Ɩzayi 59
59
A bɩwra na be nyɩɩm nɩ a Naaŋmɩn cara pʋɔ a
1A Sore nũu bɛ ɩ ŋmãa zuo a nyɩ faafʋ ƴãw ɛ,
a ʋ tobe bɛ wõw zuo a wob ƴãw ɛ.
2Ɛcɛ a nyɩ sãwna n'a ƴãw bɩwra
nyɩɩm nɩ a nyɩ Naaŋmɩn cara pʋɔ.
A nyɩ yel-bebe n'a so
ʋ lɩɛbɩ a ʋ niwn bɛr zi-yoru,
k'ʋʋ ta cãà nyɛrɛ nyɩ ɛ́ wone a nyɩ ƴɛ̀rʋ ɛ.
3Bʋ̃ʋ n'ʋ vɛ̃, a nyɩ nuru ɩ n zɩ̃ɩ,
ɛ́ ɩ-faar dɛw a nyɩ nobie.
A nyɩ nɛ́ɛ ŋmarɛ nɩ ziri,
a nyɩ zɛlɛ ɩ n zɛl-ɓɛrɩ.
4A ƴɛ̀rʋ-dɩb zie a,
nyɩ mɩ́ yel'ɩ sãwna na bɛ ɩ sɩza a.
Nyɩ bɛ ƴɛ̀rɛ kpɩɛr a nɩbɛ tuur'ɩ yel-mɩŋa ɩ.
Zi-vuo n'a nyɩ mɩ́ ƴãw a nyɩ tɩɛrʋ,
nyɩ mɩ́ yere nɩ yele na ɩ ziri a,
a yel-faa pʋɔ n'ʋ nyɩ mɩ́ tɛr
wa dɔw a kpɩɛrʋ.
5-6A nyɩ tõ-toni ɩ na mɛ̃ dɔpan jɛlɛ a:
nɩr wa 'wɔbr a a, ʋ kpiir a.
Bɛlɛ wa ŋmɛrɛ a jɛl kãw wa báarɛ a,
dɔpan mɩ́ yi na.
A pɛnɛ nyɩ na wóbr a,
ɩ na mɛ̃ mʋ̃dɛr cowr a.
A bɛ sɩɛr bʋ̃-suuri ɛ,
bɛ bɛ vaarɛ a ɩ.
Kpɩɛrʋ tɛwr'a a waar'ɩ.
Po-to-fãw tome tɛwr'a a nyɩ nuru tone.
7A nyɩ gbɛ́ɛ zɔrɛ na wɩɛr a faa maalʋ,
nyɩ zɔrɛ na páwr a nɩr na bɛ sãw a kʋb ƴãw.
Faa maalʋ tɩɛrʋ tɛwr'a nyɩ tɩɛrɛ.
Zie nɛ za nyɩ na tɔlɛ a,
a mɩ́ ɩ n po-to-fãw-ɩb nɩ yel-sãwnɩ.
8Nyɩ bɛ bãw a ƴã-ɓaarʋ sɔ́r ɛ,
ɛ́ nɩr bɛ nyɛrɛ a yel na-tu-sɔr
a be nyɩ na tɔlɛ a ɩ.
Nyɩ mɩ́ ɩ n a nyɩ sɛ́ɛ a gɔ̃w gɔ̃w,
ɛ́ sob nɛ na tuur a a
kʋ̃ bãw a ƴã-ɓaarʋ towtow ɛ.
A Naaŋmɩn nɩ-bʋʋrɛ sàw nɩ a bɛ sãwna
9Alɛ n'a so a Naaŋmɩn bɛ ɩrɛ bom a tɩ ƴãw ɛ,
ɛ́ bɛ wule a tɩ mɩnʋ ɛ.
Tɩ tɩ tɩɛrɛ nɩ a cãà, ɛ́ a wa ɩ a lige.
Tɩ tɩ gùre nɩ a zi-cãà, ɛ́ wa cere lige pʋɔ.
10Tɩ bɔblɛ na mɛ̃ zɔn na lanɛ dacin a,
tɩ bɔblɛ na bɔbr a sɔ́r,
mɛ̃ nɩbɛ na bɛ tɛr mimie a.
Tɩ ŋmɩɛr'ɩ gbɛ́ɛ mʋ̃tɔ̃w-gbawl,
mɛ̃ zi-sɔb-paala a.
Tɩ kpɛmɛ nɩ vla, ɛ́ ɩ mɛ̃ kũuni a.
11Tɩ za, tɩ 'hʋ̃ʋnɛ na mɛ̃ wɛ-baar a,
tɩ kone nɩ kʋralɛ mɛ̃ naŋmamɛ a.
Tɩ tɩ tɩɛrɛ na k'aa Naaŋmɩn na ɩ n ɩb kãw,
ɛcɛ zawla!
Tɩ tɩ gùre nɩ a faafʋ,
ɛcɛ ʋ zãá nɩ tɩ na!
12Sɩza n'a, Sore e,
tɩ zawr'ɩ a fʋ nʋɔr gb'aa yaga.
A tɩ yel-bebe wule na tɩ na sãw a.
Tɩ tɛr'ɩ a tɩ gaarʋ ɩ-ɩrɩ tɩɛrʋ kʋralɛ,
tɩ bãw nɩ a tɩ sãwna za vla.
13Sore e, tɩ zawr'ɩ a fʋ nʋɔr, tɩ mɩl fʋ na,
tɩ zawr'ɩ a fʋ tub, a fʋ̃ʋ tɩ Naaŋmɩn.
A tɩ taabɛ dɔwrʋ nɩ gaarʋ tɛwr
ƴɛ̀rʋ n'a tɩ tɛr.
A tɩ socie nɩ a tɩ zuru paal'ɩ ziri tɛwr.
14Alɛ n'a so a ɩb na ɩrɛ tu sɔ́r a síwre,
a mɩnʋ zãá nɩ tɩ na.
A nɩ-yaga tuor-taa zie a,
a yel-mɩŋa ŋmɛ n gbɛ́r lo,
ɛ́ a yel-mɩnʋ bɛ cãà tarɛ a be ɩ.
15A yel-mɩŋa bɔr'a,
ɛ́ sob nɛ na zawrɛ a faa maalʋ a,
mɩ́ ɩ na bɛ fa a ʋ bome za.
A Sore na ɩ n ɩb kãw
A Sore nyɛ̃ nɩ à á ŋá za.
Ʋ nyɛ̃ na k'aa ɩrɛ a lɛ-na-tu-sɔr-a
na bɛ ka be a, ʋ ɩ n yel-faa.
16Ʋ nyɛ̃ na kɛ́ nɩr za
bɛ tɩ damnɛ damnʋ ɛ,
a tɩ ùr ʋ na, nɩr za na bɛ tɩ ɩrɛ bom a.
Lɛ n'a ʋ tɩ yel k'aa ʋl mɩŋa na ɩ n ɩb kãw,
ɛ́ a ʋ mɩnʋ n'a tɩ kʋ̀ ʋ a fãw a al ƴãw.
17Ʋ su n a mɩnʋ mɛ̃ zɛbr-nyãa-kpale a,
ʋ vɔbl'ɩ a faafʋ kpawɔ-kpow a ʋ zũú.
Ʋ su n a san-yaafʋ kparʋ.
A tʋlʋ ʋ na tʋlɛ a zɛbr ƴãw a
n'ɩ a kpar-kpɛ̃ɛ ʋ na vaarɩ pàw ʋ tʋɔra a.
18Ʋ na ya n a nɩbɛ man nɩ a bɛ ɩb.
A ʋ suur a, a ʋ dɔ̃ dem ƴãw n'a,
a dɔwrɩ yáa a san a,
a nɩbɛ na zɛbr'ɩ ʋ a ƴãw n'a,
tɩ lãwnɩ a tẽ-zãánɩ dem.
19Lɛ n'a a mʋ̃tɔ̃w puru zie tɩ tɔ a kpɛb zie,
a nɩbɛ za na zɔrɛ a Sore,
bɛ za na zɔrɛ a ʋ yúor-vɩɛlʋ-danʋ.
Bʋ̃ʋ n'ʋ vɛ̃, a Sore na wa na mɛ̃ man-fɩɩra kʋ̃ɔ
saa-sɛsɛb na fure darɛ a.
20A Sore na wa na
k'ʋʋ wa ya de a Zerizalɛm
nɩ a Ɩsɩrayɛl nɩbɛ bɛl
na bɛr a bɛ nɩ-gaarɩ ɩb a.
A Sore n'ʋ yere.
21A Sore yere na ƴãw pʋɔ: «Ɛ́ a mãa a, nyɛ̃ a wõ-taa ɩ̃ na maalɛ nɩ a nɩbɛ bɛ ŋa a: A ɩ̃ vʋʋrʋ be n a nyɩ zu, ɩ̃ɩ ƴãw nɩ a ɩ̃ ƴɛ̀rʋ a nyɩ nɛ̃ɛ́. Nyɩmɛ so a, a nyɩ bibiir so a, nɩ a bɛ bibiir mɩ̀ bibiir, a ƴɛrɛŋa nɩ kʋralɛ. Ɩ̃ bɛ lɛb dier a a nyɩ zie towtow ɛ. A mãa, a Sore, mãa n'ʋ yere.»
Currently Selected:
Ɩzayi 59: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
