Ɩzayi 51
51
Faafʋ na kʋ̃ baar'a
1A Sore yere na:
«Nyɩ bɛrɛ wone a ɩ̃ ƴɛ̀rʋ,
nyɩɩm na bɔbr a faafʋ a,
nyɩɩm na bɔbr kɛ́ nyɩ bãw mɛ̃ a.
Nyɩ bɛl nyɛ̃ a pìir ʋl pʋɔ bɛ na cɩ̀ nyɩ ír a,
a kʋsɛ-bɔw ʋl pʋɔ bɛ na tuw nyɩ ír a.
2Nyɩ bɛl nyɛ̃ a nyɩ sãà Abraham a,
nɩ a Saara na dɔw nyɩ a.
A Abraham bɛ tɩ tɛr bie
a lɛn daar ɩ̃ na tɩ bʋɔl'ʋ a ɩ.
Ɛcɛ ɩ̃ maal'ʋ na,
ɛ́ ɩ k'ʋ ɩ nɩ-bʋʋr-yaga sãà.»
3A Sore zɔrɛ nɩ a Sɩyɔ̃ nɩbaalʋ,
ʋ zɔrɛ nɩ a ʋ deboru nɩbaalʋ.
Ʋ na ɩ n a zie ŋa bɛ na bɛ cãà kpɩɛr a,
ʋ lɩɛbɩ zi-vla vla.
Ʋ na ɩ n a zi-kõw ŋa ʋ lɩɛbɩ Edɛn zaadɛ̃#51:3 Nyɛ̃ Yzt 2.8-9..
Cɩlʋ nɩ nʋ̃ɔ̀ cɛlsɩ n'a na be a be,
lãwnɩ danʋ yielu nɩ bʋ̃-ŋmɩɛrɩ ŋmɛb.
4A Sore yere na:
«Nyɩɩm, ɩ̃ nɩbɛ ɛ, nyɩ bɛrɛ wone a ɩ̃ ƴɛ̀rʋ,
nyɩɩm, ɩ̃ tẽw dem i, nyɩ cɛlɛ be!
Bʋ̃ʋ n'ʋ vɛ̃, mãa zie n'a a wulu na yi,
ɛ́ a lɛ ɩ̃ na dɩ a ƴɛ̀rʋ bin a n'a
na ɩ a cãà na caalɛ a nɩ-bʋʋrɛ a.
5A mɩnʋ ɩ̃ na tɩrɛ a pɩɛl'a, a faafʋ waar'a.
Ɩ̃ na dɩ n nɩ a nɩ-bʋʋrɛ ƴɛ̀rʋ nɩ kpɛnʋ.
A nɩ-bʋʋrɛ na zãá a na ƴãw nɩ a bɛ tɩɛrʋ a ɩ̃ ƴãw,
bɛ na gùre nɩ a ɩ̃ nɩ-kpɛ̃ɛnʋ dɩb.
6Nyɩ úori a salom nyɛlɛ,
al pùorí nyɩ jɩ́r a tẽw a pile ka:
a salom na bɔr a mɛ̃ zʋ̀ʋ́r a,
a tẽw na zaw na mɛ̃ kparʋ a,
ɛ́ a ʋ nɩbɛ kpiir mɛ̃ nazʋʋr a.
Ɛcɛ a ɩ̃ faafʋ na be n be kʋralɛ,
ɛ́ a mɩnʋ ɩ̃ na waar'ɩ a kʋ̃ tɛr baarʋ daar ɛ.
7Nyɩ bɛrɛ wone a ɩ̃ ƴɛ̀rʋ,
nyɩɩm na bãw a yel na tu a mɩnʋ a,
nyɩɩm na tɛr a ɩ̃ wulu a nyɩ socie pʋɔ a:
nyɩ ta zɔrɛ a nɩsaalbɛ ɩ-lab ɛ,
a bɛ zʋmɛ, a taa wa tʋ̃ɔ́nɛ nyɩ ɛ.
8Bʋ̃ʋ n'ʋ vɛ̃, a zãzule na dɩ bɛ na
mɛ̃ mɔwr na mɔw kparʋ a,
ɛ́ a gùme dɩ bɛ mɛ̃ píir kɔblʋ pɛn a.
Ɛcɛ a mɩnʋ ɩ̃ na waar'ɩ a kʋ̃ tɛr baarʋ ɛ,
ɛ́ a ɩ̃ faafʋ be be yome yome za.»
Sore e, ìr!
9Ìr, Sore e, ìr! Wul a fʋ kpɛnʋ!
Ìr mɛ̃ a koro za a,
mɛ̃ a koro za dem daar a.
Fʋ̃ʋ bɛ n'ʋ tɩ cɛ̀ a Arahab ɓar ɛ?
Fʋ̃ʋ bɛ n'ʋ tɩ cɔ̀r a kʋ̃ɔ-kpɛ̃ɛ wa-bɩɛ#51:9 A Babɩlɔn tẽw dem suolu na manɛ a tẽw íru a pʋɔ n'a a dʋ̃-bɩɛ Arahab bɩɩ a kʋ̃ɔ-kpɛ̃ɛ wa-bɩɛ tɩ be. Ʋ tɩ kpɩɛr'ɩ a kʋ̃ɔ-kpɛ̃ɛ na ɩ a faalʋ kpɛnʋ bãwfʋ a pʋɔ. A suolu pʋɔ a, a ŋmɩn ʋl na ír a tẽw a tɩ tʋ̃ɔ́ nɩ a Arahab nɩ a faalʋ kpɛnʋ za. A sɛbrʋ ŋa pʋɔ a, a naaŋmɩn-ƴɛ̀r-manɛ yere na k'aa Sore, a Ɩsɩrayɛl Naaŋmɩn, n'ʋ zɛb tʋ̃ɔ́ a Arahab. col ɛ?
10Fʋ̃ʋ mɩ̀ bɛ n'ʋ tɩ ɩ a kʋ̃ɔ-kpɛ̃ɛ,
a kʋ̃ɔ-kpɛ̃ɛ-zulu zulu ʋ kò ɩ?
Fʋ̃ʋ cãà bɛ n'ʋ tɩ puo sɔ́r a kʋ̃ɔ-kpɛ̃ɛ pɛrɩ́,
k'aa fʋ nɩbɛ fʋ na ya de a tɔl ɛ?
11A nɩbɛ a Sore na na ɩ bɛ lɛb so bɛ tʋɔra a na lɛb'a wa.
Bɛ na cáarɛ na wa kpɛ n a Sɩyɔ̃ tẽw pʋɔ.
Nʋ̃ɔ̀ na bɛ tɛr baarʋ a na caal'ɩ a bɛ niŋe,
cɩlʋ nɩ nʋ̃ɔ̀ cɛlsɩ na paalɩ bɛ na,
ɛ́ kpɩɛrʋ nɩ kon bɔr.
Ɩ̃ nɩbɛ ɛ, bʋ̃ʋ dɛ̃bɩ̃ɛ n'a tɛr nyɩ?
12A Sore yere na:
«Mãa n'ʋ mɔwlɛ nyɩ, ʋ̃ʋ, mãa n'ʋ.
Ɩ̃ nɩbɛ ɛ, bʋ̃ʋ n'ʋ so nyɩ zɔrɛ
a nɩsaal na ɩ bʋ̃-kpiira a,
a nɩsaal na ɩ mɛ̃ mʋ̃ɔ a?
13Nyɩ yiir'ɩ a Sore bɛr, ʋl na ír nyɩ a,
ʋl na dɔl a salom ɛ́ bin a tẽw pɛr a.
Bibie za, nyɩ mɩ́ màwr'ɩ
a sob nɛ na dɔwrɛ nyɩ a niŋé,
a lɛ a ʋ su-yãyaar na mɩ́ ìr,
mɛ̃ ʋ cɔbr'a baarɩ na sãw nyɩ bɛr a.
Ɛcɛ ƴɛrɛŋa a, nyɩnɛ n'a a ʋ su-yãyaar be?
14A gaso nɩr a kpɩɛrʋ na dĩ a
kʋ̃ yaa kɛ́ lɛb so ʋ tʋɔra ɩ.
Ʋ bɛ kpiir a ʋ gaso pʋɔ ɩ,
ɛ́ kʋ̃ lɛb bɔ bʋ̃-dɩra gù ɛ.
15Mãa n'ɩ a Sore, a nyɩ Naaŋmɩn.
Ɩ̃ mɩ́ dam'ɩ a kʋ̃ɔ-kpɛ̃ɛ,
ɩ a ʋ kʋ̃ɔ-mie ɩrɛ gɔmɛ.
A ɩ̃ yúor'ɩ: “a Sore, a kpɛnʋ-za-sob”.
16Ɩ̃ lɛb'a dɔlɛ a salom,
ɩ̃ lɛb'a bine a tẽw pɛr ɛ́ yere a Sɩyɔ̃ tẽw:
“Fʋ̃ʋ n'ɩ a ɩ̃ nɩ-bʋʋrɛ,
ɩ̃ ƴãwnɛ nɩ a ɩ̃ ƴɛ̀rʋ a fʋ nʋɔrɩ́,
ɩ̃ piwr fʋ na tɛrɛ nɩ a ɩ̃ nũu ɓaarʋ.”»
Lɛb ƴãw fãw, Zerizalɛm i
17Ìr, Zerizalɛm i, ìr àr saaƴẽwn!
A Sore ƴãw na fʋ nyũ a ʋ suur koli-nyúura.
Fʋ fuori ʋ na, ʋ ƴãw fʋ nĩw-viir.
18A fʋ bibiir za fʋ na dɔw a pʋɔ a,
kãw za bɛ wul fʋ a sɔ́r ɛ.
A bibiir za fʋ na guoli a pʋɔ a,
kãw za bɛ tɩɛ fʋ ɛ.
19Yele á ŋá wa n a fʋ zu ayiri yiri:
po-to-fãw-ɩb nɩ zie na sãw a, kɔ̃ nɩ zɛbr.
Ɛcɛ ãa n'ʋ na kone fʋ?
Ãa n'ʋ na mɔwlɩ fʋ?
20A fʋ bibiir gã nɩ tẽw,
a sɛ́ɛ gõgone za pʋɔ.
Bɛ gã nɩ a be, bɛ tɛr fãw ɛ,
mɛ̃ muli bɛrɩ na nyɔw a,
a Sore su-yãyaar ìr a bɛ ƴãw,
nɩ a yelu a fʋ Naaŋmɩn na yere bɛ a.
21A na ɩ à ŋá a, bɛrɛ wone,
fʋ̃ʋ Zerizalɛm na ɩrɛ nɩbaalʋ a,
fʋ̃ʋ na kuoli ɛ́ a bɛ ɩ divɛ̃ n'a a:
22À ŋá n'a a Sore,
a fʋ Zu-sob, a fʋ Naaŋmɩn, yere,
ʋl na ƴɛ̀rɛ kpɩɛr a fʋ nɩbɛ a:
«Ɩ̃ na lɛb'a de
a nĩw-viir koli-nyúura a fʋ nuru pʋɔ,
a ɩ̃ suur koli-nyúura.
Fʋ kʋ̃ lɛb nyũ ʋ towtow ɛ.
23Ɩ̃ na ƴãw ʋ nɩ a bɛlɩ dem
na dɔwrɛ fʋ a nuru pʋɔ,
bɛl na tɩ yere a fʋ zie:
“Gã vɔblɩ muru tɩ tɔl a fʋ zu” a!
Lɛ n'a fʋ tɩ ɩ a fʋ zikur ʋ lɩɛbɩ tẽsɔw,
ʋ lɩɛbɩ sɔ́r a sɔr-tɔlbɛ ƴãw.»
Currently Selected:
Ɩzayi 51: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
