Ɩzayi 65
65
A Sore na dɩ n nɩ a ʋ nɩ-bʋʋrɛ nɩbɛ za ƴɛ̀rʋ
1A Sore yere na:
Ɩ̃ bɛr'a nɩbɛ na bɛ tɩ zɛlɛ bom a bɔbr mɛ̃.
Ɩ̃ bɛr'a nɩbɛ na bɛ tɩ bɔbr mɛ̃ a nyɛ̃ m.
Ɩ̃ yel'ɩ nɩ-bʋʋrɛ na bɛ tɩ bʋɔlɛ a ɩ̃ yúor a:
“Mãa n'ɩ ŋan, mãa n'ɩ ŋan!”
2Ɩ̃ tur'ɩ nũu kʋralɛ cɔw
nɩ-bʋʋrɛ na gaarɩ a,
nɩbɛ na tuur sɔr-faa
ɛ́ ɩrɛ lɛ tɛwr bɛ na tɩɛrɛ a.
3A nɩbɛ bɛ ŋa
càar'a kʋrɛ mɛ̃ suur kʋralɛ:
bɛ maalɛ nɩ bagɛ a zaadɛnɩ pʋɔ,
ɛ́ nyɩwr parfɛnɩ
birkiri bàwr-maal-kube zu
a ŋmɩn-bɛlmɛ ƴãw.
4Bɛ zɩnɛ nɩ a yàa bɔwrɩ pʋɔ,
bɛ kpɩɛrɩ tan bɔwrɩ pʋɔ.
Bɛ 'wɔbr'ɩ dobaa nɛn,
ɛ́ a bɛ labɛ mɩ́ paalɩ bʋ̃-dɩ-dɛgɛ.
5Bɛ mɩ́ yere nɩ a nɩbɛ zie:
«Nyɩ taa tawr pɩɛlɛ ɩ, nyɩ taa tʋɔr mɛ̃ ɩ.
Bʋ̃ʋ n'ʋ vɛ̃, ɩ̃ nãà ɩ na nyɩ ɩ bʋ̃-tuor».
A nyɩ ɩ-ɩrɩ á ŋá za mɩ́ ɩ na nyɛɛ karɛ mɛ̃,
a ɩ̃ suur mɩ́ ìr'a 'lere mɛ̃ vũu a, kʋralɛ.
6Ɛcɛ ɩ sɛb'ɩ à á ŋá za.
Ɩ̃ bɛ ɩrɛ gbili ɛ, ɩ̃ɩ na ɩ na bɛ ya
7a bɛ sãwna san vla vla,
lãwnɩ a bɛ sãàkʋm-kore dem.
A bɛ sãàkʋm-kore nyɩw nɩ parfɛ̃ a tan zu,
ɛ́ ɩ m la a tãli zu.
A na ɩ à ŋá a,
ɩ̃ na ɩ na bɛ ya a koro za ɩ-ɩrɩ san vla vla.
A mãa, a Sore, mãa n'ʋ yere.
8À ŋá n'a a Sore yere:
Bɛlɛ wa nyɛ̃ divɛ̃ tɩ-wɔ̃-cãacul
na mʋ̃ɔ̀ vla vla a, a nɩbɛ mɩ́ yere na:
«Nyɩ ta sãw ʋ bɛr ɛ,
ʋ nãà wa tɩr'ɩ divɛ̃-nʋ̃ɔ̀ nʋ̃ɔ̀.»
«À à ŋá mɩ̀ n'a ɩ̃ na ɩ
a bɛlɩ dem na tone a ɩ̃ tome a zũú.
Ɩ̃ bɛ sãwnɛ a za bɛrɛ ɩ.
9Ɩ̃ na kʋ̀ n bʋʋrɛ a Zakɔb nɩbɛ,
a Zuda dɔwlʋ nɩbɛ.
Bɛ na so nɩ a ɩ̃ tan.
A bɛlɩ dem ɩ̃ na kaa ír a na so a na,
a bɛlɩ dem na tone a ɩ̃ tome a na kpɩɛr'ɩ a be.
10A Saron tɩ̃tal na lɩɛb'ɩ píir àrʋ zie,
ɛ́ a Akɔɔr#65:10 Nyɛ̃ Zoz 7.24-26. fʋɔla lɩɛbɩ nadʋʋra
a ɩ̃ nɩbɛ na na bɔ m a ƴãw.
11Ɛcɛ a nyɩɩm a, nyɩ zawrɩ mɛ̃ na bɛr,
nyɩ yiir'ɩ a ɩ̃ tãw-sõw bɛr,
nyɩ kʋ̀rɛ nɩ bʋ̃-dɩrɩ a Gadɩ, a bawson ŋmɩn,
nyɩ kʋ̀rɛ nɩ divɛ̃ na jɛr taa a a Meni,
a lɛ a yele na na ɩ a baarʋ daar a ŋmɩn.
12A na ɩ à ŋá a, ɩ̃ na bɛr nyɩ na kʋ̀ a nyɩ dɔ̃ dem.
Nyɩ na gbĩ n dume bɛ ŋmaarɩ nyɩ a kɔkɛɛ.
Bʋ̃ʋ n'ʋ vɛ̃, ɩ̃ bʋɔl'a, ɛ́ nyɩ bɛ sɔw ɛ.
Ɩ̃ ƴɛ̀r'a, ɛ́ nyɩ bɛ bɛr wõ ɩ.
Nyɩ ɩ n a lɛ na bɛ vɩɛl a a ɩ̃ zie,
nyɩ kaa na ír a bom nɛ na bɛ pɛlɩ a ɩ̃ pʋɔ a.
13Alɛ n'a so ɩ̃ yere à ŋá,
a mãa, a Sore Naaŋmɩn:
a ɩ̃ tõ-tõ-biir na mɩ́ dɩ na,
ɛ́ a nyɩɩm a, nyɩ na mɩ́ bãw nɩ a kɔ̃.
A ɩ̃ tõ-tõ-biir na mɩ́ nyũ na,
ɛ́ a nyɩɩm a, kʋ̃ɔ-nyúur na mɩ́ kpɛ nyɩ na.
Nʋ̃ɔ̀ na mɩ́ ɩrɛ nɩ a ɩ̃ tõ-tõ-biir,
ɛcɛ a nyɩɩm a, vĩ na mɩ́ nyɔw nyɩ na.
14A ɩ̃ tõ-tõ-biir na mɩ́ cáarɛ na,
ɛ́ nʋ̃ɔ̀ paalɩ a bɛ socie!
Ɛcɛ a nyɩɩm a, 'wɔbrʋ n'a
na mɩ́ 'wɔbr nyɩ nyɩ cɩɩrɛ,
ɛ́ a nyɩ socie paalɩ kpɩɛrʋ.
Nyɩ na mɩ́ 'huore na,
ɛ́ a tɩɛrʋ sãw ʋ za!
15A bɛlɩ dem ɩ̃ na kaa ír a,
na mɩ́ de nɩ a nyɩ yúor,
ɛ́ a ɩ ŋmɛ-ƴãw tɛwr ƴãw, bɛ mɩ́ yel:
“A Sore Naaŋmɩn, ʋ ɩ fʋ kpi mɛ̃ bón bɩɩ bón a!”
Ɛcɛ a ɩ̃ tõ-tõ-biir ƴãw a,
yo-yũo n'ʋ bɛ na mɩ́ de.
16A tẽw pʋɔ a, nɩr na bɔbr
k'ʋʋ ƴɛ̀r nɔ-vla a ʋ tɔ sob ƴãw a,
na mɩ́ ƴɛ̀r'ɩ a Naaŋmɩn
na ŋmɛ̃ ʋ ŋmɛ̃a a yúor ƴãw.
Nɩr na bɔbr k'ʋʋ pɔ a,
na mɩ́ pɔ n a Naaŋmɩn
na ŋmɛ̃ ʋ ŋmɛ̃a a yúor ƴãw.»
Naaŋmɩn na ír'ɩ salom-paala nɩ tẽsɔw-paala
A Sore yere na:
Bɛ na yiir'ɩ a koro za kpɩɛrʋ bɛr,
a na bɔr'a zãá a ɩ̃ zie.
17Bʋ̃ʋ n'ʋ vɛ̃, ɩ̃ na ír'ɩ
salom-paala nɩ tẽsɔw-paala.
Nɩr bɛ lɛb ƴɛ̀rɛ a koro za yele ƴɛ̀rʋ ɛ,
bɛ kʋ̃ lɛb tɛr a tɩɛrʋ towtow ɛ.
18Nʋ̃ɔ̀, a paalɩ nyɩ laarɩ, nyɩ cɩlɛ kʋralɛ
a ʋlɩ bom nɛ ɩ̃ na na ír a ƴãw.
Ɩ̃ na ɩ na a Zerizalɛm
ɩ tẽ-kpɛ̃ɛ nʋ̃ɔ̀ na paalɩ a,
ɛ́ a ʋ nɩbɛ ɩ nɩ-bʋʋrɛ cɩlʋ na tɛr a.
19Ɩ̃ na cɩlɛ nɩ a Zerizalɛm ƴãw,
nʋ̃ɔ̀ na paalɩ mɛ̃ na laarɩ a ɩ̃ nɩ-bʋʋrɛ ƴãw.
Bɛ kʋ̃ cãà wone kon nɩ cɛlsɩ a bɛ pʋɔ ɩ.
20Bibie à ŋá tɛwr bi-pɩɩla bɛ lɛb kpiir a be ɩ.
Dɛnyãw na bɛ ta a ʋ daar a bɛ lɛb kpiir ɛ.
Nɩr na tɛr yome kʋba (100) kpi n a,
ʋ ɩ n pɔlbile ɛ́ kpi.
Ɛ́ nɩr bɛ wa ta yome kʋba (100) a,
bɛ na jɩ́rɛ ʋ na mɛ̃ nɩr bɛ na ŋmɛ ƴãw a.
21A ɩ̃ nɩbɛ na ŋmarɛ nɩ yie kpɩɛr,
bɛ na sɛlɛ nɩ divɛ̃ tɩɩr ɛ́ dɩrɛ a wɔmɛ.
22Bɛ kʋ̃ lɛb ŋmarɛ yie nɩ-yoru kpɩɛr ɛ,
bɛ kʋ̃ lɛb sɛlɛ divɛ̃ tɩɩr nɩ-yoru dɩrɛ a wɔmɛ ɩ.
Bʋ̃ʋ n'ʋ vɛ̃, a ɩ̃ nɩbɛ na mɩ́ kòr'a mɛ̃ a tɩɩr a.
A bɛlɩ dem ɩ̃ na kaa ír a
na mɩ́ so nɩ a bɛ nuru bome dɩrɛ.
23Bɛ kʋ̃ mɩ́ cãà bàlɛ bɛ tʋɔra zawla ɩ,
bɛ kʋ̃ mɩ́ lɛb dɔw bibiir kʋ̀ a kũu ɛ.
Bʋ̃ʋ n'ʋ vɛ̃, bɛ ɩ n a nɩbɛ bɛl yir
ɩ̃ na maalɛ a, bɛlɛ nɩ a bɛ bibiir.
24Bɛ kʋ̃ mɩ́ bʋɔlɩ sɛr ɛ, ɩ̃ɩ sɔw bɛ.
Bɛ kʋ̃ mɩ́ ƴɛ̀r baar ɛ, ɩ̃ɩ wõ a bɛ ƴɛ̀rʋ.
25A wɛ-baa nɩ a péle na lãw na 'wɔbr a mʋ̃ɔ.
A gbẽw na 'wɔbr'ɩ mʋ̃ɔ mɛ̃ a náab a.
A waab na dɩrɛ nɩ tanɛ.
Yel-faa za nɩ yel-sãwna za
bɛ lɛb maalɛ a ɩ̃ tãw-sõw za zu ɛ.
A mãa, a Sore, mãa n'ʋ yere.
Currently Selected:
Ɩzayi 65: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
