɛ nʋmɛ a ɩ̃ zie a.»
A Sore lɛb'a ƴãwnɛ a ʋ nɩbɛ kanyir ɛ́ na dɩ n a nɩsaalbɛ za ƴɛ̀rʋ
5Nyɩ bɛrɛ wone a Sore ƴɛ̀rʋ,
nyɩɩm ʋ na mɩ́ ƴɛ̀r nyɩ màwr a:
A nyɩ yɛbr bɛ mɩnɛ hɩ̃ɛn nyɩ na,
ɛ́ íre nyɩ bɛrɛ a bɛ pʋɔ a mãa ƴãw.
Bɛ mɩ́ ɩrɛ nyɩ na laar yere nɩ:
«A Sore, ʋ wul a ʋ yúor-vɩɛlʋ-danʋ
tɩ tʋ̃ɔ́ nyɛ̃ a nyɩ cɩlʋ!»
Ɛcɛ bɛlɛ nɛbɛ na nyɛ̃ vĩ.
6Nyɩ wone a gɔmɛ na yire a tẽ-kpɛ̃ɛ pʋɔ a,
a gɔmɛ na yire a Ŋmɩn-yir-kpɛ̃ɛ pʋɔ a.
A Sore n'ʋ yarɛ a dɔ̃ dem a lɛ a na sɛwnɩ bɛ a.
7A pʋɔ bɛ 'wɔb a Zerizalɛm sɛr ɛ, ʋʋ dɔw,
ʋ bɛ tĩ wone a dɔwfʋ 'wɔbrʋ sɛr ɛ, ɛ́ dɔw dɛble.
8Ãa n'ʋ dãw wõ a yel ŋa tɔ?
Ãa n'ʋ dãw nyɛ̃ ʋ?
Bɛ mɩ́ dɔw nɩ tẽw bibi-been yõ o?
Nɩ-bʋʋrɛ na tʋ̃ɔ́ na nyɛ̃ cãà daƴen daadaa a?
Ɛcɛ lɛ n'a a ɩ a Zerizalɛm zie:
a 'wɔbrʋ tɩ tine ʋ na wa báarɛ,
ʋʋ dɔw a ʋ bibiir!
9A Sore sowre na:
«Mãa wa ɩ pɔw tɛr pʋɔ tɩ ta a dɔwfʋ a,
a bie ta yi ƴãw n'a bɩɩ?
A fʋ Naaŋmɩn n'ʋ yere.»
10Nyɩ lãwnɩ a Zerizalɛm cɩlɛ,
nyɩ cɩlɛ ƴawr'ɩ a ʋ ƴãw,
nyɩɩm za na nɔnɛ ʋ a.
Nyɩɩm na tɩ be a wahala pʋɔ a ʋ ƴãw a,
nyɩ lãwnɩ ʋ ƴɛrɛŋa
a nʋ̃ɔ̀ na kpɛ ʋ bol bɛr a pʋɔ.
11Lɛ n'a ʋ na lɛb ƴãw nyɩ kanyir.
Nyɩ na tɩw na mɛ̃ bi-pɩɩlɛ na ƴɛnɛ
a bɛ mã bɩrɛ na paalɩ bʋ̀r-kʋ̃ɔ wone nɩ nʋ̃ɔ̀ a.
12Bʋ̃ʋ n'ʋ vɛ̃, à ŋá n'a a Sore yere:
«Ɩ̃ na ɩ n a ƴã-ɓaarʋ
gbɔlɛ cere a Zerizalɛm mɛ̃ man kʋ̃ɔ a,
ɛ́ a nɩ-bʋʋrɛ na-bome gbɔlɛ cere
mɛ̃ bàa na paalɩ yi nɛ́ɛ a.
Ɩ̃ na kaa nɩ a nyɩ zie
mɛ̃ a lɛ mã na mɩ́ ɩrɛ bie ʋ na ƴɛnɛ a,
ʋ na mɩ́ pɛ̀w ɛ́ ƴãw gbɛ́ɛ zu dɩ̃ɛnɛ nɩ a.
13Sɩza, mɛ̃ a lɛ mã
na mɩ́ mɔwlɩ a ʋ bie a,
a mãa mɩ̀, ɩ̃ na mɔwlɩ nyɩ na.
Nyɩ na nyɛ̃ nɩ mɔwlʋ a Zerizalɛm.
14Nyɩ na nyɛ̃ na,
a nyɩ socir na cɩlɛ na,
a nyɩ kɔbɛ na lɛb'a kpɛmɛ
mɛ̃ mʋ̃ɔ saa na wa ƴãw a.»
A Sore na ɩ n a ʋ tõ-tõ-biir bãw a ʋ kpɛnʋ,
ɛcɛ ʋ na wul'ɩ a ʋ suur a ʋ dɔ̃ dem.
15A Sore sɩrɩ n'ɩ ŋan:
vũu pʋɔ n'a ʋ waar,
a ʋ zɛbr-torkori ɩ na mɛ̃ sɛsɛb-pɩl a.
Ʋ waar'a k'ʋʋ wa wul a ʋ suur na bɛ tɛr dɩ̃ɛnʋ a,
ɛ́ fuw a nɩbɛ nɩ vũu-zɛlɛ.
16Sɩza, a vũu nɩ a zɛbr-sɔ-kpɛ̃ɛ n'a
a Sore na dɩ n a nɩsaalbɛ za a ƴɛ̀rʋ.
A kũuni na yãwmɛ na.
17A nɩbɛ bɛl na mɩ́ sʋ̃ɔmɩ bul so a bɛ dɛwr bɛr,
kɛ́ bɛ tʋ̃ɔ́ kpɛ zaadɛnɩ a mɩnɛ kãw pʋɔ a
nɛbɛ ɩ̃ yere a ka.
Bɛ mɩ́ àr'a tu nɩr na be a zaadɛ̃ sɔwlɩsɔw a.#66:17 Nɩr na be a zaadɛ̃ sɔwlɩsɔw a: Ʋ tɔ̃w na ɩ n bàwr-maalɛ, dɛb bɩɩ pɔw, na tone a ŋmɩn-bɛlmɛ tome a.
Bɛ mɩ́ 'wɔbr'ɩ dobaa bɩɩ jɩkɔl,
bʋ̃-faar na bɛ maal'ɩ wob a.
A nɩbɛ bɛ ŋa na lãw na kpi bɛ za.
A Sore n'ʋ yere.
A Sore na ɩ na a nɩ-bʋʋrɛ za bãw ʋ
18A Sore yere na: «Ɩ̃ bãw nɩ a alɩ bome nɛ bɛ na ɩrɛ a, nɩ a alɩ bome nɛ bɛ na tɩɛrɛ a. Ɩ̃ waar'a k'ɩ̃ɩ wa ɓã a nɩ-bʋʋrɛ za na ƴɛ̀rɛ ƴɛ̀r-pɛ-bʋʋrɛ za a taa. 19Ɩ̃ na ƴãw nɩ bãwfʋ a bɛ sɔgɔ. A bɛlɩ dem nãà wa cãà vʋʋrɛ a ɩ̃ ƴɛ̀rʋ-dɩb pùorí a, ɩ̃ na tõ bɛ nɩ a Tarsisɩ, a Putɩ nɩ a Ludɩ nɩbɛ zie, nɩbɛ na ɩ tã-tɛbrbɛ a. Ɩ̃ na tõ bɛ nɩ a Tubal, a Yavan#66:19 Tarsisɩ: Ɛsɩpanyɩ tẽw saa-pɛrɩ́-dʋrʋ-lowr na n'a ʋ be. Pul: Afrika tẽw lõbowr kãw na pɩɛlɩ Etiopi a n'ʋ. Ludɩ: Zie na pɩɛlɩ Eziptɩ tẽw a n'ʋ. Tubal: Zie na be tẽw bɛ na bʋɔlɛ Tirki a dɩ̃a a n'ʋ. Yavan: Gɩrɛkɩ mɩnɛ tẽw nɩ a ʋ kʋ̃ɔ-kpɛ̃ɛ-sɔgɔ-ten n'a. nɩ a kʋ̃ɔ-kpɛ̃ɛ-sɔgɔ-tẽ-zãánɩ nɩbɛ zie, a be nɩr na bɛ dãw wõ bɛ por a ɩ̃ yúor a, a be nɩr na bɛ dãw nyɛ̃ a ɩ̃ yúor-vɩɛlʋ-danʋ a. Ɛ́ bɛ na tɩ ɩ na a nɩbɛ bɛ ŋa bãw a ɩ̃ yúor-vɩɛlʋ-danʋ. 20A nɩbɛ bɛ ŋa na tɛr'ɩ a nyɩ yɛbr za na tɩ be a bɛ zie a lɛb wa n. Wie zu, zɛbr-torkori pʋɔ, torkori na pàw ɓaarʋ a pʋɔ, mílɛ̀#66:20 Mílɛ̀: Ʋ ɩ n bõw daa na do wur nyãw ʋ dɔw a. A mílɛ̀ bɛ dɔwr ɛ, dʋ̃-ãan n'ʋ. Nyɛ̃ 2Sa 13.29, Ssy 32.9. nɩ nyɔ̃wmɩ zu n'a bɛ na tɛr bɛ lɛb wa n a ɩ̃ tãw-sõw zu a Zerizalɛm. A Sore n'ʋ yel. A na ɩ n a bɛ de-kʋ̀b bom a ɩ̃ ƴãw. Ɩ̃ na sàw na de ʋ mɛ̃ a de-kʋ̀b bom ʋl a Ɩsɩrayɛl nɩbɛ na mɩ́ wa n a ɩ̃ Yir laar na bɛ tɛr dɛwr a pʋɔ a. 21Ɩ̃ mɔ̃ mɩ̀ na kaa na ír bàwr-maalbɛ nɩ levitɩ mɩnɛ a nɩ-bʋʋrɛ bɛ ŋa pʋɔ. A Sore n'ʋ yel.»
22A Sore yere na: «Mɛ̃ a lɛ a salom-paala nɩ a tẽsɔw-paala ɩ̃ na ír na kpɛmɛ àr a ɩ̃ niŋé a, lɛ n'a a nyɩ yúor nɩ a nyɩ bʋʋrɛ na be a ɩ̃ niŋé kʋralɛ.
23À ŋá n'a, cuw-paala za nɩ pɩ̃ɛnʋ-bibir za,
a nɩbɛ za na mɩ́ wa wa gbĩ dume a ɩ̃ niŋé.
24A nɩbɛ wa yire a tẽ-kpɛ̃ɛ pʋɔ a,
bɛ na tʋ̃ɔ́ na nyɛ̃ a nɩbɛ na gaarɩ a ɩ̃ ƴãw a ƴã-gamɛ.
A zãzule na dɩrɛ a a, bɛ kpiir ɛ,
ɛ́ a vũu na dɩrɛ a a, bɛ kpiire ɩ.
A na ɩ n pʋl-vʋ̃ɔ a nɩsaalbɛ za zie.»
Currently Selected:
Ɩzayi 66: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
