Ɩzayi 50
50
A Sore sɔwr'ɩ a ʋ nɩbɛ na zɛbr a
1À ŋá n'a a Sore yere:
«A zawr-bɛrʋ sɛbɛ wa ɩ̃ na maalɩ
zawr'ɩ a nyɩ mã Zerizalɛm bɛr a?
Bɩɩ, a bɛlɩ dem samɛ ɩ̃ na tɛr a,
a bɛ buor sob zie n'a ɩ̃ nyɔw nyɩ kʋɔrɩ?
Bɛlɛ wa kʋɔrɩ nyɩ a,
a nyɩ sãwna ƴãw n'a.
Bɛlɛ wa zawrɩ a nyɩ mã bɛr a,
a nyɩ yel-bebe ƴãw n'a.
2Bʋ̃ʋ n'ʋ so ɩ̃ wa bɛ nyɛ̃ nɩr za?
Bʋ̃ʋ n'ʋ so ɩ̃ bʋɔlɩ nɩr bɛ sɔw?
A ɩ̃ kpãkpãw nɔ̃w ɩ n ŋmãa zuo
a nyɩ faafʋ ƴãw bɩɩ?
Ɩ̃ nɔ̃w bɛ tɛr fãw na ɩ nyɩ so nyɩ tʋɔra bɩɩ?
Ɩ̃ mɩ́ tanɩ nɩ tanʋ tɛwr ɩ a kʋ̃ɔ-kpɛ̃ɛ ʋ ko,
ɛ́ ɩ a mamɛ a lɩɛbɩ wɛja-kpalɩ.
Lɛ n'a a kʋ̃ɔ na bɛ mɩ́ ka be a,
a zʋ́mɛ́ mɩ́ kpi kʋ̃ɔ-nyúur pʋ̃ɔ́.
3Lɛb waar, ɩ̃ mɩ́ pàw nɩ a salom nɩ bʋ̃-sɛbla,
ɛ́ su vʋɔra kparʋ pàw ʋ.»
A Sore tõ-tõ-bie (A yielu ata sob)
4A Sore Naaŋmɩn wul mɛ̃ nɩ
a ʋlɩ bom nɛ a na fɛr k'ɩ̃ɩ yel,
tʋ̃ɔ́ mɩ́ tɛr mɔwlʋ ƴɛ̀r-bie
a sob nɛ na bàl a zie a.
Biɓaara za, ʋ mɩ́ sɩ̃w mɛ̃ na,
k'ɩ̃ɩ tʋ̃ɔ́ bɛrɛ wone mɛ̃ a po-tuurbɛ a.
5A Sore Naaŋmɩn yuo mɛ̃ nɩ a tobe,
ɛ́ mãa a, ɩ̃ bɛ nàw kpaar ɛ,
ɩ̃ bɛ tɩ̃wnɩ yi pùor ɛ.
6Ɩ̃ lɩɛb'ɩ a ɩ̃ zikur kʋ̀
a bɛlɩ dem na pɔbr mɛ̃ a,
ɛ́ lɩɛbɩ a kɔrɛ cɔw a bɛlɩ dem
na tawr a ɩ̃ tɩɛm kɔblʋ vɔnɛ a.
Ɩ̃ bɛ pàw a ɩ̃ niwn tɛr
a kaar-bie nɩ a zʋmɛ ƴãw ɛ.
7A Sore Naaŋmɩn sõwne mɛ̃ na,
alɛ so a bɛ zʋmɛ bɛ 'wɔbr mɛ̃ ɩ,
alɛ so ɩ̃ nyar a ɩ̃ niwn ʋ kpɛmɛ mɛ̃ kʋsɩɛr a,
ɩ̃ɩ bãwnɩ a na ɩ̃ na kʋ̃ nyɛ̃ vĩ a.
8A Sore pɩɛlɩ mɛ̃ na, ʋ na kpɛ m'a.
Ãa n'ʋ na sàw tɛr'ɩ mɛ̃ ƴɛ̀rʋ?
Ʋ ɩ tɩ lãw cen a ƴɛ̀rʋ-dɩb zie!
Ãa n'ʋ na ɩ a ɩ̃ dɔ̃ sob a ƴɛ̀rʋ zie?
Ʋ wa àr a ɩ̃ niŋé!
9A Sore Naaŋmɩn n'ʋ sõwne mɛ̃,
ãa n'ʋ na tʋ̃ɔ́ yel k'ɩ̃ɩ ɩ n sãwna sob?
A ɩ̃ dɔ̃ dem na zaw nɩ bɛ za
mɛ̃ kparʋ mɔwr na mɔw a.
A Sore tõ-tõ-bie a na fɛr kɛ́ bɛ bɛrɛ wone a
10Ãa n'ʋ zɔrɛ a Sore a nyɩ pʋɔ?
A fɛr'a k'aa sob bɛrɛ wone a Sore tõ-tõ-bie.
Ãa n'ʋ cere a lige pʋɔ
ɛ́ bɛ nyɛrɛ cãà kãw za?
Ʋ ƴãw a ʋ tɩɛrʋ a Sore ƴãw,
ʋ de ʋ k'ʋ ɩ a ʋ tɩ̀ɛrɛ.
11Ɛcɛ nyɩɩm za na gbɔwr vũu a,
nyɩɩm na ƴãw vũu-zɛlɛ pime viiri koli nyɩ tʋɔra a,
nyɩ cen a nyɩ vũu vũu-zɛlɛ pʋɔ,
a vũu-zɛlɛ pime nyɩ na gbɔw a sɔwlɩsɔw.
A Sore n'ʋ na ɩ nyɩ kpi kpɩɛrʋ kpɛ̃ɛ pʋɔ.
Currently Selected:
Ɩzayi 50: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
