Ɩzayi 58
58
A mʋta-tuo a Naaŋmɩn na nɔnɛ a
1A Sore yere na:
Cɩɩrɛ kpɛ̃w kpɛ̃w za, taa vɛnɛ ɩ.
Ɩ a fʋ kɔkɔr ʋ yire
mɛ̃ wɩ́ɛ na pɛblɛ a.
Yel a ɩ̃ nɩbɛ sãwna kʋ̀ bɛ,
yel a Zakɔb bʋʋrɛ yel-bebe kʋ̀ bɛ.
2Bibir za, bɛ mɩ́ bɔbr mɛ̃ na,
bɛ mɩ́ bɔbr'a kɛ́ bɛ bãw
a ʋlɩ bom nɛ ɩ̃ na gùre a bɛ zie a,
mɛ̃ nɩ-bʋʋrɛ na tuur a mɩnʋ
ɛ́ bɛ zawrɩ a lɛ a bɛ Naaŋmɩn
na dɩ a ƴɛ̀rʋ bin a bɛr a.
Bɛ bɔbr'ɩ ƴɛ̀rʋ na dɩ tu n mɩnʋ a, a ɩ̃ zie,
bɛ bɔbr'a k'ɩ̃ɩ pɩɛlɩ bɛ.
3Ɛcɛ bɛ yere nɩ a ɩ̃ zie:
«Bʋnʋ ƴãw n'a tɩ na mɩ́ tɛr a mʋta-tuo
fʋ̃ʋ bɛ mɩ́ wa nyɛ̃ a a?
Tɩ na mɩ́ dɩ tuo síwre tɩ tʋɔra
fʋ̃ʋ bɛ mɩ́ wa bãwnɩ a a?»
Lɛ n'a ɩ̃ sɔwr à ŋá:
A nyɩ mʋta-tuo tɛrʋ bibir a,
nyɩ mɩ́ kaarɛ nɩ a nyɩ mɩŋa yele zie,
ɛ́ dɔwrɛ a nyɩ tõ-tõ-biir.
4Nyɩ mɩ́ tɛr'ɩ a mʋta-tuo ɛ́ zɛbr taa,
ɛ́ mɩ́ gùr nũu ŋmɩɛr'ɩ a nyɩ taabɛ.
À à ŋá bɛ n'a nyɩ na mɩ́ tɛr a mʋta-tuo
bɔbr'ɩ k'ɩ̃ɩ wõ a nyɩ puoru a saa-zu ka ɩ.
5À ŋá n'a a mʋta-tuo ɩ̃ na nɔnɛ a ŋmɛ̃ ɛ?
A bibir nyɩ na síwre nyɩ tʋɔra a?
À gʋɔ a zu mɛ̃ bàa-kɛkɛr a,
à su a vʋɔra kparʋ a,
à mɩ́ gã a uuru pʋɔ a,
à á ŋá n'a nyɩ bʋɔlɛ mʋta-tuo o?
bibir na pɛlɩ a ɩ̃ pʋɔ a a?
6A mʋta-tuo ɩ̃ na nɔnɛ a n'ɩ ŋa:
bɛ mɩ́ ír a bamɛ bɛr
bɛ na ƴãw a nɩbɛ ɛ́ a bɛ tu sɔ́r a,
bɛ mɩ́ ír a fɛrʋ na be a nɩbɛ zu a bɛr,
bɛ mɩ́ ɩ a nɩbɛ bɛ na dɔwrɛ a
bɛ lɛb so bɛ tʋɔra,
bɛ mɩ́ ír bom za na ɩ
bɛ ɩ gbãgbaar a bɛr.
7Ʋlɛ n'ɩ kɛ́ fʋ mɩ́ ɩ a fʋ bʋ̃-dɩra kʋ̀ a kɔ̃ sob,
kɛ́ fʋ mɩ́ tɛr a nan dem
na bɛ tɛr kpɛb zie a, kpɛ n a fʋ yir,
kɛ́ fʋ mɩ́ kʋ̀ bʋ̃-suuri
a bɛlɩ dem na bɛ tɛr a a,
ɛ́ taa lɩɛbɛ kpaar cɔwr a fʋ yɛb ɛ.
8Lɛ n'a a fʋ cãà na pur caalɩ
mɛ̃ a zi-wɛl-paala a,
ɛ́ a fʋ natɩr ɓãa fɔ̃w.
A fʋ mɩnʋ na de fʋ nɩ niwn,
ɛ́ a Sore yúor-vɩɛlʋ-danʋ pàw a fʋ pùor.
9Fʋ̃ʋ mɩ́ wa bʋɔlɛ a lɛn daar a,
a Sore na mɩ́ sàw na.
Fʋ̃ʋ mɩ́ wa kõ bʋɔlɩ a,
ʋ na mɩ́ yel'a: «Mãa n'ɩ ŋan!»
Fʋ̃ʋ wa ír a fɛrʋ na fɛrɛ a nɩbɛ a bɛr a fʋ tẽw pʋɔ a,
fʋ̃ʋ wa bɛr a nobir vɛlʋ nɩ a po-to-ƴɛ̀rʋ a,
10fʋ̃ʋ mɩ́ wa ɩ a fʋ bʋ̃-dɩra kʋ̀ a kɔ̃ sob
ɛ́ ƴãw a bãbàal ʋ dɩ tɩw a,
a fʋ cãà na mɩ́ caal'ɩ a lige pʋɔ,
ɛ́ a fʋ lige na mɩ́ ɩ na mɛ̃ mʋ̃tɔ̃-tuo a.
11A Sore na wule fʋ nɩ a sɔ́r kʋralɛ.
A wɛja-kpalɛ pʋɔ tɛɛ za a,
ʋ na kʋ̀ b'ɩ bʋ̃-dɩrɩ ɛ́ ɩ fʋ lɛb tɛr fãw.
Fʋ na ɩ na mɛ̃ zaadɛ̃ na bùr ʋ za a,
mɛ̃ bul-nʋɔr a kʋ̃ɔ na bɛ sɩrɛ a.
12Lɛ n'a fʋ na lɛb libri a debo-kore,
fʋ na lɛb mɛ a dacĩ-pɛ́ɛ
bɛ na bɛr koro za a zu.
Bɛ na bʋɔlɛ fʋ nɩ
«Nɩ-bʋʋrɛ na fɔbr dacine vɛɛ
ɛ́ maalɛ a tẽ-kpɛ̃ɛ sɛ́ɛ ƴãwn a».
A pɩ̃ɛnʋ-bibir maal-tɛrʋ
13A Sore yere na:
«Fʋ̃ʋ wa bɛr a fʋ zi-ceni a pɩ̃ɛnʋ-bibir a,
fʋ̃ʋ wa bɛr a fʋ yele zie kaafʋ
a ɩ̃ bibi-sõw bibir a,
fʋ̃ʋ wa bʋɔlɛ a pɩ̃ɛnʋ-bibir “Nʋ̃ɔ̀”,
a Sore bibir#58:13 Sore bibir: Nyɛ̃ 2.11-12. “Bibi-ƴãwna”,
ɛ́ sɩrɩ ƴãwnɛ ʋ,
mɩ́ bɛr a zi-ceni, a yele zie kaafʋ,
a nɔkpɛn na bɛ tɛr baarʋ a,
14a lɛn daar a, mãa zie n'a
fʋ na mɩ́ nyɛ̃ a fʋ nʋ̃ɔ̀.
Ɩ̃ na tɛr fʋ na mɛ̃ nɩr na zɛb tʋ̃ɔ́ a
do n a tẽw tan zu.
Ɩ̃ na ɩ na fʋ dɩ a tẽw
a fʋ sãàkʋm-kʋra Zakɔb na páw a bome.»
À ŋá n'a a Sore yel k'ʋʋ na ɩ na.
Currently Selected:
Ɩzayi 58: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
